Munda Bible
ବୁଗିନ୍ ଇନିତୁ 31
ଲମୁଏଲ୍ ରାଜାରାଃ କାଜି
ଲମୁଏଲ୍ ରାଜାରାଃ କାଜି, ନେ ଆୟାର୍କାଜି ଆୟାଃ ଏଙ୍ଗାତେ ଇତୁକାଇ ତାଇକେନାଏ,
ହେ ଆଇଁୟାଃ ହନ୍, ହେ ଆଇଁୟାଃ ଲାହିଦ୍ରେନ୍ ହନ୍, ଓଡ଼ୋଃ ହେ ଆଇଁୟାଃ କିରିୟାକାଦ୍ ହନ୍, ଆଇଙ୍ଗ୍ ଆମ୍କେ ଚିନାଃ କାଜିମେୟାଁଇଙ୍ଗ୍ ? ଆମାଃ ପେଡ଼େଃ କୁଡ଼ିକକେ ଆଲମ୍ ଏମାକଆ, ଚାଏ ଆମାଃ ଜୀଦାନ୍ ଇନ୍କୁଆଃ ଆକ୍ତେୟାର୍ରେ ଆଲମ୍ ଏମାଃ, ଚିଆଃଚି ଇନ୍କୁ ରାଜାକକେ ଜୀଅନ୍ କଆଃ। ହେ ଲମୁଏଲ୍, ରାଜାକକେ ଦାଖ୍ରାସି ନୁଁ ତେୟାଃ ଲାଗାତିଙ୍ଗ୍ କା ତାନା, ଚାଏ ରାଇଜ୍ ଚାଲାଅତାନ୍କଆଃ ଦାଖ୍ରାସିରେ ସାନାଙ୍ଗ୍ କା ଲାଗାତିଙ୍ଗ୍ ତାନା। ଇନ୍କୁ ନୁଁ ତାନା ରେଦ, ଇନ୍କୁ ନିୟାମ୍କେ ରିଡ଼ିଙ୍ଗ୍ କେଦ୍ତେ ସବେନ୍ ସାସାତିରେ ତାଇନ୍ ତାନ୍କକେ ବୁଗିନ୍ ବିଚାର୍ କାକ ରିକା ଦାଡ଼ିୟା। ଇଲିଆର୍ଖି ଇନ୍କୁକେ ଏମାକପେ ଅକନ୍କ ଗଜଃଲେକା ମେନାକଆ, ଦାଖ୍ରାସି ଇନ୍କୁକେ ଏମାକପେ ଅକନ୍ କଆଃ ଜୀଦାନ୍ ଦୁକୁରେ ମେନାଃ। ଇନ୍କୁକେ ନୁ ରିକାକମେ ଓଡ଼ୋଃ ଇନ୍କୁ ଆକଆଃ ଗାରିବ୍ ଓଡ଼ୋଃ ଦୁକୁକେ ମନ୍ରେ ଆଲକାକ ପାହାମ୍ ରିକାଏ।
କା ବାଖାଁଣ୍ ଦାଡ଼ିତାନ୍ ଓଡ଼ୋଃ ସବେନ୍ ନାରାଦୁରା କଆଃ ନାଗେନ୍ତେ ଆମାଃ ମଚା ଆଡ଼ାଗେମ୍। ଆମାଃ ମଚା ଅଟାଃ କେଦ୍ତେ ଧାର୍ମାନ୍ ବିଚାର୍ ରିକାଏମେ, ଓଡ଼ୋଃ ଗାରିବ୍ ଚାଏ ନାମଃ ଲାଗାତିଙ୍ଗ୍ ତାନାଃ ଏନ୍କାନ୍କଆଃ ବୁଗିନ୍ ବିଚାର୍ ରିକାଏମେ।
ସବେନ୍ ଚାଇଲ୍ ଚାଲାନ୍ତେ ପେରେଜାକାନ୍ କୁଡ଼ି
