Munda Bible
ଏନେଟେଦ୍ 11
ବାବିଲ୍ ଗାଡ଼୍
ସିଦାଦ, ଅତେରେନ୍ ହଡ଼କ ମିଆଁଦ୍ଗି ଓଡ଼ୋଃ ମିଆଁଦ୍ ଜାଗାର୍ତେକ ଜାଗାର୍ ତାଇକେନା। ଏନ୍ତେ ହଡ଼କ ସିଙ୍ଗିତୁର୍ସାଃରେ ହନର୍ବାଡ଼ା ତାନ୍ଲଃ ସିନିୟର୍ ଦିଶୁମ୍ରେୟାଃ ମିଆଦ୍ ବିର୍ ଠାୟାଦ୍ତାଃରେ ତାଇନ୍ୟାନାକ। ଏନ୍ତେ ଆକ ଆକରେ ଜାଗାର୍କେଦାକ, “ଏଲା, ଆବୁ ଇଟା ବାଇକେଦ୍ତେ ବୁଗିଲେକା ରାପାଃୟାବୁ।” ଏନ୍ତେ ଇନ୍କୁ ଦିରି ବାଦ୍ଲାରେ ଇଟା ଓଡ଼ୋଃ ଚୁନା ବାଦ୍ଲାରେ ଆଲ୍କାତ୍ରାକେ ଜଲମ୍କେଦାକ। ଏନ୍ତେ ଇନ୍କୁ କାଜିକେଦାକ, “ଦଲା ଆବୁ ଆବୁଆ ନାଗେନ୍ତେ ମିଆଦ୍ ନାଗାର୍ ଓଡ଼ୋଃ ସିର୍ମା ଟେକାଦଃ ମିଆଦ୍ ଗାଡ଼୍ବୁ1 ବାଇୟା। ଏନାରେ ଆବୁଆଃ ନୁତୁମ୍ ନୁତୁମଃଆ ଓଡ଼ୋଃ ଅତେରେ କାବୁ ନେତେହାନ୍ତେୟଃଆ।”
ଏନ୍ତେ ମାନୱା ହଡ଼ ଆକଆଃ ନାଗେନ୍ତେ ନାଗାର୍ ଓଡ଼ୋଃ ଗାଡ଼୍ ବାଇ ତାଇକେନାକ, ଏନା ନେନେଲ୍ ନାଗେନ୍ତେ ପ୍ରାଭୁ ଆଡ଼୍ଗୁୟାନାଏ। ଓଡ଼ୋଃ ପ୍ରାଭୁ କାଜିକେଦାଏ, “ନାହାଃଁଦ ନେ ସବେନ୍ ହଡ଼କ ମିଦ୍ଗିୟାକ ଓଡ଼ୋଃ ଇନ୍କୁଆଃ ମିଆଦ୍ଗି ଜାଗାର୍ ମେନା, ଇନ୍କୁ ନେ କାମି ରିକା ନାଗେନ୍ତେ ମିଦ୍କାନାକ ଓଡ଼ୋଃ ନେଆଁ ଆକଆଃ ଏନେଟେଦ୍ କାମିତାନାଃ, ଏନାତେ ଆକଆଃ ଇଛାସାନାଙ୍ଗ୍ ଲେକା ରିକା ଦାଡ଼ିୟାକ। ଏନାମେନ୍ତେ ଦଲାବୁ ଲାତାର୍ତେ ଆଡ଼୍ଗୁନାଃ, ଓଡ଼ୋଃ ଇନ୍କୁଆଃ ଥାଲାରେ ଆକଆଃ ଆପ୍ନାଃ ଜାଗାର୍ତାନ୍ ତେୟାଃକେ ବିନ୍ଗାଅ ରିକାୟାବୁ, ଜେ'ଲେକାଚି ଇନ୍କୁ ଆକଆଃ ଜାଗାର୍କେ ଆଲକାକ ଆୟୁମ୍ ଉରୁମେକା।” ନେ'ଲେକାତେ ପ୍ରାଭୁ ଇନ୍କୁକେ ଏନ୍ ଠାୟାଦ୍ଏତେ ଅତେରେୟାଃ ଚାରିଓସାଃରେ ଛିତିବିତି କେଦ୍କଆଏ, ଓଡ଼ୋଃ ଇନ୍କୁ ଏନ୍ ନାଗାର୍କେ ବାଇ କାକ ଦାଡ଼ିକେନା। ଏନାମେନ୍ତେ ଏନ୍ ନାଗାର୍ରେୟାଃ ନୁତୁମ୍ ବାବିଲ୍ ହବାୟାନା, ଚିୟାଃଚି ପ୍ରାଭୁ ଏନ୍ ଠାୟାଦ୍ରେ ସବେନ୍ ହଡ଼କଆଃ ମିଆଦ୍ ଜାଗାର୍କେ ବିନ୍ଗାଅକେଦା ଓଡ଼ୋଃ ଏନ୍ ଠାୟାଦ୍ଏତେ ଇନ୍କୁକେ ଅତେରେୟାଃ ସବେନ୍ସାଃରେ ଛିତିବିତି କେଦ୍କଆଏ।
