TRADUCTION BILBE EN KINYANGA
Matthew 16
eBafarisayo n'eBasandukayo bahema bishisharo kuri Yesu
(Mar 8.11-13; Ruk 12.54-56)
eBafarisayo n'eBasandukayo beyere Yesu kamwereka. Bamukonga mbu waronjei bo bishisharo mbi byashea mbu emaa ae atuka mu mbingu.
Ina wasako bo mbu: [«Murioroba r'ebutu, kuba ekwiyo kwacha, banu mwebanga mbu: ‹Mukoma busecha shu!› N'emukoma-koma, banu mwebanga mbu: ‹Erutundo rwasiro, embura iseke runotu!›
«Banu mosi ebiteerere by'ekwiyo, ina mufundwa isiba ebiteerere by'ekiranga kino.] Ebea ba runotu, ibo bea bema na ntí basubaha Ongo. Basondange kiteerere, ina batasheiwiyo kiteerere kimpe kuba nti ch'emutahwa Yona ho.» Kuruma nampo Yesu wasia bo na kwiire.
Echachu ch'eBafarisayo n'eBasandukayo
(Mar 8.14-21)
Ebanafunsi ba Yesu bakianga bamasoka mu umpe mwiri w'enyansa, babesenga bamobya iria emikati. Yesu were bo mbu: «Mwenda mukohya bushwa n'echachu ch'eBafarisayo n'eBasandukayo.» Ebanafunsi babucha kwiebesha mbu: «Wameba mbo bushwa mbu ntítwakuria emikati.»
Ebyabesenga byebange bo, Yesu wasiba byo. Bushwa nancho, washisha bo mbu: «Banu mwiebeshange mbu banu musira mikati bushwa nki? Banu ho bea b'isimira rikeke! Mbeni nti nensi muteerera kikai? Nti musubukia mbu bwakukianga emikati isanu yasukucha bea erefu isanu n'emitundu y'ebifundiro nji yakurianga banu? Mbeni nti musubukia tu ebea bampe erefu sinye, imbu bwasukutayo bo emikati irinda, na mitundu inga y'ebifundiro nji yakurianga banu? Bushwanki mutungateerera mbu ebinwa byebange ani bitangeba bushwa n'emikati? Nibwirengi mbu mwendi mwiranga n'echachu y'eBafarisayo n'eBasandukayo!»
Nampo ke ebanafunsi bateerera mbu kai Yesu watangeba rero nabo bushwa n'echachu nji yendanga mu mikati. Ina webange rero mbu benda bakohyange bushwa n'emahano eBafarisayo n'eBasandukayo.
Petero weba mbu Yesu nge Kirisitu
(Mar 8.27-30; Ruk 9.18-21)
Kuruma nampo, Yesu wenda n'e banafunsi bae mu sankaro-nkaro sa ku Kaisaria Firipo. Washisha bo mbu: «Mbeni ebea bebange mbu ani eMwana w'eMwea ng'inye?» Nabo bamusako mbu: «Bea bima bebange mbu ǒngo nge Yohana Murubiki, na bampe mbu ǒngo nge Eria, na bampe mbu ǒngo nge Yeremia, abe uma mu bampe batahwa.»
Yesu washisha bo mbu: «Mbeni na banu mwebange mbu ani ng'inye?»
Simoni Petero wasako mbu: «Ǒngo nge Kirisitu, Musike wa Ongo ingu uri ho!»
Nampo, Yesu wamwire mbu: «eSimoni, musike wa Yona, umakasanirwa! Bushwa mbu ekinwa ncho, kusira mwea ngu wamakushea cho, ina Tita wani ngu uri mu mbingu. Nani nikwirengi mbu ǒngo nge Petero, ngerieba mbu ikoi. Na hiyo n'erikoi ndo nge hasumba ani eKanisa kani, n'ebukwakare bw'ekwerunga butahundusiyo ko. Nasekuninka esafunguo s'eBwami bwa mu mbingu. Ebiti mbi bisenda bitinange ǒngo mu chuo, bisenda bitinwange hotu mu mbingu. N'ebiti mbi byendi birisiange ǒngo mu chuo, bisenda birisiwange hotu mu mbingu.»
Kuruma nampo, Yesu were ebanafunsi bae mbu kiro bere mwea uti-uti mbu iwe nge Kirisitu.
Yesu watura emwasi w'erikwa n'erifuka rae
(Mar 8.31; 9.1; Ruk 9.22-27)
Itukire ematu ngo, Yesu wabucha ishea ebanafunsi bae mbu iwe wahwa ienda ku Yerusaremu. Nanko, ebakungu n'ebakwakare b'ebakuhani hima n'ebahani b'eMyomba basemunubya nguru. Waseshurwa, na mu matu ashatu, wasefuka.
Petero wabikira Yesu kwahehe n'ibucha imuhakanya mbu: «eNyere Kuritu, Ongo wakwechei mbyo kore! Ebinwa mbyo, kiro byakwiyere karankuso!» Ina Yesu wabunduka n'imwire mbu: «eMushumbu! Tuka kwihi nani! Ǒngo mwereko kuri ani! Bushwa mbu emyanikiri yabe nti nge ya Ongo, ina ya bea.»
Erimisa Yesu
(Mar 8.34; 9.1; Ruk 9.23-27)
Nampo Yesu were ebanafunsi bae mbu: «Kuba mwea warae inimisa, witune wisine, wahwa iria emusaraba wae n'inimisa. Bushwa mbu ingu usondange iramya ebuingo bwae waseriminya bo. Ina ingu waseriminya ebuingo bwae bushwa nani, iwe waseshee tu bo. Mbeni inye mufa kuri emwea murishee ebikai biti by'echuo ina wariminya ebuingo bwae? Abe hotu kikai nki chamuninkana emwea murikombora ebuingo bwae?
«Bushwa mbu ani eMwana w'eMwea naseyayo mu busime bwa Tita hima n'ebamaraika bae. Na nasehembayo kira mwea itukana n'emikorere yae.1 Nibwirengi muriira mbu bima mu banu mbi muri hano, hari bima mbi batakwiyo kuti ntíbanisunga nensi ani eMwana w'eMwea neyange buri mwami.»
Source notes (1)
- Footnote Sab 62.13.
TRADUCTION BILBE EN KINYANGA. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.