Munda Bible
ଏନେଟେଦ୍ 30
ମେନ୍ଦ ରାହେଲ୍ ହାମ୍ବାଲ୍ରୋୱା କାଏ ହବାୟାନା ଓଡ଼ୋଃ ଯାକୁବ୍ ନାଗେନ୍ତେ ହନ୍କ କାଏ ଜାନାମ୍କେଦ୍କଆ, ଏନାତେ ରାହେଲ୍ ଆୟାଃ ମିଶିତେକେ ନେଲ୍କେଦ୍ତେ ହିସିଙ୍ଗାୟାନା। ଓଡ଼ୋଃ ଯାକୁବ୍କେ କାଜିକିୟା, “ଆଇଙ୍ଗ୍କେ ହନ୍ ଏମାଇଙ୍ଗ୍ମେ, କା'ରେଦ ଆଇଙ୍ଗ୍ ଗଜେନାଇଙ୍ଗ୍।”
ଯାକୁବ୍ ରାହେଲ୍କେ ଖିସ୍ୟାନା ଓଡ଼ୋଃ କାଜିକିୟାଏ, “ଆଇଙ୍ଗ୍ ପାର୍ମେଶ୍ୱାର୍ଆଃ ଠାୟାଦ୍ ଇଦି କାଇଙ୍ଗ୍ ଦାଡ଼ିୟା। ଇନିଃଗି ଆମ୍କେ ହାମ୍ବାଲ୍ରୋୱା ହବାଅଃରାଃ ପେଡ଼େଃ ଏମ୍ ଦାଡ଼ିନିଃ ତାନିଃ।”
ଏନ୍ତେ ରାହେଲ୍ କାଜିକିୟାଏ, “ଆଇଁୟାଃ କାମ୍ଡ଼ିକୁଡ଼ି ବିଲ୍ହାକେ ଇଦିମେ, ଓଡ଼ୋଃ ଇନିଃଲଃ ହଡ଼୍ମରେ ମିଦ୍ଅଃମେ। ଇନିଃ ହାମ୍ବାଲ୍ରୋୱାକେଦ୍ତେ ହନ୍ ଜାନାମିଁୟାଏ ଓଡ଼ୋଃ ଆଇଁୟାଃ କୟଙ୍ଗ୍ରେ ଏନ୍ ହନ୍କେ ଏମାଇଙ୍ଗ୍ରେ, ଇନିୟାଃ ହନ୍ ଆଇଁୟାଃ ହବାଅଃଆଏ।” ରାହେଲ୍ ଆୟାଃ କାମ୍ଡ଼ିକୁଡ଼ି ବିଲ୍ହାକେ ଆମାଃ କୁଡ଼ି ଲେକା ଇଦିମେ ମେନ୍ତେ ଯାକୁବ୍କେ ଏମ୍କିୟା। ବିଲ୍ହା ହାମ୍ବାଲ୍ରୋୱାୟାନାଏ ଓଡ଼ୋଃ ଯାକୁବ୍ ନାଗେନ୍ତେ ମିଆଦ୍ ହନ୍ ଜାନାମ୍କିୟାଏ। ଇମ୍ତା ରାହେଲ୍ କାଜିକେଦାଏ, “ପାର୍ମେଶ୍ୱାର୍ ଆଇଁୟାଃ ନାଗେନ୍ତେ ବୁଗିନ୍ ବିଚାର୍କେଦାଏ ଓଡ଼ୋଃ ଆଇଁୟାଃ ବିନ୍ତି ଆୟୁମ୍କେଦ୍ତେ ମିଆଁଦ୍ କଡ଼ାହନ୍ ଏମାକେଦିୟାଁଏ।” ଏନାମେନ୍ତେ ଇନିଃ ଏନ୍ ହନ୍କେ ଦାନ୍1 ମେନ୍ତେ ନୁତୁମ୍କିୟା। ରାହେଲ୍ରାଃ କାମ୍ଡ଼ିକୁଡ଼ି ବିଲ୍ହା ଆଡଃଗି ହାମ୍ବାଲ୍ରୋୱାୟାନା ଏନ୍ତେ ଯାକୁବ୍ ନାଗେନ୍ତେ ଆଡଃମିଆଦ୍ କଡ଼ାହନ୍ ଜାନାମ୍କିୟାଏ। ରାହେଲ୍ କାଜିକେଦା, “ଆଇଙ୍ଗ୍ ଆଇଁୟାଃ ମିଶିଲଃ ପାର୍ମେଶ୍ୱାର୍ଆଃ ଦେଙ୍ଗାତେ ଲାଡ଼ାଇକେଦ୍ତେ ଜିତାଅୟାନା,” ଏନାମେନ୍ତେ ଇନିୟାଃ ନୁତୁମ୍ ନପ୍ତାଲି2।