ଶେମ୍ରାଃ କିଲିକ
ନେଆଁ ହବାଅଃତାନା ଶେମ୍ରାଃ କିଲି, ଟୁଡା ଦାଆଃରେୟାଃ ବାର୍ ବାରାଷ୍ ତାୟମ୍ତେ ଶେମ୍କେ ମିଦ୍ ଶାଅ ବାରାଷ୍ ହବାୟାନା, ଇମ୍ତା ଆୟାଃ ମିଆଦ୍ ହନ୍ ହବାୟାନାଏ, ଇନିୟାଃ ନୁତୁମ୍ ଅର୍ଫକ୍ଷଦ୍ ତାଇକେନା। ଅର୍ଫକ୍ଷଦ୍ ଜାନାମ୍ ତାୟମ୍ତେ ଶେମ୍ ଆଡଃଗି ୫୦୦ ବାରାଷ୍ ଜୀହିଦ୍ ତାଇନ୍କେଦ୍ତେ ଇନିୟାଃ ହନ୍ଗାଁଣାକ ହବାୟାନା।
ଅର୍ଫକ୍ଷଦ୍ରାଃ ହିସିଗେଲ୍ ମଣେଁୟା ବାରାଷ୍ ହବାୟାନା ଇମ୍ତା ଶେଲହକେ ଜାନାମ୍କିୟା। ଶେଲହରାଃ ଜାନାମ୍ ତାୟମ୍ତେ ଅର୍ଫକ୍ଷଦ୍ ୪୦୩ ବାରାଷ୍ ଜିହୀଦ୍ ତାଇନ୍କେଦ୍ତେ ଆଡଃଗି ହନ୍ଗାଁଣାକ ଜାନାମ୍ କେଦ୍କଆଏ।
ଶେଲହରାଃ ୩୦ ବାରାଷ୍ ହବାଅଃ ତାଇକେନ୍ ଇମ୍ତା ଏବର୍କେ ଜାନାମ୍କିୟା। ଏବର୍ଆଃ ଜାନାମ୍ ତାୟମ୍ତେ ଶେଲହ ୪୦୩ ବାରାଷ୍ ଜିହୀଦ୍ ତାଇନ୍କେଦ୍ତେ ଆଡଃଗି ଇନିୟାଃ ହନ୍ଗାଁଣାକ ଜାନାମ୍ୟାନା।
ଏବର୍, ହିସି ଗେଲ୍ ଉପୁନିୟା ବାରାଷ୍ରେ ପେଲଗ୍କେ ଜାନାମ୍କିୟା। ପେଲଗ୍ଆଃ ଜାନାମ୍ ତାୟମ୍ତେ ଏବର୍ ୪୩୦ ବାରାଷ୍ ଜିହୀଦ୍ ତାଇନ୍କେଦ୍ତେ ଆଡଃଗି ଇନିୟାଃ ହନ୍ଗାଁଣାକ ଜାନାମ୍ୟାନା।
ପେଲଗ୍ଆଃ ହିସିଗେଲ୍ ବାରାଷ୍ରେ ରିୟୁ ଜାନାମ୍ୟାନାଏ। ରିୟୁଆଃ ଜାନାମ୍ ତାୟମ୍ତେ ପେଲଗ୍ ୨୦୯ ବାରାଷ୍ ଜାକେଦ୍ ଜିହୀଦ୍ ତାଇନ୍ୟାନାଏ, ଏନ୍ତେ ଆଡଃଗି ହନ୍ଗାଁଣାକ ଜାନାମ୍ୟାନା।
ରିୟୁଆଃ ହିସି ଗେଲ୍ ବାର୍ ବାରାଷ୍ରେ ସରୁଗ୍ ଜାନାମ୍ୟାନାଏ। ସରୁଗ୍ଆଃ ଜାନାମ୍ ତାୟମ୍ତେ ରିୟୁ ୨୦୭ ବାରାଷ୍ ଜିହୀଦ୍ ତାଇନ୍କେଦ୍ତେ ଆଡଃଗି ଇନିୟାଃ ହନ୍ଗାଁଣାକ ଜାନାମ୍ୟାନା।
ସରୁଗ୍ଆଃ ହିସି ଗେଲ୍ ବାରାଷ୍ ପୁରାୟାନା, ଇମ୍ତା ନାହୁର୍ ଜାନାମ୍ୟାନାଏ। ନାହୁର୍ଆଃ ଜାନାମ୍ ତାୟମ୍ତେ ସରୁଗ୍ ୨୦୦ ବାରାଷ୍ ଜିହୀଦ୍ ତାଇନ୍ କେଦ୍ତେ ଆଡଃଗି ହନ୍ଗାଁଣାକ ଜାନାମ୍ୟାନା।
