Nahali Bible
व्यवस्था 5
दोह उकुम
(निर्गमन 20:1-17)
मुसो आखा इस्राएली माणहाह हादिन केयो, “एय इस्राएली जी जी विदी एने नेम मी आज तुमूह होमलाड़थु तो हुमलो, केरीन काय ताह हिकीन चोकसी माय पालेन किरो। आपणो बोगवान यहोवा होरेब बोयड़ा पोर आपु हिऱ्यो वाचा बांद्यो। बोगवान ज्यी वाचा आपणा डायडाया हिऱ्यो नाह, आपु हिऱ्योच बांद्यो, जा न्या आजीन दिह जिवताला हेते। बोगवान ता बोयड़ा पोर आक्ठान विचीम तुमू हिऱ्यो आमने सामने वातु किऱ्यो। ता आक्ठाह बिन तुमू बोयड़ा पोर नाह चेड़ना, केरीन मी बोगवान एने तुमरी विची माय तान वचन केणेन केरता उबरिनो।”
तेवी तो केयो, “तारो बोगवान यहोवा, जो तुवाह मिस्र देसान गुलामीन गेराम रेन काढ़ीन लायेल हे, तो मी हे।”
तु माहु सोड़ीन दिहराह बोगवान केरीन मा मानहे। 1
तु तार केरता काल्ली मुरती गेड़ीन मा बाणावहे, नाह एगदा जेनवेरान एने नाह काल्ली वोस्तुन मुरती बाणावहे, जो उपेर जुगा माय वाली, नाह ते देरती पोर वाली, नाह ते देरतीन नेचो पाण्याम हेत्यु; 2 तु ताह वोंदहे मा एने तान बोक्ती मा किरहे; काहाकाय मी, तारो बोगवान यहोवा जलन मेलनार बोगवान हे, जा मार हेऱ्यो दुसमोनाय मिलेह तान खाराब कामान डेन्ड मी तिसरी एने चोवथी पिढ़ी वोर तान सोराह आपती रेथु; एने जा मार पोर मोंग केरतेह एने मारा उकुमान पालेन केरतेह ता पोर एजार पिढ़ी वोर गीण केरथु। 3
तु तारा यहोवा बोगवानान नाव वायबार मा लिहे; काहाकाय जो यहोवान नाव वायबार लेय, तो ताह निर्दोस नाय ठेरावी। 4
विहेवणेन दिह्याह मानीन चोखालो मिलज्ये, जिहकेरीन बोगवान यहोवा तुवाह उकुम आपेल हे। 5 तु सोव दिह ते मेहनेत केरीन तारो आखो काम किरजे; पुण सातवो दिह तारा बोगवान यहोवान केरता विहेवणेन दिह हे; ता माय तु काल्ली बातीन काम मा किरहे, नाह ते तारी सोरी, नाह ते तारो पावोर पावेरन्यु, नाह ते तारा बुयोल, तारा गेदड़ा, तारा जेनवारे, तारा हेयराम रेणार परदेसी ते दिह काल्लो काम नाय केरी, जा माय तारो पावोर एने पावेरन्यु तार गेत विहवी सिके। तु ज्यी वातीह एर मिलजे काय मिस्र देसाम तु पावोर इतो, एने ताहरो तारो बोगवान यहोवा तुवाह ताकेतवाला आथ एने सुटकारान आथ वोदाड़ीन काढ़ीन लावो, केरीन तारो बोगवान यहोवा तुवाह विहेवणेन दिह्याह मान्नेन उकुम आपेल हे। 6
तारा आईख आबाख ने मान मिलजे, जिहे काय तारो बोगवान यहोवा तुवाह उकुम आपेल हे, जा माय जो देस तारो बोगवान यहोवा तुवाह आपेह ता माय तु जुलूम दिह वोर रेय सिकहे, एने तारो बोलो एय। 7
तु खुन मा किरहे।
तु सिनालो मा किरहे।
तु चोरी मा किरहे।
तु कुणीन विरूद जुठो पुरावो मा दिहे।
तु कुणीन बायकुन लालुच मा किरहे, एने कुणीन गेरान लालुच मा किरहे, एने नाह तान खेतान, एने तान पावोर पावेरन्युन, एने तान बोयलान एने गेदड़ान, एने तान काल्ली बी वोस्तुन लालुच किरहे।
