Munda Bible
ଏନେଟେଦ୍ 39
ଯୋଷେଫ୍ ଓଡ଼ୋଃ ପୋଟିଫର୍ଆଃ କୁଡ଼ି
ନାହାଁଃଦ ଯୋଷେଫ୍କେ ଇଶ୍ମାଏଲ୍ କିଲିରେନ୍ ହଡ଼କ ମିସାର୍ତେ ଇଦିକିୟାକ ଓଡ଼ୋଃ ପୋଟିଫର୍ ନୁତୁମ୍ ମିଆଁଦ୍ ମିସାର୍ରେନ୍ ହଡ଼ ଯୋଷେଫ୍କେ କିରିଙ୍ଗ୍କିୟା। ପୋଟିଫର୍ ଫାରୋ ରାଜାରାଃ ହାକିମ୍ ଓଡ଼ୋଃ ହରତାନ୍ ସିପାଇକଆଃ ମୁଖିଆ ତାଇକେନାଏ। ପ୍ରାଭୁଆଃ ସାୟାଦ୍ ଯୋଷେଫ୍ଲଃ ତାଇକେନା, ଏନାମେନ୍ତେ ଯୋଷେଫ୍ ସବେନାଃରେ ହାରା ପସାଇଦିୟାନା। ଇନିଃ ମିସାର୍ରେନ୍ ଆୟାଃ ଗୁସିୟାଁରାଃ ଅଡ଼ାଃରେ ତାଇନ୍ୟାନା। ପ୍ରାଭୁ ଯୋଷେଫ୍ଲଃ ମେନାଇୟାଃ ଓଡ଼ୋଃ ଇନିୟାଃ ସବେନ୍ କାମିରେ ପ୍ରାଭୁ ଆଶିଷ୍ ଏମାଇତାନା, ନେ କାଜି ଏନ୍ ଗୁସିୟାଁ ସାରି ଦାଡ଼ିକେଦା।
ଏନାତେ ଯୋଷେଫ୍ ଆୟାଃ ଗୁସିୟାଁରାଃ ନେପେଲ୍ରେ ସାୟାଦ୍ ନାମ୍କେଦା ଓଡ଼ୋଃ ଆୟାଃ ସୁନୁସାର୍ କାମିରେ ତାଇନ୍ୟାନା। ଆଡଃଗି ପୋଟିଫର୍ ଇନିଃକେ ଆୟାଃ ଅଡ଼ାଃରାଃ ଗୁସିୟାଁ ଲେକା ସବେନାଃରାଃ ଜିମା ଏମ୍କିୟାଏ। ନେ'ଲେକାତେ ଇନିଃ ଯୋଷେଫ୍କେ ଆୟାଃ ଅଡ଼ାଃ ଓଡ଼ୋଃ ଅଡ଼ାଃରେୟାଃ ସବେନାଃରାଃ ଜିମା ଏମ୍କିଃ ହୁଲାଙ୍ଗ୍ତାଃଏତେ ପ୍ରାଭୁ ଯୋଷେଫ୍ଆଃ ହରାତେ ଏନ୍ ମିସାର୍ରେନ୍ ହଡ଼ଆଃ ଅଡ଼ାଃ ଚେତାନ୍ରେ ଆଶିଷ୍ ଏମ୍କେଦାଏ। ଏନ୍ତେ ଅଡ଼ାଃ ଓଡ଼ୋଃ ଲୟଙ୍ଗ୍ରେୟାଃ ସବେନାଃରେ ପ୍ରାଭୁଆଃ ଆଶିଷ୍ ହବାୟାନା। ଏନାତେ ଏନ୍ ହଡ଼ ଯୋଷେଫ୍ଆଃ ତିଃଇରେ ସବେନ୍ ବିଷାଏରେୟାଃ ବାହାରମ୍ ଏମ୍କିୟାଏ। ଏନ୍ ହଡ଼ ଆୟାଃ ଆପ୍ନାଃ ଜଜମ୍ତେୟାଃ ବାଗିକେଦ୍ତେ ଜେତାନ୍ ବିଷାଏରେ କାଏ ଉଡ଼ୁଃକେଦା।
