TRADUCTION BILBE EN KINYANGA
Matthew 10
Esantumwa ikumi na sibi sa Yesu
(Mar 3.13-19; Ruk 6.12-16)
Kuruma nampo, Yesu wabikira ebanafunsi bae ikumi na babi n'ininka bo bukwakare bw'ihambura ebifwasi n'iramya emakoni ati na kinsi burema. Emina esantumwa ikumi na sibi nso nge ano: waroso ngi Simoni ingu ubikirwange mbu Petero, na musikyabo Nderea, Yakobo na musikyabo Yohana, ibo bana ba Sebendayo, Firipo na Baritoromayo, Tomasi na Matayo ingu wabesenga mukongori w'ehoro, Yakobo musike wa Arufayo, na Tareo, Simoni w'ekikembe ch'eBaseroti, na Yuta Isikarioti ingu wasiburanga Yesu.
Yesu watuma esantumwa sae ikumi na sibi
(Mar 6.7-13; Ruk 9.1-6)
Esantumwa ikumi na sibi nso, Yesu watuma to kakora murimo. Wakurura bo emate mbu: «Kiro mwenda mu chuo ch'entí Bayuta, na kiro mukime mu ubungu ruti-ruti rwa Basamaria. Ina mwendenga ho Baisiraeri, bushwa mbu bari buri mburi sariminanga. Mukukia banu mwendange, mwenda muhubiri ebea mbu: ‹eBwami bwa mu mbingu ngie buri kwihi!› Mwenda muramya ebakoni, mwenda mufura ebakwire n'iramya ebabembi, n'ihambura ebifwasi. Bushwa mbu muninkwanga busa, kai na banu mwenda muninkana busa.
«Kiro muria noro, abe behe, abe kikoroto kiti-kiti mu mifuko yinu. Kiro muria hotu inku, abe nchangi sibi, abe birato, abe nkoma. Bushwa mbu emukori wakomenwa ininkwa eposho yae1.
«Kuba mukime mu ubungu rukiri abe rukeke, musondanga mwea ngu wamubukoke mumwae. Murikanga mo ieya n'erotu ndu rusetukayo banu murubungu ndo. Entambi nji ikimengi banu mu numba ndebe, mwendi banu mukeange bisa mo mbu: ‹Ebuhoro bubesi ninu!› Kuba bisa enumba njo babukoke, babesenga n'ebuhoro mbo. Ina bamatina ibukoke, nti mukuruka n'ebuhoro bwinu. Kuba hotu bisa enumba abe bisa erubungu batina ibukoke n'itina irukira ebinwa binu, mwitukirenga mo. Ina murituka mo, mwenda banu mutitongi emukungu w'ebisando binu2.
«Nibwirengi muriira mbu mu rotu rw'ehukumu, ebea b'erubungu ndo basehukumiwayo nguru irenga bisa ku Sondoma na ku Ngomora.»
Eminubo nji iseyayo
(Mar 13.9-13; Ruk 21.12-17)
«Mukohyanga! Nabutuma buri mburi munkati na mbibi sa busara. Kai, musengehanga buri nsoka, na kwihohea buri kampite. Mwiranganga, bushwa mbu ebea basenda baburiange ha Rushu rukiri n'iburasaka tushushu mu masinangoki abo. Basenda baburiange hotu mu makako ebakwakare n'ebami bushwa nani, kongo mwendi banu muturange mu makako abo na mu makako y'entí Bayuta ebiti mbi byasunganga banu kuri ani. Ina basekiayo baburiange mu samburano, kiro mwendi mwianyie mbu: ‹Twaseba nki?› Abe ‹Twaseba buni?› Bushwa mbu Ongo wasebuninka ebinwa byerieba mu ntambi njo. Ebinwa mbyo, ntí banu nge mukweba byo, ina eMutima wa Tita winu nge useba kumunda ninu.
«Emwea waseshurisha munachabo, ishe w'emwana waseshurisha emwana wae. N'ebana basebunduke ebabuti babo n'ishurisha bo. Ebea bati basebubaa bushwa nani. Ina ingu wasesumya emutima ieya na hende nge waseshukara. Kuba babunubya mu ubungu rurebe, nti mubeke mu rumpe. Nibwirengi muriira mbu mutukindanyiyo ieta mu sambungu siti sa ku Isiraeri kuba ani eMwana w'eMwea nenki ntínakuruka.
