व्यवस्थाविवरन 18

लेवियों अऊर याजकों को हिस्सा

1“लेवीय याजकों मतलब पूरो लेवीय कुलों को, इस्राएलियों को संग कोयी हिस्सा नहीं होयेंन; उन्को भोजन परमेश्वर को अर्पन बलि अऊर ओख दियो हुयो हिस्सा होयेंन। 2उन्को अपनो भाऊवों को बीच कोयी हिस्सा नहीं रहेंन; कहालीकि अपनो वचन को अनुसार परमेश्वर उन्को निजी हिस्सा ठहरयो हय। 3अऊर चाहे गाय-बईल यां शेरी-मेंढी को मेलबलि होना, ओको करन वालो लोगों को तरफ सी याजको को हक्क यो होना, कि हि ओको कन्धा अऊर जबड़ा अऊर पेट याजक ख दे। 4तय ओख अपनो उपज म सी फसल, नयो अंगूरीरस अऊर ताजो तेल को पहलो हिस्सा, अऊर मेंढी को पहलो काट्यो बाल ओख देजो। 5कहालीकि तोरो परमेश्वर यहोवा न तोरो सब कुलों म सी ओखच चुन लियो हय, कि ऊ अऊर ओको कुल हमेशा ओको नाम की सेवा लायी तैयार रहे।”

6“यदि कोयी लेवीय इस्राएल को गावों म सी, जित ऊ परदेशी को जसो रह्य हय, अपनो मन की बड़ी अभिलाषा सी ऊ जागा पर जायेंन जेक परमेश्वर चुन लेयेंन, 7त अपनो सब लेवीय भाऊवों को समान, जो वहां अपनो परमेश्वर यहोवा को आगु रह्य क सेवा करय हय, अपनो प्रभु परमेश्वर यहोवा को नाम सी सेवा कर सकय हय। 8अपनो पूर्वजों की सम्पत्ति बेच क जो पूंजी ओकी होयेंन, ओको अलावा ऊ उन्को संग बराबर को खाना को हिस्सा भी मिलेंन।”

मूर्तिपूजक विधियों सी सावधान

9“जब तय ऊ देश म पहुंचो जो तोरो परमेश्वर यहोवा तोख देवय हय, तब उत को देश को अनुसार बुरो काम मत करजो। 10तोरो म कोयी असो मत होय जो अपनो बेटा यां बेटी ख आगी होम कर क् म चढ़ान वालों, भविष्य बतावन वालो, शुभ-अशुभ मुहरत मानन वालों, जादू टोन्हा वालों, यां तांत्रीक, 11यां वश म करन वालो, यां पन्डा सी पूछन वालो, यां भूत साधन वालों, यां भूत जगान वालों हय। 12कहालीकि जितनो असो काम करन वालो आदमी हय हि सब परमेश्वर को आगु घृणित हय। इन कामों सी नफरत करय हय; योच वजह तोरो परमेश्वर यहोवा उन्ख तोरो आगु सी निकाल पर हय। 13तय अपनो परमेश्वर को आगु विश्वास म बन्यो रहजो।”

एक भविष्यवक्ता भेजन की प्रतिज्ञा

14“हि देश जेको तय अधिकारी होन वालो हय शुभ-अशुभ मुहरत ख मानय अऊर शगुन बिचारन वालो की सुनय हय। पर तोख तोरो परमेश्वर यहोवा न असो करन नहीं दियो। 15तोरो परमेश्वर यहोवा तोरो बीच सी, मतलब तोरो भाऊवों म सी मोरो जसो एक भविष्यवक्ता ख तोरो लायी भेजेंन; तय ओकी सुनजो। 16यो तोरी बिन्ती सी होयेंन, जो तय न होरेब पहाड़ी को जवर जमा भयो होतो ऊ दिन अपनो परमेश्वर यहोवा सी करी होती, मोख नहीं त अपनो परमेश्वर यहोवा को शब्द फिर सुननो पड़े, अऊर नहीं ऊ आगी फिर देखनी पड़े, कहीं असो नहीं हो कि मर जाऊं। 17तब परमेश्वर न मोरो सी कह्यो, हि जो कुछ कह्य हय ठीक कह्य हय। 18येकोलायी मय उन्को लायी उन्को भाऊवों को बीच म सी तोरो जसो एक भविष्यवक्ता ख खड़ो करूं; अऊर अपनो वचन ओको मन म डालेंन; अऊर जो बात की मय आज्ञा देऊ उच ऊ उन्ख सुनायेंन। 19अऊर जो आदमी मोरो यो वचन जो ऊ मोरो नाम सी कहेंन अऊर स्विकार नहीं करेंन, मय ओको हिसाब ओकोसी लेंऊ। 20पर जो भविष्यवक्ता घमण्ड कर क् मोरो नाम सी कोयी असो वचन कहेंन जो की आज्ञा मय न ओख नहीं दियो हय, यां दूसरो देवतावों को नाम सी कुछ कहेंन, त ओख मार डाल्यो जायेंन। 21अऊर यदि तय अपनो मन सी कहेंन, जो वचन परमेश्वर न नहीं कह्यो, ओख हम कसो जानबों? 22त ओकी पहिचान यो आय कि जब कोयी भविष्यवक्ता परमेश्वर को नाम सी कुछ कहेंन, तब यदि ऊ वचन पूरो नहीं भयो त ऊ वचन परमेश्वर को कह्यो नहीं हय; पर ऊ बात भविष्यवक्ता घमण्ड कर क् कह्यो हय, तय ओकोसी डरजो मत।”