Matthew 12

Yesu nge Mine Sabato

(Mar 2.23-28; Ruk 6.1-5)

1Mu matu ngo, Yesu hima n'ebanafunsi bae babesenga betange mu mashwa a ngano otu ruma rwa Sabato. Ebanafunsi bae mbo babesenga bakwa rwaka. Bushwa nancho, babucha ihururo etukobe tw'engano n'irisa etuma.

2eBafarisayo, murisunga mbo, bere Yesu mbu: «Ukaenga! Ebanafunsi babe ngie bakorange binwa mbi byahangirwa ikorwa erotu rw'eSabato!»

3Yesu wasako bo mbu: «Mbeni ntinensi musoma imbu bwaronjanga Ndauti wisine n'ebea bae entambi yakwanga bo rwaka? 4Wakimenga mu Numba ya Ongo. Nampo, warɨsa emikati nji yasiburwanga Ongo. Waronjanga mbo ina iwe n'ebea bae nti ntíbakomenwa rero irisa emikati njo. Ebakuhani ho nge babesenga bakomenwa irisa yo.1 5Mbeni mutungasomanga hotu eMyomba ya Musa mbu kirotu rwa Sabato, ebakuhani mbi bakorange emurimo mu Numba ya Ongo banoange emyomba y'erotu ndo? Ina batangaansirwa ironja bibí! 6Ina nibwirengi mbu hano hari mwea uma mukwakare irenga eNumba ya Ongo. 7Banu ntimwosi ebweba ekinwa kino mbu: ‹Nashima mbu mwendi mukwirane bonso ina ntinarae mu bisabo byinu2.› Mumasibange ncho, mutumendange banu muhukumungi ebea mbi ntibaronja bibí. 8Bushwa mbu ani eMwana w'eMwea nge mine Sabato.»

Yesu waramya mwea otu rwa Sabato

(Mar 3.1-6; Ruk 6.6-11)

9Yesu watuka mpo n'ienda mu Sinangoki yabo. 10Na mu Sinangoki njo nti muri mwea uma wasamba bukoni bwa rumbonsa mu mwine. Mwabesenga hotu bea bampe mbi basondange nsomombo kuri Yesu. Ebea mbo bashisha Yesu mbu: «Mbeni eMyomba yitu yarisia iramya mwea otu rw'eSabato?»

11Yesu wasako bo mbu: «Mwea uma munkati ninu wamubese na mburi yae nima, nampo emburi njo yahuke mu kiribu erotu rw'eSabato. Mbeni watamukuto yo mu kiribu ncho erotu ruro-ruro rw'eSabato? 12Mbeni emwea ntiwaraisha irenga mburi? Kai emyomba yatukonga ikora byakonda erotu rw'eSabato!» 13Nampo, Yesu were emwea ngo w'erumbonsa mbu: «Oro emwine wabe.» Nae woro emwine, n'emwine ngo warama n'ibese tu buri eumpe. 14Bushwa nancho, eBafarisayo batuka mpo n'ienda kamɨna nama y'erishura Yesu.

Yesu nge mukori ngu warondorwanga na Ongo

15Enama njo y'eBafarisayo, Yesu wakianga wamarukira yo, witukire rae mpo. Nampo, bea bingi bamumisa. Ebabesenga basambange munkati nabo, waramya bo ebati. 16Ina wahangire bo nguru mbu bataturi ebea mbu iwe ng'inye. 17Byabesenga mbo, kongo byabererera ebinwa mbi byebanga emutahwa Isaya mbu:

18«Mukaenga! Uno nge mukori wani ewarondoranga ani.

Iwe nge kitwana chani, namumoere nguru.

Nasemuninka eMutima wani

waseture entí Bayuta ebinwa byani mbi byaombokara.

19Wataronjiyo buhaka na mwea abe ironja burunga.

Kusira waserukirayo emurenge wae munkati ebutara.

20Watanoiyo eriseke ndi rakunyiwa,

na watarimyiyo eritara ndi risondange irima.

Waronji mbo ieya nambu busesimanyayo we ebinwa mbi byaombokara.

21Erina rae ngerisekwinyihireyo entí Bayuta3.»

Ebea beba mbu Yesu nge Bereseburi

(Mar 3.22-30; Ruk 11.14-23)

22Kuruma nampo, ebea barishie Yesu mwea uma watingirwa na kifwasi. Ekifwasi ncho chamuronjanga ibese kihumihumi na karumbu. Yesu wamuramya, n'emwea ngo wabucha ieba n'ikae. 23Ebikembe by'ebea mbi babesenga mpo bashishara n'ieba mbu: «Emwea uno, mbeni wamubese Musike wa Ndauti?»

24eBafarisayo bakianga bamarukira ebinwa mbyo, beba mbu: «Beriseburi, mukwakare w'ebifwasi, nge uninkange emwea uno ebukwakare bwerihambura byo!» 25Ina Yesu wabesenga wamasiba emyanikiri yabo. Were bo mbu: «Kuba bea ba bwami buma bakwana, ebwami mbo nti bwahona. Kuba tu ebana b'uanda ruma abe b'ubungu ruma nabo bakwana, eruanda ndo nti rwansansabana. 26Kuba ke Mushumbu wamihambura tu wisine, kai ebwami bwae bwamahona. 27Banu mwebange mbu ani nihamburange ebifwasi mu bukwakare bwa Beriseburi. Mbeni babinu bahamburange bifwasi mu bukwakare bwanye? Babinu mbo nge basebushea mbu banu bariu! 28Ina ani nihamburange ebifwasi mu maa eMutima wa Ongo, ngerieba mbu eBwami bwa Ongo bwamakinda ieya kuri banu.

