Lontomba
YONA 2
Lobondela lonka Yona
Na boiko, Nkolo atindaki nsi ɛ nɛnɛ emine Yona. Miane mehato mpe matio mahato na mokoka, Yona aliki nko o ikundu inka nsi ɛ nɛnɛ1. Ɔkɔ o ikundu inka nsi, Yona abondelaki bɔnɛ onka Nkolo, Nyambe e nande:
O elaka eliki mi na mahɛi
natotwaki onka wɛ, Nkolo,
mpe onyambolaki;
o molongo monka bawi
nakobeyaki mbɔ onsunge
mpe onzokanyaki.
O nsuhaki o ebale ɛ nɛnɛ,
o nse e mai.
Nalingolamaki na maeta na matimba,
ompomaki
mabombi ma meula.
Naoyahangela mbɔ:
«Mpe lenda naopanzema hɛi na wɛ, Nkolo,
naondi naisie nwɛnɛ Itumba i wɛ i bulɛ.»
Mai maiyaki kii o nkingo e mi.
Mpɔku e moilima mo mɔnɛnɛ monka maeta na matimba moningolaki,
nɔmbi iningolaki o motu momi.
Nasulwaki o lonse lo menkondo,
Mebaho me molongo mo iwa
mendipamenaki bɔbɛlɛ na bɔbɛlɛ,
ya Wɛ, Nkolo Nyambe e mi,
o iyɔngɔ i mpɔku, ɔmbɛliaki na bɔmɔi.
O elaka eliki mi bɛlɛbɛlɛ nokoma moloko,
nakokanenaki nko Wɛ, Nkolo,
mpe lobondela lo mi loiyaki onka wɛ,
kii o Itumba i wɛ i bulɛ.
Baiko bangola bitɛkɔ bipa na matina
tabangobikiama.
Ya mi, nangokwembela lwembo lo matoti,
nangokopa moboma,
nangobaka ndɔbɔ ikɔlɔbwelaki mi.
Oho, mbikiami ele nko onka Wɛ Nkolo!
Na boiko, Nkolo atindaki nsi ɛ nɛnɛ mpe elwaki Yona o mokonda.
Source notes (1)
- Footnote Mɔlɔngɔ moiko mɔkɛtɛmɛ mpe o Mat 12.40. O nkɛti inkina 2.1 ele o motango mo 1.17; 2.1-11 ɛɔhɔ noyala elaka enkina o 2.1-10.
Lontomba. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.