ଯୋଷେଫ୍ ନେପେଲ୍ରେ ସୁଗାଡ଼ାନ୍ଗି ଓଡ଼ୋଃ ପୁରା ବୁଗିନ୍ଗି ତାଇକେନା। ଚିମିନ୍ ମାହା ତାୟମ୍ତେ ଯୋଷେଫ୍ଆଃ ଗମ୍କେରାଃ କୁଡ଼ିତେ ଇନିଃକେ ଏତ୍କାନ୍ ନାଜେର୍ତେ ନେଲ୍କିୟା ଓଡ଼ୋଃ କାଜିକିୟାଏ, “ଦେଲା ଆଇଁୟାଃ ଜାପାଃ ହିଜୁଃକେଦ୍ତେ ମିଦ୍ତାଃରେ ଦୁଡ଼ୁମ୍ମେ।” ମେନ୍ଦ ଯୋଷେଫ୍ ଇନିୟାଃ କାଜିରେ କାଏ ରାଜିୟାନା ଓଡ଼ୋଃ ଇନିଃକେ କାଜିକିୟା, “ନେଲେମେ, ଆଇଁୟାଃ ଗମ୍କେ ସବେନ୍ ବିଷାଏରାଃ ବାହାରମ୍ ଆଇଁୟାଃ ଚେତାନ୍ରେ ଜିମାକେଦା ଓଡ଼ୋଃ ଆଇଃକ୍ ଜେତ୍ନାଃ କାଏ ନେଲ୍ତାନା। ନେ ଅଡ଼ାଃରେ ଆଇଁୟାଃଏତେ ମାରାଙ୍ଗ୍ ଜେତାଏ ବାନ୍କଆ, ଆମ୍ ଆୟାଃ କୁଡ଼ିତାନ୍ମେ। ଏନାତେ ଆମ୍କେ ବାଗିକେଦ୍ତେ ଓଡ଼ୋଃ ଜେତ୍ନାଃ ଆଇଁୟାଃ ନାଙ୍ଗ୍ ମାନା ବାନଆଃ, ତାବ୍ଦ ଆଇଙ୍ଗ୍ ଚିଲ୍କାକେଦ୍ତେ ନିମିନ୍ ମାରାଙ୍ଗ୍ ପାପ୍ କାମି ପାର୍ମେଶ୍ୱାର୍ଆଃ ବିରୁଧ୍ରେ ରିକା ଦାଡ଼ିୟାଇଙ୍ଗ୍ ?” ଏନ୍ରେହ ଏନ୍ କୁଡ଼ି ମୁସିଙ୍ଗ୍ ବାଗି ମୁସିଙ୍ଗ୍ ସବେନ୍ ଇମ୍ତା ଯୋଷେଫ୍କେ ନେ'ଲେକା କାଜିତାଇକେନା, ମେନ୍ଦ ଯୋଷେଫ୍ ଇନିଃଲଃ ମିଦ୍ତାଃରେ ଦୁଡ଼ୁମ୍ ନାଗେନ୍ତେ କାଏ ରାଜିୟାନା।
ଏନ୍ତେ ମୁସିଙ୍ଗ୍ ହୁଲାଙ୍ଗ୍ ଯୋଷେଫ୍ ଆୟାଃ କାମି ନାଗେନ୍ତେ ଅଡ଼ାଃ ଭିତାର୍ତେ ବଲୟାନା, ଓଡ଼ୋଃ ଏନ୍ ଅଡ଼ାଃରେନ୍ ଦାସିକଏତେ ଜେତାଏ ଏନ୍ତାଃରେ କାକ ତାଇକେନା। ଏନ୍ କୁଡ଼ି ଯୋଷେଫ୍ଆଃ ଲିଜାଃକେ ସାବ୍କେଦ୍ତେ କାଜିକିୟା, “ଏଲା ଆଇଁୟାଃଲଃ ଦୁଡ଼ୁମ୍ମେଁ।” ମେନ୍ଦ ଯୋଷେଫ୍ କାଏ ରାଜିୟାନା ଓଡ଼ୋଃ ଆୟାଃ ଲିଜାଃ ଇନିୟାଃ ତିଃଇରେ ବାଗିକେଦ୍ତେ ବାହାରିତେ ନିର୍ ଅଡଙ୍ଗ୍ୟାନା। ଏନ୍ କୁଡ଼ି ଯୋଷେଫ୍କେ ଆୟାଃ ତିଃଇରେ ଲିଜାଃ ବାଗିକେଦ୍ତେ ବାହାରି ନିର୍ ଅଡଙ୍ଗ୍ତେୟାଃ ନେଲ୍କିୟାଏ, ଇମ୍ତା ଇନିଃ ଏନ୍ ଅଡ଼ାଃରେନ୍ ଦାସିକକେ ହାକାଅକେଦ୍ତେ କାଜିକେଦ୍କଆ, “ନେଲିପେ, ଆଇଁୟାଃ କଡ଼ା ଅକ ଏବ୍ରୀ ହଡ଼କେ ଆଉୱାକାଇଜା, ଇନିଃ ଆଇଁୟାଃଲଃ ଗିହୁଗାନ୍ କାମି ରିକା ନାଗେନ୍ତେ ଅଡ଼ାଃ ଭିତାର୍ତେ ହିଜୁଃକାନ୍ ତାଇକେନା, ମେନ୍ଦ ଆଇଙ୍ଗ୍ କାଉରିକେଦ୍ତେ ହାକାଅକେଦାଇଙ୍ଗ୍। ଆଇଁୟାଃ କାଉରି ଆୟୁମ୍କେଦ୍ତେ ଇନିଃ ଆୟାଃ ଲିଜାଃ ବାଗିକେଦ୍ଲଃ ବାହାରିତେ ନିର୍ ଅଡଙ୍ଗ୍ୟାନା।”
