व्यवस्था 32

1एय जुग, मार उगे कान दे काय मी बोलु,

एने एय देरती, मारा मुयान वातु हुमेल।

2मारी हिकवोण पाण्यान गेत पोड़ी,

एने मार वातु ओहटान गेत टोपकी,

जिहकेरीन निल्ला खेड़ा पोर बारीक बारीक पाणी,

एने जाड़ा पोर पाणी पुड़ेह।

3मी ते बोगवानान नावान गोसणा केरूह,

तुमू तुमरा बोगवानान बोड़ायीह मानहो!

4तो सापोर हे, तान काम खेरो हे;

एने तान आखी वाट नियाव ने हेत्यु,

तो खीरलो बोगवान हे, ता माय खोट नाय मिले,

तो खीरलो एने हुतरो हे।

5पुण ज्यी पिढ़ीन माणहे वाकड़ा एने तिरसा हेते;

ज्या बिगेड़ गीया, ज्या तान सोरा नाह सोता; ज्यो न्यान डाग हे।

6एय फोगा एने विणएकल्या माणहे,

काय तुमू बोगवानाह ज्यो बुदलो आपतेह? काय तो तारो आबोख नाय मिले,

जो तुमूह वेचातो लियेल हे? तो तुमूह बाणायेल हे,

एने मोजबुत बी किरेल हे।

7जुनाला कालान दिह्याह इर किरो, पिढ़ी पिढ़ीन वोरह्या पोर विचार केर;

तुमरा आबाख फुसो, एने तो तुमूह केय;

तुमरो डावाला माणहाह सावाल फुसो, एने ता तुवाह केय देती।

8जेवी आखाम रेन मुठो बोगवान एकेक देसाह सोता सोतान ईसो वाट दिनो,

एने एदम्याह आंग आंगे वोहाड्यो,

तेवी तो देसा देसान माणहान हिल इस्राएलीन गेणतीन गेत ठेरायो।

9काहाकाय बोगवानान ईसो तान पोरजा हे; याकुब तान निवाड़ेल सोतान ईसो हे।

10तो ताह जेंगला माय, एने हुनाहाड़

एने आयेड़नारा से बोरायेल रेल्यारेटा माय सापड़ायो;

तो तान चारो उगे रेन तान राखवाली किऱ्‍यो,

एने तान डोलान पापण्यान गेत तान इर किऱ्यो।

11जिह केरीन गुवड़ो तान पांजराह आलवी आलवीन

तान पिलान उपेर उपेर उड़ेह,

तिहेच केरीन तो तान फाके पोसरावीन

ताह तान फाका पोर विस लिदो।

12यहोवा एखालोच तान अगवाय किरती रिनो,

एने ता हिऱ्यो काल्लो पारायो देवता नाह इतो।

13तो ताह देरतीन उच उचे जागे फिरायो,

एने ताह खेतान पाक खावाड्यो;

ताह तो सापरा माय रेन मोवाल,

एने पाकाला सापरा माय रेन तेल चुहाड्यो।

14गायीन खाटालो दुद एने बोकड़ीन दुद, गिदल्यान चेरबी, बोकड्या एने बाशान जातीन मेंडा,

एने गोवान हाजाम रेन हाजो फिट बी;

एने तु अंगुरान रूह पिया केरतालो।

15पुण यशूरून जाड़ो एन लात देणे बाज गीयो;

तु जाड़ो एने मातो बोण गीयो, एने चेरबी माय बोराय जायेल हे;

तेवी तान बाणावणार बोगवानाह सोड़ दिनो,

एने तान सुटकारान सापराह कोम जाण्यो।

16ता पाराया देवताह मानीन ता माय राग उबजाड्यो;

