Munda Bible
ଏନେଟେଦ୍ 4
କୟିନ୍ ଓଡ଼ୋଃ ହାବିଲ୍
ଏନ୍ତେ ଆଦାମ୍ ଆୟାଃ କୁଡ଼ି ହାୱାଲଃ ମିଦ୍ ହଡ଼୍ମୟାନାକିନ୍, ଓଡ଼ୋଃ ଇନିଃ ହାମ୍ବାଲ୍ରୋୱାୟାନାଏ। ଏନ୍ତେ ଇନିଃ ମିଆଦ୍ କଡ଼ାହନ୍ ଜାନାମ୍କିୟାଃ ଓଡ଼ୋଃ ଇନିଃକେ କୟିନ୍ ମେନ୍ତେ ନୁତୁମ୍ ଏମ୍କିୟାଃ ଓଡ଼ୋଃ କାଜିକେଦା, “ପ୍ରାଭୁଆଃ ଦେଙ୍ଗାତେ ଆଇଙ୍ଗ୍ ମିଆଦ୍ କଡ଼ାହନ୍ ନାମ୍କିୟାଃଇଙ୍ଗ୍।” ତାୟମ୍ତେ ହାୱାରାଃ ଆଡଃମିଆଦ୍ କଡ଼ାହନ୍ ଜାନାମ୍ୟାନାଏ, ଇନିୟାଃ ନୁତୁମ୍ ହାବିଲ୍ ଏମ୍କିୟାଏ। ଇନିଃ ମିଆଁଦ୍ ମିଣ୍ଡି ଗୋଟ୍ରେନ୍ ଗୁପିନିଃ ବାଇୟାନାଏ, ମେନ୍ଦ କୟିନ୍ ଲୟଙ୍ଗ୍କାମିନିଃ ବାଇୟାନାଏ। ମୁସିଙ୍ଗ୍ ହୁଲାଙ୍ଗ୍ କୟିନ୍ ପିଡ଼ିରାଃ ଅମନ୍ ଜ ଆଉକେଦ୍ତେ ପ୍ରାଭୁଆଃ ନୁତୁମ୍ରେ ହିତାଜାଙ୍ଗ୍ରାଃ ଦାନ୍ ରାକାବ୍କେଦାଏ। ଏନ୍ତେ ହାବିଲ୍ ହଁଗି ଆୟାଃ ମିଣ୍ଡି ଗୋଟ୍ରେନ୍ ସିଦା ଜାନାମ୍କାନ୍ ଚିମିନ୍ ମିଣ୍ଡିହନ୍ ଆଉକେଦ୍କଆଏ, ଓଡ଼ୋଃ ଇନ୍କୁକେ ମାଆଃକେଦ୍ତେ ଇନ୍କୁଆଃ ବୁଗିନ୍ ହିସାକେ ଦାନ୍ ରାକାବ୍କେଦା। ଏନାରେ ପ୍ରାଭୁ ହାବିଲ୍କେ ଓଡ଼ୋଃ ଆୟାଃ ଦାନ୍ ରାକାବ୍ତେୟାଃକେ ସୁକୁୟାନାଏ। ମେନ୍ଦ ପ୍ରାଭୁ କୟିନ୍କେ ଓଡ଼ୋଃ ଆୟାଃ ଦାନ୍କେ କାଏ ସୁକୁୟାନା। ଏନାମେନ୍ତେ କୟିନ୍ ପୁରାଃଗି ଖିସ୍ୟାନା ଓଡ଼ୋଃ ଦୁକୁୟାନା। ଏନ୍ତେ ପ୍ରାଭୁ କୟିନ୍କେ କାଜିକିୟା, “ଚିନାଃ ମେନ୍ତେମ୍ ଖିସ୍ଅଃ ତାନାଃ ? ଚିନାଃ ମେନ୍ତେମ୍ ଦୁକୁ ତାନାଃ ? ଆମ୍ ବୁଗିନ୍ କାମି ରିକାଏରେଦ, ଆଇଙ୍ଗ୍ ଆମ୍କେ ସୁକୁମେୟାଇଙ୍ଗ୍। ମେନ୍ଦ ଆମ୍ ଏତ୍କାନ୍ କାମି ରିକାଏ ରେଦ, ଆମାଃ ଦୁହାର୍ରେ ପାପ୍ ହର ଛେକାଦ୍ମେୟାଏ, ଓଡ଼ୋଃ ଏନା ଆମାଃ ଚେତାନ୍ରେ ରାଇଜ୍ନାଙ୍ଗ୍ ସାନାଙ୍ଗେ, ମେନ୍ଦ ଆମ୍ ଏନାକେ ଜିତାଅ ଦାଡ଼ିୟାମ୍।”
ଏନ୍ତେ କୟିନ୍ ହାବିଲ୍ଲଃ ଜାଗାର୍ତାନ୍ଲଃ ପିଡ଼ିତେକିନ୍ ସେନଃୟାନା, ଓଡ଼ୋଃ ଏନ୍ତାଃରେ କୟିନ୍ ହାବିଲ୍କେ ଗଏଃକିୟା।
