Munda Bible
ବୁଗିନ୍ ଇନିତୁ 22
ପୁରାଃ ଖୁର୍ଜି ତାଇନ୍ ହେତେ ମିଆଦ୍ ବୁଗିନ୍ ନୁତୁମ୍ ଓଡ଼ୋଃ ରୁପା, ସୋନା ହେତେ ଦାୟା ପୁରାଃ ବୁଗିନ୍ ତାନାଃ।
କିସାଁଣ୍ ଓଡ଼ୋଃ ଗାରିବ୍ ମିସାତେ ନାପାମ୍ ହବାୱା, ପ୍ରାଭୁ ଏନ୍ ସବେନ୍କଆଃ ବାବାଇନିଃ ତାନିଃ।
ଚାତୁର୍ ହଡ଼ ଦୁକୁ ହିଜୁଃତାନ୍ ନେଲ୍ କେଦ୍ତେ ଆପାନ୍କେ ଉକୁଇୟା, ମେନ୍ଦ କା ସେଣାଁନ୍କ ଆୟାର୍ତେ ସେନାଃ ଓଡ଼ୋଃ ସାଜାଇ ନାମେୟା।
ହୁଡିଙ୍ଗ୍ୟେଁନ୍ ଓଡ଼ୋଃ ପ୍ରାଭୁକେ ବରଆଇରେୟାଃ ଜ, ଖୁର୍ଜି, ମାନାରାଙ୍ଗ୍ ଓଡ଼ୋଃ ଜୀଦାନ୍ ତାନାଃ।
ଏଙ୍କବେଙ୍କ ସେସେନ୍ ହଡ଼ରାଃ ହରାରେ ଜାନୁମ୍ ଓଡ଼ୋଃ ଜାଲମ୍ ତାଇନାଃ, ଅକଏ ଆପ୍ନାଃ ଜୀଉକେ ବାନ୍ଚାଅ ରିକାଏ, ଇନିଃ ଇନିୟାଃ ହେତେ ସାଙ୍ଗିନ୍ରେ ତାଇନାଃ।
ମିଆଦ୍ ସିଟିଆକେ ଏନ୍ ହରାରାଃ ଇନିତୁ ଉଦୁବାଇମେ, ଅକନ୍ ହରାରେ ସେନ୍ ଲାଗାତିଙ୍ଗ୍ ତାନା ଓଡ଼ୋଃ ଚିମ୍ତାଙ୍ଗ୍ ଇନିଃ ହାଡ଼ାମ୍କଆଃଏ ଇମ୍ତାଙ୍ଗ୍ ଏନାତେ କାଏ ଗେନାଅଃଆ।
କିସାଁଣ୍ ଗାରିବ୍ ଚେତାନ୍ରେ ରାଇଜ୍ ରିକାଃଏ ଓଡ଼ୋଃ ରିଣି ଇଦିନିଃ ରିଣି ଏମଃନିଆଃ ଦାସି ହୁଇନାଃ।
ଅକଏ ଏତ୍କାନ୍ ହିତା ହେରେୟା, ଇନିଃ ସାଙ୍କାଟ୍ ଲେକାନ୍ ହିତା ଇରେୟାଏ ଓଡ଼ୋଃ ଇନିୟାଃ ରିସ୍ମିରାଃ ସଟା ଜୀଅନ୍କଆଃ।
ଅକେୟାଃ ଦାୟାରାଃ ମେଦ୍ ମେନାଃ, ଇନିଃ ଧାଇନ୍ ହବାୱା ଚିଆଃଚି ଇନିଃ ଆୟାଃ ଲାଦ୍ ଗାରିବ୍କକେ ଏମାଃଏ।
ଲାନ୍ଦାତେ ଅଟାଙ୍ଗ୍ତାନ୍ ହଡ଼କକେ ହାର୍ ଅଡଙ୍ଗ୍ତାକରେ ଏପେରାଙ୍ଗ୍ ସାଙ୍ଗିନ୍କଆଃ, ଓଡ଼ୋଃ ସାନ୍ତେ ଚି ଏପେରାଙ୍ଗ୍ ହକା କଆଃ।
ଅକ ହଡ଼ ମନ୍ସୁରୁଦ୍ରେୟାଃ ଫାର୍ଚି ଦୁଲାଡ଼ାଃଏ, ଅକ ହଡ଼ରାଃ ଲାଚଡ଼ାରେ ସାୟାଦ୍ ମେସାକାନା, ଇନିୟାଃ ଗାତି ରାଜା ହବାୱା।
