व्यवस्थाविवरन 16

फसह को त्यौहार

1“आबीब महीना ख याद कर क् अपनो परमेश्वर यहोवा को लायी फसह को त्यौहार मनाजो, कहालीकि आबीब महीना म तोरो परमेश्वर न रात ख तोख मिस्र सी निकाल्यो होतो। 2येकोलायी जो जागा परमेश्वर अपनो निवास ठहरायेंन, उतच परमेश्वर लायी अपनो जनावर शेरी-मेंढी यां गाय-बईल फसह को त्यौहार मनाय क बलि करजो। 3ओको साथ कोयी खमीर मिल्यो चीज मत खाजो; सात दिन तक अखमीरी रोटी जो दु:ख की रोटी आय खाजो; कहालीकि तय मिस्र देश सी हड़बड़ी म निकल्यो होतो; येकोलायी तोख मिस्र देश सी निकलन को दिन जीवन भर याद रहेंन। 4सात दिन तक तोरो पूरो देश म तोरो जवर कहीं खमीर देखन म भी नहीं आये; अऊर जो जनावर तय पहले दिन कि शाम ख बलि करजो ओको मांस म सी कुछ सुबेरे तक नहीं छोड़जो। 5फसह ख अपनो कोयी फाटक को अन्दर, जेख तोरो परमेश्वर यहोवा तोख दे ओख बलि मत करजो। 6जो जागा तोरो परमेश्वर यहोवा अपनो नाम को निवास करन लायी चुन ले केवल वहांच, साल को उच समय जेको म तय मिस्र सी निकाल्यो होतो, मतलब सूरज डूबन पर शाम ख, फसह को बलि करो। 7तब ओको मांस उच जागा म जेक तोरो परमेश्वर चुन लेन भूज क खाजो; फिर सुबेरे उठ क अपनो डेरा ख लौट जाजो। 8छे दिन तक बिना खमीर की रोटी खाजो; अऊर सातवों दिन तोरो परमेश्वर लायी महासभा रखजो ऊ दिन कोयी काम धन्दा मत करजो।”

हप्तावों को त्यौहार

(निर्गमन ३४:२२; लैव्यव्यवस्था २३:१५-२१)

9“फिर जब तय फसल काटजो, तब सी सात हप्ता तक गिनजो। 10तब अपनो परमेश्वर को आशीर्वाद को अनुसार ओको लायी इच्छाबलि चढ़ाजो अऊर अपनो प्रभु परमेश्वर लायी हप्ता नाम को त्यौहार मानजो। 11अऊर ऊ जागा म जो तोरो परमेश्वर यहोवा अपनो नाम को निवास बना ले, तब अपनो बेटा-बेटियों, दास-दासियों संग तय अऊर तोरो फाटक को अन्दर जो लेवीय हय, अऊर जो जो परदेशी, अऊर अनाथ, अऊर विधवायें तोरो बीच म हय, हि सब तोरो परमेश्वर को आगु खुशी मनाये। 12अऊर याद रखजो कि तय भी मिस्र देश म दास होतो, येकोलायी इन विधियों को पालन करन म सावधानी करजो।”

झोपड़ियों को त्यौहार

(लैव्यव्यवस्था २३:३३-४३)

13“तय जब खरियान अऊर अंगूरीरस को कुण्ड म सी सब जमा कर ले, तब सात दिन तक झोपड़ियों को पर्व मनाजो। 14अऊर अपनो यो त्यौहार म अपनो बेटा-बेटियों, दास-दासियों को संग तय अऊर लेवीय, अऊर परदेशी, अऊर अनाथ, अऊर विधवायें तोरो फाटक को अन्दर हो हि भी खुशी मनाये। 15जो जागा परमेश्वर चुन लेन ओको म तय अपनो परमेश्वर लायी सात दिन तक त्यौहार मनाजो, कहालीकि तोरो परमेश्वर यहोवा तोरी बढ़ती म अऊर तोरो सब काम म तोख आशीर्वाद देयेंन; अऊर तय खुशी मनाजो। 16साल म तीन बार, अखमीरी रोटी को त्यौहार, अऊर हप्ता को त्यौहार, अऊर झोपड़ियों को त्यौहार, इन तीनों त्यौहार म तुम्हरो सब आदमी अपनो परमेश्वर यहोवा को आगु ऊ जागा म जो ऊ चुन लेन, उत, कोयी खाली हाथ परमेश्वर को आगु नहीं जाये। 17सब आदमी अपनी पूंजी, अऊर ऊ आशीर्वाद को अनुसार जो तोरो परमेश्वर यहोवा न तोख दी हय, भेंट देजो।”

न्यायियों ख चुननो

18“तय अपनो एक एक कुल म सी, अपनो सब फाटकों को अन्दर जिन्ख तोरो परमेश्वर यहोवा तोख देवय हय न्यायी अऊर अधिकारी चुन लेजो, अऊर लोगों को न्याय सच्चायी सी करे। 19तुम न्याय मत बिगाड़जो, नहीं पक्षपात करजो, अऊर नहीं घूस लेजो, कहालीकि घूस बुद्धिमान की आंखी अन्धी कर देवय हय, अऊर न्यायियों की बात पलट देवय हय। 20तय न्याय, केवल न्याय को अनुसरन करजो, जेकोसी तय ऊ देश म, जो तोरो परमेश्वर यहोवा तोख देवय हय, जीन्दो रहे, अऊर ओको पर अधिकार करे।”

21“तय अपनो परमेश्वर की वेदी बनाजो ओको जवर कोयी भी लकड़ी की अशेरा की मूर्ती की स्थापना मत करजो। 22अऊर नहीं कोयी गोटा को खम्बा बनाजो, कहालीकि ओकोसी तोरो परमेश्वर यहोवा घृना करय हय।”