Nahali Bible
व्यवस्था 31:6
Verse 6 is marked below, with the whole chapter around it. Read from the start
यहोशु मुसान उत्तरदिकारी
मुसो जायीन ज्यु सोब वातु इस्राएली माणहाह होमलाड्यो। एने तो ताह ज्य बी केयो, “आज मी एक होव विह वोरह्यान हे; एवी मी चाल फिर नाह सिकेत।” काहाकाय यहोवा माहु कियेल हे, “काय तु ज्यी यरदन नेदीन पार नाय जाय सिकहे।” तार ओंगाण जाणार तारो बोगवान यहोवाच हे; तो ता देसान माणहाह तार ओंगाण रेन खेतेम केरी, एने तु तान देसान होकदार बुणहे, एने यहोवान वचनान गेत यहोशु तार ओंगाण ओंगाण पार जाय। एने जिह केरीन बोगवान एमोरीन राजा सीहोन एने ओग एने तान देसाह खेतेम किरेल हे, तिहेच केरीन तो ता सोब देसाह बी केरी। एने जेवी बोगवान ताह तुमू उगे रेन आरवी देय, तेवी तुमू ता आखा उकुमान गेत ता हेऱ्या वेवारो किरज्यो जो मी तुमूह उकुम आपेल हे। तु ईमोत मेल एने मोजबुत एय जा, ताह मा बिय एने मा गाबराय; काहाकाय तार हिऱ्यो चालणार तारो बोगवान यहोवा हे; तो तुवाह दुको नाय देय एने नाय सोड़ी।
तेवी मुसो यहोशुह हादिन आखा इस्राएली माणहान सोमोर केयो, “ईमोत मेल एने मोजबुत एय जा; काहाकाय न्या माणहा हेऱ्यो ता देसाम जाह बोगवान न्यान डायडाया हिऱ्यो सुगोण खायेन आपणे कियेल इतो, ता तु जाहे; एने तु न्याह तान होकदार बाणाव दिहे। एने तार ओंगाण ओंगाण चालणार बोगवान हे; तो तारी आरही रेय, एने नाय तो तुवाह दुको देय एने नाय सोड़ देय; केरीन मा बिय एने तारो मोन कोमजोर नाय एय।”
एकेक सातवे साल नेम वाचाय जाणे
उवतो मुसा ज्यीच नेम लेखीन लेवी चाकऱ्याह जा बोगवानान वाचान पेटी उखेलन्या एता, एने इस्राएलान आखा डावाला माणहाह होप दिनो। तेवी मुसा ताह उकुम आप्यो, “सात सात वोरह्या वित जाती, मतलब सुटकारान वोरह्या माय खोपड़ीवाला तिवारा पोर। जेवी आखा इस्राएली तारा बोगवान यहोवान ता जागा पोर जाह तो निवाड़ लेय आवीन एकठा एय, तेवी ज्यी नेम आखा इस्राएली माणहाह वाचीन होमलाड़जे। काय एदमी, काय बायकु, काय सोरा, काय तुमरा गावा माय वाला परदेसी, आखा माणहा टुलो किरज्ये काय ता होमलीन हिके, एने तुमरा बोगवान यहोवान बिय मानी, ज्या नेमान आखा वचनाह पालनेन चोकसी केरी, एने तान सोरा जा ज्यी वातु नाह होमल्या ता बी होमलीन हिके, काय तुमरा बोगवान यहोवान बिय ती टेम वोर मानती रेय, जाहुक वोर ता देसाम जिवताला रिहो जान होकदार बोणनेन तुमू यरदन नेदीन पार जाणे बाज रेनाह।”
मुसाह बोगवानान सेवल्यो निर्देस
उवतो बोगवान मुसाह केयो, “तारा मोरनेन दिह आहनेच हेते; तु यहोशुह हादाड़, एने तुमू दुयू मेल मिलापवाला तोम्बु माय आवीन उब रिवो काय मी ताह तार जागे नियुक्त केरूह।” तेवी मुसा एने यहोशु मिलापवाला तोम्बु माय गीया। तेवी बोगवान ता तोम्बु माय वादलान खाम्बा माय लागतो देरसेन आप्यो; एने वादलान खाम्बो तोम्बुन बायणा पोर उबरेय गीयो।
