TRADUCTION BILBE EN KINYANGA
Matthew 13
Mushinga w'emuhingi
(Mar 4.1-9; Ruk 8.4-8)
Yesu watuka mu numba n'ienda karika mwendende n'enyansa. Kikembe kikiri cha bea batumana kwihi nae. Nampo, Yesu wataya mu mutumbu n'irika kumunda nao. N'ebea bati mbo basia nti basimana kumushi n'enyansa.
Nampo, wabucha ihana bo binwa bingi mu mishinga. Were bo mbu: «Kwarikanga muhingi uma ngu wendanga keka mbuto sae. Wakianga urekeraange esambuto, sima sarare mwendende n'ense. Emirónge yeya n'irisa to. Simpe sarare mu makoi impi hasira oto rwingi. Sashuka tete bushwa mbu eroto rwabesenga rukeke. Ina, emwishi wakianga wamasaka, washika emirime njo, nayo yakama bushwa mbu emiri yao yabesenga yatebetebe. Simpe mbuto sakire munkati na mirime iri na menke. Emirime njo yakianga ishukange, yekenya embuto. Ina simpe mbuto ito sarare mu oto rwakonda n'ibuta byuma: sima sabuta byuma iyana, simpe sabuta makumi mutuba na simpe makumi ashatu. Kinsi ngu uri na mate warukire!»
Yesu uhanange ebea mu mishinga
(Mar 4.10-12; Ruk 8.9-10)
Kuruma nampo, ebanafunsi ba Yesu bamweyere n'imushisha mbu: «Mbeni ǒngo webange n'ebea mu mishinga bushwa nki?» Nae wasako bo mbu: «Banu mumaninkwa nchumo y'eriteerera enama y'eBwami bwa mu mbingu. Ina ibo ntí bareninkwa yo. Bushwa mbu kinsi mwea ngu urikire na kikai ng'uninkwanga tu na kimpe na twabese na bikai bingi. Ina ingu usira kikai wasenyakwa n'ekikeke nchi kiri rero nae. Ngyasingwa nebange nabo mu mishinga. Bushwa mbu ebea bano bakaengi ina batangasunga, na barukirange ina batangateerera. Ngebumbo ebinwa byebanga emutahwa Isaya byaberera kuri bo. N'ebinwa mbyo nge bino:
‹Erirukira, mwendi murukira ina mututeereri,
n'erikae, mwendi mukae ina mutusungi.
Bushwa mbu ebea bano bamasumya emitima yabo,
bamaribya emate abo,
na bamaribya n'emeso abo,
kongo batakai n'irukira,
na kongo batakuruki kuri ani.
Bushwa mbu bamukurukengi kuri ani kongo namuramya bo.›1
«Ina mukasanirwa banu bushwa mbu emeso inu akaengi n'emate inu arukirange! Nibwirengi muriira mbu: kuri batahwa bingi na bea bingi mbi baombokara mu makako a Ongo ebahunanga isunga ebinwa mbi bisungange banu, ina nti baresunga byo. Basondanga hotu irukira mu byo ina nti barirukira mu byo.2
Yesu wansonsomora emushinga w'emuhingi
(Mar 4.13-20; Ruk 8.11-15)
«Murukire ke ebweba emushinga ngo w'emuhingi mbu: Esambuto nsi sararenga mwendende n'ense, sasusanyiwa na bea mbi barukiranga ekinwa ch'eBwami, ina batangateerera cho. Kuruma nampo, Mushumbu weyanga kakuto cho mu mitima yabo. Esimpe nsi sararenga mu makoi, sasusanyiwa n'ebea mbi barukiranga ekinwa cha Ongo n'isimira cho na ngoa hiha-hiha. Ina ekinwa ncho kitaandiranga mu mitima yabo. Basimiranga cho mu ntambi nkeke ho. Eminubo n'emario bikianga byameyere bo, hiha-hiha ntibareke erisimira rabo. Embuto nsi sakirenga mu menke, sasusanyiwa n'ebea mbi barukiranga ekinwa cha Ongo. Ina emirakasao y'echuo kino n'erishima ebutumba, byekenyanga ekinwa ncho mu mitima yabo. Bushwa nancho, kitabutanga byuma. Embuto nsi sararenga mu roto rwakonda, sasusanyiwa n'ebea mbi barukirangǎ ekinwa cha Ongo n'iteerera mbu bweba cho. Ebea mbo nge babutangǎ byuma: bima byuma iyana, bampe makumi mutuba na bampe makumi ashatu.»
Mushinga w'engano n'ebisu byema
Yesu wakere ebea mushinga umpe mbu: «eBwami bwa mu mbingu bwasusanyiwa na mwea uma ngu wekanga mbuto yakonda mu rishwa rae. Ina otu ruma, ebea barekia bamenda toro mu mutu, kwasaa murenda w'emwea ngo. Emurenda ngo wenda keka bisu byema mu ngano na kwiire. Engano njo yakianga yamashuka n'isaisha tukobe, ebisu byema mbyo nabyo byasungwa.
«Ebakori ba mine rishwa bamwendere n'imushisha mbu: ‹Enyere kuritu, bate tosi mbu wekanga mbuto sakonda mu rishwa rabe. Mbeni ebisu byema bino byakusaire kuni?› Nae wasako bo mbu: ‹Murenda ngwakukora ncho.› Nampo, ebakori bae bamushisha mbu: ‹Mbeni ǒngo uhunange twendi kakuraa byo?› Ina wasako mbu: ‹Anga! Kiro mukuraa byo, munantambi mumakuraa byo hima n'engano. Murekenga byo ebiti bibi byoshuke mongo ieya na mu matu emukene. Nampo ke nge nasereyo ebakeri mbu: mukuraanga kasa ebisu byema. Muminanga byo bikanda-bikanda kongo byashikwa. Kuruma nampo, mutumanga engano n'ibika yo mu mwiso wani.›»
Mushinga w'ekambuto kakeke nguru
(Mar 4.30-32; Ruk 13.18-19)
Kuruma nampo, Yesu wakere tu bo umpe mushinga mbu: «eBwami bwa mu mbingu bwasusanyiwa na kambuto ka harandari, inki kakianga mwea uma watinge n'ieka ko mu rishwa rae. Ekambuto nko nge kakeke nguru irenga esambuto siti. Ina kakiangǎ kamoshuka nti kabese muti mukiri irenga emirime iti y'erishwa, nampo emirónge nti yeya k'umba birumba mu santabi sao.»
Emushinga w'echachu
(Ruk 13.20-21)
Yesu wakera tu umpe mushinga mbu: «eBwami bwa mu mbingu bwasusanyiwa na chachu eyakianga mumina uma watinge. Echachu njo, wasonya yo na nengo ishatu sa nchano ya ngano, n'enchano iti njo yabimba.»
Yesu webange mu mishinga bushwa nki
(Mar 4.33-34)
Ebinwa biti mbyo, Yesu wabesenga werengi byo ebikembe by'ebea mu mishinga. Kusira kinwa kiti-kiti nchi chebanga we n'ebea kuba nti wakere bo mushinga. Wabesenga uronjanga mbo mu ribereresha ekinwa chebwanga n'emutahwa mbu:
«Nasenda nebange nabo mu mishinga,
nasenda niturengi bo ebinwa mbi byabiswanga itukire echuo chabumbwǎ3.»
Yesu wansonsomora emushinga w'ebɨsʉ byema
Kuruma nampo, Yesu wasia ekikembe ch'ebea n'ikime mu numba. Ebanafunsi bae bamweyere n'imwire mbu: «Emushinga ngu weba bushwa n'ebisu byema mbi byabesenga murishwa, tunsonsomori o.» Yesu wasako bo mbu: «Ingu wekanga emirime yakonda nge ani eMwana w'eMwea. N'erishwa ng'echuo. Emirime yakonda njo nge bea b'eBwami bwa mu mbingu. N'ebisu byema mbyo nge bea ba Mushumbu. Emurenda ngu wekanga ebisu byema mbyo nge Mushumbu. N'emukene nge hende echuo. N'ebakauri nge bamaraika. Imbu bukiangǎ ebisu byema byakurwa mwienda katawa mu kasha, nge busebeseyo byo hende chuo. Bushwa mbu ani eMwana w'eMwea nasetumayo ebamaraika bani katumǎ ituka mu bwami bae ebea bati mbi bashooreshangǎ bampe ironja nsambi n'ebampe bati mbi baronjangǎ ebibí. Kuruma nampo, ebea bema mbo, ebamaraika basetaayo bo mu rungere rw'ekasha. Na mu kasha nko nge musekiayo ke barire n'ishiisha emeno. Ina ebea baombokara mu makako a Ongo, ibo basenyenyayo buri mwishi4 mu Bwami bwa Ishe wabo. Ingu uri n'emate, warukire!»