«Emwanafunsi watakoche irenga emuhani wae, n'ekahungu katakoche irenga nyere kurwae. Ina rakomenwa emwanafunsi wabesi buri emuhani wae, n'ekahungu kabesi buri nyere kurwae. Kuba baninkange mine numba ishembo mbu nge Beriseburi, mbeni ebea b'enumba yae bataninki bo mashembo ema nguru?»
Ongo ngwakomenwa isubahwa
(Ruk 12.2-7)
«Ebea mbo, kiro mwendi musubaha bo. Bushwa mbu kusira kikai nchi chabiswa mbu kitasungwiyo, na kusira nama nji itasibwiyo. Kinsi kinwa kibwirengi ani mu mwirimya, mwendi mweba cho mu chaka, na kinsi kinwa kiserukira banu mu kahwehwe, mwendi mutura cho hambuka. Kiro mwendi musubaha ebea mbi bamushura emubi ina batamukocha ishura emutima. Ina mwendi musubaha Ongo nge wamukocha ishura emubi hima n'emutima mu kasha nki katarimanga.
«Mbeni batangachuya bishwi bibí rufaranga ruma? Nakiro mbo, kusira na kishwi kima nchi chamukire ekwansi kuba Tita winu ntíwashima. Na banu, iwe wosi iansa ebuteo bwinu buti.
«Kai, kiro mwendi musubaha, bushwa mbu banu muraisha nguru irenga ebishwi bingi!»
Eririsia n'eritina Yesu
(Ruk 12.8-9)
«Kinsi mwea ngu wanisimira mu meso ebea, nani nisemusimirayo mu makako a Tita wani ngu uri mu mbingu. Ina kinsi ngu wanituna mu meso ebea, nani nisemutunayo hotu mu makako a Tita wani ngu uri mu mbingu.»
Yesu weyanga kasianya ebea
(Ruk 12.51-53; 14.26-27)
«Kiro mwanikira mbu neyanga karisha buhoro mu chuo. Ani ntíneyanga karisha buhoro, ina bita. Bushwa mbu neyanga kasianya mwana n'ishe, kikumi na nina, mwasana n'inabe. N'ebarenda b'emwea basebese mbi ba mu numba yae3.
«Kinsi mwea ngu washima ishe abe nina inirenga, ntíwakomenwa ibese mwanafunsi wani. Na kinsi ngu washima musikyae abe mwisiwe inirenga, ingo nae ntwakomenwa ibese mwanafunsi wani. Kinsi watina iria emusaraba4 wae n'inimisa, ntwakomenwa ibese mwanafunsi wani. Bushwa mbu kinsi ngu usondange iranga ebuingo bwae, waseriminya bo. Ina ngu waseriminya ebuingo bwae bushwa nani, waseshee tu bo.»
Ebisabo by'ebea mbi basekoke ebanafunsi ba Yesu
(Mar 9.41)
«Ingu wabukoke, wamanikoke. Nangu wanikoke, wakoke ngu wanitumanga. Ingu wakoke mutahwa wa Ongo bushwa mbu iwe mutahwa, wasehembwa buri mutahwa. Nangu wakoke mwea waombokara mu makako a Ongo, bushwa mbu mwea waombokara, wasehembwa buri mwea waombokara. Nibwirengi muriira mbu, kinsi mwea ngu useninka usara rwa mecha ahorerwa ho kuri uma mu banafunsi bani bano bakebake, bushwa mbu iwe mwanafunsi wani, emwea ngo nae wasehembwa ebihembo byae.»
Source notes (4)
- Footnote Soma 1Bako 9.14; 1Tim 5.18.
- Footnote Mu mpa y'eBayuta, eritito mukungú w'ebisando rabesenga risheanga mbu ebea bamasiana bubi. Ekinwa ncho chabesenga kisheanga hotu mbu emwea ngu wakutumwanga usira tu mwinda kuri ngu wakwenderenga we. Soma Mar 6.11.
- Footnote Soma Mik 7.6.
- Footnote Iria emusaraba ngerieba mbu isibura ebuingo bushwa na Yesu.
TRADUCTION BILBE EN KINYANGA. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.