गिनती 36

वाराड़ावाल्यु बायकुन ईसो

1ओवतो युसूफान वोस माय रेन गिलाद, जो माकीरान बिटोख एने मनश्शेन नातेणह्योक इतो, तान वोस ने वोसीन डायडायान गेराणान मुखी मुखी एदमी मुसान आहने जायीन ता मुखीन सामने, जो इस्राएलीन डायडायान गेराणान मुखी एदमी एता, केणे बाज गीया, 21“यहोवा आमरा मालक्याह उकुम आपेल इतो, काय इस्राएली माणहाह चिट्ठी टाकीन देस वाट दिज्ये; एने पुशो यहोवान ज्यो बी उकुम आमरा मालीकाह जुड़नो, काय आमरो गेरल्यो सलोफादान ईसो तान सोऱ्युह आपज्यो। 3पुण केदी त्यु इस्राएलीन एने एगदा दिहरा वोसीन एदम्या हेऱ्यु वाराड़ केरती, ताहार त्युन ईसो आपणा डायडाया हेऱ्य रेन सुट जाय, एने जा वोसी माय त्युन वाराड़ एय तास वोसीन ईसाम जुड़ जाय; तेवी आमरो वाटो कोम एय जाय। 4एने जेवी इस्राएल ने जुबली2 रेय, तेवी जा गेराणाम त्युन वाराड़ एय, त्युन ईसा माय त्युन ईसो पाक्की रिती से जुड़ जाय; एने तो आमरा डायडायान वोसीन ईसाम रेन कायेम ने केरता सुट जाय।”

5यहोवा फाय रेन उकुम सापड़ावीन मुसो इस्राएली, माणहाह केयो, “युसूफान वोस ठिक किथे। 6सलोफादान सोऱ्युन बाराम यहोवा ज्यो उकुम आपेल हे, काय जो एदमी त्युन नेजरी माय हाजो हे, त्यु ता हेऱ्यु वाराड़ किरे; पुण त्यु त्युन आबाख ने डायडायान वोसी मायच वाराड़ किरे। 7एने इस्राएलीन एगदा गेराणान ईसो दिहरा गेराणान ईसा माय नाय बेचकाणे जुवे; इस्राएली आप आपणा डायडायान वोसीन ईसा माय रेती। 8एने इस्राएलीन एगदा गेराणा माय एगदान बेटीख एय जी ईसो सापड़ावणार हे, ती तीस ने डायडायान वोसीन एगदा एदम्या हेऱ्यी वाराड़ केराय जाय, ज्यानकेरता काय इस्राएली आप आपणा डायडायान ईसान आदिकारी रेय। 9एगदा वोसीन ईसो दिहरा वोसीन ईसा माय जुड़ने नाय जुवे, इस्राएलीन एकेक वोसीन माणहे आप आपणा ईसा माय रेती।”

10यहोवान उकुमान गेत जो तो मुसाह आपेल सलोफाद ने सोऱ्यु केऱ्यु। 11मतलब महला, तिर्सा, होग्ला, मिल्का, एने नोवा, ज्यु सलोफाद ने बेट्युख एत्यु, त्यु तीन काकाख ने सोरा हेऱ्यु वाराड़ केऱ्यु। 12त्यु युसूफ ने बिटोख मनश्शेन वोसीन गेराणाम वाराड़ केर लेद्यु, एने तीन ईसो तीन डायडायान वोसीन गेराणान आदिकार माय बोणीन रिनो।

13जो उकुम एने नेम यहोवा मोआब ने अराबा माय यरीहोन आहने यरदन नेदीन दिड़े मुसान द्वारा इस्राएलीह आपेल ता ज्यास हेते।