Munda Bible
ବୁଗିନ୍ ଇନିତୁ 29
ଅକନ୍ ହଡ଼କେ ଜାମିନ୍ ଏଗେର୍ ରେୟଗି ଆୟାଃ ମନ୍କେ କେଟେଃଗି ଦହ ତାନାଏ, ଇନିଃ କାଏ ସୁଧ୍ରାଅଃଆ ଓଡ଼ୋଃ ଆଚ୍କାଗି ଜୀଅନଃଆ।
ଚିମ୍ତାଙ୍ଗ୍ ଧାର୍ମାନ୍ ହଡ଼କ ହାରା ପସାଅଃଆ, ଇମ୍ତା ହଡ଼କ ରାସ୍କା ହବାଅଃଆକ, ମେନ୍ଦ ଏତ୍କାନ୍ ହଡ଼ ରାଇଜ୍ ରିକାଏ, ଇମ୍ତାଙ୍ଗ୍ ହଡ଼କ ରାଆଃ ଗେରାଙ୍ଗ୍ ରିକାଃ।
ଅକନ୍ ହଡ଼ ସେଣାଁଁକେ ଦୁଲାଡ଼୍ ରିକାଃଏ, ଇନିଃ ଆପ୍ନାଃ ଆପୁକେ ରାସ୍କା ରିକାଏ, ମେନ୍ଦ ଅକଏ ବେଶ୍ୟାକତାଃରେ ତାଇନ୍ ତାନାଏ, ଇନିଃ ଆୟାଃ ସବେନ୍ ଖୁର୍ଜି ଚାବାତାଃଏ।
ରାଜା ବୁଗିନ୍ ବିଚାର୍ ରିକାକେଦ୍ତେ ଦିଶୁମ୍କେ ବାଇୟା, ମେନ୍ଦ ଅକଏ ଦାନ୍କେ ଇଦିୟାଏ, ଇନିଃ ଦିଶୁମ୍କେ ଛିତିବିତି ରିକାଏୟା।
ଅକନ୍ ହଡ଼ ଆପ୍ନାଃ ହୋପର୍ଜାପାଃନିଆଃ ଚୁଗ୍ଲି କାଜିକ କାଜିୟା, ଇନିଃ ଇନିୟାଃ କାଟା ନାଙ୍ଗ୍ ଜାଲମ୍ ପାସ୍ରାଅ ରିକାଃଏ।
ଏତ୍କାନ୍ ହଡ଼ରାଃ ଗୁହ୍ନାଁରେ ଫାଁସ୍ରି ତାଇନାଃ, ମେନ୍ଦ ଧାର୍ମାନ୍ ହଡ଼ ଦୁରାଙ୍ଗ୍ ଓଡ଼ୋଃ ରାସ୍କା ରିକାଃଏ।
ଧାର୍ମାନ୍ ହଡ଼କ ଗାରିବ୍ କଆଃ କାଜିଗହାର୍ ବିଷାଏରେ ସାରିୟାଃକ, ମେନ୍ଦ ଇନ୍ ବିଷାଏ ସାରି ନାଙ୍ଗ୍ ଏତ୍କାନ୍ ହଡ଼କଆଃ ସେଣାଁ ବାନଃଆ।
ଲାନ୍ଦାତାନ୍ ହଡ଼କ ନାଗାର୍କେ ଉସ୍କୁର୍ ରିକାଃକ, ମେନ୍ଦ ସେଣାଁନ୍ ହଡ଼କ ରିସ୍ମିକେ ସାଙ୍ଗିନ୍ ରିକାଃକ।
ମିଆଦ୍ ସେଣାଁନ୍ ହଡ଼ ଡଣ୍ଡ ହଡ଼ଲଃ ଏପେଗେର୍ ରିକାତାନ୍ ରେଦ ଇନିଃ ରିସ୍ମି ରେୟଗି ଚାଏ ଲାନ୍ଦା ରିକାଏରେୟଗି, ଜେତାନ୍ ଶାନ୍ତି କା ତାଇନାଃ।
ଗଗଏଃ ହଡ଼କ ସାର୍ତି ହଡ଼କେ ହିସିଙ୍ଗା ରିକାଃକ ଓଡ଼ୋଃ ଇନ୍କୁ ସାଧାସିଧା ହଡ଼ରାଃ ଜୀଉକେ ଜିଅନ୍ ନାଗେନ୍ତେ ଦାଣାଁଆଃକ।
ଡଣ୍ଡ ରିସ୍ମିତେ ଆୟାଃ ସବେନ୍ କାଜି ଉଦୁବାଃଏ, ମେନ୍ଦ ସେଣାଁନ୍ ହଡ଼ ଏନାକେ ଟୁଣ୍ଡୁ ସାନ୍ତେ ଆପ୍ନାଃ ମନ୍ରେ ଦହାଃଏ।
ଚିମ୍ତା ରାଇଜ୍ ଚାଲାଅନିଃ ବେଦା କାଜିରେ ଲୁତୁର୍ ଏମାଃଏ, ଇମ୍ତା ଆୟାଃ ସବେନ୍ ଦାସିକ ଏତ୍କାନ୍ ହବାକଆଃକ।
ଗାରିବ୍ ଓଡ଼ୋଃ ଏତ୍କାନ୍ ହଡ଼ ମିଦ୍ତାଃରେ ମେସାନ୍ରେ, ମେନ୍ଦ ପ୍ରାଭୁ ବାରାନ୍କିନାଃ ମେଦ୍କେ ମାର୍ସାଲ୍ ରିକାଃଏ।