ବୁଗିନ୍ ଚାଇଲ୍ଚାଲାନ୍ କୁଡ଼ି ଅକଏ ନାମ୍ ଦାଡ଼ିୟା ? ଚିଆଃଚି ଇନିୟାଃ ଗନଙ୍ଗ୍ ମୋତି ହେତେ ପୁରାଃ ଜାତ୍କା ତାନାଃ। ଇନିୟାଃ କଡ଼ାରାଃ ମନ୍ସୁରୁଦ୍ ଆୟାଃତାଃରେ ଆସ୍ରା ରିକାଏ, ଓଡ଼ୋଃ ଇନିୟାଃ ଲାଭ୍ କା ହୁଇନାଃ।
ଇନିଃ ଆୟାଃ ଜୀଦାନ୍ରାଃ ସବେର୍ ହୁଲାଙ୍ଗ୍ କଡ଼ାରାଃ ଏତ୍କାନ୍ କାଏ ରିକାଃ ମେନ୍ଦ ବୁଗିନାଃ ରିକାଏ।
ଇନିଃ ମିଣ୍ଡିରାଃ ପୁଣ୍ଡି ଉବ୍ ଓଡ଼ୋଃ ସାନାଇ ବାହେର୍ ଦାଣାଁଏ ଓଡ଼ୋଃ ଆପ୍ନାଃ ସାନାଙ୍ଗ୍ ଲେକା ତିଃଇତେ ରାସ୍କାଲଃ କାମି ରିକାଃଏ।
ଇନିଃ କିରିଙ୍ଗ୍ ଆଖ୍ରିଙ୍ଗ୍ ଜାହାଜ୍ ଲେକା ସାଙ୍ଗିନ୍ ହେତେ ଆପ୍ନାଃ ଜମେୟାଃ ଆଉୱାଃଏ।
ଇନିଃ ସେତାଃ ଇଦାନ୍ରେ ବିରିଦାଃ ଓଡ଼ୋଃ ଆୟାଃ ଅଡ଼ାଃରେନ୍କକେ ଜମେୟାଃ ଏମାକଆଏ ଓଡ଼ୋଃ ଆୟାଃ କାମ୍ଡ଼ିକକେ ଅକଏ ଅକନ୍ ହିସା କାମିୟା ଏନ୍ କାମିକ ଏମାକଆ।
ଇନିଃ ଲୟଙ୍ଗ୍ ବିଷାଏରେ ବୁଗିଲେକା ଉଡ଼ୁଃକେଦ୍ତେ ଏନାକେ କିରିଙ୍ଗ୍ୟେଁଆ। ଓଡ଼ୋଃ ଇନିଃ ଆୟାଃ କାମିରାଃ ନାଲାତେ ଦାଖ୍ବାକ୍ଡ଼ି ବାଇୟା।
ଇନିଃ ପେଡ଼େଃତେ ଆପ୍ନାଃ କାମି ରିକାଃଏ ଓଡ଼ୋଃ ଇନିଃ ଆୟାଃ ତିଃଇକେ କେଟେଃ ବାଇୟା।
ଇନିଃ ଆୟାଃ କିରିଙ୍ଗ୍ ଆଖ୍ରିଙ୍ଗ୍ରେ ଲାଭ୍ ବୁଗିଲେକା ନେଲେୟା ଓଡ଼ୋଃ ନୁବାଃରେ ଇନିୟାଃ ଦିଆ କା ଇଣିଁଜଃଆ।
ଇନିୟାଃ ତିଃଇ ଚାର୍ଖା ଚେତାନ୍ରେ ତାଇନାଃ, ଓଡ଼ୋଃ ଆୟାଃ ତିଃଇଲଃ ଏନ୍ ସୁତାମ୍ ଢେରାକେ ବିୟୁର୍ରେ ତାନା।
ଇନିଃ ଗାରିବ୍ ହଡ଼କଆଃ ନାଙ୍ଗ୍ ଆୟାଃ ତିଃଇ ରାଡ଼ା ରିକାଏ ଓଡ଼ୋଃ ଲାଗାତିଙ୍ଗ୍ ତେୟାଃକ ନାମଃ ହଡ଼କକେ ଆୟାଃ ତିଃଇ ଜିଲିଙ୍ଗ୍ ରିକାଏ।
ଇନିଃ ଆରିଲ୍ ଗାମାଏ ରେୟଗି ଆୟାଃ କୁଟୁମ୍ କଆଃ ନାଙ୍ଗ୍ କାଏ ବରୟା, ଚିଆଃଚି ଆୟାଃ ଅଡ଼ାଃରେନ୍ ସବେନ୍କ ଉର୍ଗୁମ୍ ଲିଜାଃ ତୁସିଙ୍ଗ୍ୟେଁନ୍ ତାନାକ।
