Matthew 11

Yohana Murubiki wátuma ebanafunsi bae kuri Yesu

(Ruk 7.18-35)

1Yesu wakianga wamakinda iere ebanafunsi bae ikumi na babi ebinwa mbyo, watuka mpo n'ienda kahana n'ihubiri ebea mu sambungu sabo

2Mu matu ngo, Yohana Murubiki wabesenga mu mwiyororo. Namo, warukira emyasi y'ebinwa mbi bikorange Kirisitu. Nampo watuma banafunsi bae bima 3kashisha Yesu mbu: «Mbeni ǒngo nge ingu wahwanga ieya, abe turindire umpe?» 4Yesu wasako bo mbu: «Mwendi kature Yohana ebinwa mbi birukirange banu n'ebisungange banu: 5ebihumihumi ngie bikaengi, ebirema ngie byendange, ebabembi baramange, ebitwitwi ngie birukirange, ebakwire bafukange, n'eMwasi Wakonda ngie uturwange kuri ebasene1. 6Wakasanirwa emwea ngu watariminyiyo erisimira rae kuri ani!»

7Ebanafunsi ba Yohana mbo bakianga bamakuruka kuri we, Yesu wabucha iture bea emyasi yeba kuri Yohana mbu: «Mbeni mwendanga mu bweru kasunga ko nki? Mbeni eriseke ndi rabesenga rirubyiwange n'eriyuhu? Anga! 8Mbeni mwendanga kasunga ko nki ke? Mbeni mwea ngu wambara nchangi yahunda? Anga! Ebambarangǎ nchangi sahunda-hunda barikanga mu manumba ebwami! 9Mbeni mwendanga kasunga nki ke? Mbeni mutahwa? Nanki, nibwirengi mbu emutahwa ngo warenga na mutahwa! 10Bushwa mbu iwe nge washembwa mu Mitiro Yashurukara mbu:

‹Namatuma entumwa yani ikusondori,

kongo yakutunganyie ense2.›»

11Nibwirengi muriira mbu: «Mu bea mbi barikire mu chuo kiti, kutangasungwanga mwea mukwakare warenga Yohana Murubiki. Ina ngu mukeke mu Bwami bwa mu mbingu, iwe nge wamurenga. 12Itukire ematu a Yohana Murubiki ieya na runotu, ebea bakwanishange eBwami bwa mu mbingu. N'ebwami mbo, ebarai nge basondange itinge bo na maa. 13Ebinwa biti mbyo byebwanga n'ebatahwa bati hima n'eMyomba ya Musa ieya na mu matu a Yohana. 14Ebinwa mbyo, kuba musimira byo, musibanga mbu emutahwa Eria ingu washembwanga mbu waseyayo, nge Yohana. 15Kinsi mwea ngu uri na mate, warukire!»

16«Nisusanye ebea ba runotu na banye? Bari buri bana mbi barika kwansi mu butara nti baronjanange mo uchechu mbu: 17‹Twakubwomberenga ngoma ina ntímukumina! Twakubusimbenga rumbo rwa kiro ina ntímukurire!›

18«Bushwa mbu Yohana wakianga wameya, wabesenga watangarisa n'iomo. Ebea babesenga bebange mbu: ‹Uri na bifwasi!› 19Ani eMwana w'eMwea nameya, nirisange n'iomo. N'ebea bebange mbu: ‹Mukai! Emwea uno murohoroho na mutamiri! Iwe tu mwira wa bakongori b'ehoro na bampe bea ba nsambi.› Ina ebutesa bwa Ongo busungwange ietere emikorere yae.»

Esambungu nsi satina isimira Yesu

(Ruk 10.13-15)

20Kuruma nampo, Yesu wabucha ifine esambungu nsi saronjeenga we mo bishisharo bingi, bushwa mbu bisa esambungu nso ntibabundukanga n'ireke esansambi sabo. Nampo, weba mbu: 21«Buhanya kuri ǒngo ubungu rwa ku Korasini! Na buhanya kuri ǒngo ubungu rwa ku Betesaita! Bushwa mbu nakuronja bishisharo kuri banu. Ebishisharo mbyo, byamuronjiwange ku Tiro na ku Sindoni, kongo bisa ko bamumbarange makunia na kwisingo mote mwishea mbu bamabunduka n'ireke esansambi sabo. 22Ngyasingwa nabwire mbu, murotu rw'eHukumu, banu mukûhukumiwayo nguru irenga bisa ku Tiro na ku Sindoni. 23Na ǒngo ubungu rwa ku Kaperenaumu, mbeni ǒngo uhakange mbu ukutarishiwayo ieya Mu mbingu? Karankuso! Ukuhichiwayo ekwerunga. Bushwa mbu ebishisharo mbi byaronjiwanga kuri ǒngo, byamuronjiwange ku Sondoma, kongo ku Sondoma kukiri hoho ieya na runotu. 24Bushwa nacho nikwirengi mbu, mu rotu rw'ehukumu, ukuhukumiwayo nguru irenga ku Sondoma.»

Yesu utatange Ongo

(Ruk 10.21-22)

25Mu ntambi njo, Yesu weba mbu: «eTita! Ǒngo nge Mine mbingu n'echuo! Nikutatange bushwa mbu ebinwa bino ubisanga byo ebea b'ebutesa n'ebwenge. Ina umakando byo mu bana bakebake3. 26Ae Tita, ebiti mbyo byatukana n'erisasa rabe.

27«Tita wamanininka ebiti. Kusira ngu unosi ani eMwana kuba ntí Tita, abe kusira ngu wosi Tita kuba ntíani eMwana na kinsi mwea ngu uhunange ani eMwana mbu nimushee Tita.

Iruhuke kuri Yesu

(Ruk 10.21-22)

28«Banu bati mbi munubange n'iruhwa n'emirio yaritohyaa, mwendi mweya kuri ani kongo naburuhucha. 29Mwendi murisia mbu nibusondori, na mwendi mumisa emahano ani. Bushwa mbu ani nasumya mutima na nihohea. Mumenda banu muronjange mbo, mukuruhuka. 30Bushwa mbu erimisa emahano ani rasanguha, n'emurio useburiesha ani ntíwaritoha.»