ପ୍ରାଭୁ କୟିନ୍କେ କୁଲିକିୟା, “ହାଗାମ୍ ହାବିଲ୍ କତାଃରିୟା ?” ଇନିଃ କାଜିରୁହାଡ଼୍କିୟା, “ଆଇଙ୍ଗ୍ କାଇଙ୍ଗ୍ ସାରିୟା, ଚିନାଃ ଆଇଙ୍ଗ୍ ହାଗାଇଁୟାଃ ଯାତାନ୍ ଇଦିନିଃ ତାନିଙ୍ଗ୍ ?” ଏନ୍ତେ ପ୍ରାଭୁ କାଜିକିୟା, “ଚିନାଃ ମେନ୍ତେମ୍ ନେ ବରୱାନ୍ କାମି ରିକାକେଦାମ୍ ? ଆମାଃ ହାଗାମାଃ ମାୟୋମ୍ ପିଡ଼ିଏତେ ରାଆଃ ତାନ୍ଲଃ କାଉରିତାନାଏ। ଅତେରେ ହାଗାମାଃ ମାୟୋମ୍ ଲିଙ୍ଗିକେଦାମ୍, ଏନାମେନ୍ତେ ଆମ୍ ସାର୍ପାଅୟାନାମ୍ ଓଡ଼ୋଃ ଆମ୍କେ ଅତେଏତେ ହାର୍ଅଡଙ୍ଗ୍ ହବାଅଃଆ। ଆମ୍ ପେଡ଼େଃ ଲାଗାଅକେଦ୍ତେ ଅତେରେ ହିତା ହେର୍ ରେୟ, ଏନାରେ ଜେତ୍ନାଃ କା ଅମନଃଆ। ଆମ୍ ଅଡ଼ାଃ ବାନଃ ଲେକା ନେତେହେନ୍ତେ ହନର୍ତାନ୍ନିଃ ହବାଅଃଆମ୍।”
କୟିନ୍ ପ୍ରାଭୁକେ କାଜିକିୟା, “ଆଇଙ୍ଗ୍ ନେ ସାଜାଇ କାଇଙ୍ଗ୍ ସାହାତିଙ୍ଗ୍ ଦାଡ଼ିୟା। ତିସିଙ୍ଗ୍ ଆମ୍ ଆଇଙ୍ଗ୍କେ ନେ ଅତେ ଏତେ ହାର୍ଅଡଙ୍ଗ୍ କେଦିଁୟାମ୍, ଓଡ଼ୋଃ ଆଇଙ୍ଗ୍ ଆମାଃ ହେପାଦ୍ଏତେ ସାଙ୍ଗିନ୍ ୟାନାଇଙ୍ଗ୍, ଆଇଙ୍ଗ୍ ଅଡ଼ାଃ ବାନଃ ଲେକା ନେତେହେନ୍ତେ ହନର୍ତାନ୍ନିଃ ହବାଅଃଆଇଙ୍ଗ୍ ଓଡ଼ୋଃ ଜେତା ହଡ଼ ଆଇଙ୍ଗ୍କେ ନାମିଙ୍ଗ୍ରେଦ ଗଜିୟାଁକ।”
ମେନ୍ଦ ପ୍ରାଭୁ କାଜିରୁହାଡ଼୍କିୟାଏ, “ବାନଃଗି, ଜେତାଏ ଆମ୍କେ ଗଏଃମେରେଦ, ଇନିଃ ଏୟା ଗୁନା ସାଜାଇ ନାମେୟାଏ। ଜେତାଏ ଇନିଃକେ ନେଲ୍କେଦ୍ତେ ଆଲକାକ ଗଜି ମେନ୍ତେ ପ୍ରାଭୁ କୟିନ୍କେ ମିଆଁଦ୍ ଚିହ୍ନା ଏମ୍କିୟାଏ। ଏନ୍ତେ କୟିନ୍ ପ୍ରାଭୁଆଃ ହେପାଦ୍ଏତେ ସେନଃୟାନାଏ, ଓଡ଼ୋଃ ଏଦାନ୍ ବାଗାଇଚାରେୟାଃ ସିଙ୍ଗିତୁରଃସାଃରେ ତାଇନ୍ତାନ୍ ନୋଦ୍ ନୁତୁମ୍ ଠାୟାଦ୍ରେ ତାଇନ୍ୟାନାଏ।
କୟିନ୍ଆଃ କିଲିକ