ଏନ୍ତେ ଲେୟା ଆୟାଃ ହାମ୍ବାଲ୍ରୋୱା ଥାବର୍ୟାନା ନେଆଁ ଆଟ୍କାର୍କେଦ୍ତେ, ଆୟାଃ ଦାସି ସିଲ୍ପାକେ ଯାକୁବ୍ଲଃ ଆଣ୍ଦି ନାଗେନ୍ତେ ଏମ୍କିୟା। ଏନ୍ତେ ଲେୟାରାଃ ଦାସି ସିଲ୍ପାତାଃଏତେ ଯାକୁବ୍ ନାଗେନ୍ତେ ମିଆଦ୍ କଡ଼ାହନ୍ ଜାନାମ୍କିୟାଏ। ଏନ୍ତେ ଲେୟା କାଜିକେଦାଏ, “ଆଇଁୟାଃ ଚେତାନ୍ରେ ପ୍ରାଭୁଆଃ ଚିମିନ୍ ଆଶିଷ୍ ମେନାଃ।” ଏନାତେ ଇନିଃ ଇନିୟାଃ ନୁତୁମ୍ ଗାଦ୍3 ଏମ୍କିୟାଏ। ଏନ୍ତେ ଲେୟାରାଃ ଦାସି ସିଲ୍ପା ଯାକୁବ୍ ନାଗେନ୍ତେ ଆଡଃମିଆଦ୍ ହନ୍ ଜାନାମ୍କିୟା। ଏନ୍ତେ ଲେୟା କାଜିକେଦାଏ, “ଆଇଁୟାଃ ଚିମିନ୍ ରାସ୍କା, ଡିଣ୍ଡାକୁଡ଼ିକ ଆଇଙ୍ଗ୍କେ ଆନନ୍ଦିନୀ ମେନ୍ତେ କାଜିୟାଁକ।” ଏନାମେନ୍ତେ ଇନିୟାଃ ନୁତୁମ୍ ଆସେର୍4 ଏମ୍କିୟାଏ।
ଏନ୍ତେ ଗହମ୍ ଇରଃ ଦିପିଲିରେ ରୁବେନ୍ ଗହମ୍ ପିଡ଼ିତେ ହନର୍ ସେନଃୟାନାଏ ଓଡ଼ୋଃ ଏନ୍ତାଃଏତେ ଦୁଦା5 ଜଅ ନାମ୍ ଆଉକେଦ୍ତେ ଏଙ୍ଗାତେକେ ଏମ୍କିୟା। ଏନ୍ତେ ରାହେଲ୍ ଲେୟାକେ କାଜିକିୟା, “ଆମାଃ ହନ୍କଡ଼ା ଆଉୱାକାଦ୍ ଦୁଦା ଜଅ ଆଇଙ୍ଗ୍କେ କାଟିକାନ୍ ଏମାଇଙ୍ଗ୍ମେ।”
ଏନ୍ତେ ଲେୟା କାଜିରୁହାଡ଼୍କିୟାଏ, “ଆଇଁୟାଃ କଡ଼ାକେ ଆମ୍ ଇଦିକିୟାମ୍, ଏନା ଚିନାଃ ହୁଡିଙ୍ଗ୍ କାଜି ତାନାଃ ? ଚିନାଃ ଆମ୍ ଆଇଁୟାଃ ହନ୍ ଆଉୱାକାଦ୍ ଦୁଦା ଜଅ ହଗି ରେଃକ୍ ଇଦିୟାମ୍ ?”
