TRADUCTION BILBE EN KINYANGA
Yohana 18
Eriminwa ra Yesu
(Mat 26.47-56; Mar 14.43-50; Ruk 22.47-53)
Yesu warekia wamakinda ieba ebinwa mbyo, wenda n'ebanafunsi bae n'isoka muo mwiri w'ekisocho cha ku Kindoroni. Ebati bakime murishwa erabesenga mpo. Yuta ngu ewabesenga wamakinda imusibura, wabesenga osi mpo, bushwa mbu Yesu wabesenga ukumanananga meta mingi nko n'ebanafunsi bae. Yuta waringa kikembe cha basura hima n'ebarangi mbi ebatumwa n'ebakwakare b'ebakuhani n'eBafarisayo. Weya nabo murishwa ntibahata matara, tusuku na bikai bikwana. Ngebumbo, Yesu wabesenga iye osi ebinwa biti mbi ebisemwiyere, wendere bo n'ishisha bo mbu: «Mbeni banu musondange nye?»
Bamusako mbu: «Yesu wa ku Nasareti.»
Yesu were bo mbu: «Ani nge uno.»
Na Yuta, ingu wabesenga wamakinda imusubura, wabesenga wasimana mpo hima nabo. Yesu warekia wamere bo mbu: «Ani nge uno», bakuruka manyuma n'ikire. Yesu were tu bo mbu: «Mbeni banu musondange inye?»
Nabo beba mbu: «Yesu wa ku Nasareti.»
Yesu wasako mbu: «Namakinda ibwere mbu nge ani. Kai kuba banu munisondange, mureki bano.» Byabesenga mbo kongo ekinwa chabererera nchi chabesenga chameba Yesu kubusondori mbu: «Ntinakuriminya anga na uma mu'mbi ebakunininka ǒngo.»
Simoni Petero wabesenga uri na mbenge, wakuto yo n'ikera emukori w'ekuhani mukiri ekote kwae kw'ekwabume. Emukori ngo erina rae nge Mariko. Ina Yesu were Petero mbu: «Kurucha embenge yabe mu hara! Rakomenwa n'omu erusara rw'eminubo nji eyakunininka Tita.»
Yesu warierwa mu makako a Anasi
Nampo, ekikembe ch'ebasura n'emukwakare wabo, hima n'ebarangi b'ebakwakare b'eBayuta, batinge Yesu n'imumina. Bamuria kasa kwa Anasi. Anasi wabesenga ishibe wa Kayafa, ingu ewabesenga kuhani mukiri mu kiranga ncho. Kayafa ngo nge washǒreshanga eBayuta mbu rakomenwa mwea uma wakwe bushwa n'ebea bati.
Petero watuna Yesu
(Mat 26.69-70; Mar 14.66-68; Ruk 22.55-57)
Simoni Petero na umpe mwanafunsi bamisa Yesu. Emwanafunsi ngo, wabesenga usibirwe n'ekuhani mukiri, bushwa nancho wakime hima na Yesu mu butara bw'enumba y'ekuhani mukiri. Ina Petero wasimana habutara kwihi n'erubi. Emwanafunsi umpe ngo, ewabesenga usibirwe n'ekuhani mukiri, wasaa habutara, weba n'emumina ngu wabesenga urangange erubi, nae wareke Petero wakimi kumunda. Emumina ngo were Petero mbu: «Mbeni na ǒngo hotu uma mu banafunsi b'emwea uno?»
Petero wamusako mbu: «Anga! Ani ntí mwanafunsi wae.»
Ebakori n'ebarangi babesenga bamakoya kasha, bushwa mbu entambi njo yabesenga ya keme, nabo ntibasimana mpo ntibonyukarange mu kasha. Petero nae wabesenga wasimana mpo hotu, nae nt'unyukarange mu kasha hima nabo.
Yesu uburanange mu makako ekuhani mukwakare
Ekuhani Mukwakare washisha Yesu bushwa n'ebanafunsi bae na bushwa n'emahano ae. Yesu wamusako mbu: «Nameba n'ebea bati shu-shu, nabesenga nihanange ematu ati mu masinangoki na mu Numba ya Ongo, impi ehakumananenga eBayuta bati. Ntínakweba kinwa mu burimba. Mbeni bushwa nki unishisha? Shisha ebakurikira ebinwa ebwakweba ani, bushwa mbu bosi shu-shu ebwakweba ani.»
