Skip to content
BibleKenya

TRADUCTION BILBE EN KINYANGA

Matthew 15

Empa y'eBafarisayo n'eMyomba ya Ongo

(Mar 7.1-13)

Kuruma nampo, Bafarisayo n'ebahani b'eMyomba bima nti batukirengi ku Yerusaremu, beyere Yesu. Bamushisha mbu: «Mbeni bushwa nki ebanafunsi babe banoange empa yatusierenga batitanku bitu? Bushwa mbu ibo barisangǎ na nti tibashua emine1.»

Yesu wasako bo mbu: «Na banu, bushwa nki banu munoange emyomba ya Ongo mwimisa empa yinu? Bushwa Ongo webanga mbu: ‹Wendi usubaha iso na nsoko.›2 Webanga tu mbu: ‹Kinsi ngu wakamba ishe na nina wakomenwa ishurwa.›3 Ina banu mwebanga mbu emwea wamere ishe abe nina mbu: ‹Ebikai mbi byamukusakengi mo ani, namakinda ininka byo Ongo.› Murironja mbo, nge banu mwebange mbu emwea watendi usubahange ishe. Na ngebumbo hotu banu munoange ekinwa cha Ongo bushwa n'erimisa empa yinu!

Banu bea ba nkuse! Emutahwa Isaya webanga shu bushwa ninu mwieba mbu:

‹Ebea bano banisubaha murieba ho,

ina emitima yabo iri kore nani.4

Erisimanike ndi rinisimanikenga bo, rabusa-busa.

N'emahano ngi ahanangǎ bo, atukanangǎ ho n'empa s'ebea.›»

Bikai mbi bibishanga emwea

(Mar 7.14-23)

Kuruma nampo, Yesu wabikira ekikembe ch'ebea n'iere bo mbu: «Muniteanga emate na muteerere ebinwa bino bisondange ibwire ani: Nti mbi bikimengi mu bunu nge bibishanga emwea, ina mbi bisaanga mu bunu bwae nge bimubishanga.»

Nampo ebanafunsi ba Yesu bamweyere n'imwire mbu: «eNyere Kuritu, mbeni ǒngo'si mbu ebinwa byabe mbyo byamababaya eBafarisayo?»

Yesu wasako mbu: «Kinsi murime ngu ntwekwanga na Tita wani ngu uri mu mbingu, usekurwa. Mureki bo, bushwa ibo bihumihumi mbi byenjange bimpe bihumihumi! Kuba ekihumihumi chenjange kimpe kihumihumi, ebati babi basekire mongo mu kiribu.»

Nampo Petero wamwire mbu: «eNyere Kuritu, emushinga ngo, tunsonsomori o.» Yesu wasako mbu: «Mbeni na banu hotu musira nensi bwenge bwiteerera? Banu mosi mbu ebiti mbi byakime mu bunu bihitirenga mu bura, kuruma nampo bitukanga kumunda mu rienda mu chorori. Ina mbi bitukanga mu bunu bw'emwea, mu mutima wae nge musairenga byo. Nambyo nge bibishanga emwea. Bushwa mbu mu mutima w'emwea nge mutukirenga emyanikiri yema, ishura bea, isingirana, ironja bushuma, ishuma, ieba manko na nkambao. Ebinwa mbyo nge bibishanga emwea! Ina eririsa na ntimwashua emine, iro ritamubisha mwea.»

Mumina uma Mukanana wasimira Yesu

(Mar 7.24-30)

Kuruma nampo, Yesu watuka mpo n'ienda mu sankaro-nkaro sa ku Tiro na ku Sindoni.

Mumina uma Mukanana wabesenga mu chuo ncho. Emumina ngo weyere Yesu na nt'ukuwange mbu: «eNyere Kuritu, musike wa Ndauti, nikwiri bonso! Mwisyani wanubiwa nguru n'ekifwasi.» Ina Yesu ntwamusakonga kinwa. Ebanafunsi bae bakensere kwihi nae n'imwire mbu: «Ere emumina uno mbu wendi, bushwa mbu utuyange na burunga!»

Yesu wasako mbu: «Naritumwa kuri eruanda rwa Baisiraeri ho, bushwa mbu bari buri mburi nsi saririmina.»

Ina emumina ngo weya n'ikome emaru mu makako a Yesu n'ieba mbu: «eNyere Kuritu, nsaki!»

Yesu wamusako mbu: «Ntírahunda itinge ebio by'ebana n'itaire byo ebiwana.» Emumina ngo weba mbu: «Nanki, eNyere Kuritu! Ina ebiwana nabyo birisanga ebifundiro mbi birarange itukire mu mesa ya bisa byo.»

Nampo, Yesu wamusako mbu: «Ǒngo mumina, erisimira rabe rikiri! Ebiti bibesi imbu bwashima ǒngo.» Mu ntambi iya-iya, ekikumi ch'emumina ngo charama nakuba.

Yesu waramya bakoni bingi

Yesu watuka mpo n'ieta mwendende n'enyansa ya ku Ngariraya. Wataya hiyo n'erou n'irika mpo. Bikembe bya bea bingi bamweyere na nti bamurishiengi birema, na bihumihumi, na nkata, na turumbu na bampe bakoni bingi. Barisha bo mu makako a Yesu, nae waramya bo. Ebea bashishara nguru murisunga eturumbu twebange, n'esankata siramange, n'ebirema byendange, n'ebihumihumi bikaengi. Batata Ongo w'eBaisiraeri.

Yesu warɨsha bea erefu sinye

(Mar 8.1-10)

Kuruma nampo, Yesu wabikira ebanafunsi bae n'iere bo mbu: «Ebea bano, namakwire bo bonso, bushwa mbu bamamana nani matu ashatu, na basira bio. Kai, ntínashima iraa bo na ntíbarisa bio, bamenda kaninkire n'erwaka mumunse.»

Ebanafunsi bae bamushisha mbu: «Hano bweru. Mbeni kuni nge kwamusheere bate bio mbi byamusukucha ebea barehe hano?» Yesu washisha bo mbu: «Banu muri na mikati inga?» Nabo mbu: «Turi na mikati irinda na bikwa bikeke byakeha-keha.»

Ekikembe ch'ebea ncho, Yesu were bo mbu barike ekwansi. Kuruma nampo watinge emikati irinda njo n'ebikwa mbyo. Warekɨa wamatata Ongo, wabengaa byo, waninka byo ebanafunsi bae, nabo babanyie byo ekikembe kiti ch'ebea. Ebea bati barisa n'isukuta. Ebanafunsi barekia bamasombo ebifundiro, byarisia mitundu irinda. Imbi barisanga ebio mbyo babesenga babume erefu sinye, ina ebomina n'ebana ntibaanswanga.

Yesu wakianga wamaraa ebea, wataya mu mutumbu n'ienda mu chuo cha ku Mangandani.

Source notes (4)
  1. Footnote Soma Ruk 11.38.
  2. Footnote Soma Ituk 20.12; Isub 5.16.
  3. Footnote Soma Ituk 21.17; Bar 20.9.
  4. Footnote Soma Isa 29.13.

TRADUCTION BILBE EN KINYANGA. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.