Munda Bible
ଏନେଟେଦ୍ 3
କାଜି କା ମାନାତିଙ୍ଗ୍ ମାନୱା
ପ୍ରାଭୁ ପାର୍ମେଶ୍ୱାର୍ତେ ବାଇୟାକାନ୍ ଅତେରେ ରେଙ୍ଗାଅଃତାନ୍ ଜାଁତୁକଏତେ ବିଙ୍ଗ୍ ପୁରାଃଗି ହସଡ଼ନିଃ ତାଇକେନାଏ। ମୁସିଙ୍ଗ୍ହୁଲାଙ୍ଗ୍ ଏନ୍ ବିଙ୍ଗ୍, କୁଡ଼ିକେ କାଜିକିୟା, “ଚିୟାଃ, ପାର୍ମେଶ୍ୱାର୍ ସାର୍ତିଗି କାଜିକାଦା, ବାଗାଇଚାରେୟାଃ ଜେତାନ୍ ଦାରୁରାଃ ଜ ଆଲ୍ବେନ୍ ଜମେ ମେନ୍ତେ ଆଚୁକାଦା ?”
କୁଡ଼ି ବିଙ୍ଗ୍କେ କାଜିରୁହାଡ଼୍କିୟାଏ, “ଆଲିଙ୍ଗ୍ ବାଗାଇଚାରେୟାଃ ସବେନ୍ ଦାରୁରାଃ ଜ' ଜମ୍ ଦାଡ଼ିୟାଃଲିଙ୍ଗ୍, ମେନ୍ଦ ବାଗାଇଚାରାଃ ଥାଲାରେ ଅକ ଦାରୁ ମେନାଃ ଏନାରେୟାଃ ଜ' ଜମ୍ ନାଗେନ୍ତେ ମାନା ମେନାଃ, ଚିୟାଃଚି ପାର୍ମେଶ୍ୱାର୍ କାଜିକାଦାଏ, ‘ଏନ୍ ଦାରୁରେୟାଃ ଜ'କେ ଆବେନ୍ ଜମେ ଚାଏ ଜୁଟିଦେ ରେଦ ଗଜଃଆବେନ୍।’”
ବିଙ୍ଗ୍ କୁଡ଼ିକେ କାଜିରୁହାଡ଼୍କିୟାଏ, “ଏନାଦ ସାର୍ତି ନାହାଁଲାଃ, ଜେତା ଲେକାତେ କାବେନ୍ ଗଜଃଆ।” ଚିୟାଃଚି ପାର୍ମେଶ୍ୱାର୍ ସାରିତାନାଏ ଯେ, ଆବେନ୍ ଅକ ହୁଲାଙ୍ଗ୍ ଏନ୍ ଦାରୁରାଃ ଜ' ଜମେୟାଁବେନ୍ ଏନ୍ ହୁଲାଙ୍ଗ୍ ମେଦ୍ ତାବେନାଃ ନିଜଃଆ ଏନ୍ତେ ପାର୍ମେଶ୍ୱାର୍ ଲେକା ଅକଆଃ ବୁଗିନ୍ ଓଡ଼ୋଃ ଏତ୍କାନାଃ ଏନା ସାରିଦାଡ଼ିୟାବେନ୍।
ଏନ୍ କୁଡ଼ି ନେଲ୍କେଦାଏ ଯେ, ଏନ୍ ଦାରୁରେୟାଃ ଜ'କେ ଜଜମ୍ ନାଙ୍ଗ୍ ବୁଗିନ୍, ନେପେଲ୍ରେ ସୁଗାଡ଼ାନ୍ ଓଡ଼ୋଃ ସେଣାଁନ୍ ଲେକା ମେନାଃ। ଇନିଃ ଜ' ଗଦ୍କେଦ୍ତେ ଜମ୍କେଦାଏ ଓଡ଼ୋଃ ଆୟାଃଲଃ ତାଇକେନ୍ କଡ଼ାତେକେ ହଁଗି