Munda Bible
ଏନେଟେଦ୍ 29
ଯାକୁବ୍ ଲାବାନ୍ଆଃ ଅଡ଼ାଃତେ ସେଟେର୍ୟାନା
ଯାକୁବ୍ ହରା ସେନ୍ ସେନ୍ଗି ସିଙ୍ଗିତୁରଃସାଃରେ ତାଇନ୍ତାନ୍ ହଡ଼କଆଃ ଦିଶୁମ୍ତେ ସେଟେର୍ୟାନା। ଇନିଃ ଏନ୍ତାଃଏତେ, ପିଡ଼ି ଥାଲାରେ ମିଆଦ୍ କୁଆଁ ନେଲ୍କେଦାଏ, ଏନ୍ ହେପାଦ୍ରେ ଆପିଆ ମିଣ୍ଡି ଗୋଟ୍ ଗିତିଜାକାନ୍ ତାଇକେନାକ; ଚିୟାଃଚି ହଡ଼କ ସବେନ୍ ମିଣ୍ଡି ଗୋଟ୍କକେ ମିସାତେ ଏନ୍ କୁଆଁଏତେ ଦାଆଃ ଆନୁଁକ ତାଇକେନାକ। ଏନ୍ କୁଆଁରେ ମିଆଦ୍ ମାରାଙ୍ଗ୍ ଦିରି ହାରୁବାକାନ୍ ତାଇକେନା। ଏନ୍ କୁଆଁତାଃରେ ଗୋଟ୍ରେନ୍ ସବେନ୍ ମିଣ୍ଡି ଝୁଣ୍ଡ୍ ହୁଣ୍ଡିୟାନ୍ ତାୟମ୍ତେ ହଡ଼କ ଏନ୍ ଦିରିକେ ଗେନାକେଦ୍ତେ ମିଣ୍ଡିକକେ ଦାଆଃ ଆନୁଁକ ତାଇକେନାକ, ଏନ୍ତେ ଏନ୍ ଦିରିକେ ଆଡଃଗି କୁଆଁ ଚେତାନ୍ରେ ହାରୁବ୍କେଦ୍ତେ ଦହ ତାଇକେନାକ।
ଯାକୁବ୍ ଇନ୍କୁକେ କୁଲିକେଦ୍କଆଏ, “ହେ ହାଗାକ ଆପେ କତାଃରେନ୍ ହଡ଼କତାନ୍ପେ ?”
ଇନ୍କୁ କାଜିକିୟାକ, “ଆଲେ ହାରାନ୍ ନାଗାର୍ରେନ୍ ହଡ଼କ ତାନ୍ଲେ।”
ଏନ୍ତେ ଯାକୁବ୍ କୁଲିକେଦ୍କଆଏ, “ଆପେ ନାହୁର୍ଆଃ ହନ୍ତେକଡ଼ା ଲାବନ୍କେ ସାରିୟାଃପେ ଚି ?”
ଇନ୍କୁ କାଜିରୁହାଡ଼୍କିୟାକ, “ହେଗି, ଆଲେ ଇନିଃକେ ସାରିୟାଃଲେ।”
ଯାକୁବ୍ କୁଲିକେଦ୍କଆଏ, “ଇନିଃ ବୁଗିନ୍ ମେନାଇୟା ଚି ?”
