TRADUCTION BILBE EN KINYANGA
Bakorosai 2
Nisondange musibe imbu bukorange ani murimo na muho bushwa ninu, na bushwa nambi ebasimira Yesu ba ku Raondikia na kuri ebati mbi ebatanganisunganga. Nisumyange kongo babese na muho na bunakima mu nchimi. Hiyo nambyo, babesi n'isimira riira ndi ritukanage n'eriteera r'eriira. Nampo basesiba echabiswa na Ongo, ngerieba mbu isiba Kirisitu wisine. Bushwa mbu ebutumba buti bw'ebutesa n'ebwenge bwabiswa kumunda nae. Nibwirengi banu ebinwa bino, kongo kutabi mwea ingu wabuhusa mu binwa byashamuka b'iriminya. Nakiro mbu nirikore ninu mu mubi, ina n'irihima ninu mu mutima. Nani namoa tu murisunga mbu buri banu murisimana shu n'iandira munkati n'erisimira mu makako a Kirisitu.
Kirisitu wisine ng'uninkananga ekaramo
Bushwa mbu mumakinda isimira Kirisitu ibese Nyere Kurinu, murike mu bunakima hima nae. Mwandire kumunda nae, mwitingiri mu binwa mbi byakuhanwa banu bushwa nae n'iandira murisimira itukana nambu bwahanwanga banu. Hiyo n'ebiti mbyo, mwendi mubesa bea bitata Ongo kiratambi. Mukohyanga, kutabi mwea waburiminya itukana na bwenge bwae bw'ebukongobanya bwa busa-busa, imbu bwinyihire ntungo sa bea na mutima wema ngu warisa echuo. Ina ntíwirae mu mahano a Kirisitu. Bushwa mbu eriira riti ra Ongo riri kumunda na Kirisitu ietere emubi wae. Namuribese banu hima nae mu bunakima, ngie banu bea b'iira. Iwe ngie wasimanire emitima iti eiri n'ebukwakare. Muribese mu bunakima hima nae, namakinda imoneshwa na kirisitu. N'erimoneshwa ndo, ramabushukaya ituka mu butetera bw'emubi. Mumakinda ikwa hima na Kirisitu ietere ense yerirubukwa. Na banu mumafuka hotu hima nae, bushwa mbu mumasimira ebukwakare bwa Ongo ingu wamufuranga. Kare-kare mubesenga mumakwa bushwa n'esansambi sinu na bushwa mubesenga ntímumoneshwa. Ina ke, Ongo wamabuninka banu karamo hima na Kirisitu, nae wamakinda itusasira esansambi siti. Wakusisibanya emaruba eminda yitu nambi ebyasingwanga batusongere. Wakusisibanya byo mwikongomee byo mu musaraba. Ongo wakunyaka ebukwakare bw'ebakwakare na mbi basimanire ebea, nae washea bo shu-shu na ntwenjange bo buri bea mbi baminwa mu mukonga w'erihima ra Musike wae. Bushwa nancho, kiro kwabese mwea uti-uti ngu wasebuhukumu bushwa nambi byarisa banu, abe ebyomo banu, abe bushwa r'erimisa kibimbi kirebe, abe kibimbi ch'erisaa r'emweri, abe otu rw'eSabato. Ebinwa biti mbyo, kirimirimi byambi biseya. Ina eriira r'ebinwa biti mbi nti Kirisitu ho wisine. Anga murisia ihukumiwa na mwea uti-uti ingu wisheange mbu iwe murongu n'usimanikengi ebamaraika. Emwea ewasusa mbo wiseke nguru mu binwa mbi byasunga we buri nsori, na ntwitatengi busa bushwa r'emyanikiri yae y'emubi. Ebea mbo bamikuto kuri Kirisitu ingu wasimanire ekanisa, iwe nge muntwe w'emubi wae. Kirisitu nge urishange n'ikumanyanya ebitambo n'emisi iti. Ngebumbo, emubi wae uti watunganana imbu bwashima Ongo.
Banu mumakinda ikwa hima na Kirisitu n'ishukara ituka mu bukwakare bw'emutima wema ingu wasimanire echuo. Mbeni bushwanki banu mubesengi tu buri bea b'echuo mbi bamimwange imisa myenjo buri ino: «Anga murisa kino», «anga irora kino», «anga iturana mu kino na kino!» Ebinwa biti bino byashea bikai bibihabiha rima ho murikoreshiwa. N'ebiti mbyo mwenjo na mahano ebea ho. Muriira, emenjo ino isungwanga buri ya butesa, bushwa mbu yatukana n'emahano erisimanike yakwisine y'ebea mbo hima n'eburongu bwabo nerikwimima rabo r'erinubya emubi. Ina itangasake kikai murihangire ekarawa k'emubi.
TRADUCTION BILBE EN KINYANGA. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.