ज्योच वचन बोगवान ता बोयड़ा पोर आक्ठो, एने वादेल, एने बोर आंदारा माय विचीम रेन तुमरी आखी मोंडलीह आयड़ीन केयो, एने ताह रेन वोदार काय नाह केयो, एने ताह तो देगड़ान दुय पाट्यु पोर लेखीन माहु आप दिनो।
बोगवानान उजाला से माणहान बिय जाणो
(निर्गमन 20:18-21)
जेवी बुयड़ो आक्ठाम हेलेगतालो, एने तुमू ता सोब्दाह आंदारान विचीम रेन आवताला होमल्या, तेवी तुमू एने तुमरा गेराणान आखा मुखी मुखी एदमी एने तुमरा डायडाया मार फाय आवा। एने तुमू केणे बाज गीया, “आमरो बोगवान यहोवा आमुह तान तेज एने बोड़ाय देखाड़ेल हे, एने आमु तान बोल आक्ठान विचीम रेन आवताला होमल्या; आज आमु देख लेदा काय खेरीच बोगवान माणहा हिऱ्यो वातु किरेह, तीबी माणुह जिवतालो रिथे। एवी आमु काहा मुरज्यो? काहाकाय ओहली मोटली आक्ठी माय आमु हेलगी जाहु; केदी आमु आमरा बोगवान यहोवान सोब्दा पोशा होमेलहो, ताहार मोर जाहु। काहाकाय आखा माणहा माय रेन कुण ओहलो हे जो आमरी गेत जिवतालो एने आक्ठान विचीम रेन बोलताला बोगवानान बोल होमलीन जिवताला वोचीन रेना? केरीन तु आहने जा, एने जो काय आमरो बोगवान यहोवा केय ताह होमली ले; उवतो जो काय आमरो बोगवान केय ताह आमुह किज्ये; एने आमु ताह होमेलहो एने ताह केरहु।”
जेवी तुमू माहु ज्यी वातु केणे बाजरियेल एता, तेवी यहोवा बोगवान तुमरी वातु हुमल्यो; तेवी तो माहु केयो, “न्या माणहे जी जी वातु तुवाह कियेल हेते तो मी हुमलेल हे; ता जो काय केया तो हाजोच केया। हाजो रेतो काय न्यान मोन जेलेम ओहलोच रेय, काय ता माहु बिती लेन मारो आखो उकुम मानीन चालती रेय, ता माय तान एने तान वोसीन जेलेम बोलो इती रेय। केरीन तु जायीन ताह केय दे, काय जिव जिवान पाड़ावा पोर पोशा जात रिवो। पुण तु न्याच मार आहने उबरी, एने मारा आखा उकुमे एने विदी एने नेम जाह तुवाह ताह हिकाड़नु हे केह, ता माय ताह ता देसान जान ताबाम मी ताह आपण्यो हे माने।”
केरीन तुमू तुमरा बोगवान यहोवान उकुमान गेत केरने माय चोकसी किरज्यो; नाह ते डाखरी उगे फिरहो एने नाह ते जिवड़े उगे फिरहो। जी वाटे चालनेन उकुम तुमरो बोगवान यहोवा तुमूह आपेल हे, ती वाटी पोर चालती रिवो, काय तुमू जिवताला रिहो, एने तुमरो बोलो एय एने जी बुयीन तुमू होकदार रिहो, ता माय तुमू जुलूम दिह्यान केरता जिवताला रेय सिकहो।
Source notes (7)
- Cross-reference लेव्यवस्था 26:1; व्यवस्था 4:15-18; 27:15
- Cross-reference निर्गमन 34:6,7; गिनती 14:18; व्यवस्था 7:9,10
- Cross-reference लेव्यवस्था 19:12
- Cross-reference निर्गमन 16:23-30; 31:12-14
- Cross-reference निर्गमन 23:12; 31:15; 34:21; 35:2; लेव्यवस्था 23:3
- Cross-reference व्यवस्था 27:16; मत्ती 15:4; 19:19; मरकुस 7:10; 10:19; लुका 18:20; इफिसीयो 6:2
- Cross-reference उत्पत्ती 9:6; लेव्यवस्था 24:17; मत्ती 5:21; 19:18; मरकुस 10:19; लुका 18:20; रोमीयो 13:9
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.