29«Kusira mwea ngu wamukime mu numba ya murai n'imunyaa ebikai byae na ntinensi wamumina kasa. Na wamakinda imumina, hipo ke nge wamukocha ishokora ebikai byae mbi biri kumunda n'enumba yae.

30«Ingu nt'uri hima nani, murenda wani. Nangu watangasonja hima nani, unsansabanyange. 31Ngyasingwa nibwirengi mbu ebea basesasirwa esansambi sabo n'esankambao sabo siti. Ina ingu wakamba eMutima Washurukara, watasasirwi. 32Kinsi mwea ngu weba bubi kuri ani eMwana w'eMwea, wasesasirwa. Ina kinsi mwea ngu weba bubi kuri eMutima Washurukara, iwe utasasirwi mu chuo kino, na mu chuo nchi kiseyayo.»

Emuti n'ebyuma byao

(Ruk 6.43-45)

33Kuruma nampo, Yesu weba mbu: «Kuba emuti wakonda, n'ebyuma byao bisekonda hotu. Bushwa mbu emuti usibwanga ietere ebyuma byao.

34«Banu kikembe cha nsoka! Buni ke, banu bea bema, mumakocha ieba binwa byakonda? Bushwa mbu emwea webanga binwa mbi byarisa mu mutima wae. 35Emwea wakonda ukutonga byakonda ebiri kumunda n'emutima wae wakonda. N'emwea wema nae ukutonga binwa byema ebiri kumunda n'emutima wae wema. 36Nibwirengi mbu, mu rotu rw'ehukumu, ebea basensonsomorayo kinsi kinwa cha busa-busa nchi chebanga bo. 37Bushwa mbu, kira mwea wasesinganayo abe ihukumiwa itukana n'ebinwa byae.»

eBafarisayo bakonga Yesu washee bo kengeko

(Mar 8.11-12; Ruk 11.29-32)

38Nampo bahani bima b'eMyomba na Bafarisayo bere Yesu mbu: «eMuhani, tuhunange utushei kengeko.» 39Yesu wasako bo mbu: «Ebea b'ekiranga kino bema na ntíbasubaha Ongo. Basondange ho isunga kengeko, ina batasungiyo kengeko kuba ntí nki k'emutahwa Yona. 40Musibanga mbu, ebwakianga Yona matu ashatu mutu na mu mwishi mu bura bw'ekikwa kikiri4 nge busekiayo hotu ani eMwana w'eMwea matu ashatu mutu na mu mwishi mu risinda. 41Mu rotu rw'ehukumu, bisa ku Ninawi basesimanayo hima ninu banu ebea b'ematu ano n'ibusongere. Bushwa mbu ibo bakianga bamarukira emahubiri a Yona, babunduka n'ireke esansambi sabo. Ngebumbo, musibanga mbu hano hari ngu waréngá Yona! 42Mu rotu rw'ehukumu, Nyamumbo wa kumbo n'echuo wasêsimanayo hima ninu banu ebea b'ematu ano kongo wabusongere. Bushwa mbu iwe watukirenga kore nguru mwienda karukira ebinwa by'ebutesa by'emubake Soromono5. Na hano nge harikire ngu warenga Soromono!

Emakurukiro ekifwasi mu mwea

(Ruk 11.24-26)

43«Ekifwasi chamakinda ituka mu mwea nti chatubatuba mu bweru mwisondekanya maruhukiro. Chamarukwa maruhukiro, 44nti cheba mbu: ‹Nasekuruka mu numba yani emwakutuka ani.›

«Chamakuruka, châkumana enumba munu, yahairwa na yatondwa shu. 45Nampo ke, kisenda karinga bimpe bifwasi birinda byema nguru imurenga, nabyo nti byakime n'irika mo. N'emwea ngo wasebinduka wema nguru irenga mbu bwabesenga we raroso. Ebea b'ematu ano nabo, nge busebeseyo byo kuri bo hotu. Bushwa mbu ibo bea bema nguru.»

Banachabo Yesu na nina

(Mar 3.31-35; Ruk 8.19-21)

46Yesu wakianga ukiri webange n'ekikembe ch'ebea, banachabo na nina beya. Basimana habutara mwisonda ieba nae. 47[Nampo, mwea uma were Yesu mbu: «Kae! Banakinu na nsoko nge bano basimana hambuka, basondange ieba nabe.»]

48Yesu wamusako mbu: «Inye nge koyo? Na banye nge banakitu?» 49Nampo washea emwine kuri ebanafunsi bae. Weba mbu: «Mukai! Bano nge koyo na banakitu. 50Bushwa mbu kinsi mwea ngu uronjange erisasa ra Tita wani ngu uri mu mbingu, iwe nge musikitu, mwisitu na koyo.»