Munda Bible
ଏନେଟେଦ୍ 12
ଆବ୍ରାମ୍କେ ପାର୍ମେଶ୍ୱାର୍ଆଃ କେନେଡ଼ା
ଏନ୍ତେ ପ୍ରାଭୁ ଆବ୍ରାମ୍କେ କାଜିକିୟା, “ଆମ୍ ଆମାଃ ଦିଶୁମ୍, କୁଟୁମ୍ ଓଡ଼ୋଃ ଆମାଃ ଆପୁଆଃ ଅଡ଼ାଃକେ ବାଗିକେଦ୍ତେ ଆଇଙ୍ଗ୍ ଉଦୁବାମେ ଦିଶୁମ୍ତେ ସେନଃମେ। ଆଇଙ୍ଗ୍ ଆମାଃଏତେ ପୁରାଃମାରାଙ୍ଗ୍ କିଲିକଆଃ ଝୁଣ୍ଡ୍ ବାଇୟାଇଙ୍ଗ୍, ଆମ୍କେ ଆଶିଷ୍କେଦ୍ତେ ଆମାଃ ନୁତୁମ୍କେ ପୁରାଃ ମାରାଙ୍ଗ୍ ବାଇୟାଇଙ୍ଗ୍, ଆମାଃ ହରାତେ ଏଟାଃ ହଡ଼କ ଆଶିଷ୍କ ନାମେୟା।
“ଆମ୍କେ ଆଶିଷ୍ମେତାନ୍ ହଡ଼କକେ ଆଇଙ୍ଗ୍ ଆଶିଷ୍ ଏମାକଆଇଙ୍ଗ୍,
ସାର୍ପାଅମେତାନ୍ ହଡ଼କକେଇଙ୍ଗ୍ ସାର୍ପାଅକଆ।
ଓଡ଼ୋଃ ଆମାଃତାଃଏତେ ଅତେରେନ୍ ସବେନ୍ କିଲିକ ଆଶିଷ୍କ ନାମେୟା।”
ଏନ୍ତେ ଆବ୍ରାମ୍ ପ୍ରାଭୁଆଃ କାଜି ଲେକା ସେନଃୟାନାଏ ଓଡ଼ୋଃ ଇନିଃଲଃ ଲୁଟ୍ ହଁଗି ଅଡଙ୍ଗ୍ୟାନାଏ। ହାରାନ୍ ନୁତୁମ୍ ସାହାର୍ଏତେ ସେନଃ ଇମ୍ତା ଆବ୍ରାମ୍କେ ଆପି ହିସି ଗେଲ୍ ମଣେୟାଁ ବାରାଷ୍ ହବାଅଃ ତାଇକେନା। ନେ'ଲେକାତେ ଆବ୍ରାମ୍ ଆୟାଃ କୁଡ଼ିତେ ସାରିକେ, ହାଗାତେୟାଃ ହନ୍ ଲୁଟ୍କେ, ଓଡ଼ୋଃ ହାରାନ୍ରେ ଆୟାଃ ହୁଣ୍ଡିୟାକାଦ୍ ଖୁର୍ଜିକ, ଦାସିକକେ ସାବ୍କେଦ୍ତେ ଅଡଙ୍ଗ୍ୟାନା ଓଡ଼ୋଃ କିନାନ୍ ଦିଶୁମ୍ତେ ସେଟେର୍ୟାନା।
ଆବ୍ରାମ୍ କିନାନ୍ ଦିଶୁମ୍ ହରାତେ ହନର୍ତାନ୍ଲଃ ଶିଖିମ୍ ହେପାଦ୍ରେୟାଃ ମୋରିରାଃ ମାରାଙ୍ଗ୍ ଦାରୁବୁଟାତାଃ ସେଟେର୍ୟାନା। ଏନ୍ ଦିପିଲିରେ କିନାନ୍ରେନ୍ ହଡ଼କ ଏନ୍ ଦିଶୁମ୍ରେକ ତାଇନ୍ ତାଇକେନା। ଏନ୍ତେ ପ୍ରାଭୁ ଆବ୍ରାମ୍କେ ଦାର୍ଶାନ୍ ଏମ୍କେଦ୍ତେ କାଜିକିୟା, “ଆଇଙ୍ଗ୍ ଆମାଃ କିଲିକ ନାଗେନ୍ତେ ନେ ଦିଶୁମ୍ ଏମାକଆଇଙ୍ଗ୍।” ଅକ ପ୍ରାଭୁ ଆବ୍ରାମ୍କେ ଦାର୍ଶାନ୍ ଏମାକାଇ ତାଇକେନାଏ, ଇନିୟାଃ ନୁତୁମ୍ତେ ଆବ୍ରାମ୍ ମିଆଦ୍ ବେଦି ବାଇକେଦା। ଏନ୍ ତାୟମ୍ତେ ଆବ୍ରାମ୍ ଏନ୍ ଠାୟାଦ୍ ବାଗିକେଦ୍ତେ ବେଥେଲ୍ ନୁତୁମ୍ ପୁରାବ୍ ସାଃରେୟାଃ ବୁରୁ ଦିଶୁମ୍ତେ ସେନଃୟାନା ଓଡ଼ୋଃ ଏନ୍ତାଃରେ ଆୟାଃ କୁମ୍ବା ବାଇକେଦା। ଏନାରେୟାଃ ପାଶ୍ଚିମ୍ସାଃରେ ବେଥେଲ୍ ଓଡ଼ୋଃ ପୁରାବ୍ସାଃରେ ଅୟ ନାଗାର୍ ତାଇକେନା, ଓଡ଼ୋଃ ଏନ୍ତାଃରେ ମିଆଦ୍ ବେଦି ବାଇକେଦ୍ତେ ପ୍ରାଭୁଆଃ ନୁତୁମ୍ରେ ବିନ୍ତିକେଦା। ଏନ୍ତେ ଆବ୍ରାମ୍ ହନର୍ବାଡ଼ା ତାନ୍ଲଃ ଦାକ୍ଷିଣ୍ସାଃତେ ସେନଃୟାନା।
ମିସାର୍ରେ ଆବ୍ରାମ୍
ମେନ୍ଦ କିନାନ୍ ଦିଶୁମ୍ରେ ପୁରାଃଗି ରିଙ୍ଗା ହବାୟାନା, ଏନାମେନ୍ତେ ଆବ୍ରାମ୍ ମିସାର୍ ଦିଶୁମ୍ତେ ସେନଃୟାନା ଓଡ଼ୋଃ ଏନ୍ତାଃରେ ତାଇନ୍ୟାନା। ଏନ୍ତେ ଆବ୍ରାମ୍ ମିସାର୍ ପାର୍ଗାନ୍ତେ ସେଟେର୍ତାନ୍ ଇମ୍ତା, ଇନିଃ ଆୟାଃ କୁଡ଼ି ସାରିକେ କାଜିକିୟା, “ଆୟୁମେମେ, ଆଇଙ୍ଗ୍ ସାରିତାନାଇଙ୍ଗ୍, ଆମ୍ ନେପେଲ୍ରେ ପୁରାଃ ବୁଗିନ୍ ନେଲଃତାନ୍ କୁଡ଼ି ତାନ୍ମେ। ଏନାମେନ୍ତେ ମିସାର୍ରେନ୍ ହଡ଼କ ଆମ୍କେ ନେଲ୍ମାଃକ ଇମ୍ତା ଆଇଙ୍ଗ୍କେ ଇନିୟାଃ କଡ଼ା ତାନିଃ ମେନ୍ତେକ କାଜିୟା ଓଡ଼ୋଃ ଆଇଙ୍ଗ୍କେ ଗଜିୟାଁକ ମେନ୍ଦ ଆମ୍କେ ଜୀହିଦ୍ଗି ଦହମାଃକ। ଏନାମେନ୍ତେ ଆମ୍ ଦାୟାକେଦ୍ତେ କାଜିମେ, ‘ଆଇଙ୍ଗ୍ ଇନିୟାଃ ମିଶି ତାନିଙ୍ଗ୍,’ ଏନାରେ ଆମାଃ ହରାତେ ଆଇଁୟାଃ ବୁଗିନାଃ ହବାଅଃଆ ଓଡ଼ୋଃ ଜୀଉ ବାଞ୍ଚାଅଃଆ।” ଆବ୍ରାମ୍ ମିସାର୍ତେ ସେଟେର୍ୟାନ୍ ତାୟମ୍ତେ ମିସାର୍ରେନ୍ ହଡ଼କ ଇନିୟାଃ କୁଡ଼ିକେ ନେଲ୍କେଦ୍ତେ, ନେପେଲ୍ରେ ପୁରାଃ ବୁଗିନ୍ ନେଲ୍କିୟାକ। ଫାରୋ ରାଜାରାଃ ହାକିମ୍ ଏନ୍ କୁଡ଼ିକେ ନେଲ୍କେଦ୍ତେ ନେପେଲ୍ରେ ପୁରାଃ ବୁଗିନ୍ ନେଲ୍କିୟାକ ଓଡ଼ୋଃ ଏନ୍ କୁଡ଼ିକେ ଫାରୋ ରାଜାରାଃ ଅଡ଼ାଃତେ ଆଉକିୟାକ। ଏନ୍ କୁଡ଼ି ହରାତେ ଫାରୋ ଆବ୍ରାମ୍କେ ମାଇନ୍କେଦ୍ତେ ଗୋଟ୍ରେନ୍ ମିଣ୍ଡି, ଉରିଃକ୍, ମେରମ୍, ଗାଧା, ଦାସି, କାମ୍ଡ଼ି ଓଡ଼ୋଃ ଉଁଟ୍କକେ ଏମ୍କିୟା।
ମେନ୍ଦ ଆବ୍ରାମ୍ଆଃ କୁଡ଼ି ସାରିରାଃ ହରାତେ ପ୍ରାଭୁ ଫାରୋରାଃ ଅଡ଼ାଃରେନ୍କକେ ମାପ୍ରାଙ୍ଗ୍ ଦୁକୁତେ ଦୁକୁକେଦ୍କଆ। ଏନାତେ ଫାରୋ ଆବ୍ରାମ୍କେ କେଡ଼ାକେଦ୍ତେ କାଜିକିୟା, “ଆମ୍ ଚିନାଃ ମେନ୍ତେ ଆଇଙ୍ଗ୍କେ ନେ'ଲେକାମ୍ ରିକାକେଦିୟାଁ ? ଇନିଃ ଆମାଃ କୁଡ଼ି ତାନିଃ ମେନ୍ତେ ଚିନାଃ ନାଙ୍ଗ୍ କାମ୍ ଉଦୁବ୍କେଦା ? ଇନିଃ ଆଇଁୟାଃ ମିଶିଙ୍ଗ୍ ତାନିଃ ମେନ୍ତେ ଚିନାଃ ନାଙ୍ଗ୍ କାଜିକେଦାମ୍ ? ଏନାମେନ୍ତେ ଆଇଙ୍ଗ୍ ଇନିଃକେ ଆଇଁୟାଃ କୁଡ଼ି ବାଇ ନାଙ୍ଗ୍ ଇଦିକାଇ ତାଇକେନାଇଙ୍ଗ୍, ମେନ୍ଦ ନାହାଃଁ ଆମ୍ ଆମାଃ କୁଡ଼ିକେ ଇଦିକେଦ୍ତେ ନେତାଃଏତେ ସେନଃମେ।” ଏନ୍ତେ ଫାରୋ ରାଜା ଆୟାଃ ହଡ଼କକେ ଆଚୁକେଦ୍କଆ, ଓଡ଼ୋଃ ଇନ୍କୁ ଆବ୍ରାମ୍ଆଃ ସବେନାଃଲଃ କୁଡ଼ିତେକେ ହଗି ବିଦାକିୟାକ।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.