ନାହୁର୍ଆଃ ହିସି ଅରେୟା ବାରାଷ୍ ହବାୟାନା ଇମ୍ତା ତେରହ ଜାନାମ୍ୟାନାଏ। ତେରହଆଃ ଜାନାମ୍ ତାୟମ୍ତେ ନାହୁର୍ ୧୧୯ ବାରାଷ୍ ଜିହୀଦ୍ ତାଇନ୍କେଦ୍ତେ ଆଡଃଗି ହନ୍ଗାଁଣାକ ଜାନାମ୍ୟାନା।
ତେରହକେ ଆପିହିସି ଗେଲ୍ ବାରାଷ୍ ପୁରାୟାନ୍ ଇମ୍ତା, ଆବ୍ରାମ୍, ନାହୁର୍ ଓଡ଼ୋଃ ହାରୁନ୍ ଜାନାମ୍ୟାନାକ।
ତେରହଆଃ କିଲିକ
ତେରହଆଃ କିଲିକ। ତେରହଆଃ ହନ୍କ ହବାଅଃତାନା ଆବ୍ରାମ୍, ନାହୁର୍ ଓଡ଼ୋଃ ହାରୁନ୍। ହାରୁନ୍ ଲୁଟ୍କେ ଜାନାମ୍କିୟା। ହାରୁନ୍ କଲ୍ଦିୟକଆଃ ଉର୍ ନୁତମଃତାନ୍ ଠାୟାଦ୍ରେ ଆୟାଃ ପାରିବାର୍ ତାଇକେନା। ଏନା ଆୟାଃ ଜାନାମ୍ ଠାୟାଦ୍ ତାଇକେନା, ଏନ୍ତାଃରେ ହାରୁନ୍ ଗଏଃୟାନାଏ, ଇମ୍ତା ଆପୁତେ ତେରହ ଜୀନିଦ୍ ତାଇକେନାଏ। ଏନ୍ତେ ଆବ୍ରାମ୍ ଓଡ଼ୋଃ ନାହୁର୍ ବାରାନ୍ ହାଗିୟା ଆଣ୍ଦିୟାନାକିନ୍। ଆବ୍ରାମ୍ଆଃ କୁଡ଼ିଆଃ ନୁତୁମ୍ ସାରି ଓଡ଼ୋଃ ନାହୁର୍ଆଃ କୁଡ଼ିତେୟାଃ ନୁତୁମ୍ ମିଲ୍କା ତାଇକେନା। ମିଲ୍କା ଓଡ଼ୋଃ ଯିସ୍କା ହାରୁନ୍ଆଃ କୁଡ଼ିହନ୍କିନ୍ ତାଇକେନା। ସାରିଆଃ ଜେତା ହନ୍ କାକ ତାଇକେନା, ଚିୟାଃଚି ଇନିଃ ଟଣିଟ୍ ତାଇକେନାଏ।
ଏନ୍ତେ ତେରହ ଆୟାଃ ହନ୍ତେକଡ଼ା ଆବ୍ରାମ୍କେ, ଆୟାଃ ଜାଇହନ୍ ଲୁଟ୍, ଅକଏଚି ହାରୁନ୍ଆଃ ହନ୍ତେକଡ଼ା ତାନିଃ ଓଡ଼ୋଃ ତେରହରାଃ କିମିନ୍ତେ ସାରି ଅକଏଚି ଆବ୍ରାମ୍ଆଃ କୁଡ଼ି ତାଇକେନାଏ। ନେ ସବେନ୍କଲଃ ଇନିଃ କଲ୍ଦିୟକଆଃ ଉର୍ ନାଗାର୍ ଏତେ ଅଡ଼ଙ୍ଗ୍ୟାନାକ ଓଡ଼ୋଃ କିନାନ୍ ଦିଶୁମ୍ତେ ସେନଃୟାନାକ। ମେନ୍ଦ ଇନ୍କୁ ଏନ୍ତାଃ ସେଟେର୍ୟାନ୍ଚି ହାରାନ୍ ନାଗାର୍ରେ ତାଇନ୍ୟାନାକ। ତେରହ ୨୦୫ ବାରାଷ୍ ତାଇନ୍କେଦ୍ତେ ହାରାନ୍ ନାଗାର୍ରେ ଜୀଉ ଟୁଣ୍ଡୁକେଦାଏ।
Source notes (1)
- Footnote ଗୁମାଟ୍
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.