ଇନ୍କୁ କାଜିରୁହାଡ଼୍କିୟାକ, “ହେଗି, ଇନିଃ ବୁଗିନ୍ଗି ମେନାଇୟା, ନେଲିମେ, ଇନିଃ ଆୟାଃ ହନ୍ତେକୁଡ଼ି ରାହେଲ୍ ମିଣ୍ଡି ଗୋଟ୍ ଆଉକେଦ୍ତେ ହିଜୁଃତାନାଏ।”
ଯାକୁବ୍ କାଜିକେଦାଏ, “ନାହାଁଃ ପୁରାଃଗି ଘାଡ଼ି ମେନାଃ, ଆସୁଲ୍ ଜାଁତୁକକେ ମିଦ୍ତାଃରେ ହୁଣ୍ଡିକରାଃ ନେଣ୍ଡା ଆଉରି ହବାଅଃଆ, ଆପେ ଗୋଟ୍ରେନ୍ ମିଣ୍ଡିକକେ ଦାଆଃ ଆନୁଁକେଦ୍ତେ ଆଡଃମିସା ଗୁପି ନାଗେନ୍ତେ ଇଦିକପେ।”
ମେନ୍ଦ ଇନ୍କୁ କାଜିକିୟାକ, “ଆଲେ ଏନ୍ଲେକା କାଲେ ରିକାଦାଡ଼ିୟା, ଗୋଟ୍ରେନ୍ ସବେନ୍ ମିଣ୍ଡି ଝୁଣ୍ଡ୍କ ହୁଣ୍ଡିୟଃ ଜାକେଦ୍ ଆଲେକେ ତାଙ୍ଗି ଲାଗାତିୟାଁଃ। ଏନ୍ତେ କୁଆଁ ଚେତାନ୍ରାଃ ଏନ୍ ଦିରିକେ ଗେନାକେଦ୍ତେ ଆଲେ ମିଣ୍ଡିକକେ ଦାଆଃ ଆନୁଁକଆଲେ।”
ଯାକୁବ୍ ଇନ୍କୁଲଃ ଜାଗାର୍ ତାଇକେନ୍ ଇମ୍ତା ରାହେଲ୍ ଆପୁତେୟାଃ ଗୋଟ୍ରେନ୍ ମିଣ୍ଡିକକେ ଆଉକେଦ୍ତେ ଏନ୍ତାଃରେ ସେଟେର୍ୟାନା, ଚିୟାଃଚି ଇନିଃ ମିଣ୍ଡି ଗୁପିନିଃ ତାଇକେନାଏ। ଯାକୁବ୍ ଆୟାଃ ମାମୁଁ ଲାବନ୍ଆଃ ହନ୍ତେକୁଡ଼ି ରାହେଲ୍କେ ଓଡ଼ୋଃ ମାମୁଁତେୟାଃ ମିଣ୍ଡି ଗୋଟ୍କେ ନେଲ୍କେଦ୍ତେ କୁଆଁ ହେପାଦ୍ ସେନଃୟାନାଏ ଓଡ଼ୋଃ କୁଆଁ ଚେତାନ୍ରେ ହାରୁବାକାନ୍ ଦିରିକେ ଗେନାକେଦ୍ତେ ମାମୁଁତେୟାଃ ମିଣ୍ଡିକକେ ଦାଆଃ ଆନୁକେଦ୍କଆଏ। ଏନ୍ତେ ଯାକୁବ୍ ରାହେଲ୍କେ ଚଅଃକିତେ ରାସ୍କାୟାନ୍ଲଃ କାଉରିକେଦ୍ତେ ରାଆଃକେଦା। ଯାକୁବ୍ ରାହେଲ୍କେ କାଜିକିୟା, “ଆଇଙ୍ଗ୍ ଆମାଃ ଆପୁଆଃ ଅଡ଼ାଃରେନ୍ ଓଡ଼ୋଃ ରିବ୍କାରାଃ ହନ୍କଡ଼ା ତାନିଙ୍ଗ୍।”
ନେ କାଜି ଆୟୁମ୍କେଦ୍ଚି, ରାହେଲ୍ ଆପୁତେକେ କାଜି ନାଙ୍ଗ୍ ନିର୍ ଇଦିକେଦାଏ। ଏନ୍ତେ ଲାବନ୍ ମିଶିତେୟାଃ ହନ୍କଡ଼ା ଯାକୁବ୍ ହିଜୁଃକାନାଏ ମେନ୍ତେ ଆୟୁମ୍କେଦ୍ଚି, ଇନିଃଲଃ ନେପେଲ୍ ନାଗେନ୍ତେ ନିର୍ ଇଦିକେଦାଏ ଓଡ଼ୋଃ ଇନିଃକେ ହାମ୍ବୁଦ୍କେଦ୍ତେ ଚଅଃକିୟାଏ, ଏନ୍ତେ ଅଡ଼ାଃତେ ଇଦିକିୟା। ଯାକୁବ୍ ଲାବନ୍କେ ସବେନ୍ କାଜି ଉଦୁବ୍କିୟାଏ। ସବେନ୍ କାଜି ଆୟୁମ୍କେଦ୍ତେ ଲାବନ୍ କାଜିକିୟାଏ, “ଆମ୍ ଆଇଁୟାଃ ଆପ୍ନାଃ ମାସ୍ ଓଡ଼ୋଃ ମାୟୋମ୍ରେନ୍ ତାନ୍ମେ।” ଏନାତେ ଯାକୁବ୍ ଇନିୟାଃ ଅଡ଼ାଃରେ ମିଦ୍ ମାହିଁନା ଜାକେଦ୍ ତାଇନ୍ୟାନାଏ।
ଲେୟା ଓଡ଼ୋଃ ରାହେଲ୍କେ ଯାକୁବ୍ଆଃ ଆଣ୍ଦି
ଲାବନ୍ ଯାକୁବ୍କେ କାଜିକିୟା, “ଆମ୍ ଆଇଁୟାଃ ଅଡ଼ାଃରେନ୍ ତାନ୍ମେ ମେନ୍ତେ ଚିନାଃ ବେଗାର୍ ଗନଙ୍ଗ୍ତେ ସୁନୁସାର୍ କାମି ରିକାଏୟାମ୍ ? ଏନାମେନ୍ତେ ଚିମିନାଙ୍ଗ୍ ଗନଙ୍ଗ୍ ଇଦିୟାମ୍ ? ଏନା କାଜିମେ।” ଏନ୍ ଲାବନ୍ଆଃ ବାରିୟା କୁଡ଼ିହନ୍ ତାଇକେନାକିନ୍, ମାରାଙ୍ଗ୍ନିୟାଃ ନୁତୁମ୍ ଲେୟା, ଓଡ଼ୋଃ ହୁଡିଙ୍ଗ୍ନିୟାଃ ନୁତୁମ୍ ରାହେଲ୍। ଲେୟାରାଃ ମେଦ୍ କାଣିଗି ତାଇକେନା ଓଡ଼ୋଃ ରାହେଲ୍ ନେପେଲ୍ରେ ପୁରାଃ ସୁନ୍ଦ୍ରି ତାଇକେନା।
ଯାକୁବ୍ ରାହେଲ୍କେ ଦୁଲାଡ଼ି ତାଇକେନା, ଏନାମେନ୍ତେ ଇନିଃ ଲାବନ୍କେ କାଜିକିୟା, “ଆମାଃ ହୁଡିଙ୍ଗ୍ ହନ୍କୁଡ଼ି ନାଗେନ୍ତେ ଆଇଙ୍ଗ୍ ଏୟା ବାରାଷ୍ ଜାକେଦ୍ ଆମାଃତାଃରେ ସୁନୁସାର୍ କାମି ରିକାୟାଇଙ୍ଗ୍।”
ଲାବନ୍ ଯାକୁବ୍କେ କାଜିକିୟା, “ଏଟାଃ କଡ଼ାଲଃ ଆଣ୍ଦି ଏମ୍ ଜାଗାରେ ଆମାଃଲଃ ଆଣ୍ଦି ଏମ୍ତେୟାଃ ବୁଗିନ୍ ହବାଅଃଆ।” ଏନାତେ ଆମ୍ ନେତାଃରେଗି ତାଇନ୍ମେ। ଯାକୁବ୍ ରାହେଲ୍କେ ଆଣ୍ଦିୟଃ ନାଗେନ୍ତେ ଏୟା ବାରାଷ୍ ଜାକେଦ୍ ସୁନୁସାର୍ କାମି ରିକାକେଦାଏ। ଯାକୁବ୍ ରାହେଲ୍କେ ନିମିନାଙ୍ଗ୍ ଦୁଲାଡ଼୍ଇ ତାଇକେନାଏ ଯେ, ଏନ୍ ଏୟା ବାରାଷ୍ ଇନିଃକେ ମୁସିଙ୍ଗ୍ ବାର୍ସିଙ୍ଗ୍ ଲେକା ଆଟ୍କାର୍କିୟା।
