Nahali Bible
व्यवस्था 7
बोगवानान सोतान माणहे
(निर्गमन 34:11-16)
उवतो जेवी तारो बोगवान यहोवा तुवाह ता देसाम पोचाड़ देय, जाह ताबाम केरनेन केरता तु जाणे माय हे पोचाड़ी, एने तार सोमोर रेन ता आखा देसाह जा तुवाह रेन वोदार मोठा एने ताकेतवाला सात देसान माणहाह हित्ती, गिर्गाशी, एमोरी, कनानी, परिज्जी, हिव्वी एने यबूसीह काढ़ देय। एने तारो बोगवान यहोवा ताह तारा आथाम होप देय, एने तु ताह आरवी दिहे, तेवी तु ता आखाह खेतेम केर दिज्ये; ता हेऱ्या वाचा मा बांदहे एने ता पोर गीण मा किरहे। एने ता हिऱ्यो वाराड़ मा किरहे एने तान सोऱ्यु हेऱ्यो तारा सोरान वाराड़ मा किरहे, एने तान सोऱ्युह तार सोरा हेऱ्यो वाराड़ मा किरहे। काहाकाय तान सोऱ्यु तारा सोराह मार पासाण चालनेन केरता बोटकाड़ती, एने ताह दिहरा देवतान बोक्ती केरावती, केरीन बोगवानान राग तार पोर बोड़की पोड़ी, एने तो तुवाह जेल्दीच खेतेम केर टाकी। ता माणहा हिऱ्यो ओहलो वेवारो किरज्ये, तान वेदीह ओदार दिज्ये, तान खांबाह तोड़ दिज्ये, तान अशेरा नावान मुरतीह काट दिज्ये, एने तान गिड़ेल मुरत्युह आक्ठा माय हेलगाड़ दिज्ये। काहाकाय तु तारा बोगवान यहोवान चोखाली पोरजा हे, काहाकाय यहोवा देरतीन आखा देसान माणहाम रेन तुवाह निवाड़ लियेल हे।
यहोवा जो तार पोर मोंग केरीन तुवाह निवाड़ लिदो, ज्यान कारेण ज्य नाह एतो काय तुमू गेणती माय आखा देसान माणहा रेन वोदार एता, पुण तुमू ते आखा देसान माणहा माय रेन गेणती माय थोड़ाच एता; यहोवा जो तुमूह ताकेतवाला आथा केरीन गुलामीन गेराम रेन, एने मिस्र देसान राजा फिरोनान आथाम रेन सोड़वीन ले लावो, ज्यान ज्य कारेण हे काय तो तुमू पोर मोंग मिलेह, एने ता सुगोणाह बी पुरो केरने हुदेह जो तुमरा डायडाया हिऱ्यो खायेल इतो। केरीन जाण ले काय तारो बोगवान यहोवा बोरहान लायकीन बोगवान हे; एने जा ता पोर मोंग केरतेह एने तान उकुम मानतेह ता हिऱ्यो तो एजार पिढ़ी वोर तान वाचान पालेन किरेह, एने ता पोर गीण किरती रिथे; पुण जा माणहे ता से दुसमोनाय मेलतेह, तो तान देखताच ता से बुदलो लेन खेतेम किर दिथे; तान दुसमोनान बाराम तो वार नाय लागाड़ी, तान देखाताच ता पोर बुदलो लेय। केरीन ज्या उकुमाह, विदी एने नेमाह, जो मी आज तुवाह उकुम आपथु, चोकसी माय पालेन किरज्ये।
उकुम पालेन केरनेन फोल
(व्यवस्था 28:1-14)
