Munda Bible
ବୁଗିନ୍ ଇନିତୁ 28
ଏତ୍କାନ୍ ହଡ଼କେ ଜେତାଏ କାକ କୁଦାଅ ରେୟଗି ନିରାଃଏ, ମେନ୍ଦ ଧାର୍ମାନ୍ ହଡ଼କ ଜାୱାନ୍ ଟେଡ଼ଃ ଲେକା ତିଙ୍ଗୁ କେଟେଃଦ୍ ତାଇନାଃଏ।
ଦିଶୁମ୍ରେ ଗୁହ୍ନାଁ କାମି ହବାଅଃ ହରାତେ, ଏନାରେନ୍ ମାରାଙ୍ଗ୍ ସାହେବ୍କ ପୁରାଃଗି ହବାଅଃଆକ, ମେନ୍ଦ ଆଟ୍କାର୍ଉରୁମ୍ ଓଡ଼ୋଃ ସେଣାଁନ୍ ହଡ଼କଆଃ ହରାତେ ଏନା ପୁରାଃ ଦିନ୍ ଜାକେଦ୍ ତାଇନାଃ।
ଅକନ୍ ଗାରିବ୍ ହଡ଼ ଏଟାଃ ନାରାଦୁରା ହଡ଼କେ ସାସାତି ରିକାଃଏ, ଇନିଃ ଏନ୍ ଟୁଡାଦାଆଃ ଗାମା ଲେକାନିଃ ତାନିଃ, ଅକ୍ନାଃଚି ସବେନ୍ ଜମେୟାଃ ତେୟାଃକ ନକ୍ସାନ୍କେନଃଆ।
ଅକନ୍କ ନିୟାମ୍କେ ବାଗିତାଃକ ଇନ୍କୁ ଏତ୍କାନ୍ ହଡ଼କଆଃ ମାଇନ୍ ରିକାଃକ, ମେନ୍ଦ ଅକନ୍କ ମାନାତିଙ୍ଗ୍ୟାଁଃକ ଇନ୍କୁଆଃ ବିରୁଧ୍ ରିକାଃକ।
ଏତ୍କାନ୍ ହଡ଼କ ନ୍ୟାୟକେ କାକ ସାରିଉରୁମ୍ ଦାଡ଼ିୟା, ମେନ୍ଦ ପ୍ରାଭୁକେ ଦାଣାଁତାନ୍ ହଡ଼କ ସବେନାଃ ସାରିଉରୁମ୍କ ଦାଡ଼ିୟା।
ବାରିୟା ହରାରେ ସେନ୍ତାନ୍ ଏତ୍କାନ୍ କିସାଁଣ୍ ହଡ଼ ତାଃଏତେ ବୁଗିନ୍ ହରାରେ ସେନ୍ତାନ୍ ଗାରିବ୍ ହଡ଼ ବୁଗିନ୍ ତାନିଃ।
ଅକଏ ନିୟାମ୍କେ ମାନାତିଙ୍ଗ୍ ତାନାଏ, ଇନିଃ ସେଣାଁନ୍ ହନ୍ ତାନିଃ ଓଡ଼ୋଃ ଅକଏ ପେଟୁ ହଡ଼କଲଃ ଗାତିନାଏ, ଇନିଃ ଆପ୍ନାଃ ଆପୁକେ ଗିହୁଃ ରିକାଃଏ।
ଅକନ୍ ହଡ଼ ମୁଲ୍କାନ୍ତାର୍ ହରାତେ ଆପ୍ନାଃ ଖୁର୍ଜିକେ ପସା ତାନାଏ, ଇନିଃ ଗାରିବ୍ ହଡ଼କକେ ଦାୟା ନାଙ୍ଗ୍ ହୁଣ୍ଡି ତାନାଏ।
ଅକଏ ଆୟାଃ ଲୁତୁର୍କେ ନିୟାମ୍ ଆୟୁମ୍ ନାଙ୍ଗ୍ ଗେନା ରିକାଃଏ, ଇନିୟାଃ ବିନ୍ତି ହିଲାଙ୍ଗ୍ ଲେକା ହବାୱା।
ଅକନ୍ ହଡ଼ ଧାର୍ମାନ୍ ହଡ଼କେ ଏତ୍କାନ୍ ହରାରେ ବେଦା କେଦ୍ତେ ଇଦିତାନାଏ, ଇନିଃ ଆଇଃକ୍ଗି ଗାଡାରେ ଉୟୁଗଃଆଏ, ମେନ୍ଦ କା ଦାଗିକାନ୍ ହଡ଼ ବୁଗିନ୍ ଆକ୍ତେୟାର୍ ନାମେୟା।
