Munda Bible
ଏନେଟେଦ୍ 6
ମାନୱାକଆଃ ଏତ୍କାନାଃ
ନେ'ଲେକାତେ ଅତେରେ ହଡ଼କ ପସାଇଦିୟାନା, ଓଡ଼ୋଃ ଇନ୍କୁଆଃ କୁଡ଼ିହନ୍କ ପୁରାଃଗି ଜାନାମ୍ୟାନା। ଇମ୍ତା ପାର୍ମେଶ୍ୱାର୍ଆଃ ହନ୍କ, ମାନୱାକଆଃ କୁଡ଼ିହନ୍କକେ ସୁନ୍ଦ୍ରିଗି ନେଲ୍କେଦ୍ତେ ଆପାନ୍ ଇଛା ଲେକାତେ ଆଣ୍ଦିୟାନାକ। ଏନ୍ତେ ପ୍ରାଭୁ କାଜିକେଦାଏ, “ଆଇଁୟାଃ ଆତ୍ମା ମାନୱାକତାଃରେ ସବେନ୍ ଇମ୍ତା କା ତାଇନାଃ, ଚିୟାଃଚି ଇନ୍କୁ ଆକଆଃ ଏତ୍କାନ୍ ସେସେନ୍ ହରାରେ ଗଜଃ ହଡ଼୍ମ ଲେକାନ୍କ ଏସ୍କାର୍ ତାନ୍କ, ଏନାମେନ୍ତେ ଇନ୍କୁଆଃ ଜୀନିଦ୍ରେୟାଃ ଦିପିଲି ୧୨୦ ବାରାଷ୍ ହବାଅଃଆ।” ଏନ୍ ଦିପିଲିକରେ ଅତେରେ ପୁରାଃ ପେଡ଼େୟାନ୍ ମାପ୍ରାଙ୍ଗ୍ ହଡ଼କ ତାଇକେନା, ଓଡ଼ୋଃ ତାୟମ୍ରେ ପାର୍ମେଶ୍ୱାର୍ଆଃ ହନ୍କ ମାନୱାକଆଃ କୁଡ଼ିହନ୍କଲଃ ମିଦ୍ ହଡ଼୍ମୟାନ୍ ହରାତେ, ଇନ୍କୁଆଃ ହନ୍କ ହବାୟାନା, ଇନ୍କୁ ହଁଗି ସିଦା ଦିପିଲିରେନ୍ ନୁତୁମଃତାନ୍ ସୁର୍ବୀର୍ ହଡ଼କ ତାଇକେନା।
ଏନ୍ତେ ପ୍ରାଭୁ ପାର୍ମେଶ୍ୱାର୍ ନେଲ୍କେଦାଏ, ଅତେରେନ୍ ମାନୱାକଆଃ କାଜିକାମିକ ଓଡ଼ୋଃ ଉଡ଼ୁଃକ ଏତ୍କାନ୍ତେ ପେରେୟାଃକାନା। ଏନାମେନ୍ତେ ପ୍ରାଭୁ ପାର୍ମେଶ୍ୱାର୍ ଅତେରେ ମାନୱାକେ ବାଇୟାକିଃ ହରାତେ ପୁରାଃଗି ଦୁକୁୟାନାଏ। ଏନ୍ତେ ପ୍ରାଭୁ ପାର୍ମେଶ୍ୱାର୍ କାଜିକେଦାଏ, “ଆଇଙ୍ଗ୍ ବାଇୟାକାଇ ମାନୱାକେ ଅତେହେତେ ଓଡ଼ୋଃ ଅତେରେ ରେଙ୍ଗାଅଃତାନ୍ ଜାଁତୁକକେ ଓଡ଼ୋଃ ସବେନ୍ ଆସୁଲ୍ ଜାଁତୁକକେ, ଚେଣେଁକକେ ଜିଅନ୍କଆଇଙ୍ଗ୍, ଚିୟାଃଚି ଏନ୍ ସବେନ୍କକେ ବାଇୟାକାଦ୍କ ହରାତେ, ଆଇଙ୍ଗ୍ ମନ୍ରେ ଦୁକୁଃ ତାନାଇଙ୍ଗ୍।” ମେନ୍ଦ ନୁହୁଁ ପ୍ରାଭୁଆଃ ନେପେଲ୍ରେ ସାୟାଦ୍ ନାମ୍କେଦାଏ।
ନୁହୁଁ ଓଡ଼ୋଃ ଟୁଡା ଦାଆଃ
ନେଆଁ ହବାଅଃତାନା ନୁହୁଁଆଃ ପାରିବାର୍ରାଃ କାଜି, ନୁହୁଁ ଏନ୍ ଦିପିଲିରେ ତାଇନ୍ତାନ୍ ହଡ଼କଆଃଏତେ ଧାର୍ମାନ୍ ଓଡ଼ୋଃ କା ଚିଟାକାନ୍ ହଡ଼ ତାଇକେନାଏ, ଓଡ଼ୋଃ ପାର୍ମେଶ୍ୱାର୍ଆଃ ଇଛାସାନାଙ୍ଗ୍ ଲେକାତେ ସେସେନ୍ ତାଇକେନାଏ। ନୁହୁଁରାଃ ଆପିୟାଃ ହନ୍କଡ଼ା ତାଇକେନାକ, ଇନ୍କୁଆଃ ନୁତୁମ୍ ଶେମ୍, ହାମ୍ ଓଡ଼ୋଃ ଯାଫେତ୍ ତାଇକେନା। ମେନ୍ଦ ଏନ୍ ଦିପିଲିରେ ଅତେରେନ୍ ସବେନ୍କ ପାର୍ମେଶ୍ୱାର୍ଆଃ ବାଇରିକ ହବାୟାନା, ଓଡ଼ୋଃ ସବେର୍ତାଃରେ ଏତ୍କାନାଃ ପେରେଃୟାନା। ଏନ୍ତେ ପାର୍ମେଶ୍ୱାର୍ ଅତେଦିଶୁମ୍କେ ନେଲ୍କେଦା ଓଡ଼ୋଃ କାଜିକେଦାଏ, ଅତେଦିଶୁମ୍ ଏତ୍କାନ୍ତେ ପେରେଃକାନା, ଚିୟାଃଚି ସବେନ୍ ହଡ଼କ ଏତ୍କାନ୍ତେ ପେରେଃକାନାକ।