एने तुमू जा ज्या नेमाह होमलीन मानहो एने ज्या पोर चालहो, ते तारो बोगवान यहोवा बी ता गीणवाली वाचान पालेन किरहे, जाह तो तारा डायडाया हिऱ्यो सुगोण खायीन बांदिल इतो। एने तो तार पोर मोंग मेली, एने तुवाह बोरकेत आपी, एने गेणती माय वोदाड़ी; एने जो देस तो तारा डायडाया हिऱ्यो सुगोण खायीन तुवाह आपणे कियेल हे, ता माय तो तारा सोरा पोर, एने एन, नोवालो अंगुरान रूह, तेल एने खेतान पाकी पोर बोरकेत आप्या केरी, एने तारा डोरे एने मेंड्रा बोकड्याह वोड़ती केरी। तु आखा देसान माणहा रेन वोदार बोरकेत वालो रिहे; तारी विचीम एदमी बायकु वांज नाय रेती, एने पालन्या जेनवारे बी वांज नाय रेती। एने यहोवा तार हिऱ्यो रेन आखी बातीन बेमारी सिटो केरी; जी मिस्र देसान मोटली बेमारीह, जिह तु जाणेह, त्युम रेन काल्ल्यु बी बेमारी तुवाह नाय लागणे देय; त्यु सोब तारा दुसमोनाहच लागती। एने देस देसान जोला माणहाह, जाह तारो बोगवान यहोवा तारा ताबा माय केर देय, तु ता सोबाह खेतेम केर दिज्ये; तु ता पोर गीन मा किरहे, एने तान देवतान बोक्ती मा किरहे, नाह ते फांदा माय फोस जाहे।
केदी तु तारा मोनाम सुचे, काय ता माणहे मार रेन वोदार हेते; ते मी ताह किहीक देसाम रेन बाहेर काढ़ सेकुह? तीबी ताह मा बिहे, तारो बोगवान यहोवा फिरोन राजा एने आखा मिस्र देसा हिऱ्यो किरेल हे, तो हास केरीन एर मिलज्ये। मोठ मोठली पारखीन काम, तु तारा डोला केरीन दिख्यो, एने ज्यु निसाण्यु, चोमेत्कार एने जा ताकेतवालो आथ, एने वोदाड़ेल आथान द्वारे तारो बोगवान यहोवा तुवाह काढ़ीन लावो, तान गेत तारो बोगवान यहोवा ता सोब माणहा हेऱ्यो बी केरी जाह तु बिथे। ज्याह रेन वोदार तारो बोगवान यहोवा, तान विचीम गेंडरा बी मोकली, न्या वोर काय ता माय रेन जा वोचीन लिकाय जाती, ता बी तार सोमोर रेन खेतेम एय जाती। तु ताह मा बिहे; काहाकाय तारो बोगवान यहोवा तारी विचीम हे, तो मोटलो एने बिवाड़नेन हारको बोगवान हे। तारो बोगवान यहोवा ता देसाह तार ओंगाण रेन बागे बागे काढ़ देय; ते तु एकदोमुच ताह खेतेम नाय केर सिकहे, नाह ते जेंगली जेनवारे आवीन तुवाह नुकसान पोचाड़ती। तीबी तारो बोगवान यहोवा, ताह तार से आरवी देय, एने जाहुख वोर ता खेतेम नाय एय जाती, ताह वोर ताह जुलूम बोंगलाड़तो रेय। एने तो तान राजाह तारा आथाम होप देय, एने तु तान नाव देरती पोर रेन खेतेम केर दिहे; ता माय रेन कुण बी तार सोमोर उबरेय नाय सेकी, एने सेवली बुखेत तु ताह खेतेम केर दिहे। तु तान देवतान बाणायेल मुरत्यु आक्ठाम हेलगाड़ दिज्ये, मुरती पोर चेड़ायेल होना चांदीन लालुच मा किरहे, एने ताह मा लिहे, नाहते ते तु फांदा माय फोस जाहे, काहाकाय ज्यो तार बोगवान यहोवान नेजरी माय खाराब हे। एने एगदी खाराब वोस्तु तुमरा गेरा माय मा लियावहो, नाह ते तु बी तान गेत खेतेम एय जाणार वोस्तु बुणहे; ताह खेतेम एणार वोस्तु सोमजीन नफरत किरज्ये एने ताह केदी बी मोंग मा किरहे; काहाकाय ती एठी वोस्तु हे।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.