ଏନ୍ତେ ରାହେଲ୍ କାଜିକିୟାଏ, “ଆମାଃ ହନ୍ଆଃ ଦୁଦା ଜଅ ଆଇଙ୍ଗ୍କେ ଏମାଇଙ୍ଗ୍ମେ। ଏନାରାଃ ବାଦ୍ଲାରେ ତିସିଙ୍ଗ୍ ନୁବାଃ ଯାକୁବ୍ ଆମାଃଲଃ ଦୁଡ଼ୁମାଏ।”
ଏନ୍ତେ ସିଙ୍ଗି ହାସୁର୍ୟାନ୍ରେ ଯାକୁବ୍ ଲୟଙ୍ଗ୍ଏତେ ରୁହାଡ଼୍ତାନ୍ ଇମ୍ତା ଲେୟା ଇନିଃଲଃ ନେପେଲ୍ ନାଗେନ୍ତେ ସେନଃୟାନା ଓଡ଼ୋଃ କାଜିକିୟାଏ, “ତିସିଙ୍ଗ୍ ଆମ୍କେ ଆଇଁୟାଃ ହେପାଦ୍ତେ ହିଜୁଃ ଲାଗାତିୟାଁଃ, ଚିୟାଃଚି ଆଇଙ୍ଗ୍ ଆଇଁୟାଃ ହନ୍ଆଃ ଦୁଦା ଜଅ ଏମ୍କେଦ୍ତେ ଆମାଃ ଗନଙ୍ଗ୍ ଏମାକାଦାଇଙ୍ଗ୍।” ଏନାତେ ଇନିଃ ଏନ୍ ନୁବାଃ ଆୟାଃଲଃ ଗିତିଜ୍ୟାନାଏ।
ପାର୍ମେଶ୍ୱାର୍ ଲେୟାରାଃ ବିନ୍ତିକେ ଆୟୁମ୍କେଦା, ଓଡ଼ୋଃ ଇନିଃ ହାମ୍ବାଲ୍ରୋୱାୟାକେଦ୍ତେ ଯାକୁବ୍ ନାଗେନ୍ତେ ମଣେୟାଁ ହନ୍ ଜାନାମ୍କିୟାଏ। ଏନ୍ତେ ଲେୟା କାଜିକେଦା, “ଆଇଁୟାଃ କଡ଼ାକେ ଦାସିତାଇୟାଁଃକେ ଏମାକାଇ ତାଇକେନାଇଙ୍ଗ୍, ପାର୍ମେଶ୍ୱାର୍ ଏନାରାଃ ଗନଙ୍ଗ୍ ଏମାକାଦାଏ।” ଏନାମେନ୍ତେ ଇନିୟାଃ ନୁତୁମ୍ ଇଷାଖର୍6 ଏମ୍କିୟାଏ। ଏନ୍ତେ ଲେୟା ଆଡଃଗି ହାମ୍ବାଲ୍ରୋୱାକେଦ୍ତେ ଯାକୁବ୍ ନାଙ୍ଗ୍ ତୁରିୟା ହନ୍ ଜାନାମ୍କିୟାଏ। ଏନ୍ତେ ଲେୟା କାଜିକେଦାଏ, “ପାର୍ମେଶ୍ୱାର୍ ଆଇଙ୍ଗ୍କେ ବୁଗିନ୍ ଗନଙ୍ଗାନ୍ ବିଷାଏ ଏମ୍କେଦିୟାଁଏ, ନାହାଁଃଦ ଆଇଁୟାଃ କଡ଼ା ଆଇଁୟାଃଲଃ ତାଇନାଏ, ଚିୟାଃଚି ଇନିୟାଃ ନାଗେନ୍ତେ ତୁରିୟାଠୁ ହନ୍ ଜାନାମ୍ କେଦ୍କଆଇଙ୍ଗ୍।” ଏନାତେ ଇନିୟାଃ ନୁତୁମ୍ ସବ୍ଲୁନ୍7 ଏମ୍କିୟାଏ। ଚିମିନ୍ ମାହାଁ ତାୟମ୍ତେ ଇନିଃ ମିଆଦ୍ କୁଡ଼ିହନ୍ ଜାନାମ୍କିୟାଏ, ଇନିୟାଃ ନୁତୁମ୍ ଦିନା ଏମ୍କିୟାଏ।
