Munda Bible
ବୁଗିନ୍ ଇନିତୁ 30
ଆଗୁର୍ରାଃ କାଜି
ଯାକିର୍ଆଃ ହନ୍ତେକଡ଼ା ଆଗୁର୍ରାଃ କାଜିକ, ଆଗୁର୍ ଈଥୀୟେଲ୍କେ, ମେନ୍ଦ, ଈଥୀୟେଲ୍କେ1 ଓଡ଼ୋଃ ଉକଲ୍କେ2 କାଜି କେଦ୍କିନାଏ, ସାର୍ତିଗି ଆଇଙ୍ଗ୍ ହଡ଼ ଏତେ ଡଣ୍ଡ ହଡ଼ ଲେକାନିଃ ତାନିଙ୍ଗ୍ ଓଡ଼ୋଃ ଆଇଙ୍ଗ୍ତାଃରେ ମିଆଦ୍ ହଡ଼ରାଃ ଆଟ୍କାର୍ଉରୁମ୍ ବାନଃଆ। ଆଇଙ୍ଗ୍ ଜେତାନ୍ ସେଣାଁ କାଇଙ୍ଗ୍ ଇତୁ। ଚାଏ ପାବିତାର୍ ପାର୍ମେଶ୍ୱାର୍ଆଃ ସେଣାଁ ହଗି କାଇଙ୍ଗ୍ ସାରିୟା। ଅକଏ ସିର୍ମା ରାକାବ୍ କେଦ୍ତେ ଆଡ଼୍ଗୁ କାନାଏ ? ଅକଏ ହୟକେ ଆପ୍ନାଃ ମୁଠାରେ ହୁଣ୍ଡିଆକାଦା ? ଅକଏ ଦାଆଃକେ ଆପ୍ନାଃ ଲିଜାଃରେ ପଟମ୍ କାଦା ? ଅତେଦିଶୁମ୍ରାଃ ସବେନ୍ ସିମ୍ନାକେ ଅକଏ ବାଇୟାକାଦା ? ଇନିୟାଃ ନୁତୁମ୍ ଚିନାଃ ତାନାଃ ? ଓଡ଼ୋଃ ଆୟାଃ ହନ୍ରାଃ ନୁତୁମ୍ ଚିନାଃ ତାନାଃ ? ନେଆଁ ଆମ୍ ସାରିକାଦ୍ ରେଦ କାଜିମେ।
ପାର୍ମେଶ୍ୱାର୍ଆଃ ସବେନ୍ କାଜି ବିଡ଼ାଅ କାନା। ଅକନ୍କ ଇନିଃତାଃରେ ଆସ୍ରା ରିକାଃକ ଇନିଃ ଇନ୍କୁଆଃ ନାଙ୍ଗ୍ ଢାଲ୍ ତାନିଃ। ଇନିୟାଃ କାଜିରେ ଆଲମ୍ ମେସାଏ, କା'ରେଦ ଇନିଃ ଆମ୍କେ ଏଗେର୍ ମେଁୟାଏ ଓଡ଼ୋଃ ଆମ୍ ବେଦାନିଃ ହବାଅଃଆମ୍।
ଆଇଙ୍ଗ୍ ଆମ୍କେ ବାରିୟା ବିଷାଏ ଆସି କାଦ୍ମାଇଙ୍ଗ୍, ଆଇଙ୍ଗ୍ ଗଜଃ ସିଦାରେ ଆମ୍ କାଇଙ୍ଗ୍ ଏମ୍ମେୟା ମେନ୍ତେ ଆଲମ୍ କାଜିୟା। ଆଇଙ୍ଗ୍ ହେତେ ସାମା କାଜି ଓଡ଼ୋଃ ବେଦା କାଜି ସାଙ୍ଗିନ୍ ରିକାଏମେ, ଆଇଙ୍ଗ୍କେ ଗାରିବ୍ ଚାଏ କିସାଁଣ୍ ଆଲମ୍ ରିକାଃ, ମେନ୍ଦ ଆଇଁୟାଃ ହିସାରେ ଚିମିନାଙ୍ଗ୍ ଲାଗାତିୟାଃଁ ଏନ୍ ହିସା ଆଇଙ୍ଗ୍କେ ଏମ୍କେଦ୍ତେ ଆସୁଲିଙ୍ଗ୍ମେ। କା'ରେଦ ଆଇଙ୍ଗ୍ ଲାହିଦ୍ ପେରେଃ କେଦ୍ତେ କାଜିୟାଇଙ୍ଗ୍, ପାର୍ମେଶ୍ୱାର୍ ଅକଏ ତାନିଃ ? ଚାଏ ଗାରିବ୍ ହବା କେନଃରେ କୁମ୍ବୁଡ଼ୁ କେଦ୍ତେ ପାର୍ମେଶ୍ୱାର୍ଆଃ ନୁତୁମ୍ ସାମା ସାମାରେ ଇଦିୟାଇଙ୍ଗ୍।
ଜେତାଏ ଦାସିକେ ଆୟାଃ ଗମ୍କେ ଆୟାର୍ରେ ଦୋଷ୍ ଲେକାନ୍ କାଜି ଆଲମ୍ କାଜିୟା, ଏନ୍ ଲେକା ରିକାଏରେ ଇନିଃ ଆମ୍କେ ସାର୍ପାଅ ଏମାମେୟାଏ ଓଡ଼ୋଃ ଆମ୍ ଗୁହ୍ନାନିଃ ମେନ୍ତେମ୍ କାଜିୟଃଆ।
ଅକଏକ ଆପ୍ନାଃ ଆପୁକେ ସାର୍ପାଅ ରିକାଃକ ଓଡ଼ୋଃ ଆପ୍ନାଃ ଏଙ୍ଗାକେ ଆଶିଷ୍ କାକ ଏମାଃ, ଏନ୍ଲେକାନ୍ ମିଆଦ୍ କିଲି ମେନାଇୟା।
ନେ'ଲେକା ମିଆଦ୍ କିଲି ମେନାଇୟା, ଇନିଃ ଆପ୍ନାଃ ନାଜେର୍ରେ ଫାର୍ଚି ମେନାଇୟା, ମେନ୍ଦ ଇନ୍କୁ ଆକଆଃ ମାଇଲାଏତେ କାକ ଆବୁଙ୍ଗ୍ କାନା।
ନେ'ଲେକା ମିଆଦ୍ କିଲି ମେନାକଆ, ଇନ୍କୁଆଃ ମେଦ୍ ଘାମାଣ୍ଡ୍ତେ ଓଡ଼ୋଃ ମେଦ୍ ପିପ୍ନି ଚେତାନ୍ତେ ରିମାକାନା।
ମିଆଦ୍ କିଲି ମେନାକଆ, ଇନ୍କୁଆଃ ଡାଟା ତାରାଉଡ଼ି ଓଡ଼ୋଃ ଚାହୁଆ ଡାଟା କାତୁ ଲେକା ତାନାଃ, ଏନାତେ ଇନ୍କୁ ଅତେଦିଶୁମ୍ ହେତେ ଦୁକୁତାନ୍ ହଡ଼କକେ ଓଡ଼ୋଃ ଗାରିବ୍କକେ ହଡ଼କଆଃ ଥାଲା ହେତେ ଜୀଅନ୍ କଆ।
ହାପାଦ୍ରାଃ ବାରିୟା ହନ୍କୁଡ଼ି ମେନାକିନା, ଇନ୍କିନ୍ କାଜିୟା, “ଦା, ଦା।” ଏନ୍ଲେକା ଆପିୟା ଜିନିଷ୍ ମେନାଃ ଇନ୍କୁ ଚିଉଲାହ କାକ ଆସ୍ଦିୟଃଆ, ଓଡ଼ୋଃ ଉପୁନିୟା ଜିନିଷ୍ ଚିଉଲାହ କାଏ କାଜିୟା, “ହବାୟାନା।” ପାତାଲ୍, କା ହାମ୍ବାଲ୍କାନ୍ ଲାହିଦ୍, ରହଡ଼୍ ଅତେ ଓଡ଼ୋଃ ସେଙ୍ଗେଲ୍ ଚିଉଲା କାଏ କାଜିୟା, “ହବାୟାନା।”
