Yohana 21

Yesu wasaire ebanafunsi bae barinda

1Kuruma nambyo, Yesu wasaire tu ebanafunsi bae mwendende n'enyansa ya ku Tiberia. Na buno nge bwakianga wasaire bo. 2Ebabesenga mpo nti Simoni Petero, Tomasi ingu wabesenga ubikirwange tu mbu Iyasa, Natanaere wa murubungu rwa ku Kana ku Ngariraya, n'ebana ba Sebendayo hima n'ebampe banafunsi babi ba Yesu, ebati babesenga hima. 3Simoni Petero were babine mbu: «Nenda karoba bikwa.»

Nabo bamwire mbu: «Nabate hotu twenda nabe.»

Nampo benda, bakime mu mutumbu. Bároba ebutu buti na ntíbasheenga kikai. 4Mu muranga-ranga, Yesu wasungwa mwendende n'enyansa, ina ebanafunsi bae ntíbamuteereranga mbu iwe. 5Nampo Yesu washisha bo mbu: «Ebana bani, mbeni mumashee bikwa?»

Nabo bamusako mbu: «Anga.»

6Iwe were bo mbu: «Murekere ekakira kinu muruharo rw'ekwabume rw'emutumbu nampo mukushee bikwa.»

Nampo barekera ekakira, nabo bafundwa ikurura ko, bushwa mbu kabesenga ngie karisere bikwa bingi.

7Ngebumbo emwanafunsi ngu wabesenga washimwa na Yesu were Petero mbu: «Nyere Kuritu uno.» Simoni Petero warekia wamarukira mbu Nyere Kuritu ngo, wámbara enchangi yae bushwa mbu wabesenga munkanga, nae witaa ekusi.

8Ebampe banafunsi beya mu umpe mutumbu ntibakururange ekakira inki kabesenga karisere bikwa. Ntíbabesenga kore nguru n'ekirindo, habesenga hasia ho buna metere iyana.

9Barekia beya ha kirindo, basunga bikwa byasokerwa mu kasha, na mukati. 10Yesu were bo mbu: «Murishe muhango w'ebikwa mbi ebyamaroba banu.»

11Nampo Simoni Petero wakime mu mutumbu, wakurura ekakira na mu kirindo. Nako kabesenga kamarisa bikwa bikiri-bikiri miya nima na makumi asanu na bishatu. Nakiro mbu byabesenga bingi mbo, ekakira ntíkabengukanga. 12Yesu were bo mbu: «Mwiye karisa.» Kusira anga na mwanafunsi uma werekanga umushisha mbu iwe ng'inye, bushwa mbu basibanga mbu Nyere Kurwabo ngo. 13Nampo Yesu wakensere hari bo, watinge emukati, wabanyie bo. Watinge hotu ebikwa, wabanyie hotu bo. 14Rino nge ra meta ashatu Yesu usairengi ebanafunsi bae ituka wafuka.

Yesu bana Petero

15Barekia bamakinda irisa, Yesu washisha Simoni Petero mbu: «eSimoni musike wa Yohana, mbeni unishima irenga bano?»

Nae wamusako mbu: «Nanki eNyere Kuritu, ǒngo'si mbu nakushima!»

Yesu wamwire mbu: «Ranga ebyana by'esamburi sani.» 16Wamwire tu r'emeta abi mbu: «eSimoni musike wa Yohana, mbeni unishima?» Nae wamusako mbu: «Nanki eNyere Kuritu, ǒngo'si mbu nakushima!» Yesu wamwire tu mbu: «Ranga esamburi sani.» 17Kuruma nampo Yesu wamushisha r'emeta ashatu mbu: «eSimoni musike wa Yohana, mbeni unishima?»

Nampo Petero watindibara bushwa mbu Yesu wamashisha meta ashatu mbu kuba wamushima. Bushwa nancho wamusako mbu: «eNyere Kuritu, ǒngo'si ebiti. Ǒngo'si mbu nakushima!»

Yesu wamwire mbu: «Ranga esamburi sani. 18Nikwirengi muriira mbu: entambi ubesenga mushukira, ubesenga ǒngo wimbarichange ǒngo wisine n'ienda nku ekwashima ǒngo. Ina entambi ukubese mukungu, ukoro emine yabe na umpe mwea ng'usekwambicha n'ikuria mpi entíhashima ǒngo.» 19Yesu wakweba ebinwa mbyo mwishea Petero eroku ndu rusekwayo we, n'eroku ndo rusesingwayo Ongo watatwa. Kuruma n'erieba ebinwa mbyo, Yesu wamwire mbu: «Nimise!»

Yesu n'emwanafunsi ingu washimae

20Nampo, Petero wikebera, wasunga kuruma nabo emwanafunsi ngu ewabesenga washimwa na Yesu. Iwe nge wisekenga mu bukuba bwa Yesu entambi y'eririsa ebio, n'imushisha mbu: «eNyere Kuritu, inye nge usekusibura?» 21Entambi Petero wamusunganga, washisha Yesu mbu: «eNyere Kuritu, mbeni kinki nge kisesaire emwanafunsi uno?» 22Yesu wamusako mbu: «Kuba nashima mbu emwea uno wabesi ho ieya nambu busekiayo neya, ekinwa ncho ntíchakukae! Ǒngo nimise!»

23Bushwa nancho, banafunsi bingi baanikira mbu emwanafunsi ngo utakwiyo. Ina Yesu ntwebanga mbu utakwiyo, ina wakweba mbu: «Kuba nashima mbu wabesi ho ieya na mbu busiyayo ani, ekinwa ncho ntíchakukae.»

24N'emwanafunsi uno nge kariho k'ebinwa bino, na nge wakuandika byo. Nabate tosi mbu ebyameba we b'iira.

Yesu waronjanga bimpe ninwa bingi

25Yesu waronjanga bimpe binwa bingi. Ina ebiti byamuandikwange, kongo echuo kiti kitamukochange ishee impi hamubikwange ebitabo mbi ebyamuandikwange.