Munda Bible
ଏନେଟେଦ୍ 38
ଯିହୁଦା ଓଡ଼ୋଃ ତାମର୍
ଏନ୍ ଦିପିଲିରେ ଯିହୁଦା ଆୟାଃ ହାଗାକକେ ବାଗିକେଦ୍ତେ ହୀରା ନୁତୁମ୍ ମିଆଁଦ୍ ହଡ଼ତାଃ ସେନଃୟାନାଏ। ଇନିଃ ଅଦୁଲାମ୍ ସାହାର୍ରେନ୍ ତାଇକେନାଏ। ଏନ୍ତାଃରେ ଯିହୁଦା କିନାନ୍ରେନ୍ ଶୁୟ ନୁତୁମ୍ ମିଆଁଦ୍ ହଡ଼ରାଃ ହନ୍ତେକୁଡ଼ିକେ ନେଲ୍କେଦ୍ତେ ଇନିଃକେ ଆଣ୍ଦିୟାନା। ଇନିଃ ହାମ୍ବାଲ୍ରୋୱାକେଦ୍ତେ ମିଆଁଦ୍ କଡ଼ାହନ୍ ଜାନାମ୍କିୟାଏ ଓଡ଼ୋଃ ଇନିୟାଃ ନୁତୁମ୍ ଏର୍ ଏମ୍କିୟାଏ। ଇନିଃ ଆଡଃମିସା ହାମ୍ବାଲ୍ରୋୱାତାନ୍ଲଃ କଡ଼ାହନ୍ ଜାନାମ୍କିୟାଏ ଓଡ଼ୋଃ ଇନିୟାଃ ନୁତୁମ୍ ଓନନ୍ ଏମ୍କିୟାଏ। ଇନିଃ ଆଡଃଗି ହାମ୍ବାଲ୍ରୋୱାତାନ୍ଲଃ କଡ଼ାହନ୍ ଜାନାମ୍କିୟାଏ ଓଡ଼ୋଃ ଇନିୟାଃ ନୁତୁମ୍ ସେଲା ଏମ୍କିୟାଏ। ଇନିୟାଃ ଜାନାମ୍ ହବାୟାନା ଇମ୍ତା ଯିହୁଦା କଷିବ୍ରେ ତାଇକେନା।
ଯିହୁଦା ଆୟାଃ ମୁତ୍କୁଲ୍ ହନ୍ତେକଡ଼ା ଏର୍କେ ତାମର୍ ନୁତୁମ୍ ମିଆଁଦ୍ କୁଡ଼ିଲଃ ଆଣ୍ଦିକିୟାଏ। ମେନ୍ଦ ଯିହୁଦାରାଃ ମୁତ୍କୁଲ୍ ହନ୍ ଏର୍ ପ୍ରାଭୁଆଃ ଆୟାର୍ରେ ଏତ୍କାନ୍ନିଃ ତାଇକେନାଏ, ଏନାମେନ୍ତେ ପ୍ରାଭୁ ଇନିଃକେ ଗଏଃକିୟା।
ଏନ୍ତେ ଯିହୁଦା ଓନନ୍କେ କାଜିକିୟା, “ଜୁ, ଆମାଃ ଦାଦାରାଃ ରାଣ୍ଡି କୁଡ଼ି ତାମର୍କେ ଆମାଃ କୁଡ଼ିଲେକା ଇଦିମେ ଓଡ଼ୋଃ ଇରିଲ୍କଡ଼ା ହିସାବ୍ରେ ଆମାଃ ଦାଦାରାଃ ବାଂଶ୍କେ ବାଚାଏମେ।” ମେନ୍ଦ ଏନ୍ ହନ୍କ ଆୟାଃ ଆପ୍ନାଃ କାକ ନୁତୁମଃଆ, ନେଆଁ ଆଟ୍କାର୍କେଦ୍ତେ ଓନନ୍ ଦାଦାତେୟାଃ କୁଡ଼ିଲଃ ହଡ଼୍ମରାଃ ନାତା ଦହ ଇମ୍ତା, ହାଗାତେୟାଃ ନାଗେନ୍ତେ ହନ୍ ଆଲକାଏ ହବାଅଃକା ମେନ୍ତେ ଇନିଃ ଅତେରେ ହିତା ଦୁଲ୍କେଦାଏ। ନେ'ଲେକାତେ ଇନିଃ ହାଗାତେ ନାଙ୍ଗ୍ ହନ୍ କାଏ ପସାକେଦ୍କଆ। ଇନିୟାଃ ନେ'ଲେକାନ୍ କାମି ପ୍ରାଭୁଆଃ ଆୟାର୍ରେ ଏତ୍କାନାଃ ହବାୟାନା। ଏନାମେନ୍ତେ ପ୍ରାଭୁ ଇନିଃକେ ହଁଗି ଗଏଃକିୟା। ଇମ୍ତା ଯିହୁଦା ଆୟାଃ କିମିନ୍ତେ ତାମର୍କେ କାଜିକିୟା, “ଆଇଁୟାଃ ହନ୍କଡ଼ା ସେଲା ଧାଙ୍ଗ୍ଡ଼ା ଆଉରି ହବାଅଃ ଜାକେଦ୍ ଆମ୍ ରାଣ୍ଡିକେଦ୍ତେ ଆମାଃ ଆପୁଆଃ ଅଡ଼ାଃରେଗି ତାଇନ୍ମେଁ।” ଚିୟାଃଚି ଯିହୁଦା ଉଡ଼ୁଃକେଦାଏ, ହବାସାକାଅଃଆ ଆୟାଃ ହାଗାକିନାଃ ଲେକା ସେଲା ହଗି ଗଏଃକଆଃଏ। ଏନାମେନ୍ତେ ତାମର୍ ଆପୁତେୟାଃ ଅଡ଼ାଃତେ ରୁହାଡ଼୍ୟାନା ଓଡ଼ୋଃ ଏନ୍ତାଃରେ ତାଇନ୍ୟାନା।
ପୁରାଃ ମାହା ତାୟମ୍ତେ, ଯିହୁଦାରାଃ କୁଡ଼ି, ଅକ୍ନିଃଚି ଶୁୟରାଃ ହନ୍ତେକୁଡ଼ି ତାଇକେନା, ଇନିଃ ଗଏଃୟାନାଏ। ଏୟମ୍ ତାଇକେନ୍ ନେଣ୍ଡା ଚାବାୟାନ୍ ତାୟମ୍ତେ, ଯିହୁଦା ଅଦୁଲାମ୍ରେ ତାଇନ୍ତାନ୍ ହୀରା ନୁତୁମ୍ ଗାତିଲଃ ତିମ୍ନାତେ ସେନଃୟାନା, ଏନ୍ତାଃରେ ଆୟାଃ ହଡ଼କ ଗୋଟ୍ରେନ୍ ମିଣ୍ଡିକଆଃ ଉବ୍ ହାଦ୍ ତାଇକେନାକ। ଇମ୍ତା ଜେତାଏ ମିହୁଡ଼୍ ତାମର୍କେ କାଜିକିୟା, “ଆମାଃ ହୟାଁର୍ମେ ଗୋଟ୍ରେନ୍ ମିଣ୍ଡିକଆଃ ଉବ୍ ହାଦ୍ ନାଙ୍ଗ୍ ତିମ୍ନାତେ ସେନଃତାନା।” ତାମର୍ ରାଣ୍ଡିକୁଡ଼ି ଏୟରଃ ଲିଜାଃ ବାଗିକେଦ୍ତେ ମିଆଁଦ୍ ବେଶ୍ୟା କୁଡ଼ି ଲେକା ଲିଜାଃ ତୁସିଙ୍ଗ୍ୟାନାଏ ଓଡ଼ୋଃ ତିମ୍ନାତେ ସେନଃ ହରା ଗେନାରାଃ ଐନାମ୍ ନୁତୁମ୍ ସାହାର୍ ବଲଃ ଠାୟାଦ୍ତାଃରେ ଦୁବ୍ୟାନାଏ, ଚିୟାଃଚି ତାମର୍ ସାରିକେଦାଏ ଯେ, ସେଲା ଧାଙ୍ଗ୍ଡ଼ାୟାନାଏ, ଏନ୍ରେହ ଇନିଃଲଃ ଆୟାଃ ଆଣ୍ଦି କାଏ ଏମ୍କିୟା।