ଏମ୍କିୟା। ଏନ୍ତେ ଇନିଃ ହଁଗି ଜମ୍କେଦାଏ। ଇନ୍କିନ୍ ଏନ୍ ଜ'କେ ଜମ୍କେଦ୍ଚି, ଆଟ୍କାର୍ ଉରୁମ୍କେଦାକିନ୍ ଯେ, ସାମା ହଡ଼୍ମ ମେନାକିନା, ଏନାତେ ଇନ୍କିନ୍ ଲଆ ଦାରୁରେୟାଃ ସାକାମ୍ ରଅଃକେଦ୍ତେ ଦାପାଲେନ୍ ନାଙ୍ଗ୍ ବାଇକେଦାକିନ୍।
ଏନ୍ ହୁଲାଙ୍ଗ୍ ସିଙ୍ଗିହାସୁରଃ ଇମ୍ତା ପ୍ରାଭୁ ପାର୍ମେଶ୍ୱାର୍ ବାଗାଇଚାତେ ହିଜୁଃତାନ୍ତେୟାଃ ମାନୱା ଓଡ଼ୋଃ ଆୟାଃ କୁଡ଼ି ଆଟ୍କାର୍କେଦାକିନ୍ ଏନ୍ତେ ଇନ୍କିନ୍ ପ୍ରାଭୁ ପାର୍ମେଶ୍ୱାର୍ତାଃଏତେ ଦାନାଙ୍ଗ୍ଅଃ ନାଗେନ୍ତେ ବାଗାଇଚାରାଃ ଦାରୁ ଝୁଣ୍ଡ୍ରେ ଉକୁୟାନାକିନ୍। ମେନ୍ଦ ପ୍ରାଭୁ ପାର୍ମେଶ୍ୱାର୍ ମାନୱାକେ ହାକାଅକେଦ୍ତେ କାଜିକିୟା, “ଆମ୍ କତାଃରେମା ?”
ଇନିଃ କାଜିରୁହାଡ଼୍କିୟାଏ, “ଆଇଙ୍ଗ୍ ବାଗାଇଚାରେ, ଆମାଃ ହିଜୁଃତେୟାଃ ଆୟୁମ୍କେଦ୍ତେ ବରତେ ଉକୁୟାନିଙ୍ଗ୍, ଚିୟାଃଚି ଆଇଙ୍ଗ୍ଦ ସାମା ହଡ଼୍ମ ତାଇକେନାଇଙ୍ଗ୍।”
ପାର୍ମେଶ୍ୱାର୍ କାଜିକିୟାଏ, “ଆମ୍ ସାମା ହଡ଼୍ମ ମେନାମେୟା ମେନ୍ତେ ଅକଏ ଆମ୍କେ ଉଦୁବାଦ୍ମାଏଁ ? ଆଇଙ୍ଗ୍ ଅକ ଦାରୁରାଃ ଜ' ଜମ୍ ନାଗେନ୍ତେ ମାନାକାଦ୍ମେ ତାଇକେନାଇଙ୍ଗ୍, ଏନା ଚିନାଃ ଆମ୍ ଜମ୍କେଦାମ୍ ?”
ହଡ଼ କାଜିରୁହାଡ଼୍କିୟାଏ, “ଅକ କୁଡ଼ିକେ ଆମ୍ ଆଇଁୟାଃ ଦେଙ୍ଗାନିଃ ଲେକା ଏମାକାଦିୟାଁମ୍, ଇନିଃ ଏନ୍ ଜ' ଜମ୍ ନାଗେନ୍ତେ ଏମାଦିୟାଁଏ ଓଡ଼ୋଃ ଆଇଙ୍ଗ୍ ଏନାକେ ଜମ୍କେଦାଇଙ୍ଗ୍।”
ଏନ୍ତେ ପ୍ରାଭୁ ପାର୍ମେଶ୍ୱାର୍ କୁଡ଼ିକେ କାଜିକିୟା, “ନେଆଁ ଚିନାଃମ୍ ଚିକାକେଦା ?”