Yesu warekia wameba ebinwa mbyo, uma mu barangi imbi babesenga kwihi nae, wamurasa kihi, weba mbu: «Mbeni bumbo nge bwamusako ǒngo ekuhani mukwakare?»
Yesu wamusako mbu: «Kuba nameba bubi, shea ebubi mbo. Ina kuba nameba shu, mbeni umanihumba bushwa nki?»
Kuruma nampo Anasi watuma Yesu ntwamaminwa kwa Kayafa ekuhani mukwakare.
Petero watuna tu Yesu
(Mat 26.71-75; Mar 14.69-72; Ruk 22.58-62)
Mu ntambi njo Simoni Petero wabesenga ukiri mpo nt'unyukarange mu kasha. Nampo bamushisha mbu: «Mbeni na ǒngo hotu uma mu banafunsi b'emwea uno?»
Petero wituna, n'ieba mbu: «Anga! Ani ntí mwanafunsi wae.» Mukori uma w'ekuhani mukwakare, ewabesenga munachabo n'emwea ngu wakianga Petero wakera ekote, wamwire mbu: «Mbeni ntínakukusunga mu rishwa hima nae?»
Ina Petero wituna tu, hiha-hiha, enchongore yakuwa.
Yesu wahukumiwa ikwa
(Mat 27.15-31; Mar 15.6-20; Ruk 23.13-25)
Ebutu bwarekia bwamacha mu muranga ranga, bakuto Yesu kwa Kayafa n'imuria mu numba y'emwami w'eBaroma. Ina eBayuta ibo bisine ntíbakimenga mu numba y'emwami w'eBaroma, bushwa mbu mwironja mbo bamwitirange mikonsi na batamukochange irisa mu bio by'ePasaka. Bushwa nancho, Pirato wákumana bo habutara, n'ishisha bo mbu: «Mbeni musongere emwea uno bushwa nki?»
Nabo bamusako mbu: «Kuba watamubesengi ukorange bibí, kongo ntítwamurisha kuri ǒngo.»
Pirato were bo mbu: «Banu bisine mumutingi na mumuhukumu itukana n'emyomba inu.»
Bámusako mbu: «Bate tusira bukwakare bwerihukumu mwea.» Rakuronjiwa mbo kongo ekinwa nchi chebanga Yesu chabererera murishea eroku ndu rusekwayo we.
Nampo Pirato wakime tu mu numba, wabikira Yesu n'imushisha mbu: «Mbeni ǒngo nge mwami w'eBayuta?»
Yesu wasako mbu: «Mbeni weba mbo itukana n'emyanikiri yabe ǒngo kisine, abe bampe bea nge bamakuture emyasi yani?»
Pirato wasako mbu: «Ani ntí Muyuta. Ebea b'echuo kinu n'ebakwakare b'ebakuhani ibo nge bakukurisha kuri ani. Mbeni ukukia nki?»
Yesu wasako mbu: «Ebwami bwani ntí bw'echuo kino. Ebwami bwani bwamabesengi bw'echuo kino, ebakori bani bamunikwanengi kongo ntásiburwi kuri eBayuta. Ina ebwami bwani ntíbw'echuo kino.»
Nampo Pirato wamushisha mbu: «Ngerieba mbu ǒngo mwami?»
Yesu wamusako mbu: «Ǒngo ngu meba mbu ani mwami. Ani namabutwa n'ieya mu chuo kongo neba eriira. N'ebati mbi bari mu ruharo rw'eriira, banirukirengi.»
Pirato wamushisha mbu: «Mbeni eriira nge nki?»
Pirato warekia wamakinda ieba ekinwa ncho, wasaa tu habutara n'iere eBayuta mbu: «Ani ntínasunga kinwa nchi echamasingwa emwea uno wahukumiwa. Ina itukana n'emwenjo winu, niboborenga ho mwea uma mu mbi ebaminwa, mukibimbi ch'ePasaka. Mbeni mushima n'ibobori emwami w'eBayuta?» Nampo bakuwa nguru mbu: «Ntítwashima emwea uno! Twashima utwobori Baraba!» Baraba ngo wabesenga munyai.
TRADUCTION BILBE EN KINYANGA. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.