ଏନ୍ତେ ଯାକୁବ୍ ଲାବନ୍କେ କାଜିକିୟା, “ଆଇଙ୍ଗ୍ କାଜିକାଦ୍ ନେଣ୍ଡା ପୁରାୟାନା, ନାହାଁଃଦ ଆମାଃ ହନ୍କୁଡ଼ିକେ ଆଇଁୟାଃଲଃ ଆଣ୍ଦିମେ।” ଏନ୍ତେ ଲାବନ୍ ହେପାଦ୍ରେନ୍ ହଡ଼କକେ ଆଣ୍ଦି ଭୋଜି ଜମ୍ ନାଗେନ୍ତେ ନେଅଁତା କେଦ୍କଆ। ମେନ୍ଦ ଏନ୍ ନିଦାରେ ଲାବନ୍ ଆୟାଃ ହନ୍ତେକୁଡ଼ି ଲେୟାକେ ଆଉକେଦ୍ତେ ଯାକୁବ୍ତାଃରେ ଜିମାକିୟା ଓଡ଼ୋଃ ଯାକୁବ୍ ଇନିଃଲଃ ମିଦ୍ନୁବାଃ ତାଇୟାନାଏ। ଲାବନ୍ ଆୟାଃ ହନ୍ତେକୁଡ଼ି ଲେୟାନାଙ୍ଗ୍ ସିଲ୍ପା ନୁତୁମ୍ ମିଆଁଦ୍ କାମ୍ଡ଼ି ଦାସିକେ ହଗି ଏମ୍କିୟା। ଆଙ୍ଗ୍ୟାନ୍ଚି, ଯାକୁବ୍ ନେଲ୍କିୟାଏ ଯେ, ଇନିଃ ଲେୟା ତାନିଃ। ଏନ୍ତେ ଯାକୁବ୍ ଲାବନ୍ତାଃ ସେନ୍କେଦ୍ତେ କାଜିକିୟା, “ଆମ୍ ଆଇଁୟାଃଲଃ ଚିନାଃମେନ୍ତେ ନେ'ଲେକା ରିକାକେଦାମ୍ ? ଆଇଙ୍ଗ୍ ରାହେଲ୍କେ ଆଣ୍ଦିନ୍ ନାଗେନ୍ତେ ଚିନାଃ ଏୟା ବାରାଷ୍ ଜାକେଦ୍ ଆମାଃ ସୁନୁସାର୍ କାମି କାଇଙ୍ଗ୍ ରିକା ? ତାବ୍ଦ ଚିନାଃ ମେନ୍ତେମ୍ ବେଦାକେଦିୟାଁ ?”
ଲାବନ୍ କାଜିକିୟାଏ, “ମାରାଙ୍ଗ୍ ହନ୍କୁଡ଼ି ତାଇନ୍କେଦ୍ତେ ହୁଡିଙ୍ଗ୍ ହନ୍କୁଡ଼ିକେ ସିଦା ଆଣ୍ଦିତେୟାଃ ଆଲେୟାଃ ରିତିରିୱାଜ୍ରେ ବାନଃଆ। ଲେୟାଲଃ ଆଣ୍ଦିକାନ୍ ମିଦ୍ ହାପ୍ତା ପୁରାଏମେ, ଏନ୍ତେ ଆଲେ ହୁଡିଙ୍ଗ୍ ହନ୍କୁଡ଼ିକେ ହଗି ଆମାଃଲଃ ଆଣ୍ଦିୟାଲେ, ମେନ୍ଦ ଇନିୟାଃ ନାଗେନ୍ତେ ଆମ୍କେ ଆଡଃଗି ଏୟା ବାରାଷ୍ ଆଇଙ୍ଗ୍ତାଃରେ ସୁନୁସାର୍ କାମି ରିକା ଲାଗାତିୟାଁଃ।”
ଯାକୁବ୍ ଏନ୍ଲେକାଗି ରିକାକେଦା, ଇନିଃ ଲେୟାଲଃ ମିଦ୍ ହାପ୍ତା ତାଇୟାନାଏ, ଏନ୍ତେ ଲାବନ୍ ଆୟାଃ ହୁଡିଙ୍ଗ୍ ହନ୍ତେକୁଡ଼ି ରାହେଲ୍କେ ଯାକୁବ୍ଲଃ ଆଣ୍ଦିକିୟାଏ। ଲାବନ୍ ଆୟାଃ ହୁଡିଙ୍ଗ୍ ହନ୍ତେକୁଡ଼ି ରାହେଲ୍ ନାଙ୍ଗ୍ ବିଲ୍ହା ନୁତୁମ୍ କାମ୍ଡ଼ି ଦାସିକେ ଏମ୍କିୟା। ଯାକୁବ୍ ରାହେଲ୍ଲଃ ହଡ଼୍ମରେ ମିଦ୍ୟାନାଏ ଓଡ଼ୋଃ ଲେୟାଏତେ ରାହେଲ୍କେ ପୁରାଃଗି ଦୁଲାଡ଼୍କିୟା। ଏନ୍ତେ ଇନିଃ ଆଡଃଗି ଏୟା ବାରାଷ୍ ଜାକେଦ୍ ଲାବନ୍ଆଃ ସୁନୁସାର୍ କାମି ରିକାକେଦା।