ପ୍ରାଭୁ ପାର୍ମେଶ୍ୱାର୍ଆଃ ମେଦ୍ ସେଣାଁଁକେ ବାନ୍ଚାଅ ରିକାଏ, ମେନ୍ଦ ଇନିଃ କା ବିଶ୍ୱାସ୍ତାନ୍କଆଃ କାଜି ଜୀଅନ୍ ରିକାଏଃ।
କୁଢ଼ି ହଡ଼ କାଜିୟା, ବାହାରିରେ ମିଆଦ୍ ଟେଡ଼ଃ ମେନାଇୟା, ଆଇଙ୍ଗ୍ ହରାରେ ଗଜଃଆଇଙ୍ଗ୍।
ବେଶ୍ୟାରାଃ ମଚା ମିଆଦ୍ ଇକିର୍ ଗାଡା ତାନାଃ, ଜେତାଏ ପ୍ରାଭୁଆଃ ହିଲାଙ୍ଗ୍ ତାନାଏ, ଇନିଃ ଏନାରେ ଉୟୁଗଃଆ।
ସେପେଡ଼େଦ୍ରାଃ ମନ୍ରେ ଡଣ୍ଡ ତଲାକାନ୍ ତାଇନାଃ, ମେନ୍ଦ ଇନିତୁରେୟାଃ ସଟା ଇନିଃକେ ଏନା ହେତେ ସାଙ୍ଗିନ୍ ରିକାୟାଏ।
ଅକନ୍ ହଡ଼ ଆପ୍ନାଃ ଖୁର୍ଜିକେ ଥିମ୍ବା ନାଗେନ୍ତେ ଗାରିବ୍କେ ସାସାତି ରିକାଃଏ ଓଡ଼ୋଃ କିସାଁଣ୍କକେ ଭେଁଟ୍ ଏମାକରେଦ, ଇନିଃ ଜାରୁଡ଼୍ଗି ଗାରିବଃଆ।
ହିସିଗେଲେୟା ସେଣାଁନ୍ କାଜି
ଆମାଃ ଲୁତୁର୍ ଅଟାଃ ରିକାଏମେ ଓଡ଼ୋଃ ସେଣାଁନ୍ରାଃ କାଜି ଆୟୁମେମ୍, ଆଇଁୟାଃ ସେଣାଁରେ ଆମାଃ ମନ୍ସୁରୁଦ୍ ଦହେମେ।
ଚିଆଃଚି ଆମ୍ ଏନାକେ ଆମାଃ ମନ୍ସୁରୁଦ୍ରେ ଦହେ ରେଦମ୍ ଓଡ଼ୋଃ ସବେର୍ ଇମ୍ତା ଆମାଃ ମଚାରେ ତାଇନ୍ ତାନ୍ରେଦ, ଏନା ସୁକୁ କାଜି ତାନାଃ।
ପ୍ରାଭୁ ପାର୍ମେଶ୍ୱାର୍ତାଃରେ ଆମାଃ ଆସ୍ରା ଚିଲ୍କା ତାଇନାଃ, ଏନାମେନ୍ତେ ଆମ୍କେ ଉଦୁବ୍ କାମିଇଙ୍ଗ୍।
ଚିଆଃଚି ଆଇଙ୍ଗ୍ ଆମାଃ ନାଗେନ୍ତେ ହିସିଗେଲେୟା ସେଣାଁନ୍ କାଜିକ ଅଲାକାଦାଇଙ୍ଗ୍, ଏନା ବୁଗିନ୍ ଇନିତୁ ଓଡ଼ୋଃ ସେଣାଁତେ ପେରେଜାକାନା।
ଆମ୍ ଜେ'ଲେକା ଇନ୍କୁକେ ସାର୍ତି କାଜି ଉଦୁବ୍ ଦାଡ଼ିୟାମ୍, ଏନାମେନ୍ତେ ଆଇଙ୍ଗ୍ ଆମାଃ ନାଗେନ୍ତେ ଚିଆଃ ବୁଗିନ୍ କାଜି କାଇଙ୍ଗ୍ ଅଲାକାଦା ?
