Nahali Bible
व्यवस्था 30
बोरकेत एने पोशो बाणावणेन शर्त
ओवती जेवी बोरकेत एने हारापान ज्यु आख्यु वातु ज्यु मी तुमूह केय होमलाड़ेल हे तुवा पोर गिटे, एने तु ता सोब देसान विचीम रेन, जा तारो बोगवान यहोवा तुवाह काड़ीन पोसराव देय, तेवी ज्यु वातुह इर किरज्ये, एने तारा सोरा हिऱ्योच तारा आखो मोन एने आखो जीवा केरीन तारा बोगवान यहोवा उगे फिरीन ता फाय आवहे, एने ज्या सोब उकुमीन गेत जो मी आज तुवाह होमलाड़थु तान वातु मानहे; तेवी तारो बोगवान यहोवा तुवाह बोंदी माय रेन फिराव लावी, एने तार पोर गीण केरीन ता सोब देसान माणहाम रेन जान विची माय तो तुवाह खोवली देय, पुशो टुलो केरी। केदी देरतीन कुपरे वोर तुवाह खोवली देय, तीबी तारो बोगवान यहोवा तुवाह तारेन लेन आवीन टुलो केरी। एने तारो बोगवान यहोवा ताच देसाम पोचाड़ी, जान तारा डायडाया होकदार बुणेल एता, एने तु उवतो तान होकदार बुणहे; एने तो तारी बोलाय केरी, एने तुवाह तारा डायडाया रेन बी गेणती माय वोदार वोदाड़ी। एने तारो बोगवान यहोवा तारो एने तारी वोसीन मोनान खेतना केरी, काय तु तारा बोगवान यहोवाह तारो आखो मोन एने आखा जीवा हिऱ्यो मोंग केरी, जा माय तु जीवतालो रिहे। एने तारो बोगवान यहोवा ज्यु आख्यु हारापान वातु तारा दुसमोना पोर जा तार पोर दुसमोनाय केरीन तार पासाण पोड़ती ताह मोकली। एने तु वुलहे एने बोगवानान वातु हुमेलहे, एने ज्या सोब उकुमाह मानहे जो मी आज तुवाह होमलाड़थु। एने बोगवान तारी बोलायीन केरता तारा सोब कामा माय, एने तारा सोरा, एने जेनवेरान पिला, एने खेतान कामाय माय वोड़ती केरी; काहाकाय बोगवान पुशो तार पोर बोलाय ने केरता तोहलीच मोंज केरी, जिहकेरीन तो तारा डायडाया पोर किरेल इतो; काहाकाय तु तारा बोगवान यहोवान होमलीन तान उकुम एने विदीह ज्यु ज्या नेमान पुस्तेक माय लिखेल हे, मान्या किरहे, एने तारा बोगवान यहोवान उगे तारो आखो मोन एने आखो जीवा केरीन मोन फिरावहे।
देख, ज्यो उकुम मी आज तुवाह होमलाड़थु, तो नाह ते तार केरता जुलूम केठीण हे एने सेटी नाह सोतो। एने नाह ते तो जुगा माय हे, काय तु केय, “कुण आमरी केरता जुगाम चेड़ीन ताह आमरी फाय लेन आवी, एने आमुह होमलाड़े काय आमु ताह माने?” एने नाह ज्यो देरीयान पार हे काय तु केय, “कुण आमरी केरता देरीयान पार जाय, एने ताह आमरी फाय लेन आवी, एने आमुह होमलाड़े काय आमु ताह माने?” पुण ज्य वचन तारी जुलूम आहने हे, पुण तारा मुय एने मोना मायच हे, काय तु ता पोर चाले।
हुमेल, “आज मी तुवाह जीवणो एने मोत, हाजो एने बाक्तो देखाड़ेल हे। काहाकाय मी आज तुवाह उकुम आपथु, काय तारा बोगवान यहोवा पोर मोंग किरज्ये, एने तान वाटी पोर चालज्ये, एने तान उकुम, विदीह, एने नेमान पालेन किरज्ये, जा माय तु जीवतालो रिहे, एने वोदती जाहे एने तारो बोगवान यहोवा ता देसाम जान होकदार बोणने तु जाणे बाज रिनोह, तुवाह बोरकेत आपी। केदी तारो मोन बोटकी जाय, एने तु नाय होमली, एने बोटकीन पाराया देवताह वुंदहे एने तान बोक्ती केरने बाज जाहे। ते मी आज तुवाह ज्यी चेतावणी आप देथु काय तुमू बिलकुर खेतेम एय जाहो; एने जा देसान होक माय लेणेन केरता तुमू यरदन नेदीन पार जाणे बाजरेनाह, ता देसा माय तुमू होवटा दिह रेय नाय सिकहो। मी आज जुग एने देरती दुयाह तुमरी सोमोर ज्यी वातीन पुरावो बाणावथो, काय मी जीवणो एने मोरनो, बोरकेत एने हारापाह तुमरी ओंगाण मिलेल हे; केरीन तु जीवणाच निवाड़ ले, काय तु एने तारो वोस दुयू जीवतालाच रेय; केरीन तुमरा बोगवान यहोवाह मोंग किरो, तान वात मानो, ताह हेऱ्या लेटकीन रिवो, काहाकाय तारो जीवणो एने जेलेमक्यो जीवणो ज्योच हे; एने ज्य किरहे ते जा देसाह बोगवान अब्राहम, इसहाक, एने याकुब, तारा डायडायाह आपणेन सुगोण खायेल इतो, ता देसाम तु वोह रिहे।”
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.