Yohana 20

Erifuka ra Yesu

(Mat 28.1-8; Mar 16.1-8; Ruk 24.1-12)

1Murotu rw'eriinga, mu muranga-ranga, ntikukiri kwasiro, Maria wa ku Makitara wenda hisinda. Warekia wameya ho wasunga erikoi ndi rabesenga rabumbe erisinda ntiramashikwa. 2Nampo wenda tete kuri Simoni Petero na kuri eumpe mwanafunsi ngu ewabesenga washima Yesu, n'iere bo mbu: «Bamakuto ekinda cha Nyere Kuritu murisinda, na ntítosi ehamaria bo cho.» 3Nampo Petero n'eumpe mwanafunsi ngo benda hisinda. 4Ebababi babesenga batibitange, ina emwanafunsi umpe ngo watibita irenga Petero, na weya waroso hisinda. 5Windama, n'irungurira murisinda, wasunga esanchangi nti samaterekwa kumushi, ina ntwakimenga. 6Nampo Simoni Petero weya kuruma nae n'ikime murisinda. Wasunga esanchangi nti samaterekwa kumushi. 7Wasunga hotu echangi nji yabesenga yabumbe emuntwe wa Yesu. Enchangi njo ntíyasonyiwanga n'esimpe, ina yabesenga yamondondwa n'iterekwa kwahehe mu bumpe buari. 8Nampo emwanafunsi ingu wasonderenga ekwesinda, nae wakime hotu. Wisungire n'isimira. 9Rabesenga mbo bushwa mbu ebanafunsi babesenga nensi ntíbateerera eMitiro Yashuruukara eyeba mbu Yesu wahwa ifuka. 10Kuruma nambyo, ebanafunsi babi mbo bakuruka ku kwabo.

Yesu wishea kuri Maria wa ku Makitara

(Mat 28.9-10; Mar 16.9-11)

11Maria wabesenga wasimana kwihi n'erisinda, nt'urengi. Wakianga urengi, windama n'irungurira mu risinda, 12wasunga bamaraika babi ntibambara nchangi sa sana ntibarika mpi habesenga ekinda cha Yesu. Uma wabesenga mu ruharo rw'emuntwe na umpe mu ruharo rw'emindi. 13Ebamaraika mbo bámushisha mbu: «Ekoyo, mbeni ǒngo urengi bushwa nki?» Nae wasako bo mbu: «Bushwa mbu bamakuto ekinda cha Nyere Kuritu, na ntínosi hakuria bo cho.» 14Warekia wamakinda ieba ebinwa mbyo, w'ikebera, wasunga Yesu ntwasimana mpo, ina ntwamuteerenga. 15Yesu wamushisha mbu: «Ekoyo, mbeni ǒngo urengi bushwa nki? Mbeni ǒngo usondange inye?»

Maria wáhaka mbu muhingi w'erishwa ndo, wamwire mbu: «Emukwakare, kuba ke ǒngo ng'ukukuto ekinda chae, n'iri impi hakuria ǒngo cho, kongo nenda karinga cho.» 16Yesu wamwire mbu: «Emaria!» Nae w'ikebera, n'ieba mu Kieburania mbu: «Raboni», ngerieba mbu: «Muhani.» 17Yesu wamwire mbu: «Ang'initinge mo, bushwa mbu ntinensi nenda kwa Tita. Ina enda kuri banakitu n'iere bo mbu nenda kwa Tita iwe hotu nge Tita winu, iwe nge Ongo wani na Ongo winu hotu.» 18Nampo Maria wa ku Makitara wenda kature ebanafunsi emwasi mbu wamasunga Nyere Kuritu, na iwe ngi wamamwere ebinwa mbyo.

Yesu wishea kuri ebanafunsi bae

(Mat 28.16-20; Mar 16.14-18; Ruk 24.36-49)

19Mu murisisi y'erotu rw'eriinga, ebanafunsi bakumanana mu numba n'esandubi nti sarindikwa, bushwa mbu babesenga basubaha ebakwakare b'eBayuta. Hiha-hiha Yesu wasaire bo n'isimana munkati nabo, n'iere bo mbu: «Buhoro kuri banu!» 20Kuruma n'erieba mbo, Yesu washea bo emine n'erukanga rwae. Nampo ebanafunsi bakokoma barekia basunga Nyere Kuritu. 21Yesu were tu bo mbu: «Buhoro kuri banu! Ebwakianga Tita wani wanituma, nani hotu nabutuma.» 22Warekia wamakinda ieba ebinwa mbyo, wábuhe bo muka n'ieba mbu: «Mushei eMutima Washurukara. 23Ebea bati ebasesasira banu esansambi, basesasirwa, n'ebati ebatasasiri banu, batasasirwi.»

Yesu na Tomasi

24Ina Tomasi, ingu ewabikirwa mbu «Iyasa», wabesenga uma mu banafunsi ikumi na babi, wabesenga nturi hima nabo mu ntambi Yesu weyanga. 25Ebanafunsi bampe bamwire mbu: «Twamasunga Nyere Kuritu.» Ina Tomasi wasako bo mbu: «Kuba ntínasunga ebiteerere by'emisumari mu mine yae n'itereka emurimba wani mu sankoru s'emisumari mu mine yae, na kuba ntínaturana mu rukanga rwae, ntamukocha isimira.» 26Rarekia rarengeka iinga rima kuruma nampo, ebanafunsi ba Yesu bakumanana tu mu numba njo, nampo ke Tomasi wabesenga hima nabo. Akiro mbu esandubi sabesenga sarindikwa, Yesu wasaire tu bo, wasimana munkati nabo n'ieba mbu: «Buhoro kuri banu!» 27Kuruma nampo were Tomasi mbu: «Tereka emurimba wabe hano na ukai emine yani. Oró emwine wabe na turana mu rukanga rwani, kongo kiro ubesa tu na koha, ina simira.» 28Tomasi wamusako mbu: «Nyere Kuritu na Ongo wani!» 29Na Yesu wamwire mbu: «Umasimira bushwa mbu umanisunga? Bakasanirwa imbi ebasimirange na nti tíbasunga!»

Emwanikiri w'ekitabo kino

30Yesu washeanga bimpe biteerere bingi kuri ebanafunsi bae imbi ntíbyaandikwa mu kitabo kino. 31Ina ebiteerere ebyamaandikwa mu kitabo kino, byaandikwa kongo musimira mbu Yesu ngi Kirisitu, Musike wa Ongo, murimusimira mushei ekaramo k'ematu ati mu rina rae.