ଅକନ୍ ମେଦ୍ ଆପ୍ନାଃ ଆପୁକେ ଲାନ୍ଦାଇୟା ଓଡ଼ୋଃ ଏଙ୍ଗାରାଃ କାଜି କା ମାନାତିୟାଁଃ, ଏନ୍ ମେଦ୍କେ ବୁରୁ ଚେତାନ୍ରେ ତାଇନ୍ତାନ୍ କାଉଆ ଅଡ଼େକ ସଦା ସଦାକେଦ୍ତେ ଅଡଙ୍ଗ୍ତାଃକ ଓଡ଼ୋଃ ବାଜ୍ ଅଡ଼େଆଃ ହନ୍କ ଏନାକେ ଜମେୟାଁକ। ଆପିୟା କାଜି ଆଇଁୟାଃ ନାଙ୍ଗ୍ ପୁରାଃ ଆକ୍ଦାନ୍ଦାଅ ତାନା, ଓଡ଼ୋଃ ଉପୁନିୟା କାଜି ଆଇଙ୍ଗ୍ କାଇଙ୍ଗ୍ ସାରି। ସିର୍ମାରେ ବାଜ୍ ଅଡ଼େରାଃ ସେନ୍ହରା, ସେରେଙ୍ଗ୍ରେ ବିଙ୍ଗ୍ରାଃ ସେନ୍ହରା, ଦରେୟାରେ ମିଆଦ୍ ଜାହାଜ୍ରାଃ ସେନ୍ହରା ଓଡ଼ୋଃ ମିଆଦ୍ ଡିଣ୍ଡା କୁଡ଼ିତାଃରେ ମିଆଦ୍ ହଡ଼ରାଃ ସେନ୍ହରା।
ମିଆଦ୍ ବେଶ୍ୟା କୁଡ଼ିରାଃ ସେନ୍ହରା ଏନ୍ଲେକାଗି, ଇନିଃ ଜମ୍ କେଦ୍ତେ ମଚା ଆବୁଙ୍ଗ୍ କଆଃଏ ଓଡ଼ୋଃ କାଜିୟା, ଆଇଙ୍ଗ୍ ଜେତା କା ଧାର୍ମାନ୍ କାମି କାଇଙ୍ଗ୍ ରିକା।
ଆପିୟା କାଜିତେ ଅତେଦିଶୁମ୍ ଦିଲ୍କାଅକଆଃ ଓଡ଼ୋଃ ଉପୁନିୟା କାଜିରେ ହଗି, ଏନା ଇନିଃ କାଏ ସାହାତିଙ୍ଗ୍ ଦାଡ଼ିୟା। ଦାସି ରାଜା ହବାୱା, ଡଣ୍ଡରାଃ ଲାହିଦ୍ ପେରେଃ, ହିଲାଙ୍ଗ୍କାନ୍ କୁଡ଼ିରାଃ ଆଣ୍ଦି ହବାଅଃତେୟାଃ। ମିଆଦ୍ ହିଲାଙ୍ଗ୍କାନ୍ କୁଡ଼ିରାଃ ଆଣ୍ଦି ହବାଅଃଆ ଓଡ଼ୋଃ ଅଡ଼ାଃରେନ୍ କାମ୍ଡ଼ିକୁଡ଼ି ଆୟାଃ ମାଲ୍କେନ୍କେ ଆତମ୍କେଦ୍ତେ ଆଇଃକ୍ ଆକ୍ତେୟାର୍ ଇଦିୟାଏ।