ଏନ୍ତେ ପାର୍ମେଶ୍ୱାର୍ ରାହେଲ୍କେ ପାହାମ୍କିୟା ଓଡ଼ୋଃ ପାର୍ମେଶ୍ୱାର୍ ଇନିଃକେ ହାମ୍ବାଲ୍ରୋୱା ହବାଅଃରାଃ ପେଡ଼େଃ ଏମ୍କିୟାଏ। ଏନ୍ତେ ଇନିଃ ହାମ୍ବାଲ୍ରୋୱାୟାନ୍ଲଃ ହନ୍ ଜାନାମ୍କେଦ୍ତେ କାଜିକେଦା, “ପାର୍ମେଶ୍ୱାର୍ ଆଇଁୟାଃ ଗିହୁଃ ସାଙ୍ଗିନ୍କେଦାଏ।” ଏନ୍ତେ ଇନିଃ ଏନ୍ ହନ୍ରାଃ ନୁତୁମ୍ ଯୋଷେଫ୍8 ଏମ୍କେଦ୍ତେ କାଜିକେଦା, “ପ୍ରାଭୁ ଆଇଙ୍ଗ୍କେ ଆଡଃମିଆଦ୍ ହନ୍ ଏମାଇଙ୍ଗ୍ କାଏ।”
ଯାକୁବାଃ ହାରା ଇଦିୟଃ
ଯୋଷେଫ୍ ରାହେଲ୍ତାଃଏତେ ଜାନାମ୍ୟାନ୍ ତାୟମ୍ତେ ଯାକୁବ୍ ଲାବନ୍କେ କାଜିକିୟା, “ଆଇଁୟାଃ ଦିଶୁମ୍ତେ ସେନଃ ନାଙ୍ଗ୍ ବିଦା ଏମାଇଙ୍ଗ୍ମେ। ଆଇଙ୍ଗ୍ ଅକନ୍କଆଃ ନାଗେନ୍ତେ ଦାସି କାମିକାଦାଇଙ୍ଗ୍, ଆଇଁୟାଃ ଏନ୍ କୁଡ଼ିକକେ ଓଡ଼ୋଃ ହନ୍କକେ ଇଦି ଇଚିଇଙ୍ଗ୍ମେଁ, ଚିୟାଃଚି ଚିଲ୍କା ଆଇଙ୍ଗ୍ ଆମାଃତାଃରେ ସୁନୁସାର୍ କାମି ରିକାକାଦାଇଙ୍ଗ୍, ଏନା ଆମ୍ ସାରିତାନାମ୍।”
ମେନ୍ଦ ଲାବନ୍ ଯାକୁବ୍କେ କାଜିକିୟା, “ବିନ୍ତିମେ ତାନାଇଙ୍ଗ୍, ଆମ୍ ଆଇଁୟାଃ ଚେତାନ୍ରେ ସାୟାଦ୍ ଏମାଇଙ୍ଗ୍ମେ, ଚିୟାଃଚି ଆମାଃ ହରାତେ ପ୍ରାଭୁ ଆଇଙ୍ଗ୍କେ ଆଶିଷ୍କାଦିୟାଁ। ଏନା ଆଇଙ୍ଗ୍ ଲେକାକେଦ୍ ହରାତେ ସାରିଦାଡ଼ି ତାନାଇଙ୍ଗ୍। ଏନାମେନ୍ତେ ଆମ୍ ଆମ୍ଗି ଆମାଃ ଗନଙ୍ଗ୍ କାଜିମେ, ଆଇଙ୍ଗ୍ ଏନାଇଙ୍ଗ୍ ଏମାମେୟା।”
ଏନ୍ତେ ଯାକୁବ୍ ଇନିଃକେ କାଜିକିୟା, “ଆଇଙ୍ଗ୍ ଆମାଃ ନାଗେନ୍ତେ ଚିଲ୍କା ସେୱାକାମି ରିକା କାଦାଇଙ୍ଗ୍ ଓଡ଼ୋଃ ଆଇଁୟାଃତାଃରେ ଆମାଃ ଆସୁଲ୍ ଜାଁତୁକ ଚିଲ୍କା ମେନାକଆ, ଏନାଦମ୍ ସାରିକାଦା। ଚିୟାଃଚି, ଆଇଙ୍ଗ୍ ଆମାଃତାଃ ହିଜୁଃ ସିଦାରେ ଆମାଃତାଃ କାଟିଃଗି ଖୁର୍ଜି ତାଇକେନା। ନାହାଃଁଦ ଏନା ପୁରାଃଗି ହବାକାନା, ଆଇଙ୍ଗ୍ ଅକ ଠାୟାଦ୍ତେ ଆମାଃ ମିଣ୍ଡିକକେ ଗୁପି ନାଙ୍ଗ୍ ଇଦିକେଦ୍କଆଇଙ୍ଗ୍, ଏନ୍ତାଃରେ ପ୍ରାଭୁ ଆମାଃ ଆଶିଷ୍ ରିକାକେଦାଏ, ମେନ୍ଦ ଆଇଙ୍ଗ୍ ଆଇଁୟାଃ ହନ୍ଗାଁଣା ନାଗେନ୍ତେ ଜେତ୍ନାଃ କାଇଙ୍ଗ୍ ହୁଣ୍ଡି।”
ଏନ୍ତେ ଲାବନ୍ କାଜିକିୟାଏ, “ଆଇଙ୍ଗ୍ ଆମ୍କେ ଚିନାଃ ଏମାମେୟାଁଇଙ୍ଗ୍ ?”
