व्यवस्थाविवरन 17

1“तय अपनो परमेश्वर यहोवा लायी कोयी बईल यां शेरी-मेंढी ख बली मत करजो जेको म कलंक यां दोष होना; कहालीकि असो करनो तोरो परमेश्वर यहोवा की नजर म गलत हय।”

2“जो शहर तोरो परमेश्वर यहोवा तोख देवय हय, यदि तोख सुनन म आये कि ओको म कोयी आदमी यां बाई जो तोरो परमेश्वर की आज्ञा तोड़ क असो काम करयो हय, जो ओकी नजर म बुरो हय, 3मतलब मोरी आज्ञा ख तोड़ क दूसरो देवतावों की, सूरज, चन्दा, यां आसमान को तारों म सी कोयी की आराधना करी होना, यां ओख दण्डवत् करयो होना, 4अऊर यो बात तोरो सुननो म आये; तब अच्छो सी पूछताछ करजो, अऊर यदि यो बात सही हय कि इस्राएल म असो बुरो काम करयो गयो हय, 5त जो आदमी यां बाई न असो बुरो काम करयो हय, ऊ आदमी यां बाई ख बाहेर अपनो फाटक पर ले जाय क असो गोटा मारजो कि हि मर जाये। 6जो मृत्‍यु-दण्‍ड को लायक ठहरेंन ओख दोय यां तीन आदमियों की गवाही को आधार पर मृत्‍यु-दण्‍ड दियो जायेंन। एकच गवाही को आधार पर कोयी ख मृत्‍यु-दण्‍ड नहीं दियो जायेंन। 7ओको मार डालन लायी सब सी पहले गवाही देन वालों को हाथ ओको पर उठेंन, अऊर ओको बाद दूसरो सब लोगों को हाथ उठेंन। या रीति सी असी बुरायी ख अपनो बीच सी दूर करजो।”

8“यदि कोयी झगड़ा की बात हय, जसो आपसी खून, विवाद, यां मारपीट को कोयी मुकद्दमा उठय, अऊर ओको न्याय करनो तोरो लायी कठिन जान पड़य, त ऊ जागा म जाजो जो तोरो परमेश्वर यहोवा चुन लेयेंन; 9लेवी याजकों को जवर अऊर उन दिनों को न्यायियों को जवर जाय क पूछताछ करजो, कि हि तुम ख न्याय कि बात बतायेंन। 10परमेश्वर को निवास जागा सी, हि अपनो निर्नय तुम्ख बतायेंन। उन्की बातों ख सुन क वसोच करजो। अऊर जो व्यवस्था ऊ तोख देंन ओकोच अनुसार चलन म सावधानी करजो। 11व्यवस्था की जो बात ऊ तोख बतायेंन, अऊर न्याय की बात ऊ तोरो सी कहेंन, ओकोच अनुसार करजो; जो बात ऊ तोरो ख बतायेंन ओकोसी दायो यां बायो मत मुड़जो। 12अऊर जो आदमी अभिमान कर क् ऊ याजक की, जो उत तोरो परमेश्वर यहोवा की सेवा लायी रहेंन, उन्की नहीं मानेंन यां सुनेंन, त ऊ आदमी ख मार डालो जाये; यो तरह सी तय इस्राएल म सी असी बुरायी दूर कर देजो। 13येकोसी सब लोग सुन क डर जायेंन, अऊर फिर जिद्द नहीं करेंन।”

राजावों को बारे म सुचना

14“जब तय ऊ देश म पहुंचजो जेख तोरो परमेश्वर यहोवा तोख देवय हय, अऊर ओको पर अधिकार करजो, अऊर ओको म निवास करन लगजो, अऊर सोचो जो कि दूसरो देश को जसो मय भी अपनो ऊपर राजा ठहराऊं, 15तब जेख तोरो परमेश्वर यहोवा चुन ले ओखच राजा ठहराजो। अपनो भाऊवों म सी च कोयी ख अपनो ऊपर राजा बनाजो; कोयी परदेशी ख जो तोरो भाऊ नहाय तय अपनो ऊपर राजा नहीं बनाय सकय। 16अऊर राजा अपनो जवर जादा घोड़ा नहीं रखेंन, अऊर घोड़ा बढ़ानो लायी अपनो लोगों ख मिस्र म नहीं भेजेंन। कहालीकि परमेश्वर न तुम सी कह्यो होतो, कि तुम ऊ रस्ता सी फिर कभी मत लौटो। 17अऊर ऊ बहुत बाईयां भी नहीं रखेंन, असो मत हो कि ओको मन परमेश्वर को तरफ सी पलट जाये; अऊर धनवान बनन लायी ऊ अपनो लायी सोना चांदी भी नहीं बढ़ाये। 18अऊर जब ऊ राजगद्दी पर विराजमान होयेंन, तब योच व्यवस्था की किताब, जो लेवीय याजकों को जवर रहेंन, ओकी एक नकल अपनो लायी भी कर लेजो। 19अऊर ऊ ओख अपनो जवर रखे, अऊर अपनो जीवन भर ओख पढ़्यो करे, जेकोसी ऊ अपनो परमेश्वर यहोवा को डर मानजो, अऊर यो व्यवस्था अऊर विधियों की पूरी बातों को पालन करनो सिखे; 20जेकोसी ऊ अपनो मन म घमण्ड कर क् अपनो भाऊवों ख तुच्छ नहीं समझेंन, अऊर इन आज्ञावों सी नहीं दायो मुड़जो अऊर नहीं बायो; जेकोसी कि ऊ अऊर ओको वंश को लोग इस्राएलियों को बीच म बहुत दिन तक राज्य करतो रहेंन।”