Bakorosai 3:2

1Bushwa mbu ke mumafuka hima na Kirisitu, mwenda musonda ebikai bya mu mbingu, inku kwarika Kirisitu muruharo rwa kwabume kwa Ongo. 2Mwendi mwanikira nguru ebinwa mbi ebiri kokwiyo, ina angi mwenda mwanikira ebinwa by'echuo. 3Bushwa mbu mumakinda ikwa, n'ekaramo kinu kabiswa hima na Kirisitu kuri Ongo. 4Kirisitu nge karamo kinu k'eriira. Nawasekiya wasungwa tu, na banu mukusungwa hima nae mu busime bwae.

Ebuingo bwakare-kare n'ebushasha

5Ngebumbo, mureki ebinwa biti by'echuo ebiri kumunda ninu: Busingirani, mikorere yema, myanikiri yabusingirani, karawa na karawa ka behe inki kari buri isimanike kamoi. 6Ebikai buri mbyo bisingwanga Ongo wasubuke ebatina imurukira. 7Bumbo nge wabesenga bwitingengi banu ematu ngi abesenga akiri mu banu mu sansambi. 8Ina ke, mutae kore ebikai biti bino: busubuke, bushu, manko, ihambike, na angi mwenda mweba kinwa kiti-kiti chema. 9Angi ienda mwebane manko munkati ninu, bushwa mbu mumakinda ireke emikorere yinu ya kare-kare. 10Ngie banu mumakinda ibinduka ibese bea bashasha. Na Ongo ngubukiange mubesi bashasha kirotu, kongo mususana nae, na mumuteerere shu-shu. 11eBayuta, n'entí Bayuta, ebamona, n'entíbamona, ebeni, bashensi, etuhungu, n'entítuhungu: Ebati barengeke. Ina Kirisitu wisine ho ng'waraisha, nae uri mu biti. 12Banu bea ba Ongo, iwe wamabushima n'iburondora bushwa nae kisine. Bushwa nancho, mubesi na mutima wa bonso, bongo, kwihohea na muandire. 13Kuba mwea uri na kinwa chisongere munachabo, mwendi mu sasirana, imbu bwakianga Kirisitu wabusasira. 14Echaraisha mu biti bino, mwendi mubese na nchimi bushwa mbu enchimi ironganyanga ebiti mu bunakima bweriira. 15Ebuhoro bwa Kirisitu burise mu mitima inu. Bushwa mbu ietere bo murebikirwa banu bati ibese mwea uma. Mwendi musubukia ebyakonda ebyakubukore bo. 16eMyasi ya Kirisitu irike mu bwingi kumunda ninu. Mwendi mu hanana n'ininkana mahano mu butesa, mwendi mweba akisanti kwa Ongo mu mitima inu n'imutata mu Saburi na ndumbo insi sarisa eMutima Washurukara. 17Kira kikai nchi kironjange banu abe ieba, muronje byo murina ra Nyere Kuritu Yesu, mwitata Ongo Tita ietere Kirisitu.

Mahano bushwa n'ebuingo bushasha

18Banu ebomina, mwendi musubaha bake binu imbu bwakomenwa ibese mu makako a Nyere Kuritu. 19Banu ebabume, mwendi mushima bakari binu, angi mwendi musuwe bo. 20Banu ebana, mwendi muronja ebweba ebabuti binu mu kira kinwa, bushwa mbu ekinwa kino chamoesha Nyere Kuritu. 21Banu ba tita, angi mwendi mushosha ebana binu, kongo bataneki emitima. 22Banu etuhungu, mwendi muronja ebweba ba nyere kurinu mu kira kinwa hano hansi. Angi ienda muronja ebweba bo ho kuba banu muri hima nabo, mwisonda kwishea kuri bo. Ina muronje muriira ebweba bo, bushwa mbu musubaha Nyere Kuritu. 23Na kira kinwa nchi kironjange banu, muronje cho mu mutima wakonda, buri bea mbi bakorengi Nyere Kuritu, ina batangakore bea. 24Musibanga mbu Nyere Kuritu, wasebuninka bihembo imbi byabike we ebea bae. Bushwa mbu Kirisitu nge Nyere Kuritu w'eriira eukorengi banu. 25Ina ingu ukorange bibí, usehembwa itukana n'ebibi byarekora we, bushwa mbu Ongo wasehukumuyo kira mwea ingu ukorange bibí.