ଅତେଦିଶୁମ୍ରେ ଉପୁନିୟା ହୁଡିଙ୍ଗ୍ ତାନ୍କ, ମେନ୍ଦ ଇନ୍କୁ ପୁରାଃ ସେଣାଁନ୍ ତାନ୍କ। ମୁଇକ୍କ ନାରାଦୁରାଗିୟାକ, ଏନ୍ରେୟ ସିତୁଙ୍ଗ୍ ସାହାରେ ଜମେୟାଃ ହୁଣ୍ଡିୟାକ। ଦିରି ରେୟାଃ ଉଣ୍ଡୁଃରେ ତାଇନ୍ତାନ୍ ନାରାଦୁରା ଗୁଡୁହୁନି ତାନିଃ, ଇମିନ୍ ରେୟଗି ଇନିଃ ଆପ୍ନାଃ ତାଇନଃ ଠାୟାଦ୍ ଦିରିରେ ବାଇୟା। ସନ୍ସରେଦ୍କଆଃ ଜେତାନ୍ ରାଜା କାକ ତାଇନାଃ, ଇମିନ୍ ରେୟଗି ଇନ୍କୁ ମିଦ୍ ଝୁଣ୍ଡ୍ କେଦ୍ତେ ସେନେୟାଁକ। ଗାଛ୍ମାଛାଇ ତିଃଇତେ ସାବ୍ ଦାଡ଼ିନାଏ, ଇମିନ୍ ରେୟଗି ଇନିଃ ରାଜାରାଃ ମାହାଲ୍ରେ ତାଇନାଃ।
ଆପିୟା ଜାଁତୁ ବୁଗିଲେକା ସେସେନା ଓଡ଼ୋଃ ଉପୁନିୟା ଜାଁତୁ ବୁଗିଲେକା ସେସେନା, ଜାୱାନ୍ ଟେଡ଼ଃ ସବେର୍ ଜାଁତୁ ହେତେ ପେଡ଼େୟାନ୍ନିଃ ତାନିଃ ଓଡ଼ୋଃ ଇନିଃ ଜେତାୟାଃ ବରତେ ତାୟମ୍ତେ କାଏ ରୁହାଡ଼ାଃ। ମିଆଦ୍ ସାଣ୍ଡିସିମ୍, ବାକ୍ରା ମେରମ୍ ଓଡ଼ୋଃ ମିଆଦ୍ ରାଜାରାଃ ବିରୁଧ୍ରେ ଜେତାଏ କାକ ବିରିଦାଃ। ଆମ୍ ଆପାନ୍କେ ମାରାଙ୍ଗ୍ ରିକା ନାଙ୍ଗ୍ ଡଣ୍ଡ ଲେକା କାମି ରିକାଏ ରେଦ ଚାଏ ଏତ୍କାନ୍ ଉଡ଼ୁଃ ରିକା କାଦା, ତାବ୍ଦ ଆମାଃ ତିଃଇ ମଚାରେ ଦହେମେ। ଚିଆଃଚି ତଆକେ ଫେଟାଅ ରିକାରେ ଗତମ୍ ଅଡଙ୍ଗ୍ଆଁ ଓଡ଼ୋଃ ମୁହୁଁକେ ଭିତାର୍ ହଟର୍ ରିକାରେ ମାୟୋମ୍ ଅଡଙ୍ଗ୍ଆଁ, ଏନ୍ଲେକା ରିସ୍ମିକେ ଉସ୍କୁର୍ ରିକାରେ ଏପେରାଙ୍ଗ୍ ଅଡଙ୍ଗ୍ଆଁ।
Source notes (2)
- Footnote ଈଥୀୟେଲ ନେଆଁରାଃ ମୁଣ୍ଡି ହେ ପାର୍ମେଶ୍ୱାର୍, ଆଇଙ୍ଗ୍ ଲାଗା କାନାଇଙ୍ଗ୍
- Footnote ଉକଲ୍କେ ନେଆଁରାଃ ମୁଣ୍ଡି ହେ ପାର୍ମେଶ୍ୱାର୍ ଆଇଙ୍ଗ୍ ପୁରାଗି ଲାଗା କାନାଇଙ୍ଗ୍
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.