व्यवस्था 1

होरेब बोयड़ान आहने रेन जाणेन उकुम

1ज्‍यु वातु मुसा यरदन नेदीन पार जेंगलाम, मतलब सुपान सोमोर अरबा माय, पारान एने तोपेलान विचीम, एने लाबान हसेरोत एने दीजाहाब माय आखा इस्राएली माणहाह कियेल त्यु ज्यी हेत्यु। 2होरेब1 रेन कादेशबर्ने वोर चालनो सेईर बोयड़ान वाटे रेन इग्यार दिह लागतेह। 3चालीहवा वोरह्यान इग्यारवा मोयनान पेल्‍ली दिह जो काय यहोवा बोगवान मुसाह इस्राएली माणहाह उकुम आपेल इतो, तान गेत मुसा ताह ज्यी वातु केणे बाज गीयो। 42 जेवी मुसा एमोरीन राजा हेशबोन माय रेणार सीहोन एने बाशान ने राजा अशतारोत ओगाह एद्रेई माय आरविल इतो, 5तान पासाण यरदन नेदीन पार मोआब देसाम, नियम ने बाराम विवरण केरने लागो,

मुसा केयो, 6“आमरो बोगवान यहोवा होरेब बोयड़ा पोर आमुह ज्य कियेल इतो, ‘तुमूह ज्या बोयड़ा पोर रेताला जुलूम दिह एय जायेल हेते; 7केरीन एवी, न्या रेन जावो, एमोरीन बोयड़ान देसाह एने काय अराबा माय, काय बोयड़ा माय, काय नेचाला देसाम, काय दक्षिण माय काय देरीयान दिड़े, जोला माणहे एमोरीन आहने रेतेह तान देसाह, मतलब लबानोन बोयड़ा पोर वोर फरात नावान मोटली नेदी वोर रेणारे कनानीन देसाम जात रिवो। 8हुमलो, मी ता देसाह तुमरी ओंगाण केर देथु; जा देसान बाराम यहोवा बोगवान अब्राहम, इसहाक एने याकुब, तुमरा डायडाया हिऱ्यो सुगोण खायीन कियेल इतो, मी ज्याह तुमूह एने तुमरी पासाण तुमरी वोसीह आपुह, ताह जायीन तुमरा ताबाम केर लिवो।’”

मुसा उगे रेन न्यायियोन ठेरावणो

(निर्गमन 18:13-27)

9ती टेम माय मी तुमूह ज्य कियेल इतो, “मी तुमरो बार एखालो उखेल नाह सिकेत; 10यहोवा तुमरो बोगवान तुमरी गेणती ओलीक वोदाड़ दियेल हे, काय एवी गेणती माय आज जुगावाला तारान गेत गेणाय नाय ओलाक बोण जायेल हेते। 11तुमरा डायलान बोगवान तुमरी गेणती माय एजार गुणा उंजु वोड़ावी, एने तान वायदान गेत तुमूह बोरकेत बी आपती रेय। 12पुण तुमरी तेकलीप एने बार, एने राड़ीह मी एखालो का वोर वेट सेकुह? 13केरीन तुमू आप आपणा परिवाराम रेन एकेक उशार, सोमेजदार एने अनुबवी एदमी निवाड़ लिवो, एने ताह मुखी बाणावो। 14तान जापाप माय तुमू माहु केया, ‘जो काय तु आमुह किथे ताह केरनो हाजो हे।’ 15केरीन मी तुमरा परिवारान मुखी एदम्याह जा उशार एने अनुबवी एदमी एता, ताह निवाड़ीन तुमू पोर आदिकार ठेरायो, मतलब एजार एजार, होव होव पाचाह पाचाह एने दोह दोहान उपेर मुखी एने तुमरा गेराणान आदिकारी बी ठेरायो।”

