Munda Bible
ଏନେଟେଦ୍ 10
ନୁହୁଁରାଃ ହନ୍କଆଃ କିଲିକ
(୧ କିଲିକଆଃ ୧:୫-୨୩)
ନୁହୁଁରାଃ ଆପିୟା ହନ୍କଡ଼ା, ଶେମ୍, ହାମ୍ ଓଡ଼ୋଃ ଯାଫେତ୍ ଟୁଡା ଦାଆଃ ତାୟମ୍ତେ ଇନ୍କୁଆଃ ହନ୍କଆଃ କିଲିକଆଃ କାଜି।
ଗୋମର୍, ମାଗୋଗ୍, ମିଦିୟ, ଯାବନ୍, ତୁବଲ୍, ମେଶକ୍ ଓଡ଼ୋଃ ତିରସ୍ ନିକୁ ହବାଅଃତାନାକ ଯାଫେତ୍ରାଃ ହନ୍କ। ଅସ୍କିନସ୍, ରାଫତ୍, ଓଡ଼ୋଃ ତୁଗ୍ରମାଃ, ନିକୁ ହବାଅଃତାନାକ ଗୋମର୍ଆଃ ହନ୍କ। ଇଲିଶା, ତର୍ଶିଶ୍, କିତ୍ତିମ୍ ଓଡ଼ୋଃ ଦଦାନିମ୍, ନିକୁ ହବାଅଃତାନାକ ଯାବନ୍ଆଃ ହନ୍କ। ନେ ସବେନ୍ ହଡ଼କତାଃଏତେଗି ଏଟାଃ ଦିଶୁମ୍ରାଃ ଟାପୁରେ ତାଇନ୍ୟାନାକ, ଓଡ଼ୋଃ ଇନ୍କୁ ଆକଆଃ ଆପ୍ନାଃ ଠାୟାଦ୍ ଲେକାତେଗି ଆପାନ୍ ଆପାନ୍ ଝୁଣ୍ଡ୍ରେ ହାଟିଙ୍ଗ୍ୟାନାକ ଓଡ଼ୋଃ ପାସ୍ରାଅ କେଦ୍ତେ ଆକଆଃ ଆପାନ୍ ଜାଗାର୍ତେ ଜାଗାର୍କେଦାକ।
କୁଶ୍, ମିସାର୍, ପୁଟ୍ ଓଡ଼ୋଃ କିଣାନ୍, ନିକୁ ହବାଅଃତାନାକ ହାମ୍ରାଃ ହନ୍କ। ସେବା, ହବିଲା, ସାବ୍ତା, ରାମା, ଓଡ଼ୋଃ ସବ୍ତେକା ନିକୁ ହବାଅଃତାନାକ କୁଶ୍ରାଃ ହନ୍କ। ଶିବା ଓଡ଼ୋଃ ଦାଦାନ୍ ନେ ବାରାନ୍କିନ୍ ରଏମାରାଃ ହନ୍କିନ୍ ତାଇକେନା। କୁଶ୍ରାଃ ହନ୍ଆଃ ନୁତୁମ୍ ନିମ୍ରୋଦ୍ ତାଇକେନା, ଇନିଃ ଅତେରେନ୍ ପାହିଲା ସୁର୍ବିର୍ ହଡ଼ ହବାକାନ୍ ତାଇକେନାଏ। ଇନିଃ ପ୍ରାଭୁଆଃ ଆୟାର୍ରେ ମିଆଦ୍ ମାରାଙ୍ଗ୍ ପେଡ଼େୟାନ୍ ଜାଁତୁ ସାଙ୍ଗାର୍ନିଃ ହବାୟାନାଏ, ଏନାମେନ୍ତେ ହଡ଼କ ନାହାଃଁ ଜାକେଦ୍ ନେ ଜନ୍କା କାଜିୟାଃକ, “ପ୍ରାଭୁ ଆପେକେ ନିମ୍ରୋଦ୍ ଲେକା ମାରାଙ୍ଗ୍ ଜାଁତୁ ସାଙ୍ଗାର୍ନିଃ ଲେକାଏ ବାଇପେକା।” ସିନିୟର୍ ଦିଶୁମ୍ରାଃ ବାବିଲୋନ୍, ଏରକ୍, ଏକ୍କଦ୍ ଓଡ଼ୋଃ କଲନି ନେ ସବେନ୍ ନାଗାର୍କ ଇନିୟାଃ ପାହିଲା ରାଇଜ୍ ତାଇକେନା। ଇନିଃ ଏନ୍ ଦିଶୁମ୍ ବାଗିକେଦ୍ତେ ଆସେରିୟାତେ ସେନଃୟାନା ଓଡ଼ୋଃ ନୀନିବ୍, ରାହାବତ୍ ଇର୍ ଓଡ଼ୋଃ କେଲହ, ନାଗାର୍କକେ ବାଇକେଦା। ଏନ୍ତେ ରେସନ୍ ନାଗାର୍ ବାଇକେଦାଏ, ଏନା ମିଆଦ୍ ମାରାଙ୍ଗ୍ ନାଗାର୍ ତାଇକେନା, ଅକଆଃଚି ନୀନିବ୍ ଓଡ଼ୋଃ କେଲହ ନୁତୁମ୍ ନାଗାର୍ରାଃ ଥାଲାରେ ବାଇୟାକାଦ୍ ତାଇକେନା।
ମିସାର୍ରେନ୍ କିଲିକ ହବାଅଃତାନା : ଲୁଦୀୟ, ଅନାମୀୟ, ଲହାବୀୟ, ନପ୍ତୁହୀୟ, ପଥ୍ରୋଷୀୟା ଏନ୍ତେ ପାଲେଷ୍ଟାଇନ୍ ହଡ଼କଆଃ ପୁର୍ଖା ଆପୁ ହବାଅଃତାନାକିନ୍ କସ୍ଲୁହୀୟା ଓଡ଼ୋଃ କପ୍ତୋଲୀୟା।
କିଣାନ୍ରାଃ ମୁତ୍କୁଲ୍ ହନ୍ ହବାଅଃତାନାଏ ସିଦୋନ୍, ଇନିଃ ସିଦୋନ୍ରେନ୍ ହଡ଼କଆଃ ଆପୁ ତାଇକେନା ଓଡ଼ୋଃ କିଣାନ୍ରାଃ ଆଡଃମିଆଦ୍ ହନ୍କଡ଼ା ହେତ୍, ଇନିଃ ହିତ୍ତିୟ ହଡ଼କଆଃ ଆପୁ ତାଇକେନାଏ। ଯିବୁଷିୟ, ଇମୋରିୟ, ଗିର୍ଗାଶୀୟ ହିବ୍ବୀୟ, ଅର୍କୀୟ, ସିନୀୟ, ଅର୍ବଦୀୟ, ସମାରୀୟ, ହମାତୀୟ, ନେ'ଲେକାତେ କିନାନ୍ରେନ୍ ହଡ଼କଆଃ କିଲିକ ପସାଇଦିୟାନା। ଏନ୍ତେ ସିଦୋନ୍ଏତେ ଗେରାର୍ରାଃ ଗାଜା ଜାକେଦ୍ ଓଡ଼ୋଃ ସିଙ୍ଗି ହାସୁର୍ସାଃ ସଦୋମ୍, ଗମ୍ରା, ଆଦ୍ମା, ସବୋୟୀମ୍ ସାଃରେୟାଃ ଲେସା ଜାକେଦ୍ କିନାନ୍ରେନ୍ ହଡ଼କଆଃ ତାଇନଃ ଠାୟାଦ୍ରାଃ ସିମ୍ନା ତାଇକେନା। ନେ ସବେନ୍କ ଆକଆଃ ଆପ୍ନାଃ ଦିଶୁମ୍ ଓଡ଼ୋଃ ଝୁଣ୍ଡ୍ରେ ତାଇକେଦ୍ତେ ଆକଆଃ କିଲି ଓଡ଼ୋଃ ଜାଗାର୍ ଲେକାତେ ହାମ୍ରାଃ ହନ୍କ ତାନ୍କ।