ଇନିଃ କାଜିରୁହାଡ଼୍କିୟାଏ, “ଆଇଙ୍ଗ୍ ଜମ୍କେଦାଇଙ୍ଗ୍, ଚିୟାଃଚି ବିଙ୍ଗ୍ ଆଇଙ୍ଗ୍କେ ବେଦାକେଦିୟାଁ।”
ପାର୍ମେଶ୍ୱାର୍ଆଃ ବିଚାର୍
ଏନ୍ତେ ପ୍ରାଭୁ ପାର୍ମେଶ୍ୱାର୍ ବିଙ୍ଗ୍କେ କାଜିକିୟା, “ଆମ୍ ନେଆଁ କାମିକାଦ୍ ହରାତେ ସବେନ୍ ବିର୍ଜାଁତୁ ଓଡ଼ୋଃ ଆସୁଲ୍ ଜାଁତୁ କତାଃଏତେ ପୁରାଃଗି ସାର୍ପାଅ ନାମ୍କେଦାମ୍, ଆମ୍ ଆମାଃ ଲାହିଦ୍ତେ ଜାନାଅଗି ରେଙ୍ଗାଅଃଆମ୍ ଓଡ଼ୋଃ ଧୁଡ଼ି ଜମେୟାମ୍। ଆଇଙ୍ଗ୍ ଆମାଃ ଓଡ଼ୋଃ କୁଡ଼ିରାଃ ଥାଲାରେ, ହିସିଙ୍ଗା ଦହେୟା, ଆମାଃ ହନ୍କଆଃ ଓଡ଼ୋଃ ଇନିୟାଃ ହନ୍କଆଃ ଥାଲାରେ ବାଇରି ଦହେୟା, ଇନିୟାଃ ହନ୍କ ଆମାଃ ବହଃକେ ରଚଦେୟାଃକ ଓଡ଼ୋଃ ଆମ୍ ଇନିୟାଃ ହନ୍କଆଃ ଇଡିରେ ହାବ୍କୁଆମ୍।”
ଏନ୍ତେ ପାର୍ମେଶ୍ୱାର୍ କୁଡ଼ିକେ କାଜିକିୟା, “ଆମାଃ ହାମ୍ବାଲ୍ରୋୱା ଦୁକୁ ପୁରାଃଗି ହବାଅଃଆ ଓଡ଼ୋଃ ହନ୍ ଜାନାମ୍ରେୟାଃ ଦୁକୁ ପୁରାଃଗି ହବାଅଃଆ, ଓଡ଼ୋଃ କଡ଼ା ଚେତାନ୍ରେ ଆମାଃ ପୁରାଃଗି ଇଛାସାନାଙ୍ଗ୍ ତାଇନାଃ, ଇନିଃ ଆମାଃ ଚେତାନ୍ରେ ରାଇଜ୍ ରିକାୟା।”
ଓଡ଼ୋଃ ଇନିଃ ଆଦାମ୍କେ କାଜିକିୟା, “ଆଇଙ୍ଗ୍ ଅକ ଦାରୁରାଃ ଜ' ଜମ୍ନାଙ୍ଗ୍ ମାନାକାଦ୍ ତାଇକେନାଇଙ୍ଗ୍, ଏନାକେ ଆମ୍ ଆମାଃ କୁଡ଼ିରାଃ କାଜି ଆୟୁମ୍କେଦ୍ତେ ଜମ୍କେଦାମ୍, ଆମାଃ ନେ କାମି ହରାତେ ଅତେ ସାର୍ପାଅୟାନା, ଆମ୍ ଜାନାଅ ଜୀଦାନ୍ ଅତେରେ କେଟେଃଦ୍ କାମିକେଦ୍ତେ ଜଜମାଃ ନାମେୟାମ୍। ପିଡ଼ିରେ ଜାନୁମ୍ ଓଡ଼ୋଃ ଚୁପାଦ୍କ ଅମନଆଃ ଓଡ଼ୋଃ ଆମ୍ ପିଡ଼ିରେୟାଃ ଆଡ଼ାଃସାକାମ୍ ଜମେୟାଁମ୍। ଆମ୍ ପୁରାଃ କେଟେଃଦ୍ କାମିୟାମ୍ ଓଡ଼ୋଃ ବାଲ୍ବାଲ୍ଦାଆଃ ହାସାରେ କା ମେସାଅଃ ଜାକେଦ୍ ହାସା ଜଜମା କାଏ ଅମନ୍ ରିକାୟା; ଆମ୍ ଅକ ହାସା ଏତେ ବାଇୟାକାନାମ୍ ଏନାରେଗି ଆଡଃମିସା ମେସାରୁହାଡ଼ଃଆମ୍।”