“କୟିନ୍ ଓଡ଼ୋଃ ଆୟାଃ କୁଡ଼ିତେଲଃ ମିଦ୍ ହଡ଼୍ମୟାନ୍ ହରାତେ ମିଆଦ୍ ହନ୍ ଜାନାମ୍ୟାନାଏ, ଓଡ଼ୋଃ ଇନିଃକେ ହନୋକ୍ ନୁତୁମ୍କିୟାକିନ୍, ଏନ୍ତେ ଇନିଃ ମିଆଦ୍ ନାଗାର୍ ବାଇକେଦ୍ତେ ଆୟାଃ ହନ୍ତେକଡ଼ାରାଃ ନୁତୁମ୍ ଲେକା ଏନାରା ନୁତୁମ୍ ହନୋକ୍ ଏମ୍କେଦାଏ। ଏନ୍ ହନୋକ୍ଆଃ ହନ୍ ଈରଦ୍, ଈରଦାଃ ହନ୍ ମହୁଆୟେଲ୍, ମହୁଆୟେଲ୍ଆଃ ହନ୍ ମଥୁଶାୟେଲ୍, ମଥୁଶାୟେଲ୍ଆଃ ହନ୍ ଲାମେକ୍। ଲାମେକ୍ ବାରିୟା କୁଡ଼ିକିନ୍କେ ଆଣ୍ଦିକାନ୍ ତାଇକେନାଏ, ମିଆଦ୍ନିୟା ନୁତୁମ୍ ଆଦା, ଏଟାଃନିୟାଃ ନୁତୁମ୍ ସିଲ୍ଲା। ଆଦା ଜାବଲ୍କେ ଜାନାମ୍କିୟା, ଇନିଃ କୁମ୍ବାରେ ତାଇନ୍ତାନ୍ ଆସୁଲ୍ ଜାଁତୁକଆଃ ପୁର୍ଖାହାଡ଼ାମ୍ ତାଇକେନାଏ। ଇନିୟାଃ ହାଗାତେୟାଃ ନୁତୁମ୍ ଯୁବଲ୍, ଇନିଃ ବାନାମ୍ ଓଡ଼ୋଃ ମୁର୍ଲି ସାଡ଼ି ହଡ଼କଆଃ ପୁର୍ଖାହାଡ଼ାମ୍ ତାଇକେନାଏ। ସିଲ୍ଲାରାଃ ମିଆଦ୍ କଡ଼ାହନ୍ ଜାନାମ୍ୟାନାଏ, ଇନିୟାଃ ନୁତୁମ୍ ତୁବଲ୍କୟିନ୍ ତାଇକେନା। ଇନିଃ ପିତାଲ୍ ଓଡ଼ୋଃ ମେଡ଼େଦ୍ରାଃ ସବେନ୍ ରାକାମ୍ରାଃ ଜିନିଷ୍କ ବାବାଇନିଃ ହବାୟାନାଏ, ଓଡ଼ୋଃ ଇନିୟାଃ ମିଆଦ୍ ମିଶି ତାଇକେନାଏ ଇନିୟାଃ ନୁତୁମ୍ ନୟମା ତାଇକେନା।”
ଲାମେକ୍ ଆୟାଃ କୁଡ଼ିକିନ୍କେ କାଜିକେଦ୍କିନା,
“ଆଦା ଓଡ଼ୋଃ ସିଲ୍ଲା ଆଇଁୟାଃ କାଜି ଆୟୁମେବେନ୍, ମିଆଁଦ୍ ହଡ଼ ଆଇଙ୍ଗ୍କେ ଦାଲ୍କେଦିୟାଁ, ଏନାମେନ୍ତେ ଆଇଙ୍ଗ୍ ଇନିଃକେ ଗଏଃକିୟାଇଙ୍ଗ୍।
କୟିନ୍କେ ଗଗଏଃ ହଡ଼ରାଃ ସାଜାଇ ଏୟାଗୁନା ହବାଅ ତାନ୍ରେଦ,
ଲାମେକ୍କେ ଗଗଏଃ ନିୟାଃରାଃ ସାଜାଇ ଆପିହିସି ଗେଲ୍'ଏୟା ଗୁନା ହବାଅଃଆ।”
ଶେଥ୍ ଓଡ଼ୋଃ ଇନୋଶ୍
ଆଦାମ୍ ଓଡ଼ୋଃ ହାୱାରାଃ ଆଡଃମିଆଦ୍ ହନ୍ ଜାନାମ୍ୟାନାଏ,ଏନ୍ତେ ଇନିଃକେ ଶେଥ୍ ନୁତୁମ୍କିୟାଃ ଓଡ଼ୋଃ କାଜିକେଦାଏ, “ପାର୍ମେଶ୍ୱାର୍ ଆଇଙ୍ଗ୍କେ ହାବିଲ୍ରାଃ ବାଦ୍ଲାରେ ଆଡଃମିଆଦ୍ ହନ୍ ଏମ୍କେଦିୟାଁଏ, ଚିୟାଃଚି କୟିନ୍ ହାବିଲ୍କେ ଗଜାକାଇତେନାଏ।” ଏନ୍ତେ ଶେଥ୍ରାଃ ମିଆଦ୍ ହନ୍ ଜାନାମ୍ୟାନାଏ ଓଡ଼ୋଃ ଇନିୟାଃ ନୁତୁମ୍ ଇନୋଶ୍ ଏମ୍କିୟାଏ। ଏନ୍ ଦିପିଲିଏତେ ହଡ଼କ ପ୍ରାଭୁଆଃ ନୁତୁମ୍ରେ ବିନ୍ତି ଏଟେଦ୍କେଦାକ।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.