Munda Bible
ଏନେଟେଦ୍ 40
ଯୋଷେଫ୍ଆଃ ହରାତେ କୁମୁରାଃ ମୁଣ୍ଡି ଉନୁଦୁବ୍
ନେ ସବେନାଃ ହବାୟାନ୍ ତାୟମ୍ତେ ମିସାର୍ ଦିଶୁମ୍ରେନ୍ ରାଜାରାଃ ଦାଖ୍ରାସି ହାଟିଙ୍ଗ୍ ହଡ଼ ଓଡ଼ୋଃ ଜଜମାଃ ବାବାଇ ହଡ଼, ଆକିନାଃ ଗମ୍କେଆଃ ବିରୁଧ୍ରେ ପାପ୍ କାମି ରିକାକେଦାକିନ୍। ଏନାମେନ୍ତେ ଫାରୋ ରାଜା ନେ ବାରାନ୍ ହାକିମ୍କିନାଃ ଚେତାନ୍ରେ ଖିସ୍ୟାନା, ଓଡ଼ୋଃ ହରତାନ୍ ସିପାଇକଆଃ ଆଗୁଆଇରାଃ ଅଡ଼ାଃରେ ତାଇକାନ୍ ଜେହେଲ୍ରେ ଦହକେଦ୍କିନା, ଏନ୍ତାଃରେଗି ଯୋଷେଫ୍କେହ ଦହକାଇ ତାଇକେନାକ। ଏନ୍ ହରତାନ୍ ସିପାଇକଆଃ ଆଗୁଆଇ, ଯୋଷେଫ୍ରାଃ ତିଃଇରେ ଇନ୍କିନ୍କେ ଜିମାକେଦ୍କିନା, ଓଡ଼ୋଃ ଯୋଷେଫ୍ ଇନ୍କିନାଃ ସୁନୁସାର୍ ରିକାକେଦାଏ। ନେ'ଲେକାତେ ଇନ୍କିନ୍ ଚିମିନ୍ ମାହା ଜେହେଲ୍ରେ ତାଇନ୍ୟାନାକିନ୍।
ଏନ୍ ତାୟମ୍ତେ ମିସାର୍ରେନ୍ ରାଜାରାଃ ଏନ୍ ଜେହେଲ୍ରେ ତାଇକାନ୍ କାଟୋରା ହାଟିଙ୍ଗ୍କିନ୍ ମୁସିଙ୍ଗ୍ ନିଦାରେ ଏନ୍ ବାରାନ୍କିନ୍ ମୁସିଙ୍ଗ୍ତେଗି ବାର୍ ରାକାମ୍ରାଃ କୁମୁ ନେଲ୍କେଦାକିନ୍ ଓଡ଼ୋଃ ଏନ୍ ବାରାନ୍କିନାଃ କୁମୁରେୟାଃ ମୁଣ୍ଡି ଏଟାଃ ଏଟାଃ ତାଇକେନା। ଏନ୍ତେ ଯୋଷେଫ୍ ସେତାଃରେ ଇନ୍କିନ୍ତାଃ ହିଜୁଃୟାନା, ଇମ୍ତା ଏନ୍ ବାରାନ୍କିନାଃ ମେଦ୍ମୁହାଁଡ଼୍ ଗସକାନ୍ଗି ନେଲ୍କେଦ୍କିନା। ଏନ୍ତେ ଇନିଃ ଫାରୋରାଃ ହାକିମ୍କିନ୍କେ କୁଲିକେଦ୍କିନା, “ତିସିଙ୍ଗ୍ ଆବେନାଃ ମେଦ୍ମୁହାଁଡ଼୍ ଚିନାଃମେନ୍ତେ ଗସକାନ୍ଗି ନେଲଃତାନା ?”