ଯାକୁବ୍ଆଃ ହନ୍କ
ଯାକୁବ୍ ଲେୟାକେ କା ଦୁଲାଡ଼୍ତାନ୍ ନେଲ୍କେଦ୍ତେ, ପ୍ରାଭୁ ଲେୟାକେ ହାମ୍ବାଲ୍ରୋୱା ହବାଅଃ ନାଙ୍ଗ୍ ପେଡ଼େଃ ଏମ୍କିୟାଏ, ମେନ୍ଦ ରାହେଲ୍କେ ହାମ୍ବାଲ୍ରୋୱା ହବାଅଃରାଃ ପେଡ଼େଃ କାଏ ଏମ୍କିୟା। ଲେୟା ହାମ୍ବାଲ୍ରୋୱାକେଦ୍ତେ ମିଆଁଦ୍ କଡ଼ାହନ୍ ଜାନାମ୍କିୟାଏ ଓଡ଼ୋଃ ଇନିୟାଃ ନୁତୁମ୍ ରୁବେନ୍1 ଏମ୍କେଦ୍ତେ କାଜିକେଦାଏ, “ପ୍ରାଭୁ ଆଇଁୟାଃ ଦୁକୁକେ ନେଲ୍କେଦା, ନାହାଁଃଦ ଆଇଁୟାଃ କଡ଼ା ଆଇଙ୍ଗ୍କେ ଦୁଲାଡ଼ିଙ୍ଗ୍ୟାଁ।” ଇନିଃ ଆଡଃଗି ହାମ୍ବାଲ୍ରୋୱାୟାନାଏ ଓଡ଼ୋଃ କଡ଼ାହନ୍ ଜାନାମ୍କେଦ୍ତେ କାଜିକେଦା, “ଆଇଙ୍ଗ୍କେ ଦୁଲାଡ଼୍ କା ନାମଃତାନା ମେନ୍ତେ ପ୍ରାଭୁ ଆୟୁମ୍କେଦ୍ଲଃ ନେ ହନ୍କେ ଏମାକାଦିୟାଁ।” ଏନାତେ ଏନ୍ ହନ୍ରାଃ ନୁତୁମ୍ ଶିମିୟୋନ୍2 ଏମ୍କେଦାଏ। ଇନିଃ ଆଡଃଗି ହାମ୍ବାଲ୍ରୋୱାକେଦ୍ତେ କଡ଼ାହନ୍ ଜାନାମ୍କିୟାଏ ଓଡ଼ୋଃ କାଜିକେଦାଏ, “ଆଇଙ୍ଗ୍ ଆଇଁୟାଃ କଡ଼ାକେ ଆପିୟା କଡ଼ାହନ୍ ଏମାକାଇ ହରାତେ, ନାହାଁଃ ଇନିଃ ଆଇଁୟାଃ ହେପାଦ୍ତେ ହିଜୁଃଆ।” ଏନାତେ ଇନିଃ ଏନ୍ ହନ୍ଆଃ ନୁତୁମ୍ ଲେବୀ3 ଏମ୍କିୟାଏ। ଇନିଃ ଆଡଃଗି ହାମ୍ବାଲ୍ରୋୱାୟାନ୍ଲଃ କଡ଼ାହନ୍ ଜାନାମ୍କିୟାଏ ଓଡ଼ୋଃ କାଜିକେଦାଏ, “ନାହାଃଁ ପ୍ରାଭୁଆଃ ସାହାରାଅ ଦୁରାଙ୍ଗ୍ ରିକାୟାଇଙ୍ଗ୍।” ଏନାତେ ଇନିଃ ଏନ୍ ହନ୍ରାଃ ନୁତୁମ୍ ଯିହୁଦା4 ଏମ୍କେଦାଏ। ଏନ୍ତେ ଲେୟାରାଃ ହନ୍ଗାଁଣା ଓଡ଼ୋଃ କାକ ହବାୟାନା।
Source notes (4)
- Footnote ନେ ହନ୍କେ ନେଲିମେ
- Footnote ଆୟୁମ୍ନିଃ
- Footnote ହେପାଦ୍ତେ ହିଜୁଃ
- Footnote ପ୍ରାଭୁଆଃ ସାହାରାଅ
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.