କିସାଁଣ୍ ହଡ଼ ଆପ୍ନାଃ ନାଜେର୍ରେ ସେଣାଁନ୍ ତାନିଃ, ମେନ୍ଦ ସାରିଉରୁମ୍ ଗାରିବ୍ ହଡ଼ ଆୟାଃ ସେଣାଁନ୍ ବିଷାଏକେ ସାରିଉରୁମ୍ ଦାଡ଼ିୟା।
ଚିମ୍ତାଙ୍ଗ୍ ଧାର୍ମାନ୍ ହଡ଼କ ଜିତାଅଃ ତାନ୍ରେ, ପୁରାଃ ମାନାରାଙ୍ଗ୍ ହବାୱା, ମେନ୍ଦ ଚିମ୍ତାଙ୍ଗ୍ ଏତ୍କାନ୍ ହଡ଼କ ବିରିଦ୍ତାନା, ଇମ୍ତାଙ୍ଗ୍ ହଡ଼କ ଆପାନ୍କେ ଉକୁନାଃକ।
ଅକଏ ଆୟାଃ ଗୁହ୍ନାଁକେ ଉକୁତାନା, ଇନିଃ ଜେତାନ୍ ବୁଗିନାଃ କାଏ ନାମେୟା, ମେନ୍ଦ ଅକଏ ଏନାକେ ମାନାତିଙ୍ଗ୍ତାନା ଓଡ଼ୋଃ ବାଗିତାନା, ଇନିଃ ଦାୟା ନାମେୟା।
ଅକନ୍ ହଡ଼ ସବେର୍ ଇମ୍ତା ପ୍ରାଭୁକେ ବରତାନାଏ, ଇନିଃ ଧାଇନ୍ ତାନିଃ, ମେନ୍ଦ ଅକଏ ଆପ୍ନାଃ ମନ୍ସୁରୁଦ୍କେ କେଟେଃଦ୍ ଦହେତାନାଏ, ଇନିଃ ସାଙ୍କାଟ୍ରେ ଉୟୁଃନାଃ।
କାଉରିତାନ୍ ଟେଡ଼ଃ ଓଡ଼ୋଃ ହନର୍ବାଡ଼ାତାନ୍ ଭାଲୁ ଲେକା ରେଙ୍ଗେଃ ରାବାଙ୍ଗ୍ ହଡ଼ କଆଃ ଚେତାନ୍ରେ ମିଆଦ୍ ଏତ୍କାନ୍ ଚାଲାଅନିଃ ମେନାଇୟା।
ଅକନ୍ ହାକିମ୍ କତାଃରେ ସାରିଉରୁମ୍ ବାନଃଆ, ଇନିଃ ପୁରାଃ ସାସାତି ନିଃ ହୁଇନାଃ ଓଡ଼ୋଃ ଅକଏ ଲାଲାଚ୍କେ କାଏ ସୁକୁତାନା, ଇନିଃ ପୁରାଃ ଦିନ୍ ଜାକେଦ୍ ଜୀହିଦ୍ ତାଇନାଃ।
ଅକନ୍ ହଡ଼ ଜେତାନ୍ ହଡ଼ରାଃ ଗନଏଃରାଃ ଗୁହ୍ନା ହବାଅଃ ତାନାଏ, ଇନିଃ ଗାଡାରେ ସେନଃଆ, ଜେତାଏ ଇନିଃକେ ଆଲକାଏ ଦେଙ୍ଗାଇକା।
ଅକନ୍ ହଡ଼ କା ଚିଟାଃଅ ହରାରେ ସେସେନ୍ ତାନାଏ, ଇନିଃ ବାଞ୍ଚାଅ ହବାୱା, ମେନ୍ଦ ଅକଏ ଆୟାଃ ସେସେନ୍ ହରାରେ ଏତ୍କାନ୍ ଉଡ଼ୁଃ ତାନାଏ, ଇନିଃ ଆଚ୍କାଗି ଉୟୁଗଃଆ।