ଯିହୁଦା ଏନ୍ ହରାରେ ସେନଃ ଇମ୍ତା ଇନିଃକେ ନେଲ୍କେଦ୍ତେ ବେଶ୍ୟା କୁଡ଼ି ମେନ୍ତେ ଆଟ୍କାର୍କେଦା, ଚିୟାଃଚି ଇନିଃ ଆୟାଃ ମେଦ୍ ମୁହାଁଡ଼୍କେ ଦାପାଲାକାଦ୍ ତାଇକେନା। ଯିହୁଦା ଆୟାଃ କିମିନ୍ତେକେ କା ନେଲ୍ଉରୁମ୍କେଦ୍ତେ ଇନିୟାଃ ହେପାଦ୍ ସେନ୍ୟାନ୍ଲଃ କାଜିକିୟାଏ, “ଆଇଙ୍ଗ୍କେ ଆମାଃ ଜାପାଃତେ ହିଜୁଃ ଇଚିଙ୍ଗ୍ମେ।”
ତାମର୍ କାଜିକିୟାଏ, “ଆଇଙ୍ଗ୍ ଆମ୍କେ ଆଇଁୟାଃ ଜାପାଃତେ ହିଜୁଃ ଇଚିମେରେ, ଆମ୍ ଆଇଙ୍ଗ୍କେ ଚିନାଃମ୍ ଏମାଇୟାଁ ?”
ଯିହୁଦା କାଜିକିୟାଏ, “ଆଇଙ୍ଗ୍ ଗୋଟ୍ଏତେ ମିଆଁଦ୍ କିରିକାନ୍ ମେରମ୍ହନ୍ ଏମାମେୟାଇଙ୍ଗ୍।”
ତାମର୍ କାଜିକିୟାଏ, “ଏନା କୁଲ୍ ସିଦାରେ ଆଇଙ୍ଗ୍କେ ଜେତ୍ନାଃ ଗାହାଁନା ଲେକା ଏମାଇୟାଁମ୍ ଚି ?”
ଯିହୁଦା କାଜିକିୟାଏ, “ଚିନାଃ ଗାହାଁନା ଏମାମେୟାଇଙ୍ଗ୍ ?”
ତାମର୍ କାଜିକିୟାଏ, “ଆମାଃ ନେ ମୋହର୍ରାଃ ମୁଦାମ୍, ସୁତାମ୍ ଓଡ଼ୋଃ ତିଃଇରେ ସାବାକାଦ୍ ସଟା ଏମାଇଙ୍ଗ୍ମେ।” ଯିହୁଦା ଏନ୍ ସବେନାଃ ତାମର୍କେ ଏମ୍କେଦ୍ତେ ଇନିଃଲଃ ହଡ଼୍ମରାଃ ନାତା ଦହକେଦାଏ ଓଡ଼ୋଃ ଇନିଃ ହାମ୍ବାଲ୍ରୋୱା ହବାୟାନାଏ। ତାମର୍ ଏନ୍ତାଃଏତେ ବିରିଦ୍ୟାନ୍ଲଃ ସେନଃୟାନାଏ ଓଡ଼ୋଃ ଆୟାଃ ତୁସିଙ୍ଗ୍କାନ୍ ବେଶ୍ୟା ଲିଜାଃକେ ପାଲ୍ଟାକେଦ୍ତେ ରାଣ୍ଡି କୁଡ଼ିରାଃ ଲିଜାଃ ତୁସିଙ୍ଗ୍ୟାନାଏ।
ଏନ୍ ତାୟମ୍ତେ ଯିହୁଦା ଆୟାଃ ଗାହାଁନାକାନ୍ ଜିନିଷ୍କେ ଏନ୍ କୁଡ଼ିତାଃଏତେ ନାମ୍ରୁହାଡ଼୍ ନାଙ୍ଗ୍ ଆୟାଃ ଗାତି ଅଦୁଲାମ୍ରେନ୍ ହୀରାରାଃ ତିଃଇରେ ମିଆଁଦ୍ ମେରମ୍ହନ୍ କୁଲ୍କିୟାଏ, ମେନ୍ଦ ହୀରା ଏନ୍ କୁଡ଼ିକେ କାଏ ନାମ୍କିୟା। ହିରା ଏନ୍ତାଃରେନ୍ ହଡ଼କକେ କୁଲିକେଦ୍କଆ, “ଐନାମ୍ରାଃ ହରା ଗେନାରେ ତାଇନ୍ତାନ୍ ବେଶ୍ୟା କୁଡ଼ି କତେ ସେନଃୟାନା ?”