एने खाराब कामे केरीन ताह राग लागाड्या।

17ता बुतड़ान केरता जा बोगवान नाह एता, बोली चेड़ाया,

एने तान केरता ता एनजाण्या देवता एता,

ता ते नोव नोवा देवता एता जा थोड़ाच दिह्याम रेन देखायेल एता,

जाह तान डायडाया केदी बिना नाह।

18जा सापरा माय रेन तु पायदा इनो ताह तु विहरी गीयो,

एने बोगवान जा पोर तारी पायदास एनी ताह बी तु विहरी जायेल हे।

19न्यु वातुह देखीन बोगवान ताह कोम जाण्यो,

काहाकाय तान सोरा सोऱ्यु ताह राग लागाड़ेल एता।

20तेवी तो केयो, “मी ता हिऱ्यो रेन मारो मुय लिकाड़ लेह,

एने देखुह काय तान सेवोट किहीक इथे,

काहाकाय ज्यी पिढ़ीन माणहे जुलूम वाकड़ा हेते एने दुको देणार सोरा हेते।

21ताह ओहली वोस्तुह जा बोगवान नाय मिले ताह मानीन,

माहु माय राग पायदा केऱ्या,

एने तान खाराब वोस्तु केरीन माहु राग लागाड्या,

केरीन मी बी तान उगे रेन जा मारी पोरजा नाय मिले तान मोना माय राग पायदा केरूह;

एने एक फोगा माणहान देसान उगे रेन ताह राग लागाडुह।

22काहाकाय मारा रागान आक्‍ठो बोड़की उठेल हे,

जो आंदारी केलीन थुड़े वोर हेलगती जाय,

एने देरती तिन पाकी हेरीच हेलगी जाय,

एने बोयड़ान पाया माय बी आक्‍ठो हेलगाड़ देय।

23मी ता पोर पिढ़ा मोकलुह;

एने ता पोर मी मारा बेलखाह सोडुह।

24ता काल से बुखल्या रेन कोमजोर एय जाती, एने ईंगाला से

एने केठीण मोटल्यु बेमारी माय पोड़ जाती;

एने मी ता पोर जेनवेरान दात लागाड़ देह,

एने रेजड़ा माय लोलनार गेड़हान जेहेर सोड़ देह।

25बाहेर ता तालवारी केरीन मोरती, एने गेरा माय बिय से;

काय जुवान सोरा एने जुवान सोरी,

काय दुद पिणार सोरा काय डावाला,

आखा इहीच केरीन बोरबाद एती।

26मी कियेल इतो, काय मी ताह सिट सिटो वोर वेर देह,

एने माणहा माय रेन तान एर वोर बुरवी देह;

27पुण माहु दुसमोनान चिड़ ने बिय एती,

ओहलो नाय एय काय दिंगो केरनार उल्टो सोमजीन इह केणे बाज जाती,

‘आमु आमराच जोरा पोर जिकनाह; एने ज्यो सोब बोगवाना से नाह एनो।’

28ज्या देसान माणहे विणएकल्या ते हेते,

एने न्या माय सोमेज नाय मिले।

29हाजो एतो काय ज्या उशार रेता, काय ज्याह सोमजी लेता,

एने सोतान सेवोटान विचार केरता।

30केदी न्यान सापरूच न्याह नाय वेच दितो,

एने बोगवान न्याह दिहरान आथाम नाय हुपतो,

ते ज्य किहीक एय सिकेह काय तान एजारान पासाण एक माणुह पोड़तो,

एने तान दोह एजाराह दुय माणहे नाहाड़ देता?

31काहाकाय जुहलो आपणो सापोर हे,

तिह केरीन तान सापोर नाय मिले, केदी आमरा दुसमोनुच काहा नाय नियाव केरनार रेय।

32काहाकाय तान अंगुर ने वेल सदोम ने वेला माय रेन निकेलनी, एने अमोरान अंगुर ने वाड़ी माय रेन हे;

तान अंगुर जेहराम बोरायेल एने तान गुमसा कोड़वा हेते,

33तान अंगुरान रूह गेड़हान जेहेर,

एने गेड़हान काल्ला हापान गेत जेहेर हे।”

34काय ज्यी वात मारा मोनाम पेरायेल,

एने मारा गोडामा माय सिलबोंद लागाड़ेल नाय मिले?

