TRADUCTION BILBE EN KINYANGA
Matthew 14
Erikwa ra Yohana Murubiki
(Mar 6.14-29; Ruk 9.7-9)
Mu matu ngo, Herote nge wabesenga wasimanire echuo cha ku Ngariraya. Warukira enkuru ya Yesu. Nampo were ebea bae mbu: «Emwea uno nge Yohana Murubiki ingu wamafuka ngyasingwa washee emaa erironja bishisharo.»
Herote wabesenga wamaminisha Yohana. Wamutaanga mu mwiyororo bushwa na Herondia, mukari wa Firipo. Firipo ngo wabesenga musikyabo Herote1. Byabesenga mbo, bushwa mbu Yohana wabesenga wamere Herote mbu: «Herotia ngo, eMyomba yitu yakuhangire imubinga2!» Nampo, Herote wahuna ishura Yohana, ina wabesenga usubahange ebea bushwa mbu ebea bati babesenga bosi Yohana Murubiki mbu mutahwa.
Esikukuu y'erikandira erotu rwabutwanga Herote yakianga yameya, mwisi wa Herondia wamɨna munkati n'ebea bati mbi babikirwanga. Erimina rae ndo, Herote wamoere ro nguru. Nampo wamuraa n'isere mbu wasemuninka kiti-kiti nchi kisemukonga we. Emwana emukari ngo, wakianga wamakonga nina ihano, were Herote mbu: «Hano-hano, mbesi emuntwe wa Yohana Murubiki mu ntengi ino!» Ekinwa ncho chasubucha emwami. Ina bushwa n'erisere rabesenga ramasere we munkati n'ebea mbi babikirwanga, weba mbu emwana mukari ngo waninkwe echamakonga we. Nampo watuma mwea mu mwiyororo kakera emuntwe wa Yohana. Emuntwe ngo, barisha o mu ntengi n'ininka o emwana emukari ngo. N'emwana mukari nae warishie o nina.
Kuruma nampo, ebanafunsi ba Yohana beya karinga ekinda chae n'ienda kataa cho. Emwasi ngo, benda kature Yesu o.
Yesu warisha bea bingi
(Mar 6.30-44; Ruk 9.10-17; Yoh 6.1-14)
Yesu wakianga wamarukira emwasi ngo, watuka mpo na mutumbu n'ienda kishika kwahehe. Ebikembe by'ebea bakianga bamasunga mbo, batuka-tuka mu sambungu sabo n'imisa Yesu na bisando. Yesu wakianga wamatuka mu mutumbu, wasunga kikembe kikiri cha bea, wakwire bo bonso. Ebabesenga bakoni mubo, waramya bo. Ebutu bwakianga bwamaoroba, ebanafunsi bae bamweyere n'imwire mbu: «eNyere Kuritu, ehari bate hano bweru, n'ebutu nge buno bwamasiro. Kai, reke ebea bano bendi mu sambungu kongo bichure bio.» Ina Yesu wasako bo mbu: «Ebea bano ntibakomenwa ienda. Ina banu bisine muninke bo bio!» Nabo mbu: «Turi ho hano na mikati isanu na bikwa bibí.» Yesu were bo mbu: «Munirishii byo hano.»
Kuruma nampo, were ebea mbu barike kwansi mu bisu. Watinge emikati isanu n'ebikwa bibí mbyo, wararame ekwiyo n'itata Ongo. Wabengaa byo n'ininka byo ebanafunsi bae. Nabo babanyie-banyie byo ebea. Ebea bati barisa n'isukuta. Ebanafunsi basonja ebyasianga n'irisia mitundu ikumi na ibi3. Ebea mbi barisanga ebio mpo babesenga babume buna erefu isanu ikuto ebomina n'ebana.
Yesu wendange hambasiro n'enyansa
(Mar 6.45-52; Yoh 6.15-21)
Kuruma nampo, Yesu were ebanafunsi bae mbu bakimi mu mutumbu n'imusondore mwienda muo mwiri w'enyansa. Bushwa mbu wasianga kasa uraange ekikembe ch'ebea.
Na wakianga wamaraa ekikembe ch'ebea, wataya iwe kisine mu rou kahema. Ebutu bwamusirenga mpo iwe kisine. Mu ntambi njo, emutumbu wabesenga wamenda kore n'ekirindo. N'eriyuhu rabesenga risairengi bo kubusondori. Bushwa nancho, emibimbi yabucha iinya-inya emutumbu.
Ebutu bwakianga buri kacha, Yesu wabungura ebanafunsi bae na ntwendange hambasiro n'enyansa. Bakianga bamusunga wendange hambasiro n'enyansa, batingirwa na boba. Babucha ikua nguru n'ieba mbu: «Mpacha njo!» Hiha-hiha, Yesu were bo mbu: «Musumyanga emutima! Ani uno! Kiro mukwa boba.»
Petero wamwire mbu: «eNyere Kuritu, kuba ho ǒngo ngo, muriira, niri nani neye hariǒngo mpo nti nendange hambasiro n'emecha.» Na Yesu mbu: «Iya!»
Petero watuka mu mutumbu, wabucha ienda hambasiro n'emecha murisonda ieya hari Yesu. Ina wakianga wasunga eriyuhu rasuma, wakwa boba n'ibucha itia. Nampo wakua mbu: «eNyere Kuritu, nishukaye!» Hiha-hiha, Yesu waoro emwine, wamutinge n'imwire mbu: «Era! Mbeni umatika-tika bushwa nki? Erisimira rabe rikeke!» Bakianga bamakime mu mutumbu ebababi, eriyuhu rakoba nakuba. Nampo, ebanafunsi mbi babesenga mu mutumbu, bakome emaru mu makako a Yesu n'ieba mbu: «Muriira ǒngo ho Musike wa Ongo!»
Yesu waramya ebakoni mu chuo cha ku Kenesareti
(Mar 6.53-56)
Yesu n'ebanafunsi bae bakianga bamasoka enyansa, beya mu chuo cha ku Kenesareti. Bisa echuo bakianga bamasiba mbu Yesu nge wameya, batuma emwasi mu sambungu siti sa mwendende echuo ncho. Nampo, babesenga bamurishiengi ebakoni bati. Babesenga bamuhemange mbu wareki ebakoni batingi mu mupindo w'enchangi yae ho. N'ebati mbi batingenga muo barama.
Source notes (3)
- Footnote Soma Mariko 6.17.
- Footnote Soma Bar 18.16; 20.21.
- Footnote Soma 2Bam 4.42-44.
TRADUCTION BILBE EN KINYANGA. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.