TRADUCTION BILBE EN KINYANGA
Matthew 19
Yesu uhanange bushwa n'erisiana n'emumina
(Mar 10.1-12)
Yesu wakianga wamakinda ieba ebinwa mbyo, watuka mu chuo cha ku Ngariraya. Wenda mu chuo cha ku Yundea muo mwiri na Yorondani. Bikembe bingi bya bea bamumisa, nanko waramya ebakoni.
Bafarisayo bima bamweyere kamwereka. Bamushisha mbu: «Mbeni eMyomba yitu yarisia wabume ihensa mukari mu kira kinwa?»
Yesu wasako bo mbu: «Mbeni ntinensi musoma imbu bweba eMitiro Yashurukara mbu: ‹Muribucha r'echuo, ingu wabumbanga echuo wabumbanga wabume na mumina1?› Kuruma nampo, weba tu mbu: ‹Bushwa nancho, ewabume wasia b'ishe na nina n'irika na mukari, nabo ebababi basebese mwea uma.›2 Ibo ntíbabi tu ina ngie mwea uma. Bushwa nancho, ebyamakia Ongo wamina, kiro mwea uti-uti wasianya byo.»
Ebafarisayo mbo bamushisha tu mbu: «Mbeni bushwa nki Musa wechanga momba mbu ewabume waninke mukari maruba erisiana nae kuba uhunange imuhensa?»
Yesu wasako bo mbu: «Musa warisianga mbu mwendi banu muhensange bakari binu bushwa n'emitima yinu yasuma. Ina mu raroso ntirabesenga mbo. Ina ani nibwirengi mbu kuba mwea wasiana na mukari kuba ho twakumutinge mu busingirani, na wamabinga umpe, emwea ngo wasibanga mbu wamaronja busingirani.»
Nampo, ebanafunsi ba Yesu bamwire mbu: «eNyere Kuritu, kuba ebusingirani ho nge bwamusingwa ewabume wasiana na mukari, kai eribinga risira mufa uti-uti!» Yesu basako bo mbu: «Ekinwa chameba banu ncho, ntíkira mwea ngwamukocha irisia cho, ina imbi baninkwa maa na Ongo. Bushwa nancho, bea bima batamubinga bushwa mbu ibo babutwanga nti bamaroborwa. Bampe ntibabinga bushwa mbu bariroborwa na bea. Na bampe barikwirobora bushwa n'erikore eBwami bwa mu mbingu. Kai ingu wamusimira emahano ano, wasimire o!»
Yesu ukasanengi ebana
(Mar 10.13-16; Ruk 18.15-17)
Kuruma nampo, bea bima barishie Yesu bana kongo watereka emine kuri bo n'iheme bo. Ina ebanafunsi bae bafinyae ebea mbo. Yesu weba mbu: «Mureki ebana beye kuri ani, angi muhangire bo, bushwa mbu eBwami bwa mu mbingu bw'ebea mbi bari buri ebana bano.»
Yesu watereka emine yae kuri ebana mbo. Kuruma nampo, watuka mpo n'ienda.
Ebutumba n'eBwami bwa mu mbingu
(Mar 10.17-31; Ruk 18.18-30)
Kuruma nampo, mwea uma weya hari Yesu n'imushisha mbu: «eMuhani, kinki chamukora ani chakonda kongo nashee ebuingo bw'ematu ati?»
Yesu wamusako mbu: «Mbeni bushwa nki ǒngo nishishange bushwa n'ebyakonda? Uma ho nge wakonda. Kuba ǒngo usondange ikime mu buingo bweriira, wenda uronja mbu bweba emyomba ya Ongo.»
Emwea ngo washisha Yesu mbu: «Ini myomba?» Yesu wasako mbu: «Ang'ienda ushura, ang'ienda usingirana, ang'ienda ushuma, ang'ienda ushukeshuke mwea. Wendi usubaha iso na nsoko, wendi ushima ngu uri kumushi nabe imbu bwishima ǒngo kisine3.»
Emushukira ngo wamwire mbu: «Emyomba iti njo, nimisanga yo. Mbeni kinki tu nge chahwa ironja ani?»
Yesu nae wamusako mbu: «Kuba ǒngo sondange ibese mwea warumira, enda kachuya ebikai byabe biti, n'ebehe mbi bisechuya ongo, ubanyienga byo ebasene. Nampo ukubese na butumba mu mbingu. Kuruma nampo ke, eya kanimisa.»
Emushukira ngo wakianga wamarukira mbo, wenda ntwasubuka nguru bushwa mbu wabesenga na busoki bwingi.
Nampo ke Yesu were ebanafunsi bae mbu: «Nibwirengi muriira mbu rasuma kuri emutumba ikime mu Bwami bwa mu mbingu.»
«Na nibwirengi tu mbu: ratamba kuri engamia ikime mu riso r'enandi irenga emutumba ikime mu Bwami bwa mu mbingu.»
Ebanafunsi bakianga bamarukira ebinwa mbyo, bashishara nguru. Babucha ieba mbu: «Mbeni inye ke ngwaseshukarayo?»
Yesu wakae bo n'iere bo mbu: «Ekinwa ncho kitamukochekana kuri ebea, ina kuri Ongo, ebinwa biti byakochekana.»
Nampo, Petero wamushisha mbu: «Kae, bate bano twakusia ebiti n'ikumisa. Mbeni twasesheeyo nki?»
Yesu were bo mbu: «Nibwirengi muriira: mu chuo kishasha, ani eMwana w'eMwea naserikayo mu rutebe rwani rw'ebusime. Na banu mbi murinimisa, mukurikayo mu santebe ikumi na sibi kahukumu ebisasa ikumi na bibí by'eBaisiraeri. Na kira mwea ngu wakusia enumba yae, abe banachabo, abe bisi babo, abe ishe, abe nina, abe ebana bae, abe erishwa rae bushwa nani, wasehembwayo ringi irenga meta iyana n'ininkwa ebuingo bw'ematu ati. Ina bingi mu baroso enompena basebeseyo bahende, na bingi mu bahende enompena basebeseyo baroso.»
Source notes (3)
- Footnote Soma Ntan 1.27.
- Footnote Soma Ntan 2.24; 1Bako 6.16.
- Footnote Soma Ituk 20.12-16; Bar 19.18; Isub 5.16-20.
TRADUCTION BILBE EN KINYANGA. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.