ଅକଏ ଆପ୍ନାଃ ଲୟଙ୍ଗ୍କେ ଚାଷ୍ କାମି ରିକାଏ ତାନା, ଇନିଃତାଃରେ ପୁରାଃ ଜମେୟାଃ ତାଇନାଃ, ମେନ୍ଦ ଅକଏ ସାମାଗି ତାଇନ୍ ତାନ୍ ହଡ଼କଲଃ ଗାତି ତାନାଏ, ଇନିଃ ପୁରାଃ ରେଙ୍ଗେଃରେ ତାଇନାଃ।
ପାତିୟାର୍ରଃ ହଡ଼ ପୁରାଃ ଆଶିଷ୍ ନାମେୟାଏ, ମେନ୍ଦ ଅକଏ କିସାଁଣ୍ ହବାଅଃ ନାଙ୍ଗ୍ ପୁରାଃ ଚେଷ୍ଟା ରିକାଃଏ, ଇନିଃ ସାଜାଇ କା ନାମ୍କେଦ୍ତେ କାଏ ତାଇନାଃ।
ମେଦ୍ମୁହାଁଡ଼୍ ନେଲ୍କେଦ୍ତେ ରିକାଃ ବୁଗିନ୍ ନାହାଁଲାଃ ଓଡ଼ୋଃ ମିଦ୍ କେଚାଃ ଲାଦ୍ ନାଙ୍ଗ୍ ଗୁହ୍ନାଁ ରିକା କା ବୁଗିନାଃ।
ଏତ୍କାନ୍ ନେପେଲ୍ ହଡ଼ କିସାଁଣ୍ ହବାଅଃ ନିରାଃଏ, ମେନ୍ଦ ଇନିଃକେ ଦହୟାଏ ଓଡ଼ୋଃ ଇନିଃ କାଏ ସାରିୟା ଯେ ଆଇଁୟାଃ ଚେତାନ୍ରେ ଗାରିବ୍ ଉୟୁଗଃଆ।
ଅକଏ ଜେତାନ୍ ହଡ଼କେ ଏଗେର୍ ତାନାଏ, ଇନିଃ ତାୟମ୍ତେ ବେଦା କାଜିନିଃ ହେତେ ଜାତ୍କା ସାୟାଦ୍ ନାମେୟାଏ।
ଅକଏ ଆୟାଃ ଏଙ୍ଗା ଆପୁରାଃ ଜିନିଷ୍କେ ରେଃକ୍ ଇଦି କେଦ୍ତେ କାଜିୟା, ନେଆଁରେ ଜେତାନ୍ ଗୁହ୍ନାଁ ବାନଃଆ, ଇନିଃ ଜୀଅନ୍ ରିକାତାନ୍ କଆଃ ଗାତି ତାନିଃ।
ଲାଲାଚ୍ ହଡ଼ ଏପେରାଙ୍ଗ୍ ରିକାଏ ଓଡ଼ୋଃ ଅକଏ ପ୍ରାଭୁରେ ଆସ୍ରା ଦହ ତାନାଏ ଇନିଃ କିରିକାନ୍ ତାଇନାଏ।
ଅକଏ ଆପ୍ନାଃ ମନ୍ସୁରୁଦ୍ରେ ଆସ୍ରା ଦହ ତାନାଏ, ଇନିଃ ଡଣ୍ଡ ତାନିଃ, ମେନ୍ଦ ଅକଏ ସେଣାଁରେ ସେନେୟା, ଇନିଃ ବାଞ୍ଚାଅ ହବାୱା।
ଅକଏ ରେଙ୍ଗେଃ ହଡ଼କେ ଦାନ୍ ଏମାଇତାନାଏ, ଇନିଃକେ ଘାଟି କା ହୁଇନାଃ, ମେନ୍ଦ ଅକଏ ମେଦ୍କେ ଜାପିଦ୍ ରିକାଏ, ଇନିଃ ସାର୍ପାଅ ନାମେୟା।
ଏତ୍କାନ୍ ହଡ଼କ ପେଡ଼େୟାନ୍ ହବାଅଃରେ, ହଡ଼କ ଆପାନ୍କେ ଉକୁ ରିକାଃ, ମେନ୍ଦ ଇନ୍କୁଆଃ ଜୀଅନ୍ ହବାଅଃରେ, ଧାର୍ମାନ୍କ ହାରାପସାୱା।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.