Nahali Bible
व्यवस्था 6
मोटली उकुम
ज्यो तो उकुम, विद्यु एने नेम हे, जो तुमूह हिकाड़नेन तुमरो बोगवान यहोवा उकुम आपेल हे। तुमू ताह ता देसाम मानज्यो जाह ताबाम लेणे जाण्या हेते; केरीन तु एने तारो बिटोख एने तारो नातण्योक यहोवा बोगवानान बिय मानती लेन, तान सोब विदी एने उकुमा पोर, जो मी तुवाह होमलाड़थु, तारो जीवणो बोर चालती रेय, ता माय तु जुलूम दिह वोर जिवतालो रिहे। एय इस्राएल हुमेल, एने ओहलोच केरनेन चोकसी केर, केरीन काय तारो बोलो एय, एने तारा डायडायान बोगवान यहोवान वचनान गेत ता देसाम, जाहरो दुद एने मोवालान दारे वोयतेह ता जुलूम एय जावो।
एय इस्राएल हुमेल, यहोवा आपणो बोगवान हे, यहोवा एकुच हे; तु तारा बोगवान यहोवाह तारो आखो मोन लागाड़ीन एने आखो जीव, एने आखी ताकेत से मोंग किरज्ये। एने ज्या उकुमे जो मी आज तुवाह होमलाड़थु, ता तारा मोनाम बोणीन रेय। एने तु न्याह तारा सोरा पोऱ्याह सोमजाड़ीन हिकाड्या किरज्ये, एने तु तारा गेराम बोहता, एने वाटे चालते, लुटते, उठते ज्यान चेरचा केऱ्या किरज्ये। एने न्याह तारा आथा पोर निसाणीन रूपा माय बांदज्ये, एने ज्या तारा डोलान विचीम निसाणीन गेत काम देय। तुमू न्याह जिव जिवान गेरान चोवकटा पोर एने हेयरान फाटेक पोर लिखज्ये।
उकुम नाह मान्नेन चेतावणी
जेवी तारो बोगवान यहोवा तुवाह ता देसाम पोचाड़ी, जान बाराम तो अब्राहम, इसाहक एने याकुब नावान तारा डायडाया हिऱ्यो तुवाह आपणेन सुगोण खादो, तेवी तो तुवाह मोठ मोठा एने हाजाला हियोर आपी, जो तु नाह बाणायो, एने हाज हाजी वोस्तु माय बोरायेल गेर जो तु नाह बुऱ्यो, एने खुदेल कुवा, जा तु नाह खुद्यो एने अंगुर ने रूहान वाड़ा, एने जेतुनान जाड़े जाह तु नाह ठाणेल सुतो; ज्यी सोब वोस्तु जेवी तो आपी, एने तु खायीन आफरी जाहे। तेवी तु चेकचिल्यो रिज्ये, नाहते ओहलो नाय एणे जुवे काय तु बोगवानाह विहरी जाय, जो तुवाह मिस्र देसाम रेन गुलामीन गेरा माय रेन बाहेर काढ़ीन लायेल हे। तु तारा बोगवान यहोवाह बिज्ये; ताच ने सेवा किरज्ये, एने ताच ने नावान सुगोण खाज्ये। तु पाराया देवतान, मतलब तारा चारो उगेन देसान माणहान देवतान पासाण मा जाहे; तारो बोगवान यहोवा जो तारी विचीम हे; तो जलन मेलनार बोगवान हे; नाहते ओहलो नाय एणे जुवे काय तारो बोगवान यहोवान राग तार पोर बुड़के, एने तो तुवाह देरती पोर रेन खेतेम केर टाके।
तु तारा बोगवान यहोवान पारेख मा किरहे, जीहे काय तुमू मस्सा माय तान पारेख किरेल एता। तु तारा बोगवान यहोवान उकुमे, पुरावा एने विद्युह, जो तो तुवाह आपेल हे, चेकचिल्यो रेन मानज्ये। एने जो काम बोगवानान नेजरी माय ठिक एने हाजो हे तोच केऱ्या किरज्ये, ता माय तारो बोलो एय, जा हाजाला देसान बाराम यहोवा तारा डायडाया हिऱ्यो सुगोण खादो, ता माय तु जायीन तान होकदार बोण जाहे, काय तारा आखा दुसमोन तार सोमोर रेन सेटा केराय जाय, जीहे काय बोगवान कियेल इतो।
पोशा ओंगाण जेवी तारा सोरा तुवाह फुसे, “जी पुरावा एने विदी एने नेम, जाह मान्नेन उकुम आपणो बोगवान यहोवा तुमूह आपेल हे, तान मतलब काय हे?” तेवी तु तारा सोराह किज्ये, “जेवी आमु मिस्र माय फिरोन राजान गुलाम एता, तेवी यहोवा ताकेतवाला आथा केरीन आमुह काढ़ीन लेन आवो। एने बोगवान आमरी देखताच मिस्र माय फिरोन एने तान आखा गेराणाह दुख आपणार मोठ मोठी निसाणी एने चोमेत्कार देखाड़ेल इतो। एने आमुह तारेन काढ़ीन लेन आवो, केरीन काय आमुह ज्या देसाम पोचाड़ीन, जान बाराम तो आपणा डायडाया हिऱ्यो सुगोण खायेल इतो, ज्याह आपुह होप दे। एने बोगवान आपुह ज्यी सोब विद्यु मान्नेन उकुम आप्यो, तान केरता काय आपु आपणा बोगवान यहोवान बिय माने, एने इह केरीन जेलेम आपणो बोलो एय, एने तो आमुह जिवताला मिले, जीहे काय आजीन दिह हे। केदी आपु आपणा बोगवान यहोवान नेजरीम तान उकुमीन गेत ज्या आखा नेमाह मान्नेन चोकसी केरी, ते ज्यी आपणी केरता न्यायी पोणान काम रेय।”
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.