Munda Bible
ଏନେଟେଦ୍ 9
ନୁହୁଁଲଃ ପାର୍ମେଶ୍ୱାର୍ଆଃ ରାଜିନାମା
ଏନ୍ତେ ପାର୍ମେଶ୍ୱାର୍ ନୁହୁଁ ଓଡ଼ୋଃ ଆୟାଃ ହନ୍କକେ ଆଶିଷ୍କେଦ୍ତେ କାଜିକେଦ୍କଆ, “ଆପେୟାଃ ହନ୍କ ପୁରାଃଗି ହବାଅଃକାକ ଓଡ଼ୋଃ ହାରା ପସାକେଦ୍ତେ ଅତେରେ ପେରେୟଃପେ। ଅତେରେନ୍ ସବେନ୍ ଜାଁତୁ, ଅତେରେନ୍ ରେଙ୍ଗାଅଃତାନ୍ ସବେନ୍ ଜାଁତୁ, ଚେଣେଁ, ଦରେୟାରେ ତାଇନ୍ତାନ୍ ହାକୁ, ନେ ସବେନ୍ ଆପେକେ ବରପେକାକ ଓଡ଼ୋଃ ଇନ୍କୁ ଆପେୟାଃ ଆକ୍ତେୟାର୍ରେ ତାଇନ୍କାକ। ହାରିୟାର୍ ଆଡ଼ାଃ ସାକାମ୍ ଜମ୍ ନାଗେନ୍ତେ ଏମାକାପେତାଇନାଇଙ୍ଗ୍ ଏନ୍ଲେକାଗି ରେଙ୍ଗାଅଃତାନ୍ ସବେନ୍ ଜାଁତୁକକେ ଜମ୍ ନାଗେନ୍ତେ ଏମାପେତାନାଇଙ୍ଗ୍। ମେନ୍ଦ ଆପେ ମାସ୍ ଜମେ ଇମ୍ତା ଏନାରେ ମାୟୋମ୍ ମେସାକେଦ୍ତେ ଆଲପେ ଜମାଃ ଚିୟାଃଚି ମାୟୋମ୍ରେ ଜୀଉ ମେନାଃ। ଜେତା ହଡ଼ ମିହୁଡ଼୍ରାଃ ଜୀଉ ଇଦି ରେଦ, ଇନିଃ ସାଜାଇ ନାମେୟାଏ। ଏନା ଜାଁତୁ ସାଃଏତେ ଚାଏ ହଡ଼ ସାଃଏତେ ହବାଃଅ, ଇନିଃକେ ସାଜାଇ ନାମଃଗିଆଃ। ଜେତାଏ ମାନୱାରାଃ ଜୀଉ ଇଦି ରେଦ, ଇନିୟାଃ ମାନୱା ହରାତେଗି ଜୀଉ ଇଦିୟଃଆ, ଚିୟାଃଚି ପାର୍ମେଶ୍ୱାର୍ ଆୟାଃ ଆପ୍ନାଃ ମୁରୁତ୍ ଲେକାତେ ମାନୱାକେ ବାଇୟାକାଇଜାଏ।
“ଆପେୟାଃ ହନ୍କ ପୁରାଃଗି ହବାଅଃକାକ ଓଡ଼ୋଃ ହାରାପସାକେଦ୍ତେ ଅତେରେ ପେରେୟଃପେ।”
ଏନ୍ତେ ପାର୍ମେଶ୍ୱାର୍ ନୁହୁଁ ଓଡ଼ୋଃ ନୁହୁଁରାଃ ହନ୍କକେ କାଜିକେଦ୍କଆଏ, “ଆଇଙ୍ଗ୍ ଆମାଃଲଃ ଓଡ଼ୋଃ ଆମାଃ କିଲି କଲଃ ମିଆଁଦ୍ ରାଜିନାମା ବାଇୟାଇଙ୍ଗ୍, ଆଡଃଗି ଆମାଃଲଃ ଦାଆଃ ଜାହାଜ୍ଏତେ ଅଡଙ୍ଗ୍ୟାନ୍ ସବେନ୍ ଜାଁତୁକଲଃ, ଆସୁଲ୍ ଜାଁତୁ, ବିର୍ରେନ୍ ଜାଁତୁ, ଚେଣେଁ, ଅତେରେନ୍ ସବେନ୍ ଜାଁତୁକଲଃ ରାଜିନାମା ବାଇୟାଇଙ୍ଗ୍। ଆଇଙ୍ଗ୍ ଆମାଃଲଃ ନେ ରାଜିନାମା ବାଇୟାଇଙ୍ଗ୍, ଆଇଙ୍ଗ୍ ସବେନ୍ ଜୀଉ ଜାଁତୁକକେ ଟୁଡା ଦାଆଃରେ କାଇଙ୍ଗ୍ ଜିଅନ୍କଆ ଓଡ଼ୋଃ ଚିଉଲାହ ଟୁଡା ଦାଆଃତେ ଅତେକେ କାଇଙ୍ଗ୍ ଜିଅନ୍ ରିକାୟା।”
