Yohana 17

Emahemo a Yesu

1Yesu warekia wamakinda ieba ebinwa mbyo, wararama ekwiyo n'ieba mbu: «eTita, entambi yameya. Shea ebusime bwa Musike wabe, kongo Musike wabe washea ebusime bwabe hotu. 2Ukumuninka ebukwakare bw'erisimanire ebea bati, kongo waninka ebea bati ekaramo k'ematu ati. 3N'ekaramo k'ematu ati nti ikusiba ǒngo Ongo w'eriira na Yesu Kirisitu ewatumanga ǒngo. 4Ani namakutata ǒngo munkati n'echuo bushwa namakinda emurimo ngu wanininkanga ǒngo. 5Na ngebumbo eTita, nininke busime kwihi nabe, busime mbu ebwasusana nambu ebwabesenga buri nani hima nabe kubusondori n'eribumba echuo.

6«Namakushea mu bea mbi ebanininka ongo, urondora bo mu nkati ne chuo. Ibo babesenga bea babe, na ǒngo ukuninika bo, nabo bakumisa ekinwa chabe. 7Ngebumbo bamateerera mbu ebiti ebyaninikanga ǒngo byatuka ku kwabe, 8bushwa mbu namature bo ebinwa mbi ebyanerenga ǒngo, nabo bamasimira byo. Bamakinda iteerera mbu nakutuka kuri ǒngo n'isimira mbu ǒngo ng'ukunituma.

9«Nihemengi bo mbu, ntangaheme ebea b'echuo, ina imbi ebanininka ǒngo, bushwa mbu ibo babe. 10N'ebiti biri nani byabe, n'ebiti biri nabe byani, nani namatatwa bushwa nabo. 11Ani ntariki tu mu chuo kino, ina ibo bakiri mu chuo, nani nenda ku kwabe. eTita ǒngo ngu ushurukara, ranga bo mu bukwakare bwerina rabe, erina ndi raninikanga ǒngo, kongo babese mu bunakima imbu eburi bate mu bunakima. 12Entambi nabesenga hima nabo, nakuranga bo mu bukwakare bwerina rabe, nge rina ndo eranininka ǒngo. Nakuranga bo na kusira na uma ngu ewakurimina, ina ho ingu ewahwanga irimina, kongo eMitiro Yashurukara yabererera. 13Ina nakuruka ke ku kwabe, nani nebange ebinwa bino nikiri mu chuo, kongo erimoa rani rikiri rabese kumunda nabo. 14Ani namatura ekinwa chabe kuri bo, n'echuo chamabaa bo bushwa mbu ibo ntí b'echuo, eburi hotu ani ntíw'echuo. 15Ntanga kuhema mbu ukutu bo mu chuo, ina nikuhemange mbu urange bo n'emubisha Mushumbu. 16Ibo ntíb'echuo, eburi hotu ani ntíw'echuo. 17Shuurura bo bisibure kuri ǒngo mwietere ense y'eriira, ngerieba mbu munse y'ekinwa chabe ch'eriira. 18Imbu bwakianga unituma mu chuo, nani hotu natuma bo mu chuo. 19Ani n'isibura kuri ǒngo bushwa nabo, kongo nabo hotu bisibura r'eriira kuri ǒngo.

20«Ntangaheme bano ho, ina nihemengi hotu ebampe mbi basesimira bushwa n'emahano abo. 21Nihemange kongo ebati babesi mu bunakima, eburi ǒngo Tita kumunda nani, nani kumunda nabe. Nihemange hotu mbu babesi kumunda nitu, kongo echuo kibesi n'isimira mbu umanituma. 22Nani namaninka bo busime imbu ebwanininkanga ǒngo, kongo babese mu bunakima eburi bate mu bunakima. 23Nihemange nibesi kumunda nabo na ǒngo kumunda nani, kongo babese mu bunakima, n'echuo kiteerere mbu ǒngo ng'ukunituma na ushima bo imbu bwanishima ǒngo.

24«eTita, nikuhemange mbu ebanininka ǒngo babesi hima nani impi hasebese ani, nabo basunge ebusime bwani, na nge busime mbu bwanininkanga ǒngo bushwa mbu unishimanga kubusondori n'eribumbwa r'echuo. 25Tita mine eriira, akiro mbu echuo ntíchikosi, ani nikosi. Nambi ebakunininka ǒngo nabo bosi mbu ǒngo ng'ukunituma. 26Namakushea kuri bo, na n'iseenderee ikushea kuri bo, kongo enchimi nji eirinabe kuri ani, ibesi kumunda nabo, nani kisine nibesi kumunda nabo.»