ଇନ୍କିନ୍ କାଜିରୁହାଡ଼୍କିୟାକିନ୍, “ଆଲିଙ୍ଗ୍ ବାରାନ୍କିନ୍ କୁମୁ ନେଲାକାଦାଲିଙ୍ଗ୍, ମେନ୍ଦ ଏନ୍ କୁମୁରେୟାଃ ମୁଣ୍ଡି ଉଦୁବ୍ ନାଙ୍ଗ୍ ଜେତାଏ ବାନ୍କଆ।”
ଏନ୍ତେ ଯୋଷେଫ୍ ଇନ୍କିନ୍କେ କାଜିକେଦ୍କିନା, “ଚିୟାଃ ପାର୍ମେଶ୍ୱାର୍ କୁମୁରେୟାଃ ମୁଣ୍ଡି ଉଦୁବ୍ କାଏ ଦାଡ଼ିୟା ? ଦାୟାକେଦ୍ତେ ଆବେନାଃ କୁମୁ ଆଇଙ୍ଗ୍କେ କାଜିଇଙ୍ଗ୍ବେନ୍।”
ଦାଖ୍ରାସି ହାଟିଙ୍ଗ୍ ହଡ଼କଆଃ ହାକିମ୍ ଯୋଷେଫ୍କେ ଆୟାଃ କୁମୁ ଉଦୁବ୍କିୟାଏ, “ଆଇଙ୍ଗ୍ କୁମୁରେ ମିଆଁଦ୍ ଦାଖ୍ନାଡ଼ି ଆଇଁୟାଃ ଆୟାର୍ରେ ତାଇକେନା, ଏନ୍ ଦାଖ୍ନାଡ଼ିରେ ଆପିୟା କତ ତାଇକେନା, ଏନାରେ ଡେମ୍ବୟାନ୍ଲଃ ବାହାୟାନା ଓଡ଼ୋଃ ସବେନ୍ କତରେ ଝୁପା ଝୁପା ଦାଖ୍ଜ ମାତାୟାନା। ଇମ୍ତା ଆଇଁୟାଃ ତିଃଇରେ ଫାରୋରାଃ କାଟୋରା ତାଇକେନା ଓଡ଼ୋଃ ଆଇଙ୍ଗ୍ ଏନ୍ କାଟୋରାରେ ଦାଖ୍ଜ ଚିପୁଦ୍କେଦ୍ତେ କାଟୋରାକେ ଫାରୋରାଃ ତିଃଇରେ ଏମ୍କିୟାଇଙ୍ଗ୍।”
ଯୋଷେଫ୍ ଇନିଃକେ କାଜିକିୟା, “ଆମାଃ କୁମୁରାଃ ମୁଣ୍ଡି ନେଆଁ ତାନାଃ, ଏନ୍ ଆପି କତ ଆପି ମାହାକେ ଉଦୁବାଃଏ। ଆପି ମାହା ଭିତାର୍ରେ ଫାରୋ ଆମ୍କେ ରାଡ଼ାମେୟାଁଏ ଓଡ଼ୋଃ ଆମାଃ ସିଦାରାଃ କାମିକେ ଆଡଃମିସା ଏମାମେୟାଁ, ଆମ୍ ସିଦା ଲେକା ରାଜାରାଃ ଦାଖ୍ରାସି ହାଟିଙ୍ଗ୍ ହଡ଼ ହବାଅଃଆମ୍ ଓଡ଼ୋଃ ଫାରୋରାଃ ତିଃଇରେ ଆୟାଃ ଦାଖ୍ରାସିରାଃ କାଟୋରା ଏମାଇୟାମ୍। ମେନ୍ଦ ଆମାଃ ଚେତାନ୍ରେ ବୁଗିନାଃ ହବାଅଃରେ, ଆଇଙ୍ଗ୍କେ ପାହାମିଙ୍ଗ୍ମେ। ଦାୟାକେଦ୍ତେ ଆଇଁୟାଃ ବିଷାଏରେ ଫାରୋକେ କାଜିମେ ଓଡ଼ୋଃ ନେ ଜେହେଲ୍ଏତେ ରାଡ଼ାଅଃ ନାଙ୍ଗ୍ ଦେଙ୍ଗାଇଙ୍ଗ୍ମେ। ଚିୟାଃଚି ଏବ୍ରୀ ହଡ଼କଆଃ ଦିଶୁମ୍ଏତେ ହଡ଼କ ଆଇଙ୍ଗ୍କେ କୁମ୍ବୁଡ଼ୁକେଦ୍ତେ ଆଉକାଇୟାଁକ ଓଡ଼ୋଃ ନେତାଃରେ ହଗି ଆଇଙ୍ଗ୍ ଜେତାନ୍ ଗୁହ୍ନାଁ କାଇଙ୍ଗ୍ ରିକାକାଦା, ଏନ୍ରେୟ ଇନ୍କୁ ଆଇଙ୍ଗ୍କେ ନେ ଜେହେଲ୍ରେ ଦହକାଇୟାଁକ।”