ଇନ୍କୁ କାଜିକିୟାକ, “ନେତାଃରେ ଚିଉଲାଅଗି ବେଶ୍ୟା କୁଡ଼ି କାଏ ତାଇକେନା।”
ଇନିଃ ଯିହୁଦାତାଃ ସେନ୍ ରୁହାଡ଼୍କେଦ୍ତେ କାଜିକିୟା, “ଆଇଙ୍ଗ୍ ଏନ୍ କୁଡ଼ିକେ କାଇଙ୍ଗ୍ ନାମ୍କିୟା” ଓଡ଼ୋଃ ଏନ୍ତାଃରେନ୍ ହଡ଼କ ହଗି କାଜିକେଦା, “ନେତାଃରେ ଜେତାନ୍ ବେଶ୍ୟା କୁଡ଼ି କାଏ ତାଇନ୍ ତାନା।”
ଏନା ଆୟୁମ୍କେଦ୍ତେ ଯିହୁଦା କାଜିକେଦାଏ, “ଆୟାଃତାଃରେ ଅକ୍ନାଃ ମେନାଃ, ଏନା ଆୟାଃତାଃରେ ତାଇନ୍କା। ଆଲାଙ୍ଗ୍ ଚିନାଃମେନ୍ତେ ହଡ଼କତାଃରେ ଗିହୁଗଃଆଲାଙ୍ଗ୍ ? ଆଇଙ୍ଗ୍ଦ ନେ ମେରମ୍ହନ୍କେ ଏମ୍ନାଙ୍ଗ୍ କୁଲ୍କିୟାଇଙ୍ଗ୍, ମେନ୍ଦ ଆମ୍ ଇନିଃକେ କାମ୍ ନାମ୍କିୟା।”
ଏନ୍ତେ ଆପି ମାହିଁନା ତାୟମ୍ତେ, ଜେତାଏ ମିହୁଡ଼୍ ଯିହୁଦାକେ କାଜିକିୟା, “ଆମାଃ କିମିନ୍ ତାମର୍ ଆପାଙ୍ଗିର୍ କାମି ରିକାକାଦା, ଇନିଃ ହାମ୍ବାଲ୍ରୋୱା କାନାଏ।”
ଯିହୁଦା କାଜିକେଦାଏ, “ଇନିଃକେ ବାହାରି ଅଡଙ୍ଗ୍କେଦ୍ତେ ସେଙ୍ଗେଲ୍ରେ ଅଣ୍ଡର୍ ଗଜିପେ।”
ମେନ୍ଦ ଇନିଃକେ ବାହାରିତେ ଅଡଙ୍ଗ୍କିୟାକ ଇମ୍ତା ଆୟାଃ ହୟାଁର୍ତେତାଃ କାଜିକୁଲ୍କେଦାଏ, ନେ ସବେନ୍ ଜିନିଷ୍ ଅକେୟାଃ ତାନାଃ, ଏନ୍ ହଡ଼ରାଃ ହରାତେଗି ଆଇଙ୍ଗ୍ ହାମ୍ବାଲ୍ରୋୱା ହବାକାନାଇଙ୍ଗ୍। ଆଡଃଗି ଇନିଃ କାଜିକେଦାଏ, “ନେ ମୋହର୍ରାଃ ମୁଦାମ୍, ସୁତାମ୍ ଓଡ଼ୋଃ ସଟା ଅକଏୟାଃ ତାନାଃ ? ଏନା ନେଲ୍ଉରୁମେମେଁ।”
ଯିହୁଦା ଏନ୍ ସବେନାଃ ନେଲ୍କେଦ୍ତେ ଆଇଁୟାଃ ତାନାଃ ମେନ୍ତେ କାଜିକେଦା, “ଇନିଃ ଆଇଁୟାଃଏତେ ପୁରାଃଗି ବୁଗିନ୍ ଗିୟାଏ, ଚିୟାଃଚି ଆଇଙ୍ଗ୍ ଆଇଁୟାଃ ହନ୍କଡ଼ା ସେଲାକେ କାଇଙ୍ଗ୍ ଏମ୍କିୟା।” ଯିହୁଦା ଇନିୟାଃ ହେପାଦ୍ତେ ଓଡ଼ୋଃ କାଏ ସେନ୍ୟାନା।
ତାମର୍ରାଃ ହନ୍ଜାନାମ୍ରେୟାଃ ନେଣ୍ଡା ସେଟେର୍ୟାନ୍ ଇମ୍ତା ଇନିୟାଃ ଲାହିଦ୍ରେ ଜାୱାହନ୍ ମେନାକିନା ମେନ୍ତେ ଆଟ୍କାର୍ୟାନା। ଇନିଃ ହନ୍ଜାନାମ୍ରାଃ ଦୁକୁ ନାମେ ତାଇକେନ୍ ଇମ୍ତା ମିଆଁଦ୍ ବାଲେଃକ୍ହନ୍ରାଃ ତିଃଇ ବାହାରି ଅଡଙ୍ଗ୍ୟାନ୍ ହରାତେ କୁସ୍ରେନ୍କୁଡ଼ି ଇନିୟାଃ ତିଃଇରେ ମିଆଁଦ୍ ଆରାଃ ରାଙ୍ଗ୍ରେୟାଃ ସୁତାମ୍ ତଲ୍କେଦ୍ତେ କାଜିକେଦା, “ନିଃ ମୁତ୍କୁଲ୍ ହନ୍ ତାନିଃ।” ମେନ୍ଦ ଏନ୍ ବାଲେଃହନ୍ ଆୟାଃ ତିଃଇ ତାହିକ୍ ଆଦେର୍କେଦ୍ ତାୟମ୍ତେ, ଆୟାଃ ହାଗାତେ ଜାନାମ୍ୟାନା। ଏନ୍ତେ କୁସ୍ରେନ୍କୁଡ଼ି କାଜିକେଦାଏ, “ଆମ୍ ଚିଲ୍କାତେ ଜାବାର୍ଜାସ୍ତି ବିନ୍ଗାଅକେଦ୍ତେ ବାହାରି ଅଡଙ୍ଗ୍ୟାନାମ୍ ?” ଏନାମେନ୍ତେ ଇନିୟାଃ ନୁତୁମ୍ ପେରସ୍1 ହବାୟାନା। ଏନ୍ତେ ତିଃଇରେ ସୁତାମ୍ ତଲାକାନ୍ ଆୟାଃ ହାଗାତେ ଜାନାମ୍ୟାନା ଓଡ଼ୋଃ ଇନିୟାଃ ନୁତୁମ୍ ସେରହ ଏମ୍କିୟାଏ।
Source notes (1)
- Footnote ବିନ୍ଗାଅ
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.