Munda Bible
ଏନେଟେଦ୍ 28:15
Verse 15 is marked below, with the whole chapter around it. Read from the start
ଯାକୁବ୍କେ ଲାବାନ୍ତାଃ କୁଲଃ
ଇସାକ୍ ଯାକୁବ୍କେ କେଡ଼ାକିୟାଏ ଓଡ଼ୋଃ ଆଶିଷ୍ ଏମ୍କେଦ୍ତେ ହୁକୁମ୍କିୟା, “ଆମ୍ କିନାନ୍ ଦିଶୁମ୍ରେନ୍ ଜେତା କୁଡ଼ିକେ ଆଲମ୍ ଆଣ୍ଦିନାଃ। ଆମ୍ ଜାଲ୍ଦି ବିରିଦ୍ମେ, ଓଡ଼ୋଃ ପଦାନ୍ ଅରାମ୍ରେ ତାଇନ୍ତାନ୍ ଆମାଃ ଉମାରାଃ ଆପୁ ବଥୁୟେଲ୍ଆଃ ଅଡ଼ାଃତେ ସେନଃମେ। ଏନ୍ତାଃରେ ଆମାଃ ମାମୁଁ ଲାବନ୍ରାଃ ହନ୍କୁଡ଼ିକଏତେ ମିଆଁଦ୍ନିଃକେ ଆଣ୍ଦିୟଃମେ। ପୁରାଃ ପେଡ଼େୟାନ୍ ପାର୍ମେଶ୍ୱାର୍ ଆମ୍କେ ଆଶିଷ୍ମେକା, ଇନିଃ ଆମ୍କେ ପୁରାଃଗି ହନ୍ଗାଁଣା ଏମାମ୍କା ଓଡ଼ୋଃ ପସାକକାଏ, ଏନ୍ତେ ପୁରାଃ କିଲିରେନ୍ ଆପୁ ବାଇମେକା। ଓଡ଼ୋଃ ଆବ୍ରାହାମ୍କେ ଏମାକାନ୍ ଆଶିଷ୍ ଆମାଃତାଃରେ ଓଡ଼ୋଃ ଆମାଃ କିଲିକତାଃରେ ପୁରାଏକା। ଏନାରେ ନାହାଁଃ ଆମ୍ ଅକ ଠାୟାଦ୍ରେମ୍ ତାଇନଃତାନା, ଏନ୍ ଦିଶୁମ୍କେ ପାର୍ମେଶ୍ୱାର୍ ଆବ୍ରାହାମ୍କେ ଏମାକାଇଜା, ଏନ୍ ଦିଶୁମ୍ରେ ଆମାଃ ଆକ୍ତେୟାର୍ ହବାଅଃକା।” ଏନ୍ତେ ଇସାକ୍ ଯାକୁବ୍କେ ବିଦାକିୟା ଓଡ଼ୋଃ ଯାକୁବ୍ ପଦାନ୍ ଅରାମ୍ରେ ତାଇନଃତାନ୍ ବଥୁୟେଲ୍ଆଃ ହନ୍ତେକଡ଼ା ଲାବନ୍ତାଃତେ ସେନଃୟାନା। ଇନିଃ ଯାକୁବ୍ ଓଡ଼ୋଃ ଏଷୌରାଃ ଏଙ୍ଗା ରିବ୍କାରାଃ ହାଗାତେ ତାଇକେନା।
ଏଷୌରାଃ ଆଡଃମିସା ଆଣ୍ଦି
ଏଷୌ ଆୟୁମ୍କେଦାଏ ଯେ, ଇସାକ୍ ଯାକୁବ୍କେ ଆଶିଷ୍କେଦ୍ତେ ଆଣ୍ଦିୟଃ ନାଙ୍ଗ୍ ପଦାନ୍ ଅରାମ୍ତେ କୁଲ୍କିୟା ଓଡ଼ୋଃ ଯାକୁବ୍କେ ଆଶିଷ୍ ଏମ୍କିଃ ଇମ୍ତା ଇସାକ୍ ଇନିଃକେ ହୁକୁମ୍କେଦ୍ତେ କାଜିକାଇ ତାଇକେନା, “ଆମ୍ କିନାନ୍ ଦିଶୁମ୍ରେନ୍ ଜେତା କୁଡ଼ିହନ୍କେ ଆଲମ୍ ଆଣ୍ଦିନା।” ଯାକୁବ୍ ଆୟାଃ ଏଙ୍ଗା ଆପୁକିନାଃ କାଜି ମାନାତିଙ୍ଗ୍କେଦ୍ତେ ପଦାନ୍ ଅରାମ୍ତେ ସେନଃୟାନା। ଆୟାଃ ଆପୁତେ ଇସାକ୍, କିନାନ୍ରେନ୍ କୁଡ଼ିହନ୍କକେ ପୁରାଃଗି କାଏ ସୁକୁତାନା, ଏନା ନେଲ୍କେଦ୍ତେ ଏଷୌ ଆଟ୍କାର୍କେଦାଏ। ଏନାତେ ଏଷୌରାଃ ମିଆଁଦ୍ କୁଡ଼ିଏତେ ଆଦ୍କା କୁଡ଼ି ତାଇକେନ୍ରେୟଗି, ଇନିଃ ଆବ୍ରାହାମ୍ଆଃ ହନ୍ତେକଡ଼ା ଇଶ୍ମାଏଲ୍ତାଃ ସେନଃୟାନାଏ ଓଡ଼ୋଃ ମହଲତ୍ ନୁତୁମ୍ ଇନିୟାଃ ହନ୍କୁଡ଼ିକେ ଆଣ୍ଦିୟାନା। ଇନିଃ ନବାୟୋତ୍ରାଃ ମିଶିତେ ତାଇକେନା।
ବେଥେଲ୍ରେ ଯାକୁବ୍ଆଃ କୁମୁ
ଏନ୍ତେ ଯାକୁବ୍ ବେର୍ଶେବାଏତେ ଅଡଙ୍ଗ୍ୟାନ୍ଲଃ ହାରାନ୍ତେ ସେନଃୟାନା। ସିଙ୍ଗିହାସୁର୍ୟାନ୍ ହରାତେ ଇନିଃ ମିଆଁଦ୍ ଠାୟାଦ୍ତାଃରେ ତାଇନ୍ୟାନା ଓଡ଼ୋଃ ମିଆଁଦ୍ ଦିରି ଇଦିକେଦ୍ତେ ଆୟାଃ ବହଃ ଲାତାର୍ରେ ଉଠ୍ଙ୍ଗି ଏମ୍କେଦ୍ତେ ମିଦ୍ନୁବାଃ ଏନ୍ତାଃରେ ଗିତିଃଜ୍ୟାନା। ଇନିଃ କୁମୁତେ ମିଆଁଦ୍ ସିଢ଼ି, ଅତେଏତେ ସିର୍ମା ଜାକେଦ୍ ଜିଲିଙ୍ଗ୍ଆଁକାନ୍ ନେଲ୍କେଦାଏ, ଓଡ଼ୋଃ ଏନାରେ ପାର୍ମେଶ୍ୱାର୍ଆଃ ଦୁଁତ୍କ ଚେତାନ୍ ଲାତାର୍ ହିଜୁଃସେନଃ ତାଇକେନାକ। ଓଡ଼ୋଃ ପ୍ରାଭୁ ଏନ୍ ଚେତାନ୍ରେ ତିଙ୍ଗୁକେଦ୍ତେ କାଜିକେଦା, “ଆଇଙ୍ଗ୍ ପ୍ରାଭୁ, ଆମାଃ ପୁର୍ଖା ଆପୁ ଆବ୍ରାହାମ୍ଆଃ ଓଡ଼ୋଃ ଇସାକ୍ଆଃ ପାର୍ମେଶ୍ୱାର୍ ତାନିଙ୍ଗ୍। ଆମ୍ ନେ ଅକ ଦିଶୁମ୍ରେ ଗିତିଜାକାନାମ୍, ଏନାକେ ଆଇଙ୍ଗ୍ ଆମ୍କେ ଓଡ଼ୋଃ ଆମାଃ କିଲିକକେ ଏମାକଆଇଙ୍ଗ୍। ଆମାଃ କିଲିକ ଅତେରେନ୍ କା ଲେକା ଦାଡ଼ିୟଃ ଧୁଡ଼ି ଲେକାକ ହବାଅଃଆ। ଆମ୍ ପୁରାବ୍, ପାଶ୍ଚିମ୍, ଉତ୍ତାର୍ ଓଡ଼ୋଃ ଦାକ୍ଷିଣ୍ସାଃରେ ପୁରାଃଗିମ୍ ପସା ଇଦିୟଃଆ। ଆମାଃ ହରାତେ ଓଡ଼ୋଃ ଆମାଃ କିଲିକଆଃ ହରାତେ ଅତେଦିଶୁମ୍ରେନ୍ ସବେନ୍ ହଡ଼କ ଆଶିଷ୍କ ନାମେୟା। ନେଲେମେ, ଆଇଙ୍ଗ୍ ଆମାଃଲଃ ମେନାଇୟାଁଃ, ଆମ୍ ଅକ ଅକ ଠାୟାଦ୍ତେମ୍ ସେନାଃ, ଏନ୍ ସବେନ୍ ଠାୟାଦ୍ରେ ଆଇଙ୍ଗ୍ ଆମ୍କେ ବାଞ୍ଚାଅମେୟାଁଇଙ୍ଗ୍ ଏନ୍ତେ ଆଡଃମିସା ନେ ଦିଶୁମ୍ତେଇଙ୍ଗ୍ ଆଉରୁହାଡ଼୍ମେୟାଁ। ଚିୟାଃଚି ଆଇଙ୍ଗ୍ ଆମ୍କେ ଅକଆଃ କାଜିକାଦ୍ମେୟାଁଇଙ୍ଗ୍, ଏନା ଆଉରି ପୁରାଏ ଜାକେଦ୍ ଆମ୍କେ କାଇଙ୍ଗ୍ ବାଗିମେୟାଁ।”
