Lontomba
YONA 3
Ilako inka Yona o Ninɛwɛ
Munya monka Nkolo moisiaki notepela onka Yona lotepela lo ipe: «Tɛlɛmɛ, nsɔ o Ninɛwɛ inanga i inɛnɛ mpe obaebie nsango engokohangele mi.» O lotepela loiko, Yona aonaki munya monka Nkolo mpe atɛlɛmɛki noha o Ninɛwɛ. Nsande Ninɛwɛ eliki inanga i inɛnɛ penda, iɔhɔ moto nokela maina mahato ma lɔkɛndɔ nopendia. Yona akɛndɛki boina bo boho na ibondo nolalolake ntepela mbɔ: «Ombiha e maina nyomu inɛi, inanga i Ninɛwɛ ingopitana.» Na boiko, bato bakihi o inanga i Ninɛwɛ bambelaki Nyambe1. Banaki mbɔ bayakihiye mohipili mpe balɔte bitobo bi ilɛbɔ, ɔmɔ na ɔmɔ, ima onka mobati kii onka mɔmbɔlɔ. Oiyaki nsango ɛlɔkɔ onka Nkumu enka Ninɛwɛ, asulwaki o mbata e nande e bonkumu, atungolaki etobo e nande e bokopo, alɔtɔki etobo e ilɛbɔ mpe ahɛbɛnɛki o metoko2. Ombiha atindaki iyoi nolalola nsango eiko o Ninɛwɛ: «Na mokeko monka Nkumu mpe na bakɛndia na nde ehe, eonyangema onka bato, nyama mpe na bibwa bi binɛnɛ na bi bikɛ noyala nkɔlɛ mpe nkomina. Eyale bato, eyale nyama, bankuma bangɔlɔtɔ bitobo bi ilɛbɔ. Moto na moto angototwa na nguya nobeya Nyambe, ɔmɔ na ɔmɔ aboye mbo i nande i mbe mpe bonkulukanya bole o makata ma nande. Nampe Nyambe angobutola bikaneno noumonya lɔbɛli lo nande mpe tangotoboma.»
Na boiko, Nyambe ɛnɛkɛ mbɔ bato ba Ninɛwɛ baobutola meloko mpe baokambia mbo i balɔkɔ imbe, aenzaki bikaneno bi nande mpe taisia nokokia mwano mo nande onga na balɔkɔ.
Source notes (2)
- Footnote Lendaka Mat 12.41; Luk 11.30,32.
- Footnote Aokihi o metoko: Elembetelo e itale na mpe e mahɛi penda, Ezek 27.30.
Lontomba. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.