Yohana 16

1«Namabwire ebinwa mbyo, kongo mutureki erinisimira rinu. 2Ebea basebuhensa ituka mu masinangoki abo. Na kuseya matu ngi ebea mbi basebushura, basehaka mbu bakorengi Ongo. 3Baseronja mbo bushwa mbu ntíbosi Tita abe ani. 4Ina namabwere mbo, kongo entambi njo isekiya yeya, musubukie ebyakubwere ani.

Emurimo w'eMutima Washurukara

«Ntínakubwere ebinwa bino mu ntangiro bushwa mbu nakubesenga nikiri hima ninu. 5Ngebumbo, nakuruka kuri ngu wanitumanga na kusira na uma mu banu eunishishange mbu: ‹Mbeni wenda kuni?› 6Murukwa buhoro mu mitima yinu bushwa namabwere mbu nendange kuri Tita. 7Ina ani nibwirengi iira: rakonda kuri banu ani nendi, bushwa mbu kuba ntínenda, emutaberi ngo watei kuri banu kuba ntínenda. Ina kuba nenda, nǎmutuma kuri banu. 8Nae wasekiyayo weya, wǎsheyayo ebea b'echuo kino shu-shu mbu bamihusa bushwa n'esansambi sabo, na bushwa n'eriombokara rani, na bushwa n'ehukumu ya Ongo. 9Wasenda usheange bo mbu bamihusa itukana n'esansambi sabo, bushwa mbu ntíbakumusimira. 10Wasenda usheange tu bo mbu bamihusa itukana n'eriombokara rani, bushwa mbu nenda kwa Tita, na banu mutunisungi tu. 11Wasenda usheange tu bo mbu bamihusa itukana n'ehukumu ya Ongo, bushwa mbu emukwakare w'echuo kino wamakindi ihukumiwa.

12«Nikiri na binwa bingi b'ibwere, ina nenki banu musira bukwakare bw'iteerera byo. 13Ina emutima ngu w'eriira wasekiyayo weya, wasebwenja mwimisa eriira riti. Iwe watebi mu bukwakare bwae kisine, ina waseba ho mu mbi ebiserukira we, nae wasebuture emyasi yambi ebiseyayo. 14Iwe wasenitata bushwa mbu ebinwa mbi bisebwere we, byatukana nambi ebiri kumunda nani. 15Ebiti mbi biri na Tita, byani. Na bushwa nancho, nakweba mbu ebinwa ebisebwereyo eMutima, bisetukana nambi ebiri kumunda nani.

Bonso na ngoa

16«Kwasia ntambi nkeke, banu mutunisungi, ina kuruma na ntambi nkeke mukunisunga tu.»

17Nampo banafunsi bae bima b'ebeshana mbu: «Iwe watwere mbu kwasia ntambi nkeke tutamusungi, ina kuruma na ntambi nkeke twamusunga tu. Ngebumbo hotu wameba mbo bushwa wendange kwishe. Mbeni ebinwa biti bino byeba buni?» 18Baenderee ishishana mbu: «Mbeni entambi nkeke ngerieba buni? Ntítwateerera ebyebange we.» 19Yesu wateerera mbu basondange imushisha. Were bo mbu: «Banu mushishanange bushwa bw'ebinwa ebyameba ani mbu kwasia ntambi nkeke banu mutunisungi, ina kuruma na ntambi nkeke mukunsunga tu? 20Muriira nibwirengi mbu: mukurire n'itindibara, ina ebea b'echuo basemoa. Mukusibuka, ina ebusubuke bwinu busebunduka imoa. 21Entambi emumina utangirwange, werikiranga ebwae bushwa ntambi yae yerikwikokora ngie yameya. Ina wamakinda kwikokora, utamasubukia tu ebwae mbo, bushwa bwerimoa r'eributwa r'emwana. 22Na ngebumbo banu hotu murukirange ebwae, ina nǎbusungayo tu, na banu mukumoa, na kusira mwea ingu wasekocha ibusubucha tu.

23«Erotu ndo rusekiyayo rweya, banu mutunishishiyo bushwa bw'ekinwa kiti. Muriira nibwirengi mbu Tita wǎbuninka kiti-kiti nchi kisemukonga banu mu rina rani. 24Iya n'enompena nenki nti muhema kikai mu rina rani. Mwenda banu muhemange na banu mukuninkwa, n'erimoa rinu risebese rikiri nguru.

Yesu wahima ebibí by'echuo

25«Namabwere ebinwa bino mu mishinga. Ina kuseyayo matu ingi atebiyo tu ani ninu mu mishinga, ina nabwere eriira bushwa na Tita. 26Erutu ndo rwakii rwameya, mukuhema Tita mu rina rani. Ani ntangeba mbu nabuheme kwa Tita, 27bushwa Tita wisine wabushima. Wabushima banu bushwa mbu munishima n'inisimira mbu natuka kwa Ongo. 28Nakutuka kwa Tita, nani neya mu chuo. Ngebumbo nasia echuo nikuruka kwa Tita.» 29Nampo ebanafunsi bae bamushisha mbu: «Eo umeba shu-shu na nt'ukweba mu mishinga. 30Ngebumbo iwe nt'osi mbu ǒngo'si ebiti na ntirakonda tu mbu mwea wakushishe kinwa. Bushwa nancho twasimira mbu ukutuka kwa Ongo.»

31Yesu washisha bo mbu: «Mbeni musimira ke? 32Kuseya ntambi, nayo yamia, nge ntambi inji isesansabanyiwa mo banu, kira mwea usekweire mu ruharo rwae wisine, na banu mukunisia ani kisine. Ina ntíniri ani kisine, bushwa mbu Tita uri hima nani. 33Nibwirengi ebinwa bino, kongo mubese na buhoro, múmarika mu bunakima hima nani. Mukunubiwa mu chuo. Ina mwininke busumya, bushwa mbu namakinda ihima ebiti bya mu chuo.»