ଯୋଷେଫ୍ ଦାଖ୍ରାସି ହାଟିଙ୍ଗ୍ ହଡ଼କଆଃ ହାକିମ୍କେ ବୁଗିଲେକାତେ କୁମୁରେୟାଃ ମୁଣ୍ଡି ଉଦୁବ୍କିୟା, ଏନା ନେଲ୍କେଦ୍ତେ, ଜଜମାଃ ବାବାଇନିଃ ଯୋଷେଫ୍କେ କାଜିକିୟା, “ଆଇଙ୍ଗ୍ ହଗି ମିଆଁଦ୍ କୁମୁ ନେଲାକାଦାଇଙ୍ଗ୍, ଏନା ହବାଅଃତାନା, ଆଇଁୟାଃ ବହଃ ଚେତାନ୍ରେ ହଲଙ୍ଗ୍ତେ ପେରେୟାକାନ୍ ଆପିୟା ଟୁଙ୍କି ତାଇକେନା। ସବେନାଃଏତେ ଚେତାନ୍ ଟୁଙ୍କିରେ ଫାରୋ ରାଜା ଜମେ ନାଗେନ୍ତେ ସବେନ୍ ରାକାମ୍ରାଃ ଜଜମାଃକ ତାଇକେନା। ମେନ୍ଦ ଅଡ଼େକ ହିଜୁଃକେଦ୍ତେ ଆଇଁୟାଃ ବହଃରେ ତାଇକେନ୍ ଟୁଙ୍କିଏତେ ଏନ୍ ସବେନାଃ ଜମ୍କେଦାକ।”
ଯୋଷେଫ୍ କାଜିକିୟାଏ, “ଆମାଃ କୁମୁରାଃ ମୁଣ୍ଡି ନେ'ଲେକା ମେନାଃ, ଏନ୍ ଆପି ଟୁଙ୍କି ଆପି ମାହାକେ ଉଦୁବାଃଏ। ଆପି ମାହା ଭିତାର୍ରେ ଫାରୋ ରାଜା ଆମାଃ ବହଃକେ ମାଆଃ ଖାଣ୍ଡାଅକେଦ୍ତେ ଦାରୁରେ ଡୁଙ୍ଗାଏୟା, ଓଡ଼ୋଃ ଅଡ଼େକ ଆମାଃ ମାସ୍କ ଜମେୟାଁ।”
ଏନ୍ତେ ଆପି ମାହାରେ ଫାରୋ ରାଜାରାଃ ଜାନାମ୍ ଦିନ୍ ସେଟେର୍ୟାନ୍ ହରାତେ ଇନିଃ ଆୟାଃ ସବେନ୍ ଦାସିକ ନାଗେନ୍ତେ ମିଆଁଦ୍ ଭୋଜି ଏମ୍କେଦାଏ। ଇମ୍ତା ଇନିଃ ଆୟାଃ ଦାସିକଆଃ ଆୟାର୍ରେ ଦାଖ୍ରାସି ହାଟିଙ୍ଗ୍ ହଡ଼କଆଃ ହାକିମ୍କେ ଓଡ଼ୋଃ ଜଜମାଃ ବାବାଇ ହଡ଼କଆଃ ହାକିମ୍କେ ଜେହେଲ୍ଏତେ ରାଡ଼ାକେଦ୍କିନା। ଯୋଷେଫ୍ କୁମୁରେୟାଃ ମୁଣ୍ଡି କାଜିକେଦ୍ ଲେକାଗି, ଫାରୋ ଦାଖ୍ରାସି ହାଟିଙ୍ଗ୍ ହଡ଼କଆଃ ହାକିମ୍କେ ଆଡଃମିସା ଆୟାଃ କାମିରେ ସାଲାକିୟା ଓଡ଼ୋଃ ଇନିଃ ଫାରୋରାଃ ତିଃଇରେ ଦାଖ୍ରାସି କାଟୋରା ଏମ୍ ଏଟେଦ୍କେଦାଏ। ମେନ୍ଦ ଇନିଃ ଜଜମାଃ ବାବାଇ ହାକିମ୍କେ ଦାରୁରେ ହାକା ଗଏଃକିୟା। ନେଆଁ ଯୋଷେଫ୍ କୁମୁରାଃ ମୁଣ୍ଡି ଉଦୁବ୍କାଇ ଲେକାଗି ହବାୟାନା। ମେନ୍ଦ, ଏନ୍ ଦାଖ୍ରାସି ହାଟିଙ୍ଗ୍ ହଡ଼କଆଃ ହାକିମ୍ ଯୋଷେଫ୍କେ କାଏ ପାହାମ୍କିୟାଃ, ଇନିଃକେ ରିଡ଼ିଙ୍ଗ୍ତାଇଜା।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.