ଏନାମେନ୍ତେ ରେଙ୍ଗେଃକକେ ଆଲପେ ରେଃକ୍କଆଃ ଚି ଇନ୍କୁ ରେଙ୍ଗେଃ ତାନ୍କ, ଓଡ଼ୋଃ ନାଗାର୍ ଦୁଆର୍କରେ ସାସାତି କାନ୍କକେ ଆଲପେ ସିଗିଦ୍କଆ।
ଚିଆଃଚି ପ୍ରାଭୁ ଇନ୍କୁଆଃ ବିରୁଧ୍ରେ ତାଇନାଃ ଓଡ଼ୋଃ ଅକନ୍କ ଇନ୍କୁଆଃ ଜିନିଷ୍ କୁମ୍ବୁଡ଼ୁ କେଦ୍ତେ ଇନିଃ ଇନ୍କୁଆଃ ଜୀଉ ରେଃକ୍କଆ।
ଅକନ୍ ହଡ଼ ରିସ୍ମି ତାନିଃ, ଇନିଃଲଃ ଆଲପେ ଗାତିନାଃ ଓଡ଼ୋଃ ରିସ୍ମି ହଡ଼ଲଃ ଆଲମ୍ ତାଇନାଃ।
ନେ'ଲେକା ଆଲକା ହବାଅ ଚି ଆମ୍ ଇନିୟାଃ ଚାଇଲ୍ ଚାଲାନ୍ ଇତୁ କେଦ୍ତେ ଆପ୍ନାଃ ଜୀଉରେ ଫାଁସ୍ରି ବାଇୟାମ୍।
ଆମ୍ ଏନ୍ ହଡ଼କଆଃ ଲେକା ଆଲମ୍ ହୁଇନାଃ ଅକନ୍କ ତିଃଇ ମେସାଏୟା ଓଡ଼ୋଃ ରିଣି ଇଦି ନାଙ୍ଗ୍ ଜାମିନ୍କ ହୁଇନାଃ।
ଚିମ୍ତାଙ୍ଗ୍ ହାଲ୍ ରୁହାଡ଼୍ ନାଙ୍ଗ୍ ଆମାଃତାଃରେ ଜେତ୍ନାଃ କା ତାଇନାଃ, ଇମ୍ତାଙ୍ଗ୍ ଇନିଃ ଆମାଃ ଡିସ୍ନାହଗି ଆମାଃ ଲାତାର୍ ହେତେ ରେଃକ୍ ଇଦିକଆ।
ଆମାଃ ପୁର୍ଖାକଆଃ ହରାତେ ବାଇୟାକାନ୍ ସିମ୍ନା ଏନାକେ ଆଲମ୍ ଆତମେୟା।
ଚିଆଃ ଆମ୍ ଏନ୍ ଲେକା ହଡ଼ ନେଲ୍ କାଇୟାଃମେ, ଇନିଃ ଆୟାଃ କାମି ବୁଗିଲେକା ସାରିୟା ? ଇନିଃ ରାଜାକଆଃ ଆୟାର୍ରେ ତିଙ୍ଗୁ ଦାଡ଼ିୟା ଓଡ଼ୋଃ ହୁପ୍ଡ଼ିଙ୍ଗ୍କଆଃ ଆୟାର୍ରେ କାଏ ତିଙ୍ଗୁନା।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.