ଆଦାମ୍ ଆୟାଃ କୁଡ଼ିତେୟାଃ ନୁତୁମ୍ ହାୱା ଏମ୍କିୟାଏ, ଚିୟାଃଚି ଇନିଃ ସବେନ୍ ଜୀନିଦ୍ ମାନୱାକଆଃ ଏଙ୍ଗା ହବାୟାନାଏ। ଓଡ଼ୋଃ ପ୍ରାଭୁ ପାର୍ମେଶ୍ୱାର୍ ଜାଁତୁରାଃ ଉହୁର୍ତେ ଲିଜାଃ ବାଇକେଦାଏ, ଏନ୍ତେ ଆଦାମ୍ ଓଡ଼ୋଃ ଆୟାଃ କୁଡ଼ିକେ ତୁସିଙ୍ଗ୍ କେଦ୍କିନାଏ।
ଆଦାମ୍ ଓଡ଼ୋଃ ହାୱା ବାଗାଇଚାଏତେ ହାର୍ଅଡଙ୍ଗ୍ୟାନାକିନ୍
ଏନ୍ତେ ପ୍ରାଭୁ ପାର୍ମେଶ୍ୱାର୍ କାଜିକେଦାଏ, “ନାହାଁଦ ହଡ଼ ବୁଗିନ୍ ଓଡ଼ୋଃ ଏତ୍କାନାଃରାଃ ସେଣାଁ ନାମ୍କେଦ୍ତେ ଆବୁଆଃ ଲେକା ହବାକାନାଏ। ଓଡ଼ୋଃ ନାହାଁଃ ଇନିଃ ଆୟାଃ ତିଃଇ ଜିଲିଙ୍ଗ୍ କେଦ୍ତେ ଜୀଦାନ୍ ଏମଃ ଦାରୁରେୟାଃ ଜ' ଜମ୍କେଦ୍ତେ ଜାନାଅ ଜୀଦାନ୍ ଆଲକାଏ ନାମେ।” ଏନାମେନ୍ତେ, ପ୍ରାଭୁ ପାର୍ମେଶ୍ୱାର୍ ଏଦାନ୍ ବାଗାଇଚା ଏତେ ଇନ୍କିନ୍କେ ହାର୍ଅଡଙ୍ଗ୍କେଦ୍କିନାଏ ଓଡ଼ୋଃ ଇନ୍କିନ୍ ଅକ ହାସାଏତେ ହିଜୁଃକାନ୍ ତାଇକେନାକିନ୍, ଏନ୍ ହାସାରେ ଲୟଙ୍ଗ୍କାମି ନାଗେନ୍ତେ ଇନ୍କିନ୍କେ ଜିମାକେଦ୍କିନା। ମାନୱାକେ ହାର୍ଅଡଙ୍ଗ୍କେଦ୍ତେ ଜୀଦାନ୍ ଦାରୁତାଃ ସେନ୍ ହରାକେ ହର ନାଙ୍ଗ୍ ଏଦାନ୍ ବାଗାଇଚାରେୟାଃ ସିଙ୍ଗିତୁରଃ ସାଃରେ କିରୁବ୍କକେ ଓଡ଼ୋଃ ବାଗାଇଚାରେୟାଃ ଚାରିୟସାଃରେ ଜୁଲ୍ ବିହୁର୍ତାନ୍ ତାରାଉଡ଼ି ଦହକେଦା।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.