TRADUCTION BILBE EN KINYANGA
Matthew 20
Mushinga w'ebakori mbi bakoranga mu rishwa r'emisabibu
eBwami bwa mu mbingu bwasusanyiwa n'emushinga uno: «Kwarikanga mwea uma ngu wabesenga n'ishwa rae ra misabibu. Otu ruma, emwea ngo wasimana mu muranga-ranga n'ienda kasonda bea b'imukore mu rishwa rae r'emisabibu. Warana nabo mbu wasenda utuange bo kira mwea kikoroto kima cha behe bya tinari1 mu mubisi. Kuruma nampo, watuma bo mu rishwa rae.
«Musantambi ishatu s'emukomakoma, emwea ngo wenda tu. Wasunga tu bampe bea basimana mu butara na basira murimo. Were bo mbu: ‹Na banu mwendi kakora mu rishwa rani r'emisabibu, nisebutua bihembo mbi byakomenwa.› Ebea mbo nabo benda.
«Musantambi mutuba, mine rishwa wenda n'ituma bampe bea ekwishwa rae. Musantambi mwenda sa mumwishi, waronja hotu bumbo.
«Musantambi buna ikumi na nima sa mwiyoro-yoro, wenda tu. Wasunga bampe bea basimana hotu himpo. Washisha bo mbu: ‹Bushwa nki musimana hano anga murimo?› Nabo bamusako mbu: ‹Bushwa mbu kusira mwea ngu wakutuninka murimo.› Nampo, were bo mbu: ‹Kai na banu mwendi kakora mu rishwa rani r'emisabibu.›
«Ebutu bwakianga bwamaoroba, mine rishwa ndo were ekapita k'emurimo mbu: ‹Bikira ebakori, tuwa bo ebisabo byabo. Buchie mu mbi bakweya kuruma, na ukindanyii mu mbi bakweya baroso.› Ebakori mbi babuchanga emurimo musantambi ikumi na nima beya, na kira uma waninkwa kikoroto kima cha behe bya tinari. Imbi babuchanga emurimo baroso nabo beya. Babesenga bahakange mbu basehembwa irenga ebampe. Ina kira mwea waninkwa nae kikoroto kima cha behe. Ebea mbo barekia bamaninkwa ebihembo mbyo, bayongwa bushwa n'emine rishwa. Bamwire mbu: ‹Ebakori bano ebasindu ebamarierwa mu murimo, ibo bamakora ntambi nima ho! Buni bwamutua ongo bo buri bate mbi twamasibana tukorange mu mwishi uti ngu wasua?›
«Mine rishwa wasako uma mubo mbu: ‹Emirani, ntinakukanga! Mbeni ntitwakurananga mbu nasekuhemba kikoroto kima cha behe bya tinari? Tinge ke bihembo byabe, na enda. Nakushimanga ininka emukori ngu wakweyanga kuruma bihembo mbi birengekane nambi byabe. Mbeni ntinakomenwa ikoresha ebehe byani imbu bwashima ani? Utingirwa na mono bushwa mbu ani mwea wakonda?›»
Yesu weba tu mbu: «Nge buri byo bumbo, ebasindu nge basebese baroso, n'ebaroso nge basebese basindu.»
Yesu watura ra meta ashatu emwasi w'erikwa n'erifuka rae
(Mar 10.32-34; Ruk 18.31-34)
Yesu wakianga utariengi ku Yerusaremu, watinge ebanafunsi bae ikumi na babi n'ienda nabo kwahehe, were bo mbu: «Musibanga mbu tutariengi ku Yerusaremu. Nanko, ani eMwana w'eMwea nasesiburwa mu mine y'ebakwakare b'ebakuhani n'ebahani b'eMyomba. Nabo basenihukumu mbu nishurwe. Basenisibura kuri entí Bayuta mbi basenicharika n'inirasaka mihumbo. Kuruma nampo, basenitundika mu musaraba, ina nasefuka mu matu ashatu.»
Mukari wa Sebendayo usondengi basike bae bukwakare
(Mar 10.35-45)
Otu ruma, mukari wa Sebendayo hima na basike bae bendere Yesu. Emumina ngo wakome emaru mu makako a Yesu mwimuhema kikai kima. Yesu wamushisha mbu: «Ekoyo, mbeni ǒngo uhunange nki?» Nae mbu: «Erotu ndu rusebeseyo ongo mu bwami bwabe, risia mbu emishukira yani ibi ino iserikayo kumushi nabe. Uma mu ruharo rw'ekurembe kwabe, n'eumpe mu ruharo rw'ekwabume kwabe.» Yesu wasako mbu: «Imbi binihemange banu nti banu mwosi byo. Mbeni mumakocha iomo erusara rw'eminubo ndu ruseomo ani?» Nabo mbu: «Nanki, twamukocha.»
Were bo mbu: «Nanki, erusara ndo, mukomo ro! Ina eririkecha bea mu ruharo rwani rw'ekurembe abe rw'ekwabume nti murimo wani. Impi haserikayo ebea mbo, Tita Ongo wisine nge warikinda ibika ho bushwa nabo.»
Ebanafunsi bampe ikumi bakianga barukira mbo, bayongwa bushwa n'emisike ibi njo.
Nampo Yesu wabikira ebanafunsi bae bati hima n'iere bo mbu: «Musibanga mbu mu byuo by'entí Bayuta, ebakwakare babo basimanirengǎ bo na maa, n'ebakangame bo benjangǎ bo n'emaru. Ina kiro rabese mbo munkati ninu. Kuba mwea uhunange ibese mukwakare munkati ninu, wakomenwa ibese mukori winu. Nangu uhunange ibese waroso munkati ninu, wakomenwa ibese kahungu kinu. Ngyasingwa ani eMwana w'eMwea ntinakweya mbu banikori, ina nakweya kongo nenda nikorengi bampe n'isibura ebuingo bwani bubesi kinsinso kongo nashukaya bea bingi.»
Yesu waramya bihumihumi bibí
(Mar 10.46-52; Ruk 18.35-43)
Yesu n'ebanafunsi bae bakianga batukange ku Yeriko, kikembe kikiri cha bea babesenga bamumisange.
Nampo habesenga bihumihumi bibí nti byakurika mwendende n'ense, byarukira mbu Yesu ngwetange. Ngerikia byakua mbu: «eNyere Kuritu, Musike wa Ndauti, tukwiri bonso!»
Ekikembe ch'ebea bafine bo n'iere bo mbu babibire. Ina ebihumihumi mbyo byakua ketu na nguru mbu: «eNyere Kuritu, Musike wa Ndauti, tukwiri bonso!»
Nampo Yesu wasimana n'ibikira bo. Washisha bo mbu: «Mbeni banu muhunange mbu niburonjei kinki?» Bamusako mbu: «eNyere Kuritu, tuhunange mbu emeso itu oboke!»
Yesu wakwire bo bonso. Waturana mu meso abo. Hiha-hiha emeso abo oboka, nabo bamumisa.
Source notes (1)
- Footnote Ekikoroto kima ch'ebehe byabikirwa mbu tinari, byabesenga behe byitua mukori wa mubisi uma.
TRADUCTION BILBE EN KINYANGA. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.