16ती टेम माय मी तुमरा न्यायियोह उकुम आप्यो, “तुमू तुमरा बायाख ने मुकदमा होमल्या किरो, एने तान विचीम एने तान आहने रेणारान एने पारायान विचीम बी न्यायीपण से नियाव केऱ्या किरो। 17नियाव केरने बुखेत, कुणीन बी बेदबाव मा किरहे; जिह केरीन मोठलान तिह केरीन आतल्या माणहान बी हुमेलज्यो, कुणीन मुय देखीन मा बिहो, काहाकाय नियाव केरने बोगवानान काम हे; जो मुकदमो तुमरी केरता केठीण एय, तो मार फाय लेन आवज्यो, एने ताह मी होमलुह। 18एने मी तीच टेम माय आखो काम तुमूह केरनेन उकुम आपेल इतो, जो तुमूह केरनु एतो।”

पालथ्याह कादेशबर्ने माय मोकलाय जाणो

(गिनती 13:1-33)

19आमु होरेब रेन सोड़ीन तान बोगवान यहोवान उकुम मानीन ता आखा मोटला एने बियावजाय ओहला जेंगलाम लागता चाले, जाह तुमू एमोरीन बोयड़ान देसान वाटे देख्या, एने आमु कादेशबर्ने वोर आवा। 20ताहरो मी तुमूह कियेल इतो, तुमू एमोरीन बोयड़ान देसाम वोर आव लागेल हेते, जाह आपणो बोगवान यहोवा आपुह आपेह। 21दिखो, ता देसाह तुमरो बोगवान यहोवा तुमरी सोमोर केर दिथे, केरीन तुमरा डायडायान बोगवान यहोवान वचन मानीन ता पोर चिढ़ो, एने ताह तुमरा ताबाम लेय लिवो; एने तुमू बिहो मा एने कोमजोर मा इवो।

22एने तुमू आखा मार फाय आवीन केणे बाज गीया, “आमु आमरी ओंगाण आमरा एदम्याह मोकली देहु, जा ता देसान पोतो लागाड़ीन आमुह खुबेर केरती काय काल्ली वाटे लागता चालने पोड़ी एने काल्ला काल्ला हेयराम रिगणे पोड़ी।”

23जी वात मार नेजरी माय हाजी लागी काय मी तुमू माय रेन बारा एदमी मतलब आखा गेराणा माय रेन एकेक एदमी निवाड़ लिदो; 24तेवी ता बोयड़ा पोर वाला देसाम चेड़ीन गीया, एने एशकोल नावान खोदराम पोचीन ता देसान पुतो लेदा। 25एने ता देसान फोलाम रेन थोड़ोक आथाम लेन आपणी फाय आवा, एने आमुह ज्यी खुबेर आप्या, “जो देस आमरो बोगवान यहोवा आपुह आपेह तो हाजो हे।” 263

तीबी तुमू ता जाणेन नाकार केऱ्या, पुण आपणा बोगवान यहोवान उकुम ने विरूद केऱ्या। 27एने तुमू तुमरा पाड़ावा माय ज्य किन कुरकुर केरने बाज गीया, “बोगवान आमु हिऱ्यो दुसमोनाय मिलेह, केरीन आमुह मिस्र देसाम रेन काड़ीन लेन आयेल हे, काय आमुह एमोरीन ताबाम केरीन आमुह खेतेम केर देय। 28आमु का जाज्यो? आमरा बाहख इही किन आमरो मोनाह कोमजोर केर दियेल हेते काय तावाला माणहे आपुह रेन मोठा एने ताकेतवान हेते; एने तावाला हियोर मोठ मोठा हेते, एने तान हेयरान बितड़ा जुगा हेऱ्या वातु केरतेह; एने आमु ता अनाक वोसीन माणहाह बी दिखेल हेते।”