ଅକନ୍ ରାଜା ପାତିୟାର୍ତେ ରେଙ୍ଗେଃ ରାବାଙ୍ଗ୍ ହଡ଼କଆଃ ନ୍ୟାୟ ରିକାଃଏ, ଇମ୍ତା ଇନିୟାଃ ରାଜ୍ଗାଦି ସବେନ୍ ହୁଲାଙ୍ଗ୍ କେଟେଃଗି ତାଇନାଃ।
ସଟା ଓଡ଼ୋଃ ଏଗେର୍ ସେଣାଁ ଏମାଃଏ, ମେନ୍ଦ ସିଟିଆକେ ଆୟାଃ ସାନାଙ୍ଗ୍ଲେକା ବାଗିତାଇରେ, ଇନିଃ ଆୟାଃ ଏଙ୍ଗାକେ ଗିହୁଃ ଏମାଇୟାଏ।
ଏତ୍କାନ୍ ହଡ଼କ ହାରା ଇଦିୟଃରେ, ଗୁହ୍ନାଁ ପସାଅଃଆ, ମେନ୍ଦ ଧାର୍ମାନ୍ ହଡ଼କ ଇନ୍କୁଆଃ ଜୀଅନ୍ ନେଲେଆକ।
ଆପ୍ନାଃ ହନ୍କେ ସାଜାଇ ଏମ୍ରେ, ଇନିଃ ଆମ୍କେ ଶାନ୍ତି ଏମାମେଆ। ଓଡ଼ୋଃ ଆମାଃ ଜୀଉକେ ସୁକୁ ଏମାମେଆ।
ଅକତାଃରେ ଚେତ୍ଗାର୍ କାଜି କା ତାଇନାଃ, ଏନ୍ତାଃରେ ହଡ଼କ ଜିୟନଃଆ, ମେନ୍ଦ ଅକଏ ଆଇନ୍ ଲେକା ସେସେନ୍ ତାନାଏ, ଇନିଃ ଧାଇନ୍ ତାନିଃ।
ଦାସି, କାଜିତେ କାଏ ସୁଧ୍ରାଅଃଆ, ଚିଆଃଚି ଇନିଃ ସାରିଉରୁମ୍ ରେୟ, କାଜି କାଏ ଆୟୁମାଃ।
ଚିଆଃ ଆମ୍ ହାର୍ବାର୍ ଜାଗାର୍ତାନ୍ ହଡ଼କେ ନେଲାକାଇଜାମ୍ ? ଇନିୟାଃ ଏତେ ଡଣ୍ଡ ଚେତାନ୍ରେ ପୁରାଃ ଆସ୍ରା ତାଇନାଃ।
ଅକଏ ଆୟାଃ ଦାସିକେ ସିଟିୟା ହେତେ ଦୁଲାଡ଼୍ତେ ଆସୁଲ୍ ରିକାଇୟା, ତାୟମ୍ତେ ଏନ୍ ଦାସି ଆୟାଃ ହନ୍ ହବାଅଃଆଏ।
ରିସ୍ମି ହଡ଼ ଲାପ୍ଡ଼ାଇ ରେୟାଃ କାଜିକ ରିକାଃଏ ଓଡ଼ୋଃ ପୁରାଃ ରିସ୍ମି ହଡ଼ ପୁରାଃଗି ଗୁହ୍ନାଁ ରିକାଃଏ।
ହଡ଼ରାଃ ଘାମାଣ୍ଡ୍ ଇନିଃକେ ତିରୁବ୍ ରିକାଃଏ, ମେନ୍ଦ ଜେତାଏୟାଃ ମନ୍ରେ ଲିନିବୁଇ ତାଇନାଃ, ଇନିୟାଃ ମାଇନ୍ ହବାଅଃଆ।
ଅକଏ କୁମ୍ବୁଡ଼ୁ ହଡ଼କଆଃ ସାଙ୍ଗାତିରେ ତାଇନାଃ, ଇନିଃ ଆୟାଃ ଜୀଉକେ ହିଲାଙ୍ଗ୍ ରିକାଃଏ, ଇନିଃ କିରିୟା ରେୟାଃ କାଜି ଆୟୁମାଃଏ, ମେନ୍ଦ ଜେତ୍ନାଃ କାଏ ଉଦୁବାଃ।
ହଡ଼ରାଃ ବର ଫାଁସ୍ରି ଲେକାନ୍ କାଜି ତାନାଃ, ମେନ୍ଦ ଅକଏ ପ୍ରାଭୁତାଃରେ ଆସ୍ରା ଦହୟା, ଇନିଃ ବୁଗିଲେକା ତାଇନାଃଏ।
ସବେନ୍କ ରାଇଜ୍ ଚାଲାଅନିଃ ତାଃଏତେ ଦାୟା ନାମେ ନାଙ୍ଗ୍ ସାନାଙ୍ଗ୍ଆଃକ, ମେନ୍ଦ ହଡ଼ରାଃ ବିଚାର୍ ପ୍ରାଭୁ ରିକାଃଏ।
କା ଧାର୍ମାନ୍ ହଡ଼ ଧାର୍ମାନ୍ ହଡ଼କେ ହିଲାଙ୍ଗ୍ ରିକାଃଏ, ଓଡ଼ୋଃ ଏତ୍କାନ୍ ହଡ଼ହଗି ସାର୍ତି ହରାରେ ସେନ୍ତାନ୍ ହଡ଼କେ ହିଲାଙ୍ଗ୍ ରିକାଃଏ।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.