Yohana 19

1Nampo, Pirato weba mbu batingi Yesu n'imurasa tushushu. 2Ebasura baruka kakumbu ka bisu biri na menke, n'imwambicha ko hiyo n'emuntwe. Bamwambicha na nchangi ya ngora. 3Benda bakeserengi kwihi nae, n'imwire mbu: «Twakukea eMwami w'eBayuta!» Babesenga hotu bamurasange bihi. 4Pirato wasaa tu habutara n'iere eBayuta mbu: «Murukire! Niburishiengi we hano habutara, kongo musiba mbu ani ntínasunga kinwa nchi chamusingwa wahukumiwa.» 5Nampo, Yesu wasaa habutara, ntwambara ekakumbu k'ebisu biri na menke, n'enchangi y'engora. Pirato were ebea mbu: «Emwea winu nge uno!» 6Ina entambi ebakwakare b'ebakuhani n'ebarangi mbo barekia bamusunga, bakua n'ieba mbu: «Mutundike mu musaraba! Mutundike mu musaraba!»

Pirato were bo mbu: «Mumutingi banu bisine n'imutundika, bushwa mbu ani ntínasunga kinwa nchi chamusingwa wahukumiwa.»

7eBayuta bamusako mbu: «Bate turi na momba. Itukana n'emomba ngo, wakomenwa ishurwa, bushwa mbu w'ibikirange mbu Musike wa Ongo.»

8Pirato warekia wamarukira ekinwa ncho, wakwa tu boba nguru. 9Wakime tu mu numba yae n'ishisha Yesu mbu: «Mbeni ǒngo mwisa kunye?» Ina Yesu ntwamusakonga. 10Nampo Pirato wamwire mbu: «Mbeni nt'ushima ieba nani? Nt'ǒngo osi mbu niri n'ebukwakare bwerikubora n'ebwerikutundika mu musaraba?» 11Yesu wamusako mbu: «Ǒngo usira bukwakare buti-buti kuri ani, ina ho ebwaninkwanga ǒngo ituka mu mbingu. Bushwa nancho, ewakunisibura kuri ǒngo waria nsambi nkiri nguru.»

12Itukire entambi njo Pirato wasonda buni bwamubora we Yesu. Ina eBayuta bakua nguru, n'ieba mbu: «Umobora emwea uno, nti tíǒngo mira w'emwami w'eBaroma. Kira mwea ngu ewironjange mwami, ukwanyange emwami wa ku Roma!» 13Pirato warekia warukira ebinwa mbyo, wasaisha Yesu habutara. Warika mu kitumbi ch'ehukumu impi habikirwa mu ki Eburania mbu «Ngabata». Ngerieba mbu «Sakafu ya makoi.» 14Erotu ndo rwabesenga otu rwibungure erotu rwekibimbi ch'ePasaka, buna ntambi mutuba. Pirato were eBayuta mbu: «Emwami winu nge uno!»

15Ina bakua n'ieba mbu: «Mushure! Mushure! Mutundike mu musaraba!» Pirato washisha bo mbu: «Mbeni banu muhunange nitundike emwami winu mu musaraba?» Ebakwakare b'ebakuhani basako mbu: «Bate tusira umpe mwami irenga emwami w'eBaroma.» 16Nampo Pirato wasibure bo Yesu, kongo watundikwa mu musaraba.

Yesu watundikwa mu musaraba

(Mat 27.32-44; Mar 15.21-32; Ruk 23.26-43)

Nampo batinge Yesu. 17Yesu watuka murubungu ntwaria emusaraba wae iya nampi ehabikirwa mu kieburania mbu «Ngoringota», ngerieba mbu «Ou rwa kahangasi.» 18Nampo nge hatundike bo Yesu mu musaraba na bampe bea babi, uma muruharo rwae rw'ekwabume na umpe muruharo rwae rw'ekurembe. 19Pirato weba mbu baandike mu kisai n'itereka cho mu musaraba. Erwandiko ndo rwaandikwanga mbu: «Yesu wa ku Nasareti, Mwami w'eBayuta.» 20Erwandiko ndo rwabesenga rwaandikwa mu mwebe w'eKieburania, Kirumi na Kikiriki. Bayuta bingi babesenga basomange erwandiko ndo, bushwa mbu impi hakianga baria Yesu mu musaraba habesenga kwihi na ku Yerusaremu. 21Nampo ebakwakare b'ebakuhani bere Pirato mbu: «Ang'iandika mbu: ‹Uno nge mwami wa Bayuta›, ina andika mbu: ‹Emwea uno wakweba mbu, iwe nge mwami w'eBayuta.›» 22Pirato wasako bo mbu: «Ebyamaandika ani, byamaandikwa!»

23Ebasura barekia bamakinda itundika Yesu mu musaraba, batinge esanchangi sae n'ibanya to mihango inye, baninka kira musura muhango. Batinge n'eropo yae, eropo njo yabesenga ntyarandwa ina yabesenga yatunganyiwa na nchangi nima itukire murikoti ieya na mu bisando. 24Ebasura bashishana mbu: «Kiro twabenga eropo ino, ina turekere mishari, kongo twasiba kuba yasebese yanye.» Ebinwa mbyo byaronjiwanga mbo, kongo byabererera ebyaandikwa mu Mitiro Yashurukara mbu: «Bakubanya esanchangi sani n'eropo yani bakurekere yo mishari.» Ebinwa mbyo ngi byaronjanga ebasura.

25Nampo, habesenga hasimana bomina banye imbi babesenga kwihi n'emusaraba wa Yesu. N'ebomina mbo nge bano: Nina wa Yesu, na mwisiabo nina, Mariamu mukari wa Kereopa, na Maria wa ku Makitara. 26Yesu warekia wamasunga nina mpo n'emwanafunsi ngu ewabesenga washima we, ntwasimana kwihi nae, were nina mbu: «Ekoyo, uno nge musike wabe.»

27Kuruma nampo, were n'emwanafunsi ngo mbu: «Uno nge nsoko.» N'itukire entambi njo, emwanafunsi ngo wenda na Maria kukwae.

28Ebiti mbyo byakianga byameta, Yesu wateerera mbu wamaheya emirimo yae iti. Nampo weba mbu: «Nakwa mbusha.» Webanga mbo kongo imbi byaandikwa mu Mitiro Yashurukara byabererera.

29Nampo habesenga kambiri karisa ndifai nji yasua nguru, Ebasura barubika kabe ka nchangi mu ndifai njo, bamina ko mu useke n'iria ko Yesu mu bunu. 30Yesu warekia wamarora mu ndifai njo, weba mbu: «Ebiti byamabererera!» Nampo waombya erikoti, n'ikera emutima.

31Erutu ndo rwabesenga rwirange eSabato nsindu. Bushwa nancho eBayuta ntíbashimanga mbu ebinda by'ebea mbi ebatundikwa bisie mu musaraba bushwa mbu erotu ndo rwabesenga otu rukiri nguru. Bushwa nancho bakonga Pirato mbu bánoe emindi yambi ebatundikwa kongo bakwa tete, n'ebinda byabo bitunjiwe. 32Nampo ebasura beya, bánoa emindi y'emwea waroso, na w'emeta abi yambi ebatundikwanga hima na Yesu mu musaraba. 33Ina barekia beya hari Yesu, bakumana ntwamakwa, bushwa nancho ntíbamunoanga tu emindi. 34Ina musura uma wamukura eritumo mu nkanga. Hiha-hiha echama n'emecha byasaa. 35Emwea ingu ewasunganga ebinwa bino nge kariho kabyo, n'ebukariho bwae bw'iira. Na osi mbu webange iira, kongo musimira hotu. 36Ebinwa mbyo byakuronjiwa mbo, kongo byabererera ebinwa mbi byaandikwa mu Mitiro Yashurukara mbu: «Bata noí anga n'ikuwa rae rima.» 37eMitiro ya Shurukara yeba tu mbu: «Baseya katangura ewakukura bo eritumo.»

38Kuruma n'ebinwa mbyo, Yosefu, wa ku Arimatayo, wakonga Pirato mbu wakutu ekinda cha Yesu. Yosefu wabesenga uma mu banafunsi ba Yesu ina mukwibisa, bushwa mbu wabesenga usubahange ebakwakare b'eBayuta. Pirato warisia. Nampo, Yosefu wenda kakuto ekinda cha Yesu. 39Na Nikondemu, ingu ewenderenga Yesu otu ruma mutu, nae weya hotu. Wabesenga urishange buna biro makumi ashuta bya marashi abesenga asonyiwa na mwaka. 40Ebababi batinge ekinda cha Yesu, bamina cho mu nchangi nsi satirwa marashi anunkange shu itukana n'emwenjo wambu butaanga eBayuta emwea. 41Hatundikenga bo Yesu, habesenga ishwa. Na mu rishwa ndo, habesenga isinda rishasha, ndi rabesenga nensi ntíratawa mo mwea. 42Na murisunga mbu erotu ndo rwabesenga otu rwerirange eSabato y'eBayuta, bushwa nancho, bataa Yesu murisinda ndo bushwa mbu rabesenga kwihi.