ଯାକୁବ୍ କାଜିକିୟାଏ, “ଆମ୍ ଆଇଁୟାଃ ନାଗେନ୍ତେ ମିଆଦ୍ କାମି ରିକାଏ ରେଦମ୍, ଆମ୍କେ ଜେତ୍ନାଃ ଏମଃ କା ଲାଗାତିୟାଁଃ। ଏନ୍ତେ ଆଇଙ୍ଗ୍ ଆମାଃ ଗୋଟ୍ରେନ୍ ମିଣ୍ଡିକକେ ଆଡଃଗିଇଙ୍ଗ୍ ଗୁପିକଆ। ତିସିଙ୍ଗ୍ ଆମାଃ ସବେନ୍ ଗୋଟ୍ରେନ୍ ମିଣ୍ଡିକଏତେ କାବ୍ରାଚିତ୍ରା, ଦାଗ୍ କାନ୍ ଓଡ଼ୋଃ ହେନ୍ଦେ ରାଙ୍ଗ୍ରେନ୍ ମିଣ୍ଡି ଓଡ଼ୋଃ ମେରମ୍କକେ ଆପାନ୍କଆଇଙ୍ଗ୍, ଏନ୍ ସବେନ୍କ ଆଇଁୟାଃ ଗନଙ୍ଗ୍ ଲେକା ହବାଅଃଆକ। ଏନ୍ତେ ଚିମ୍ତା ଆମାଃ ଓଡ଼ୋଃ ଆଇଁୟାଃ ଥାଲାରେ ନେ ଗନଙ୍ଗ୍ କାଜି ସେଟେରାଃ, ଇମ୍ତା ଆଇଁୟାଃ ଧାର୍ମାନ୍ କାଜିରେୟାଃ ଗାୱା ଉଦୁବେୟାଏ। ସବେନ୍ ମିଣ୍ଡି ଓଡ଼ୋଃ ମେରମ୍କ ଥାଲାରେ କାବ୍ରାଚିତ୍ରା, ଦାଗ୍ କାନ୍ ଓଡ଼ୋଃ ହେନ୍ଦେ ନେଲଃତାନ୍ ସବେନ୍କ ଆଇଁୟାଃ କୁମ୍ବୁଡୁ କାନ୍କ ମେନ୍ତେ ସାରି ଦାଡ଼ିୟଃଆକ।”
ଏନ୍ତେ ଲାବନ୍ କାଜିକେଦାଏ, “ବୁଗିନ୍ କାଜି, ଆମାଃ କାଜି ଲେକାତେଗି ହବାଅଃକା।” ଏନ୍ତେ ଇନିଃ ଏନ୍ ହୁଲାଙ୍ଗ୍ ଗାର୍ ହାଦାକାନ୍, କାବ୍ରାଚିତ୍ରା, ଦାଗ୍ କାନ୍ ଓଡ଼ୋଃ ହେନ୍ଦେ ରାଙ୍ଗ୍ରେନ୍ ସବେନ୍ ମିଣ୍ଡି ଓଡ଼ୋଃ ବାକ୍ରା ମେରମ୍କକେ ହିଗାଡ଼୍କେଦ୍ତେ ଆୟାଃ ହନ୍କଡ଼ାକଆଃ ତିଃଇରେ ଜିମାକେଦ୍କଆ। ଏନ୍ତେ ଯାକୁବ୍ ଲାବନ୍ତାଃଏତେ ଆପି ହୁଲାଙ୍ଗ୍ ଜାକେଦ୍ ସେସେନ୍ ହରା ହବାଅଃ ଲେକା ସାଙ୍ଗିନ୍ତେ ଗୋଟ୍ରେନ୍ ମିଣ୍ଡିକକେ ଗୁପି ନାଙ୍ଗ୍ ଇଦିକେଦ୍କଆଏ।
ଯାକୁବ୍ ଲିବ୍ନି, ମୁଫ୍ଲି ଓଡ଼ୋଃ ଅର୍ମୋନ୍ ଦାରୁରାଃ ନାୱା କତ ମାଆଃ ଆଉକେଦାଏ ଓଡ଼ୋଃ ଏନାରାଃ ହାର୍ତାଃ ଅଚାଃକେଦ୍ତେ ପୁଣ୍ଡି ରାଙ୍ଗ୍ତେୟାଃ ଅଡଙ୍ଗ୍କେଦାଏ। ଏନ୍ତେ ଅକ ଠାୟାଦ୍ରେ ଏନ୍ ଗୋଟ୍ରେନ୍ ଜାଁତୁକ ଦାଆଃ ନୁଁ ନାଗେନ୍ତେ ହିଜୁଃ ତାଇକେନାକ, ଏନ୍ତାଃରେ ଏନ୍ ହାର୍ତାଃ ଅଚାଃକାନ୍ କତକେ ଡୁଙ୍ଗାକେଦ୍ତେ ଦହକେଦା। ଚିମ୍ତା ପେଠି ମିଣ୍ଡି ମେରମ୍ ଦାଆଃ ନୁଁ ନାଗେନ୍ତେ ହିଜୁଃୟାନାକ ଇମ୍ତା ଗାଭିନ୍ୟାନାକ। ଓଡ଼ୋଃ ଏନ୍ କତ ହେପାଦ୍ରେ ଧାମେର୍ୟାନ୍ ହରାତେ ଗୋଟ୍ରେନ୍ ଜାଁତୁକ ଗାର୍କାନ୍, କାବ୍ରାଚିଚ୍ରା ଓଡ଼ୋଃ ଦାଗ୍ କାନ୍ ହନ୍ ଜାନାମ୍କେଦ୍କଆକ।
ଏନ୍ତେ ଯାକୁବ୍ ଏନ୍ ହନ୍କକେ ହିଗାଡ଼୍କେଦ୍କଆ। ଲାବାନ୍ରାଃ ଗାର୍କାନ୍ ଓଡ଼ୋଃ ହେନ୍ଦେ ରାଙ୍ଗ୍ରେନ୍ ସବେନ୍ ମିଣ୍ଡିକକେ ନେଲ୍କେଦ୍କଆ। ନେ'ଲେକା ଇନିଃ ଲାବନ୍ରାଃ ମିଣ୍ଡି ଗୋଟ୍ଲଃ ଆୟାଃ ମିଣ୍ଡି ଗୋଟ୍କକେ ବିନ୍ଗାଅ କେଦ୍କଆ।
ଓଡ଼ୋଃ ଗୋଟ୍ରେନ୍ କିରିକାନ୍ ପେଠି ମିଣ୍ଡି ମେରମ୍କ ଗାଭିନ୍ ହବାଅଃ ତାଇକେନାକ ଇମ୍ତା, ଯାକୁବ୍ ଏନ୍ କତକକେ ଦାଆଃ ଢୁଙ୍କୁରେ ଦହେ ତାଇକେନା, ଏନା ନେଲ୍କେଦ୍ତେ ଗୋଟ୍ରେନ୍ ପେଠି ମିଣ୍ଡି ମେରମ୍କ ଗାଭିନ୍ ହବାଅଃ ତାଇକେନାକ। ମେନ୍ଦ ଗୋଟ୍ରେନ୍ ନାରାଦୁରା ଜାଁତୁକଆଃ ସାମ୍ନାଙ୍ଗ୍ରେ ଏନ୍ କତକେ କାଏ ଦହକେଦା। ଏନାତେ ନାରାଦୁରା ଜାଁତୁକ ଲାବନ୍ରାଃ ଓଡ଼ୋଃ କିରିକାନ୍ ଜାଁତୁକ ଯାକୁବ୍ଆଃ ହବାୟାନାକ। ନେ'ଲେକାତେ ଯାକୁବ୍ଆଃ ଗୋଟ୍ରେ ପୁରାଃଗି ଜାଁତୁକ ହବାୟାନା। ଇନିୟାଃ ଦାସିକ, ଉଁଟ୍, ଗାଧା ପୁରାଃଗି ହବାୟାନାକ।
Source notes (8)
- Footnote ବିଚାର୍
- Footnote ମୁକା ଲାଡ଼ାଇ
- Footnote ଭାଗ୍ୟବାନ୍
- Footnote ରାସିକା
- Footnote ହାମ୍ବାଲ୍ରୋୱା ନାଗେନ୍ତେ ରାନୁ ଲେକା କାମି ଏମେତାନ୍ ଜଅ
- Footnote ଖ / ଗନଙ୍ଗ୍
- Footnote ଗ / ମାଇନ୍ ଚାଏ ତେଲା
- Footnote ଘ / ହାରା ଇଦିୟଃ
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.