ପାର୍ମେଶ୍ୱାର୍ ନୁହୁଁକେ କାଜିକିୟାଏ, “ହଡ଼କଆଃ ହରାତେ ଗଟା ଅତେଦିଶୁମ୍ ଏତ୍କାନ୍ତେ ପେରେୟାକାନା, ଏନାମେନ୍ତେ ଆଇଙ୍ଗ୍ ଉହାଟ୍ କେଦାଇଙ୍ଗ୍, ସବେନ୍ ହଡ଼କକେ ଓଡ଼ୋଃ ଜାଁତୁକକେ ଅତେଦିଶୁମ୍ଲଃଗି ଜିଅନ୍କଆଇଙ୍ଗ୍। ଆମାଃ ନାଗେନ୍ତେ ଗୋଫର୍ ଦାରୁରାଃ ମିଆଦ୍ ଦାଆଃ ଜାହାଜ୍ ବାଇୟେମେ, ଓଡ଼ୋଃ ଏନାରେ କୋଠା କୋଠା ବାଇୟେମେ ଆଡଃଗି ଏନାରାଃ ଭିତାର୍ରେ ଓଡ଼ୋଃ ବାହାରିରେ ଲାସା ଜଲମେମ୍। ଏନ୍ ଦାଆଃ ଜାହାଜ୍କେ ନେ'ଲେକାତେ ବାଇୟେମେ, ଜିଲିଙ୍ଗ୍ରେ ୩୦୦ ମୁକା, ଚାକାର୍ ୫୦ ମୁକା ଓଡ଼ୋଃ ୩୦ ମୁକା ସାଲାଙ୍ଗି ବାଇୟେମେ। ଦାଆଃ ଜାହାଜ୍ରେୟାଃ ଚେତାନ୍ଏତେ ମିଦ୍ମୁକା ବାଗିକେଦ୍ତେ ଖିଡ଼୍କି ବାଇୟେମେ, ଏନାରାଃ ଗେନାରେ ଦୁହାର୍ ଦହେମେ, ଓଡ଼ୋଃ ଏନାରେ ଆପି ମାହାଲା ବାଇୟେମେ। ସିର୍ମା ଲାତାର୍ରେ ତାଇନ୍ତାନ୍ ସବେନ୍ ଜୀବ୍ଜାଁତୁକକେ ଜିୟନ୍କ ନାଗେନ୍ତେ ଆଇଙ୍ଗ୍ ଅତେରେ ଟୁଡା ଦାଆଃ କୁଲେୟାଇଙ୍ଗ୍, ଏନାରେ ଅତେରେନ୍ ସବେନ୍ ଜୀବ୍ଜାଁତୁକ ଜିୟନଃଆ। ମେନ୍ଦ ଆଇଙ୍ଗ୍ ଆମାଃଲଃ ମିଆଦ୍ ରାଜିନାମା ରିକାୟାଇଙ୍ଗ୍। ଆମ୍ ଆମାଃ କୁଡ଼ି, ଆମାଃ ହନ୍ଗାଁଣା ଓଡ଼ୋଃ ଆମାଃ କିମିନ୍କଲଃ, ଦାଆଃଜାହାଜ୍ରେ ବଲପେ। ଓଡ଼ୋଃ ସବେନ୍ ଜୀଉ ମେନାଃକକେ ବାଞ୍ଚାଅକ ନାଗେନ୍ତେ ସବେନ୍ ରାକାମ୍ରେନ୍ ଜାଁତୁକକେ ମିପିଦ୍ ଜଡ଼ା ଆଉକମ୍ ଓଡ଼ୋଃ ଆମ୍ ଇନ୍କୁଲଃ ଜାହାଜ୍ରେ ବଲଃମେଁ। ସବେନ୍ ରାକାମ୍ ରାକାମ୍ରେନ୍ ଚେଣେଁକ, ବିର୍ଜାଁତୁକ, ଆସୁଲ୍ ଜାଁତୁ, ଅତେରେନ୍ ରେଙ୍ଗାଅଃତାନ୍ ଓଡ଼ୋଃ ସେସେନ୍ତାନ୍ ସବେନ୍ ମିମିଦ୍ ଜଡ଼ାରାଃ ଜୁଡ଼ିକକେ ଜାହାଜ୍ରେ ଆମାଃଲଃ ଆଉକମେ। ଓଡ଼ୋଃ ସବେନ୍ ଜୀବ୍ଜାଁତୁକଆଃ ନାଗେନ୍ତେ ଆକଆଃ ଜଜମ୍ତେୟାଃ ଓଡ଼ୋଃ ଆମାଃ ଜଜମ୍ତେୟାଃ ଆଉହୁଣ୍ଡିକେଦ୍ତେ ଦହେମେ।” ଏନ୍ତେ, ପାର୍ମେଶ୍ୱାର୍ କାଜିକେଦ୍ ଲେକାଗି ନୁହୁଁ ସବେନାଃ ରିକାକେଦାଏ।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.