TRADUCTION BILBE EN KINYANGA
Bakorosai 1
Nkei
Ani Poro, ntumwa ya Yesu Kirisitu murisasa ra Ongo. Ani na munakitu Timoteo, twabuandikire banu bana Ongo ba murubungu rwa ku Korosai, banu banakitu mbi musimira Yesu muriira. Nchumo na buhoro imbi bitukange kuri Ongo, bibesi hima ninu.
Mahemo itata Ongo
Kira ntambi inji ibuhemenga bate tutatanga Ongo, Tita wa Nyere Kuritu Yesu Kirisitu. Tukorange mbo bushwa mbu twamarukira emyasi y'erisimira rinu Yesu Kirisitu nambu bwashima banu ebea bati ba Ongo. Erisimira rinu n'erishimana rinu ratukana n'emwinyihiro winu mbu mukuninkwa mukisa ingu wabubike Ongo mu mbingu. Mumakinda irukira bushwa n'emwinyihiro ngo entambi mubesenga mumakinda ihanwa ekinwa ch'eriira na nge Mwasi wakonda wa Ongo. eMwasi Wakonda ngo, ubutange byuma mbi byarisa mu chuo kiti imbu bwabesenga byo itukire erotu ndu rwarukiranga banu bebange bushwa n'enchumo ya Ongo n'isiba iteerera yo mbu iyo iira. Epafura mukori munakitu ingu washima bate, iwe ng'wabuhananga emyasi njo. Iwe mukori w'iira wa Kirisitu bushwa nitu. Iwe ng'watuturenga emyasi y'enchimi yinu eyaninkwanga banu n'eMutima Washurukara.
Bushwa nancho, tutangaruhwa ibuheme banu itukire erotu ndu rwarukiranga bate emyasi inu. Tubuhemengi Ongo wabusaki iteerera erisasa rae n'ibuninka butesa na bwenge ebwatuka kuri eMutima wae. Nampo musekocha ibese imbu bwashima Nyere Kuritu, n'imukokomya mu binwa biti. Ietere mbyo, mǔkocha ikora mikorere yakonda ya kira bususe n'ienderee isiba Ongo. Ongo wendi ubuninkange maa mu bukwakare bwae, imbu buri n'ebusime kongo mwandira mu kira kikai, na ntintímuruha. Ngebumbo, hima na ngoa, mwendi mutate Ongo Tita, ingu ewakubusakenga ibese bea imbi bakomenwa ishee muhango w'emwandu winu, ewabikengae ebea bae mu bwami bw'echaka. Bushwa mbu iwe wamakindanga itushukaya ituka mu maa emwerimya, n'itukimisha mu bwami bwa Musike we ingu washima we. Ietere we, twamashukara n'isasirwa esansambi situ.
Kirisitu uri hiyo n'ebiti
Kirisitu nge nsusanyi ya Ongo eutanga sungwa. Iwe nge ntangi y'ebiti mbi byabumbwa. Ietere we, Ongo wábumba ebikai biti ebiri mu mbingu na mu chuo, ebisungwange n'ebitangasungwa, kuba bwami, bukwakare, isima abe isimanire. Ongo wabumbanga ebiti ietere we, na bushwa nae. Kirisitu wabesenga ho kubusondori n'ebikai biti, ietere we ebiti byendange shu hima. Iwe nge muntwe w'ekanisa nki kabikirwa mbu, mubi wae. Iwe nge ntangiro na waroso murifuka munkati n'ebakwi, kongo wabese waroso mu biti. Bushwa mbu Ongo wisine washimanga mbu eriira rae risungwe ietere Musike we. Ietere Musike we washimanga ironganya echuo nae. Ietere echama ya Musike we inji yakubukanga mu musaraba, Ongo wamarisha buhoro, nampo waronganya ebikai biti nae, imbi biri mu chuo na mu mbingu.
Na banu kare-kare mubesenga kore na Ongo, mubesenga barenda bae, bushwa n'emyanikiri n'emikorere yinu yema. Ina ke, Ongo wamakinda iburonganya nae, ietere erikwa ra Musike we mu mubi, kongo wabusake isungwa mu makako ae nti mumashurukara, anga burema abe ikosa riti-riti. Ina mukomenwa isimira eMwasi Wakonda wa Ongo na ntimusimana na ntibanu muri na maa. Kiro musia emwinyihiro ngu waninkwanga banu murekia murukira eMwasi Wakonda wa Ongo. eMwasi wakonda ngo wamaturwa kuri ebea bati b'echuo hano, na ani Poro ngie mukori wae. Ngebumbo, namoere eminubo nji yetange mo ani bushwa ninu. Ietere erinuba rani mu mubi, n'iberereshange eminubo nji yasianga Kirisitu bushwa n'emubi wae, ngerieba mbu ekanisa. Ani ngie mukori w'ekanisa itukana n'emurimo ngu wanininkanga Ongo bushwa ninu. Emurimo ngo nti itura eMwasi Wakonda muriira. eMwasi Wakonda ngo, nge wabisangae itukire kare-kare, ina ke wamashea o kuri ebea bae. Bushwa mbu Ongo wasondanga ishea ebea mbo enama yanchi chabisa we ekiri n'ebutumba bukiri mbu ebwaronjanga we bushwa n'ebea bati. N'echabisae ncho ngerieba mbu Kirisitu uri kumunda ninu, nae nguturishiengi emwinyihiro mbu twabeseyo mu busime bwa Ongo. Bushwa nancho tusheange Kirisitu kuri ebea bati. Tutondengi n'ihana kira mwea mu butesa buti kongo twasake ebea bati ihiere ibesa bea b'iira mu bunakima bwabo na Kirisitu. Bushwa nancho, nikorange n'ikwisumya mu bukwakare buninkwange ani na Kirisitu imbu busingwange nakora na maa.
TRADUCTION BILBE EN KINYANGA. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.