ଆଡଃଗି ପାର୍ମେଶ୍ୱାର୍ କାଜିକେଦାଏ, “ଆଇଙ୍ଗ୍, ଆପେୟାଃଲଃ ଓଡ଼ୋଃ ଆପେୟାଃଲଃ ତାଇନ୍ତାନ୍ ସବେନ୍ ଜୀଉ ଜାଁତୁକଲଃ ପିଢ଼ି ପିଢ଼ି ନାଗେନ୍ତେ ଜାନାଅ ଜାନାଅ ଜାକେଦ୍ ନେ ରାଜିନାମା ବାଇୟାକାଦାଇଙ୍ଗ୍, ଏନାରେୟାଃ ଚିହ୍ନାଁ ନେୟାଁ ତାନାଃ, ଆଇଙ୍ଗ୍ ରିମିଲ୍ରେ ଆଇଁୟାଃ ଏୟା ରାଙ୍ଗ୍ରାଃ ଧାନୁକେଇଙ୍ଗ୍ ଉଦୁବେୟା,ଏନା ଅତେଲଃ ଆଇଁୟାଃ ରାଜିନାମାରେୟାଃ ଚିହ୍ନା ହବାଅଆଃ। ଚିମ୍ତା ଅତେ ଚେତାନ୍ରେ ରିମିଲ୍ ଚାରିଓସାଃ ହାରୁବଃଆ ଇମ୍ତା ନେ ଏୟା ରାଙ୍ଗ୍ରେୟାଃ ଧାନୁ ନେଲଃଆ ଏନ୍ତେ ଆଇଙ୍ଗ୍ ଆମାଃଲଃ ଓଡ଼ୋଃ ସବେନ୍ ଜୀଉ ଜାଁତୁକଲଃ ଆଇଁୟାଃ ଅକ ରାଜିନାମା ବାଇୟାକାନା, ଏନାକେଇଙ୍ଗ୍ ପାହାମେୟା, ଓଡ଼ୋଃ ଚିଉଲାହ ଟୁଡା ଦାଆଃ କା ହବାଅଃଆ। ରିମିଲ୍ରେ ଚିମ୍ତା ନେ ଏୟା ରାଙ୍ଗ୍ରେୟାଃ ଧାନୁ ନେଲଃଆ, ଇମ୍ତା ଆଇଙ୍ଗ୍ ଏନାକେ ନେଲ୍କେଦ୍ତେ ଆମାଃଲଃ ଓଡ଼ୋଃ ଅତେରେ ଜୀନିଦ୍ ତାଇନ୍ତାନ୍ ସବେନ୍ ଜୀଉ ଜାଁତୁକଲଃ ପାର୍ମେଶ୍ୱାର୍ ଅକ ଜାନାଅ ଜାନାଅରେୟାଃ ରାଜିନାମା ରିକା କାଦାଇଙ୍ଗ୍, ଏନାକେ ପାହାମେୟାଇଙ୍ଗ୍।”
ପାର୍ମେଶ୍ୱାର୍ ନୁହୁଁକେ କାଜିକିୟା, “ଆଇଙ୍ଗ୍ ଅତେରେ ଜୀହିଦ୍ ତାଇନ୍ତାନ୍ ସବେନ୍କଲଃ ଅକ ରାଜିନାମା ରିକାକାଦାଇଙ୍ଗ୍ ଏନାରାଃ ଚିହ୍ନାଁ ନେଆଁ ତାନାଃ।”
ନୁହୁଁ ଓଡ଼ୋଃ ଆୟାଃ ହନ୍କ
ନୁହୁଁରାଃ ଅକ ହନ୍କ ଦାଆଃ ଜାହାଜ୍ଏତେ ଅଡଙ୍ଗ୍ୟାନାକ, ଇନ୍କୁଆଃ ନୁତୁମ୍ ଶେମ୍, ହାମ୍ ଓଡ଼ୋଃ ଯାଫେତ୍। ହାମ୍ କିଣାନ୍ରାଃ ଆପୁ ହବାୟାନାଏ। ନୁହୁଁରାଃ ନେ ଆପିୟା ହନ୍କଆଃ କିଲିକ ଅତେରେ ପୁରାଃଗି ପସା ଇଦିୟାନାକ।