29पुण मी तुमूह केयो, “तुमू ताह मा बिवो एने मा गाबरावो। 30तुमरो बोगवान यहोवा जो तुमरी ओंगाण ओंगाण चालेह तो तुमरी उगे रेन लेड़ी, जिह केरीन तो मिस्र माय तुमरी देखताच तुमरी केरता किरेल इतो; 31ओवता तुमू जेंगलाम बी देख्या काय जिह केरीन एगदो एदमी तान सोराह उखलीन चालेह, तिहेच केरीन आपणो बोगवान यहोवा आपुह, ज्या जागा पोर पोचता वोर ती आखी वाटे माय जा आपु आयेल हेते, उखलीन चालनो। 32ज्यी वाती पोर बी तुमू आपणा ता बोगवान यहोवा पोर बुरहो नाह केऱ्या, 33जो तुमरी ओंगाण ओंगाण चालती रिनो काय पाड़ावो टाकणेन जागो तुमरी केरता हुदे, एने राती आक्ठाम एने दिह्या वादलाम देखायीन चालनो, काय तुमूह तो वाट देखाड़ी जा माय तुमू चालो।”

इस्राएलाह डेन्ड जुड़नो

(गिनती 14:20-45)

344

पुण तुमरी त्यु वातु होमलीन यहोवान राग बोड़की उठनो, एने तो सुगोण खायीन केयो, 35“खेरीस ज्यी खाराब पिढीन माणहाम रेन एक बी ता हाजाला देसाह देख नाय सेकती, जाह मी न्यान डायडायाह आपणेन सुगोण खायेल इतो। 36निस्तो यपुन्नेन सुरो कालेब उलोस ताह देख सेकी, एने जी बुय पोर तान पाय पुड़ेल हेते, मी ताह एने तान वोसीह बी आपुह; काहाकाय तो मार पासाण पुरी रिती से मोन लागाड़ीन आयेल हे। 37एने मार पोर बी यहोवा तुमरी केरता रागानो, एने ज्य केयो, ‘तु बी ता जाय नाय सिकहे; 38नुन ने सुरो यहोशु जो तार सोमोर उबरिथे, तो ते ता जाय सेकी; केरीन तु ताह ईमोत आप, काहाकाय ता देसाह इस्राएली माणहान होक माय तोच केर देय।’”

39ओवता तुमरा बायकु सोरा जान बाराम तुमू केतेह काय लुट माय जात रेती, एने तुमरा सोरा एवी हाजा बाकतान बाराम नाह जाणते, ता ता रिगती एने ताह मी तो देस आपुह, एने ता ता देसान होकदार रेती। 40पुण तुमूह फिरीन जाणे जुवी, रातला देरीयान वाटे जेंगला उगे जावो।

41तेवी तुमू माहु केया, “आमु यहोवान विरूद पाप किरेल हेते; एवी आमु आमरा बोगवान यहोवान उकुम मानीन बोयड़ा वाला देसाम चेड़ाय केरहु एने लेड़ाहु।” तेवी तुमू आप आपणा आथ्‍यार बांदिन बिगेर सुचे सुमजे चेड़नेन केरता तियार एय गीया।

42तेवी यहोवा माहु केयो, “ता माणहाह केय दे काय तुमू मा चिढ़ो, एने लेड़ाय मा किरो; काहाकाय मी तुमरी विचीम नाह सुतो; ओहलो नाय एणे जुवे काय तुमू तुमरा दुसमोनाह हेऱ्या आरवाय जाहो।” 43ज्यी वात मी तुमूह केय दिनो, पुण तुमू मार वात नाह मान्या; पुण जिद केरीन यहोवान उकुम तोड़ीन बोयड़ा पोर चेड़ गीया। 44तेवी ता बोयड़ा पोर रेणारे एमोरी माणहे तुमरो सामनो केरनेन आवा एने मोवालान माखान गेत तुमरी पासाण पोड़ना, एने सेईर देसान होर्मा वोर तुमूह मारती मारतेन आवा। 45तेवी तुमू फिरीन यहोवान सोमोर रेड़ने बाज गीया; पुण यहोवा तुमरी वात नाह हुमल्यो, एने तुमरी वातु उगे द्यान नाह दिनो।

46केरीन तुमू कादेश माय जुलूम दिह वोर रेना।