ଯାକୁବ୍ ଦୁଡ଼ୁମ୍ଏତେ ବିରିଦ୍ୟାନ୍ଲଃ କାଜିକେଦା, “ପ୍ରାଭୁ ନେତାଃରେ ସାର୍ତିଗି ମେନାଇୟା, ମେନ୍ଦ ଆଇଙ୍ଗ୍ କାଇଙ୍ଗ୍ ସାରିକାଦ୍ ତାଇକେନା।” ଇନିଃ ବରକେଦ୍ତେ କାଜିକେଦା, “ନେଆଁ ମିଆଁଦ୍ ବରୱାନ୍ ଲେକାନ୍ ଠାୟାଦ୍ ତାନାଃ, ନେଆଁ ସାର୍ତିଗି ପାର୍ମେଶ୍ୱାର୍ଆଃ ଅଡ଼ାଃ ଓଡ଼ୋଃ ସିର୍ମାରେୟାଃ ଦୁହାର୍ ତାନାଃ।”
ଏଟାଃ ହୁଲାଙ୍ଗ୍ ଯାକୁବ୍ ସେତାଃ ଇଦାନ୍ରେ ବିରିଦ୍ୟାନା ଓଡ଼ୋଃ ଅକ ଦିରି ଚେତାନ୍ରେ ବହଃ ଉଠ୍ଙ୍ଗିକାଦ୍ ତାଇକେନାଏ, ଏନାକେ ପାହାମ୍ମେ ନାଙ୍ଗ୍ ଖୁଣ୍ଟୁ ଲେକାଏ ବିଦ୍କେଦା ଓଡ଼ୋଃ ଏନାରେ ସୁନୁମ୍ ଦୁଲ୍କେଦାଏ। ଇନିଃ ଏନ୍ ଠାୟାଦ୍ରେୟାଃ ନୁତୁମ୍ ବେଥେଲ୍1 ଏମ୍କେଦାଏ। ସିଦା ଏନ୍ ନାଗାର୍ରାଃ ନୁତୁମ୍ ଲୁସ୍ ତାଇକେନା। ଏନ୍ତେ ଯାକୁବ୍ କିରିୟାକେଦ୍ତେ କାଜିକେଦା, “ପାର୍ମେଶ୍ୱାର୍ ଆଇଁୟାଃ ଦେଙ୍ଗାନିଃ, ସେନଃ ହରାରେ ବାଞ୍ଚାଅନିଃ ହବାଅଃରେଦ, ଜମେୟାଃ ନାଗେନ୍ତେ ଜଜମାଃ ଓଡ଼ୋଃ ତୁସିଙ୍ଗ୍ ନାଗେନ୍ତେ ଲିଜାଃ ଏମାଇଙ୍ଗ୍ ରେଦ, ଓଡ଼ୋଃ ଆଇଙ୍ଗ୍ ଜୀଉସୁକୁତେ ଆପୁଆଃ ଅଡ଼ାଃତେ ଆଡଃମିସା ହିଜୁଃରୁହାଡ଼୍ ରେଦ, ପ୍ରାଭୁ ଆଇଁୟାଃ ପାର୍ମେଶ୍ୱାର୍ ହବାଅଃଆଏ। ଓଡ଼ୋଃ ଆଇଙ୍ଗ୍ ନେ ଅକ ଦିରିକେ ପାହାମେରେୟାଃ ଖୁଣ୍ଟୁ ଲେକା ବିଦାକାନ୍ ଦିରିକେଇଙ୍ଗ୍ ଦହକାଦା, ଏନା ପାର୍ମେଶ୍ୱାର୍ଆଃ ଅଡ଼ାଃ ବାଇୟଃଆ ଓଡ଼ୋଃ ଆମ୍ ଆଇଙ୍ଗ୍କେ ଅକ ସବେନାଃ ଏମାଇଙ୍ଗ୍ୟାଁମ୍, ଏନାରାଃ ଗେଲ୍ହିସା ଆଇଙ୍ଗ୍ ଆମ୍କେ ସାର୍ତିଗିଙ୍ଗ୍ ଏମାମେୟାଁ।”
Source notes (1)
- Footnote ପାର୍ମେଶ୍ୱାର୍ଆଃ ଅଡ଼ାଃ
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.