तेवी बोगवान मुसाह केयो, “तु ते मोरीन तारा डायडाया हिऱ्यो मिलन्यो हे; एने ज्या माणहे उठीन ता देसान पाराया देवतान पासाण जान विचीम ता जायीन रेती, एने सिनालो केरनारे बोण जाती, एने माहु सोड़ीन ती वाचाह जी मी ता हेऱ्यो बांदिल इतो, तोड़ती। ती टेम माय मारो राग न्या पोर बोड़की, एने मी न्याह सोड़ीन न्या से मारो मुय लिकाड़ लेह, एने ज्या खेतेम एय जाती; एने जुलूम पिढ़ा एने दुख न्या पोर आव पोड़ती, न्या वोर काय ज्या ती टेम माय केती, ‘काय ज्यी पिढ़ा आमु पोर ज्यान कारेण ते नाह आव पोड़नी, काहाकाय आमरो बोगवान आमरी विची माय नाह रिनो?’ ती टेम माय त्यु आख्यु खाराबीन केरता जो ज्या पाराया देवतान उगे फिरीन केरती, खेरीस न्याह हिऱ्यो रेन मारो मुय लिकाड़ लेह।”
केरीन एवी, तुमू ज्य गीत लेख लिवो, एने तु ज्याह इस्राएली माणहाह हिकाड़ीन पाट केराव दिजे, केरीन काय ज्य गीत तान विरूद मारो पुरावो रेय। जेवी मी न्याह ता देसा माय पोचाडुह, जाह आपणेन मी न्यान डायडाया हिऱ्यो सुगोण खायेल इतो, जा माय दुद एने मोवालान दार वुयेह, जेवी ता पेट बोरीन खायेन आफरी जाती, एने ज्या मात्या थाबा बोण जाती; तेवी ज्या पाराया देवतान उगे फिरीन तान बोक्ती केरने बाज जाती, एने मारो नाकार केरीन मारी वाचा तोड़ देती। जेवी मी न्याह ता देसा माय जान बाराम मी सुगोण खायेल हे, पोचाड़ नाह दिनो, माहु मालुम हे काय ज्या काय काय केल्पना केरने बाज रेनाह; केरीन जेवी जुलूम संकट आव पोड़ती, तेवी ज्य गीत न्या पोर पुरावो देय, काहाकाय न्यान सोरा ज्याह केदी बी नाय विहेरती।
तेवी मुसा तेदीच ज्य गीत लेखीन इस्राएली माणहाह हिकाड्यो।
तेवी बोगवान नुन ने बेटाख यहोशुह ज्यो उकुम आप्यो, “ईमोत मेल एने मोजबुत एय जा; काहाकाय इस्राएली माणहाह ता देसाम जाह न्याह आपणेन मी ता हिऱ्यो सुगोण खायेल हे, तु पोचाड़हे; एने मी सोता तार हिऱ्यो रेह।”
जेवी मुसो ज्या नेमान वचनाह सुरवाती रेन सिवोट वोर पुस्तेक माय लेख दिनो, तेवी तो यहोवान पेटीह उखेलनारे लेवीह उकुम आप्यो। “नेमान ज्यी पुस्तेकीह लेन तुमरा बोगवान यहोवान वाचान पेटीन आहने मेल दिवो, काय ज्यो ताहरो तार पोर पुरावो दिती रेय। काहाकाय तारो दिंगो एने मनमानी केरनो माहु मालुम हे; दिखो, मार जिवतालो एने आरही रिती लेन बी तुमू बोगवाना हेऱ्या दिंगो किरती आयेल हेते; ओवता माहु मोरनेन पासाण बी काहा नाय किरहो! तुमू तुमरा गेराणान आखा डावाला माणहाह एने तुमरा मुखीह मार फाय टुलो किरो, काय मी ताह ज्य वचन होमलावीन तान विरूद जुग एने देरती दुयूह पुरावो बाणावुह। काहाकाय माहु मालुम हे काय मारी मोतीन पासाण तुमू बिलकुर बिगड़ी जाहो, एने जी वाटे चालनेन उकुम मी तुमूह होमलाड़ेल हे ताह बी तुमू सोड़ दिहो; एने आखरी दिह्या माय जेवी तुमू ता काम केरीन जो बोगवानान नेजरी माय खाराब हे, तुमरी बाणायेल वोस्तुन पुजा केरीन ताह राग लागाड़हो, तेवी तुमू पोर पिढ़ा आव पोड़ी।”
मुसान गीत
तेवी मुसो इस्राएलान आखो पोंचाह ज्या गीतान वचन सुरवात रेन सिवोट वोर पुरो केय होमलाड्यो;
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.