ଇନିଃ ଆୟାଃ ନାଗେନ୍ତେ ରାଙ୍ଗ୍ବିରାଙ୍ଗ୍ ହାରୁବ୍ ଲିଜାଃ ବାଇୟା ଓଡ଼ୋଃ ଇନିଃ ପୁଣ୍ଡି ନିରାଲ୍ ନାରାମ୍ ଲିଜାଃ ଓଡ଼ୋଃ ବାଇଗିନିୟା ରାଙ୍ଗ୍ରାଃ ଲିଜାଃ ତୁସିଙ୍ଗ୍ୟେଁନା।
ଇନିୟାଃ କଡ଼ା ଦିଶୁମ୍ରେନ୍ ଆଗୁଆଇକଲଃ ଦୁବ୍ତାନ୍ ସାମାଏରେ ଇନିୟାଃ ମାଇନ୍ ହୁଇନାଃ।
ଇନିଃ ଫାର୍ଚି ନିରାଲ୍ ଲିଜାଃ ବାଇ କେଦ୍ତେ ଆଖ୍ରିଙ୍ଗ୍ ରିକାଃଏ ଓଡ଼ୋଃ କିରିଙ୍ଗ୍ ଆଖ୍ରିଙ୍ଗ୍ ହଡ଼ କତାଃରେ ମାୟାଙ୍ଗ୍ରାଃ କାସ୍ନା ଆଖ୍ରିଙ୍ଗ୍ ରିକାଃଏ।
ପେଡ଼େଃ ଓଡ଼ୋଃ ମାଇନାନ୍ ଆୟାଃ ଲିଜାଃ ଲେକାନାଃ ତାନାଃ, ଓଡ଼ୋଃ ଆୟାର୍କାଜି ବିଷାଏରେ ଇନିଃ କାଏ ବରଏୟା।
ଇନିଃ ଆୟାଃ ମଚାତେ ସେଣାଁ ରେୟାଃ କାଜି କାଜିୟାଃ ଓଡ଼ୋଃ ଇନିୟାଃ ଆଲାଙ୍ଗ୍ରେ ଲିନିବୁଇରାଃ ଇନିତୁ ତାଇନାଃ।
ଇନିଃ ଆୟାଃ ପାରିବାର୍ରାଃ ଚାଇଲ୍ ଚାଲାନ୍ ଧ୍ୟାନ୍ ରିକାଃଏ ଓଡ଼ୋଃ ବେଗାର୍ କାମିତେ ଜମେୟାଃ କାଏ ଜମାଃ।
ଆୟାଃ ହନ୍କ ବିରିଦ୍ କେଦ୍ତେ ଇନିୟାଃ ଧାଇନ୍ କାଜିୟା, ଓଡ଼ୋଃ ଆୟାଃ କଡ଼ାହଗି ଆୟାଃ ସାହାରାଅ ରିକାଃଏ।
ପୁରାଃ କୁଡ଼ିକ ବୁଗିନ୍ କାମିକ ରିକାକାଦା, ମେନ୍ଦ ଆମ୍ ଏନ୍ ସବେନ୍କଆଃ ଏତେ ମାରାଙ୍ଗ୍ ତାନ୍ମେ।
ପୁରାଃ ସୁଗାଡ଼ାନ୍ତେୟାଃରେ ଉୟୁଗଃତେୟାଃ ହସଡ଼ ତାନାଃ ଓଡ଼ୋଃ ବୁଗିନ୍ ନେଲଃତେୟାଃ ସାମା ତାନାଃ, ମେନ୍ଦ ଅକନ୍ କୁଡ଼ି ପ୍ରାଭୁକେ ବରଆଃ, ଇନିୟାଃ ସାହାରାଅ ହବାଅଃଆ।
ଇନିୟାଃ ତିଃଇରାଃ ନାଲା ଇନିଃକେ ଏମଃକା ଓଡ଼ୋଃ ଇନିୟାଃ କାମିତେ ନାଗାର୍ ରେୟାଃ ଦୁଆର୍ରେ ଇନିୟାଃ ସାହାରାଅ ହବାଅଃଆ।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.