Munda Bible
ଏନେଟେଦ୍ 7
ଟୁଡା ଦାଆଃ
ପ୍ରାଭୁ ନୁହୁଁକେ କାଜିକିୟା, “ଆମାଃ ଅଡ଼ାଃରେନ୍କଲଃ ଜାହାଜ୍ରେ ବଲଃମେଁ, ଚିୟାଃଚି ନେ ପାରିୟାରେନ୍ ହଡ଼କଏତେ ଆଇଙ୍ଗ୍ ଆମ୍କେ ଏସ୍କାର୍ ଅତେରେ ଅକଆଃ ଧାର୍ମାନ୍ ତାନାଃ ଏନା ରିକାତେୟାଃ ନେଲେମେ ତାନାଇଙ୍ଗ୍। ଓଡ଼ୋଃ ଅତେରେ ପସାଇଦିୟଃ ନାଙ୍ଗ୍, ଅକନ୍ ଜାଁତୁକ ଫାର୍ଚିଗିଆଃକ ଇନ୍କୁଆଃ ଏୟା ଜଡ଼ା ଲେକା ଓଡ଼ୋଃ ଅକନ୍କ ସତ୍ରା ଗିୟାଃକ ଇନ୍କୁଆଃ ମିମିଆଦ୍ ଜଡ଼ା, ଓଡ଼ୋଃ ସବେନ୍ ରାକାମ୍ରେନ୍ ଚେଣେଁକଆଃ ଏୟା ଜୁଡ଼ି ଆମାଲଃ ଇଦିକମେ। ଚିଆଃଚି ଆଡଃମିସା ନେ ଅତେଦିଶୁମ୍ରେ ପସାଇଦିୟଃ ସବେନ୍ ଲେକାନ୍ ଚେଁଣେ ଓଡ଼ୋଃ ଜାଁତୁକକେ ଜୀନିଦ୍ଗି ଦହଃକାକ। ଚିୟାଃଚି ଏୟା ହୁଲାଙ୍ଗ୍ ତାୟମ୍ତେ ଆଇଙ୍ଗ୍ ଅତେରେ ବାର୍ହିସି ନିଦା ଓଡ଼ୋଃ ସିଙ୍ଗି ଗାମାଦାଆଃ କୁଲେୟାଇଁଙ୍ଗ୍ ଓଡ଼ୋଃ ଆଇଙ୍ଗ୍ ବାଇୟାଃକାଦ୍ ଅତେରେନ୍ ସବେନ୍ ଜୀବ୍ଜାଁତୁକକେ ଜିୟନ୍ କଆଇଙ୍ଗ୍।” ଓଡ଼ୋଃ ପ୍ରାଭୁ ଆଚୁକାଦ୍ ଲେକାଗି ନୁହୁଁ ସବେନାଃ ରିକାକେଦାଏ।
ନୁହୁଁରାଃ ୬୦୦ ବାରାଷ୍ ହବାଅ ତାଇକେନ୍ ଇମ୍ତା, ଅତେରେ ଟୁଡା ଦାଆଃ ହିଜୁଃୟାନା। ଏନ୍ତେ ନୁହୁଁ ଓଡ଼ୋଃ ଆୟାଃ କୁଡ଼ିତେ, ଇନିୟାଃ ହନ୍ଗାଣା ଓଡ଼ୋଃ କିମିନ୍କଲଃ ଟୁଡା ଦାଆଃଏତେ ବାଞ୍ଚାଅ ନାଗେନ୍ତେ ଦାଆଃ ଜାହାଜ୍ତେ ବଲୟାନାକ। ଏନ୍ତେ ଫାର୍ଚି ଓଡ଼ୋଃ ସତ୍ରାକାନ୍ ସବେନ୍ ରାକାମ୍ରେନ୍ ଜାଁତୁ ଓଡ଼ୋଃ ଚେଣେଁକ ଓଡ଼ୋଃ ରେଙ୍ଗାଅଃତାନ୍ ମିମିୟାଦ୍ ଜୁଡ଼ି ନୁହୁଁତାଃ ହିଜୁଃୟାନାକ, ଓଡ଼ୋଃ ପାର୍ମେଶ୍ୱାର୍ ଆଚୁକାଦ୍ ଲେକାଗି ଇନ୍କୁ ଜୁଡ଼ି ଜୁଡ଼ି ଦାଆଃ ଜାହାଜ୍ରେ ବଲୟାନାକ। ଏନ୍ତେ ଏୟା ହୁଲାଙ୍ଗ୍ ତାୟମ୍ତେ ଗାମାଦାଆଃ ଅତେରେ ହିଜୁଃୟାନା।
ନୁହୁଁଆଃ ୬୦୦ ବାରାଷ୍ ହବାକାନ୍ ତାଇକେନା ଇମ୍ତା, ବାର୍ ମାହିନାରାଃ ଗେଲେୟା ହୁଲାଙ୍ଗ୍ରେ, ମାରାଙ୍ଗ୍ ଦରେୟାରେ ହୁଣ୍ଡିୟାକାନ୍ ସବେନ୍ ସେତେଙ୍ଗ୍ ଦାଆଃ ନିଜ୍ୟାନା ଓଡ଼ୋଃ ସିର୍ମାରେୟାଃ ଦାଆଃ ଦୁହାର୍ ନିଜ୍ୟାନା। ଓଡ଼ୋଃ ଅତେରେ ବାର୍ହିସି ନିଦା ଓଡ଼ୋଃ ବାର୍ହିସି ସିଙ୍ଗି ଦାଆଃ ଗାମାକେଦାଏ। ଏନ୍ ହୁଲାଙ୍ଗ୍ଗି ନୁହୁଁ ଆୟାଃ କୁଡ଼ିତେ ଓଡ଼ୋଃ ଆୟାଃ ଆପିୟା ହନ୍କଡ଼ା ଶେମ୍, ହାମ୍, ଯାଫେତ୍ ଓଡ଼ୋଃ ଆୟାଃ ଆପିୟା କିମିନ୍କଲଃ ଦାଆଃ ଜାହାଜ୍ରେ ବଲୟାନାକ। ଇନ୍କୁଲଃ ସବେନ୍ ରାକାମ୍ ରାକାମ୍ରେନ୍ ଆସୁଲ୍ ଜାତୁଁ, ବିର୍ରେନ୍ ଜାଁତୁ, ଅତେରେ ରେଙ୍ଗାଅଃତାନ୍ ଜାଁତୁ, ଓଡ଼ୋଃ ଚେଣେଁକ, ଦାଆଃ ଜାହାଜ୍ରେ ବଲୟାନାକ ନେ'ଲେକାଗି ସବେନ୍ ସାହେଁଦ୍ ଇଦିତାନ୍ ସବେନ୍ ଜିବ୍ ଜାତୁଁକ ମିମିଦ୍ ମିମିଦ୍ ଜଡ଼ା ନୁହୁଁତାଃତେ ହିଜୁଃ ସେଟେର୍କେଦ୍ତେ ଜାହାଜ୍ରେ ବଲୟାନାକ। ପାର୍ମେଶ୍ୱାର୍ ଆଚୁକାଦ୍ଲେକାଗି ସବେନ୍ ରାକାମ୍ରେନ୍ ଜାତୁଁକ ମିମିଦ୍ ମିମିଦ୍ ଜଡ଼ାକେଦ୍ତେ ବଲୟାନାକ, ଏନ୍ତେ ପ୍ରାଭୁ ପାର୍ମେଶ୍ୱାର୍ ଦାଆଃ ଜାହାଜ୍ରେୟାଃ ଦୁଆର୍କେ ହାଣ୍ଡେଦ୍କେଦା।
ଏନ୍ତେ ବାର୍ହିସି ହୁଲାଙ୍ଗ୍ ଜାକେଦ୍ ଗାମାଦାଆଃ ହିଜୁଃୟାନା; ଓଡ଼ୋଃ ପୁରାଃଗି ଦାଆଃ ଗାମା ହରାତେ ଦାଆଃ ଜାହାଜ୍ ଅତେକେ ବାଗିକେଦ୍ତେ ଦାଆଃ ଚେତାନ୍ତେ ଆତୁ ୟାନା। ଅତେ ଚେତାନ୍ରେ ଦାଆଃ ପୁରାଃଗି ହବାୟାନା ଏନ୍ତେ ଦାଆଃ ଜାହାଜ୍ ଦାଆଃ ଚେତାନ୍ରେ ଆତୁ ଏଟେଦ୍ୟାନା। ଅତେ ଚେତାନ୍ରେ ପୁରାଃଗି ଦାଆଃ ହବାୟାନ୍ ହରାତେ ସାଲାଙ୍ଗି ବୁରୁକ ଦାଆଃତେ ତପାୟାନା। ଏନ୍ ବୁରୁ ଚେତାନ୍କ ଏତେ ଆଡଃଗି ଗେଲ୍ ମଣେୟାଁ ମୁକାରେୟାଃ ସାଲାଙ୍ଗିରେ ଦାଆଃ ତାଇନ୍ୟାନା। ଏନାମେନ୍ତେ ସବେନ୍ ଅତେରେନ୍ ଜାଁତୁକ ଗଏଃୟାନା, ଚେଣେଁକ, ହାତୁରେ ତାଇନ୍ତାନ୍ ଆସୁଲ୍ ଜାତୁଁକ, ବିର୍ରେନ୍ ଜାଁତୁକ, ଅତେରେ ରେଙ୍ଗାଅଃତାନ୍ ଜାଁତୁ ଓଡ଼ୋଃ ସବେନ୍ ହଡ଼କ ଜିଅନ୍ୟାନାକ। ଅତେ ଚେତାନ୍ରେ ସାହେଁଦ୍ ଇଦିତାନ୍ ସବେନ୍ ଜାଁତୁକ ଗଏଃୟାନା। ନେ'ଲେକାତେ ଅତେ ଚେତାନ୍ରେ ତାଇନ୍ତାନ୍ ସବେନ୍ ଜାଁତୁକ, ଚେଣେଁକ,ଅତେରେ ରେଙ୍ଗାଅଃତାନ୍ ଜାଁତୁକ ଓଡ଼ୋଃ ସବେନ୍ ହଡ଼କ ଜିଅନ୍ୟାନାକ, ନୁହୁଁ ଓଡ଼ୋଃ ଆୟାଃଲଃ ଦାଆଃ ଜାହାଜ୍ରେ ତାଇକେନ୍କ ଏସ୍କାର୍ ବାଞ୍ଚାଅୟାନା। ନେ'ଲେକାତେ ଅତେରେ ୧୫୦ ମାହା ଜାକେଦ୍ ଦାଆଃ ତାଇନ୍ୟାନା।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.