Mushinga w'ebehe mbi byabiswanga mwishwa
«eBwami bwa mu mbingu bwasusanyiwa na behe mbi byabiswanga mwishwa. Ebehe mbyo, mwea uma wasunga byo, n'ibisa byo nae. Emwea ngo wamoa nguru n'ienda kachuya bikai byae biti, kuruma nampo wenda kachura erishwa ndo.
Mushinga w'ekachichi kakonda
«eBwami bwa mu mbingu bwasusanyiwa hotu na munonki uma ngu wahunanga ichura kachichi kakonda5. Wakianga wamasunga ekachichi nko, wenda kachuisha ebikai byae biti n'ichura ko.»
Emushinga w'ekakira
«eBwami bwa mu mbingu bwasusanyiwa hotu na kakira kima nki kakianga barobi bima barekera ko mu nyansa, nako katinge kira kikwa. Ekakira nko kakianga kamarisa, ebarobi mbo bakurure ko kumushi. Nampo, barika n'ibucha irondora ebikwa. Babika ebikwa byahunda mu mitundu, ina ebikwa byema ibyo, bataa byo. Nge busebeseyo byo bumbo hende chuo. Ebamaraika baseyayo kasianya ebea bema nambi baombokara mu makako a Ongo. Nampo ke nge basetaayo ebea bema mu rungere rw'ekasha, na nge muserire bo n'ishiisha emeno.»
Bikai bishasha n'ebikai byakarekare
Yesu washisha ebanafunsi bae mbu: «Ebinwa biti mbi byamabwere ani, mbeni mumateerera byo?» Nabo basako mbu: «Nanki.»
Kuruma nampo, Yesu were bo mbu: «Kinsi muhani w'eMyomba ngu mwanafunsi mu Bwami bwa mu mbingu, wasusanyiwa na shemine numba ingu ukutongi bikai bishasha nambi byakarekare mu butumba bwae.»
Ebea ba ku Nasareti batina isimira Yesu
(Mar 6.1-6; Ruk 4.16-30)
Yesu wakianga wamakinda ikera emishinga njo, watuka mpo. Wenda murubungu rwoshukenga mu we. Wabucha ihana ebea mu masinangoki abo. Ebea mbo bashishara nguru n'ibucha ishishana mbu: «Emwea uno, mbeni wamakuto ebutesa buno n'ebishisharo bino kuni? Uno! Mbeni nti nge musike wa seremara ngo? Na Maria, mbeni nti nge nina? Na Yakobo, na Yosefu, na Simoni na Yuta, mbeni nti nge banachabo? Na babitu bae bati, turikanga nabo kuno! Ebiti mbi, mbeni wamakuto byo kuni? Ebinwa biti mbyo byasingwanga batamurisii.» Ina Yesu were bo mbu: «Emutahwa usimirwanga ekuti, ina unenwanga ku rwabo na mu mwabo.»
Bushwa mbu ebea ba ku Nasareti batinanga isimira, Yesu ntiwaronjanga tu bishisharo bingi nko.
Source notes (5)
- Footnote Soma Isa 6.9-10.
- Footnote Soma 1Pet 1.10-12.
- Footnote Sab 78.2.
- Footnote Soma Ndan 12.3.
- Footnote Ekachichi nko kabesenga ka busi bwasuma
TRADUCTION BILBE EN KINYANGA. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.