ଶେମ୍ରାଃ ହଁଗି ହନ୍କ ଜାନାମ୍ୟାନା, ଶେମ୍ ଏବର୍ ହଡ଼କଆଃ ପୁର୍ଖାଆପୁ ତାଇକେନାଏ ଓଡ଼ୋଃ ଯାଫେତ୍ରାଃ ମାରାଙ୍ଗ୍ ହାଗାତେ ତାଇକେନାଏ। ଶେମ୍ରାଃ ହନ୍କଆଃ ନୁତୁମ୍ ହବାଅଃତାନା ଏଲମ୍, ଅଶୁର୍, ଅର୍ଫକ୍ଷଦ୍, ଲୁଦ୍, ଅରାମ୍। ଅରାମ୍ରାଃ ହନ୍କ ହବାଅଃତାନା ଉଷ୍, ହୁଲ୍, ଗେଥର୍ ଓଡ଼ୋଃ ମେଶକ୍। ଅର୍ଫକ୍ଷଦ୍ରାଃ ହନ୍ ଶେଲହ ଓଡ଼ୋଃ ଶେଲହରାଃ ହନ୍ ଏବର୍। ଏବର୍ଆଃ ବାରିୟା ହନ୍ ତାଇକେନାକିନ୍, ମିହୁଡ଼୍ରାଃ ନୁତୁମ୍ ପେଲଗ୍,1 ଚିୟାଃଚି ଇନିୟାଃ ଦିପିଲିରେ ଅତେଦିଶୁମ୍ରେନ୍ ହଡ଼କ ହାଟିଙ୍ଗ୍ୟାନାକ ଓଡ଼ୋଃ ଇନିୟାଃ ହାଗାତେୟାଃ ନୁତୁମ୍ ଯକ୍ତାନ୍ ତାଇକେନା। ଯକ୍ତାନ୍ରାଃ ହନ୍କ ହବାଅଃତାନା, ଅଲ୍ମୋଦଦ୍, ଶେଲପ୍, ହତ୍ସର୍ମାବତ୍, ଯେରହ, ହଦୋରାମ୍, ଇଷଲ୍, ଦିକ୍ଲ, ଓବଲ୍, ଅବିମାୟେଲ୍, ସେବା, ଯକ୍ତାନ୍ରାଃ ହନ୍କ ହବାଅଃତାନା, ଓଫିର୍, ହବିଲା, ଯୋବବ୍। ମେଷାତାଃଏତେ ସିଙ୍ଗି ତୁରଃସାଃରେୟାଃ ବୁରୁ ଦିଶୁମ୍ ସଫାର୍ ଜାକେଦ୍ ଇନ୍କୁଆଃ ତାଇନଃ ଠାୟାଦ୍ ତାଇକେନା। ନେ ସବେନ୍କ ଆକଆଃ ଆପ୍ନାଃ ଦିଶୁମ୍, ଝୁଣ୍ଡ୍ରେ ଆକଆଃ କିଲି ଓଡ଼ୋଃ ଜାଗାର୍ ଲେକାତେ ଶେମ୍ରାଃ ହନ୍କ ତାନ୍କ।
ନେ ସବେନ୍କ ନୁହୁଁରାଃ ହନ୍କଆଃ କିଲିକ ତାଇକେନା, ନେ ସବେନ୍ ହଡ଼କ ଆକଆଃ ଆପ୍ନାଃ କିଲି ଓଡ଼ୋଃ ଝୁଣ୍ଡ୍ ଲେକାତେ ନୁହୁଁରାଃ କିଲିକ ତାଇକେନା। ଟୁଡା ଦାଆଃ ତାୟମ୍ତେ ନେ ହଡ଼କତାଃଏତେଗି ଆପ୍ନାଃ କିଲି ଓଡ଼ୋଃ ଝୁଣ୍ଡ୍ ଲେକାତେ ଅତେରେ ନିତିର୍ୟାନାକ।
Source notes (1)
- Footnote ଏନାରା ମୁଣ୍ଡି ହାଟିଙ୍ଗ୍
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.