35पुलटो लेणे एने बुदलो आपणे मारोच काम हे,

ज्य तान पाय सेटेकणे बुखेत देखाय; काहाकाय तान पिड़ान दिह आहने हेते,

जा दुखे ता पोर पोड़न्या हेते ता जेल्दीच आवणे बाज रेनाह।

36काहाकाय जेवी बोगवान देखी काय मारी पोरजान सेक्ती कोम एय गियीह,

एने काय कोंडायेल काय सुटेल, ता माय रेन कुण वुचेल नाह सोतो,

तेवी बोगवान तान माणहान नियाव केरी,

एने तान पावरान बाराम किव केरी।

37तेवी तो केय, “तान देवता का हेते,

मतलब तान सापोर का हे, जा पोर तान बुरहो इतो,”

38जा तान बोलीन चेरबी खाताला।

एने तान पिणी बेट ने अंगुरान रूह पिताला?

ताच आवीन तान मुदेक केरी,

एने तुमरा आड़ा वुले।

39“केरीन तुमू देख लिवो काय मीच तो हे,

एने मार सावाय काल्लो देवता नाय मिले;

मीच मारथु एने मी जीवाड़थु बी;

एने गायला केरथु एने मीच हुदारथु;

एने मारा आथाम रेन कुण वोचाड़ नाह सिकेत।

40काहाकाय मी मारो आथ जुगा उगे उचो केरीन केथु,

काहाकाय मी हामेशान केरता जिवतालो हे,

41केरीन मी विजलीन तालवार ने दार तेज केरीन चोमकाडुह,

एने न्यायनिवाड़ो मारा आथाम लेय लेव,

ते मारा दिंगो केरनारा फाय बुदलो लेह,

एने दुसमोनाह बुदलो आपुह।

42मी मारा बेलखाह लुय केरीन साकवाला केरूह,

एने मारी तालवार माह खाय,

ती लुय मारायेल एने बोंदीन हे,

एने तो माह दुसमोनान लांबाला लेट्यावाला मुखीन रेय।

43एय देस देसान माणहे, तान पोरजा हेऱ्या खुसी माणावो;

काहाकाय तो तान पावरान लुयीन पुलटो लेय,

एने तान दिंगो केरनाराह बुदलो आपी,

एने तान देस एने तान पोरजान पाप ढापी।”

44ज्या गीतान सोब वचन मुसो नुन ने बेटाख यहोशु हिऱ्यो आवीन माणहाह होमलाड्यो।

मुसान सेवल्यो निर्देश

45जेवी मुसो ज्या सोब वचन आखा इस्राएली माणहाह केय दिनो, 46तेवी तो ताह केयो, “जोल्यु वातु मी आज तुमूह चेतावीन केथु, त्यु आख्‍यु पोर आप आपणो मोन लागाड़ो, एने तान मतलब ज्या नेमान आख्‍यु वातुह मान्ने माय चोकसी केरनेन उकुम तुमरा सोराह आपो। 47काहाकाय ज्य तुमरी केरता फालतु काम नाय मिले, पुण तुमरो जीवणाच ने हे, एने ओहलो केरने माय ता देसाम तुमरी वोयीन दिह होवटा रेती, जान होकदार बोणनेन तुमू यरदन नेदीन पार जाणे बाज रेनाह।”

48उवतो बोगवान मुसाह तेदिह केयो, 49“ता अबारीम बोयड़ान नबो नावान चुटा पोर, जा मोआब देसा माय यरीहोन सोमोर चेड़ीन कनान देस, जाह मी इस्राएलीन सोतान बुय केर देथु, ताह दिखले। 50तेवी जिह केरीन तारो बाहख हारून होर बोयड़ा पोर मोरीन तान माणहा माय मिलाय गीयो, तिहेच केरीन तु ज्या बोयड़ा पोर चेड़ीन मोर जाहे, एने तारा माणहाम मिलाय जाहे। 51ज्यान कारेण ज्य हे, काय सीन जेंगला माय कादेशान मरीबा नावान जिरा पोर तुमू दुय जाणे मारो गुनो किरेल एता, काहाकाय तुमू इस्राएली माणहान विची माय माहु चोखो नाह ठेराया। 52केरीन तो देस जो मी इस्राएली माणहाह आपथु, तु तार सोमोर दिख ले, पुण ताहरो जाय नाय सिकहे।”