ଯୋଷେଫ୍ରାଃ ଗମ୍କେ ଅଡ଼ାଃତେ ସେଟେର୍ ଜାକେଦ୍ ଏନ୍ କୁଡ଼ି ଯୋଷେଫ୍ରାଃ ଲିଜାଃକେ ଆୟାଃ ହେପାଦ୍ରେ ଦହକେଦା। ଇନିଃ ଆୟାଃ କଡ଼ାତେ ହିଜୁଃୟାନ୍ ତାୟମ୍ତେ କାଜିକିୟା, “ଆମ୍ ଅକ ଏବ୍ରୀ ଦାସିକେ ଆଇଁୟାଃ ହେପାଦ୍ତେ ଆଉକାଇଜାମ୍, ଇନିଃ ଆଇଁୟାଃଲଃ ଗିହୁଗାନ୍ କାମି ରିକା ନାଙ୍ଗ୍ ଆଇଁୟାଃ ହେପାଦ୍ତେ ହିଜୁଃକାନ୍ ତାଇକେନା। ମେନ୍ଦ ଆଇଙ୍ଗ୍ କାଉରିକେଦ୍ତେ ହାକାଅକେଦ୍ ହରାତେ, ଇନିଃ ଆଇଁୟାଃତାଃରେ ନେ ଲିଜାଃକେ ବାଗିକେଦ୍ତେ ବାହାରି ଅଡଙ୍ଗ୍ୟାନ୍ଲଃ ନିର୍ୟାନାଏ।”
“ଆମାଃ ଦାସି ଆଇଁୟାଃଲଃ ନେ'ଲେକା କାମି ରିକାକାଦା।” ଆୟାଃ କୁଡ଼ିତେୟାଃ ମଚାଏତେ ନେ'କାଜି ଆୟୁମ୍କେଦ୍ଚି ଯୋଷେଫ୍ଆଃ ଗମ୍କେ ପୁରାଃଗି ଖିସ୍ୟାନା। ଯୋଷେଫ୍ଆଃ ଗମ୍କେ ଯୋଷେଫ୍କେ ଇଦିକେଦ୍ତେ, ରାଜା ଅକ ଜେହେଲ୍ରେ ହଡ଼କକେ ଜେହେଲାକାଦ୍କ ତାଇକେନା ଏନ୍ତାଃରେ ଦହକିୟା।
ମେନ୍ଦ ପ୍ରାଭୁଆଃ ସାୟାଦ୍ ଯୋଷେଫ୍ଲଃ ତାଇକେନା, ଓଡ଼ୋଃ ଇନିଃକେ ଦାୟାକେଦ୍ତେ ଜେହେଲ୍ ହରତାନ୍ ହାକିମ୍ୟାଃ ଆୟାର୍ରେ ଇନିଃ ଦାୟା ନାମ୍କେଦାଏ। ଜେହେଲାକାନ୍ ହଡ଼କକେ ହରତାନ୍ ହାକିମ୍ ଯୋଷେଫ୍କେ ଜେହେଲାକାନ୍ ହଡ଼କଆଃ ବାହାରମ୍ ଏମ୍କିୟାଏ। ଓଡ଼ୋଃ ଯୋଷେଫ୍ ଏନ୍ତାଃରାଃ ସବେନ୍ କାମିରାଃ ବାହାରମ୍ ଇଦିକେଦାଏ। ଜେହେଲ୍ ହରତାନ୍ ହାକିମ୍ ଯୋଷେଫ୍ଆଃ ଜେତାନ୍ କାଜିକାମିକ ନେଲ୍ ନାଙ୍ଗ୍ କା ଲାଗାତିଙ୍ଗ୍ ତାଇକେନା, ଚିୟାଃଚି ପ୍ରାଭୁ ଇନିୟାଃ ଦେଙ୍ଗାନିଃ ତାଇକେନାଏ, ଓଡ଼ୋଃ ଇନିଃ ଅକଆଃ ରିକାକେଦାଏ, ଏନା ପ୍ରାଭୁ ପୁରାକେଦାଏ।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.