ଏନ୍ତେ ନୁହୁଁ ଲୟଙ୍ଗ୍ କାମି ରିକାକେଦାଏ, ଓଡ଼ୋଃ ଦାଖ୍ବାକ୍ଡ଼ି କାମି ରିକାନିଃ ପାହିଲା ହଡ଼ ତାଇକେନାଏ। ଏନ୍ତେ ଇନିଃ ଦାଖ୍ରାସି ନୁଁ'କେଦାଏ ଓଡ଼ୋଃ ବୁଲ୍କେଦ୍ତେ ସାମା ହଡ଼୍ମଗି ଗିତିଜ୍ୟାନା। ଇମ୍ତା କିଣାନ୍ରାଃ ଆପୁତେ ହାମ୍, ଆୟାଃ ଆପୁତେକେ ସାମା ହଡ଼୍ମଗି ଗିତିଜାକାନ୍ ନେଲ୍କେଦ୍ତେ ବାହାରି ଅଡଙ୍ଗ୍ୟାନାଏ ଓଡ଼ୋଃ ଆୟାଃ ବାରାନ୍ ହାଗିୟାକିନ୍କେ ଉଦୁବାଦ୍କିନା। ଇମ୍ତା ଶେମ୍ ଓଡ଼ୋଃ ଯାଫେତ୍ ତାରାନ୍ରେ ଲିଜାଃ ସାବ୍ ଆଉକେଦ୍ତେ, ଆପୁତେସାଃ ଦୟାକୁଣ୍ଡାମ୍କେଦ୍ଲଃ ଇନ୍କିନ୍ ଆପୁତେକେ ଉୟୁକିୟାକିନ୍ ଓଡ଼ୋଃ ଇନ୍କିନ୍ ଆପୁତେୟାଃ ସାମାହଡ଼୍ମ କାକିନ୍ ନେଲ୍କେଦା। ଏନ୍ତେ ନୁହୁଁ ଚିମ୍ତା ଦାଖ୍ରାସି ନୁଁ ବୁଲ୍ ଏତେ ଚେତାୟାନାଏ, ଇମ୍ତା ଆୟାଃ ହୁଡିଙ୍ଗ୍ ହନ୍ତେକଡ଼ାରାଃ ଚାଲାନ୍କେ ଆଟ୍କାର୍ କେଦାଏ। ନୁହୁଁ କାଜିକେଦାଏ,
“କିଣାନ୍ ସାର୍ପାଅଃକାଏ,
ଇନିଃ ଆୟାଃ ହାଗାକିନାଃ ଦାସିରାଃ ଦାସି ହବାଅଃକାଏ।”
“ଆଡଃଗି କାଜିକେଦାଏ, ଶେମ୍ରାଃ ପ୍ରାଭୁ ପାର୍ମେଶ୍ୱାର୍ ଧାଇନ୍ ହବାଅଃକାଏ,
କିଣାନ୍, ଶେମ୍ରାଃ ଦାସି ହବାଅଃକାଏ।
ପାର୍ମେଶ୍ୱାର୍ ଯାଫେତ୍କେ ହାରା ଇଦିକାଏ,
ଓଡ଼ୋଃ ଇନିଃ ଶେମ୍ରାଃ କୁମ୍ବାରେ ତାଇନ୍କା,
ଏନ୍ତେ କିଣାନ୍ ଯାଫେତ୍ଆଃ ଦାସି ହବାଅଃକାଏ।”
ଟୁଡା ଦାଆଃ ତାୟମ୍ତେ ନୁହୁଁ ଆଡଃଗି ୩୫୦ ବାରାଷ୍ ବାଞ୍ଚାଅୟାନାଏ। ନେ'ଲେକାତେ ନୁହୁଁ ୯୫୦ ବାରାଷ୍ ବାଞ୍ଚାଅୟାନାଏ, ଏନ୍ତେ ଇନିୟାଃ ଜୀଉ ଟୁଣ୍ଡୁୟାନା।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.